“Koutou Nonofo Fakaonoono”!

“Ko te meʼa ʼaē ʼe ʼau tala atu kia koutou ʼe ʼau tala foki ki te hahaʼi fuli: ke koutou nonofo fakaonoono.”—Maleko 13:37, MN.

1, 2. (a) Koteā te ako neʼe tāʼofi e te tagata ʼo ʼuhiga mo te hāofaki ʼo tona ʼu koloā? (b) ʼAki te lea fakatātā ʼa Sesu ʼo ʼuhiga mo te tagata kaihaʼa, koteā ʼaē neʼe tou ako ʼo ʼuhiga mo te nofo ʼalaʼala?

KO JUAN neʼe ina taupau tona ʼu koloā ʼi tona loto fale. Neʼe ina tānaki ʼi tona lalo palepale—ʼi tana manatu neʼe ko te fufūʼaga lelei pe ʼaia ʼi te ʼapi. Kae ʼi te tahi po, ʼi tana lolotoga moe mo tona ʼohoana, neʼe hū te tagata kaihaʼa ki tonā koga fale. ʼE ʼasi mai neʼe ʼiloʼi lelei e te tagata kaihaʼa te faʼahi ʼaē ʼe tonu ke ina kumi ai. Neʼe ina toʼo fakalogologo te ʼu koloā fuli ʼaē neʼe fufū ʼi te lalo palepale, pea mo te paʼaga ʼaē neʼe tuku e Juan ʼi te puha toho ʼo te laupapa ia tafa ʼo tonā palepale. ʼI te ʼaho ake, neʼe sio ia Juan kua kaihaʼa tona ʼu koloā. ʼE ina manatuʼi fualoa anai te ako neʼe ina tāʼofi mai ai: Ko te tagata ʼaē ʼe moe ʼe mole feala ke ina leʼoleʼo tona ʼu koloā.

² ʼE toe moʼoni te faʼahi ʼaia ʼi te faʼahi fakalaumālie. ʼE mole feala ke tou hāofaki tatatou ʼamanaki pea mo tatatou tui mo kapau ʼe tou tulemomoe. Koia neʼe tokoni fēnei ia Paulo: “ ʼAua naʼa tou momoe ohage ko ʼihi, kae ke tou nonofo ʼalaʼala pea mo tou aga fakapotopoto.” (1 Tesalonika 5:6, MN ) Moʼo fakahā te maʼuhiga ʼaē ke nonofo ʼalaʼala, neʼe fakaʼaogaʼi e Sesu te lea fakatātā ʼo te tagata kaihaʼa. Neʼe ina fakamatala te ʼu meʼa ka hoko ʼaē ka iku anai ki tana haʼu ʼi tona ʼuhiga Tuʼi Fakamāu, pea neʼe ina fai te fakatokaga ʼaenī: “Ke koutou nofo fakaonoono, heʼe mole koutou ʼiloʼi pe ko te ʼaho fea ʼaē ʼe haʼu ai tokotou ʼAliki. Kaʼe ke koutou ʼiloʼi te meʼa ʼaenī: kanapau neʼe ʼiloʼi e te pule ʼo te ʼapi pe ko te lakaga leʼo fea ʼaē ʼe tonu ke haʼu ai te tagata kaihaʼa, kanaʼauala neʼe nofo ʼalaʼala anai ia pea neʼe mole ina tuku anai ke hūfi tona ʼapi. Koia ke toe feiā foki mo koutou ke koutou nofo teuteu, heʼe ko te Foha ʼo te tagata ʼe haʼu ʼi te hola ʼe mole koutou manatu kiai.” (Mateo 24:42-44, MN ) ʼE mole fakahā mai e te tagata kaihaʼa te temi ʼaē ka haʼu ai. ʼE ʼamanaki haʼu ʼi he temi ʼe mole fakatalitali kiai he tahi. ʼO toe feiā pe, ohage ko tona ʼui e Sesu, ko te fakaʼosi ʼo te tuʼu ʼaenī ʼe hoko mai anai ʼi ‘he hola ʼe mole tou manatu kiai.’

“Koutou Nonofo ʼAlaʼala, Koutou Pipiki Maʼu Ki Te Tui”

3. ʼAki te lea fakatātā ʼo te ʼu kaugana ʼaē ʼe nātou atalitali ki te toe liliu mai ʼo tonatou pule mai te fai ʼohoana, neʼe fakahā feafeaʼi e Sesu te maʼuhiga ʼaē ke tou nofo ʼalaʼala?

³ ʼI tana ʼu palalau ʼaē ʼe tuʼu ʼi te Evaselio ʼa Luka, neʼe fakatatau e Sesu te kau Kilisitiano ki he ʼu kaugana ʼe nātou atalitali ki te toe liliu mai ʼo tonatou pule mai te fai ʼohoana. ʼE maʼua ke nātou nonofo tokaga, ke feala mokā tau mai ʼe ina maʼu mai ʼe nātou ʼalaʼala ʼo fakatalitali lelei kia ia. ʼO toe feiā pe, neʼe ʼui fēnei e Sesu: “Koutou nofo teuteu he mole iloi e koutou te hola e haele mai ai te Foha o te tagata.” (Luka 12:40) Ko ʼihi ʼaē kua lauʼi taʼu tanatou tauhi kia Sehova, lagi ʼe mole kei maʼuhiga kia nātou te temi ʼaē ʼe tou maʼuʼuli ai. ʼE lagi nātou manatu ʼe kei tuai mai te fakaʼosi. Kae ko te taʼi manatu ʼaia ʼe feala ke tupu ai hatatou mole kei tokakaga ki te ʼu meʼa fakalaumālie, ʼo tou maliu ʼo kumi te ʼu koloā, mo te ʼu fakafiafia ʼaē ʼe feala ke tou māʼumoea ai ʼi te faʼahi fakalaumālie.—Luka 8:14; 21:34, 35.

4. Koteā ʼaē ʼe tou tui papau kiai, ʼe ina uga anai tatou ke tou nofo fakaonoono, pea neʼe fakahā feafeaʼi e Sesu te faʼahi ʼaia?

⁴ ʼE ʼi ai te tahi ako ʼe feala ke tou tāʼofi mai te lea fakatātā ʼa Sesu. Logola neʼe mole ʼiloʼi e te ʼu kaugana te hola ʼaē ka toe liliu mai ai tonatou pule, kae ʼe hā mai neʼe nātou ʼiloʼi pe ko te po fea. Neʼe feala ke faigataʼa hanatou nonofo ʼalaʼala ʼi te po katoa mo kapau neʼe nātou manatu ʼe lagi haʼu anai tonatou pule ʼi he tahi po. Kae neʼe nātou ʼiloʼi te po ʼaē ʼe toe liliu mai ai, pea neʼe nātou maʼu ai te mālohi ke nātou nonofo ʼalaʼala. ʼI he ʼaluʼaga feiā, ʼe fakahā lelei mai e te ʼu lea faka polofeta ʼe tou maʼuʼuli ʼi te temi ʼo te fakaʼosi, kae ʼe mole nātou tala mai te ʼaho peʼe ko te hola ʼaē ka hoko ai te fakaʼosi. (Mateo 24:36) Ko tatatou tui ʼaē ʼe hoko mai anai te fakaʼosi, ʼe tokoni mai ke tou nonofo ʼalaʼala, kae kapau ʼe tou tui papau kua ōvi moʼoni mai te ʼaho ʼo Sehova, pea ʼe toe uga mālohi anai tatou ke tou nonofo fakaonoono.—Sofonia 1:14.

5. ʼE tou lava tali feafeaʼi ki te tokoni ʼa Paulo ke tou “nonofo ʼalaʼala”?

⁵ Ko Paulo, ʼi tana faitohi ki te kau Kolonito, neʼe ina ʼui fēnei: “Koutou nonofo ʼalaʼala, koutou pipiki maʼu ki te tui.” (1 Kolonito 16:13, MN ) Ko tatatou nonofo ʼalaʼala ʼe ʼalutahi mo tatatou pipiki maʼu ki te tui faka Kilisitiano. ʼE lava feafeaʼi hatatou nonofo ʼalaʼala? ʼAki tatatou maʼu he ʼatamai mālama loloto ʼo ʼuhiga mo te Folafola ʼa te ʼAtua. (2 Timoteo 3:14, 15) Ko he ʼu agamāhani lelei ki te ako takitokotahi pea mo kau tuʼumaʼu ki te ʼu fono, ʼe tokoni anai ke mālohi tatatou tui, pea ko te manatuʼi tuʼumaʼu ia te ʼaho ʼo Sehova ʼe ko he faʼahi maʼuhiga ʼaia ʼo tatatou tui. Ko hatatou toe vakavakaʼi ʼi ʼihi temi te ʼu fakamoʼoni faka Tohi-Tapu ʼaē ʼe fakahā ai kua tou ōvi ki te fakaʼosi ʼo te tuʼu ʼaenī, ʼe tokoni mai anai ke mole galo kia tatou te ʼu moʼoni maʼuhiga ʼo ʼuhiga mo te fakaʼosi ʼaē ka hoko mai.a Pea ʼe toe lelei ke tou tokagaʼi te ʼu meʼa ʼaē ʼe hoko ʼi te malamanei, heʼe nātou fakahoko te ʼu lea faka polofeta ʼo te Tohi-Tapu. Neʼe tohi fēnei e te tēhina ʼi Siamani: “ ʼI te temi fuli pe ʼe ʼau sioʼi te ʼu tala logo—te ʼu tau, mo te ʼu mafuike, mo te agamālohi, pea mo te ʼulihi ʼo totatou kele—ʼe fakahā lelei mai ia te ōvi mai ʼo te fakaʼosi.”

6. Koteā te lea fakatātā neʼe fai e Sesu moʼo fakahā, ʼe feala ʼaki te temi ke mole kei tou nonofo tokaga ʼi te faʼahi fakalaumālie?

⁶ Ia Maleko kapite 13, ʼe tou maʼu ai te tahi fakamatala ʼa Sesu moʼo tokoni ki tana kau tisipulo ke nātou nonofo ʼalaʼala. Ohage ko tona tohi ʼi te kapite ʼaia, ʼe fakatatau e Sesu tonatou ʼaluʼaga ki he tagata leʼoleʼo matapā ʼe atalitali ke toe liliu mai tona pule mai tana folau ki te tahi fenua. Ko te tagata leʼoleʼo matapā neʼe mole ina ʼiloʼi te hola ʼaē ʼe toe liliu mai ai tona pule. Neʼe tonu pe ke nofo fakaonoono. Neʼe talanoa Sesu ki he ʼu temi leʼo kehekehe e fā neʼe feala pe ke haʼu ai te pule. Ko te fā temi leʼo neʼe kamata ʼi te teitei hola tolu māfoatā ki te hopo ake ʼo te laʼā. ʼI te temi leʼo fakamuli ʼaia, neʼe faigafua he māʼumoea ʼa te tagata leʼoleʼo matapā. ʼE fakamatala ko te kau solia neʼe nātou manatu ko te temi ʼaē ʼi muʼa ʼo te hopo ake ʼo te laʼā, ʼe ko te temi faigamālie ʼaia moʼo ʼohofi fakapunamaʼuli te ʼu fili, he neʼe mole nātou nonofo tokaga. ʼO toe feiā aipe, ʼi te fakaʼosi ʼo te ʼu ʼaho fakamuli ʼaenī, ʼi te māʼumoea ʼa te hahaʼi ʼi te ʼaluʼaga fakalaumālie, ʼe lagi tonu ke tou faiga mālohi ke tou haga nonofo ʼalaʼala. (Loma 13:11, 12) Koia ʼi tana lea fakatātā, ʼe uga liuliuga fēnei e Sesu: “Koutou haga lamalama, pea ke koutou nonofo ʼalaʼala . . . Koia ke koutou nonofo fakaonoono . . . Ko te meʼa ʼaē ʼe ʼau toe tala atu kia koutou ʼe ʼau tala foki ki te hahaʼi fuli: ke koutou nonofo fakaonoono.”—Maleko 13:32-37, MN.

7. Koteā te tuʼutāmaki moʼoni ʼe feala ke hoko, pea ʼo ʼuhiga mo te faʼahi ʼaia, koteā te fakaloto mālohi ʼe tou tau lau ʼi te Tohi-Tapu?

⁷ Tuʼa lahi ʼi tona minisitelio pea mo tona ʼosi fakatuʼuake, neʼe uga e Sesu tana kau tisipulo ke nonofo tokaga. ʼI tona fakahagatonu, ʼi te temi fuli pe ʼaē ʼe talanoa ai te Tohi-Tapu ki te fakaʼosi ʼo te tuʼu ʼaenī, ʼe tou maʼu ai te fakatokaga ʼaē ke tou nonofo ʼalaʼala peʼe ke tou nonofo fakaonoono.b (Luka 12:38, 40; Apokalipesi 3:2; 16:14-16) ʼE hā lelei mai ko te māʼumoea ʼi te faʼahi fakalaumālie ʼe ko he tuʼutāmaki moʼoni. ʼE ʼaoga kia tatou fuli te ʼu fakatokaga ʼaia!—1 Kolonito 10:12; 1 Tesalonika 5:2, 6.

Te ʼu ʼApositolo e Toko Tolu Neʼe Mole Feala Ke Nātou Nonofo ʼAlaʼala

8. ʼI te ʼōloto ʼo Setesemane, neʼe tali feafeaʼi e te toko tolu kau ʼapositolo ʼa Sesu ki tana kole ʼaē ke nātou nonofo fakaonoono?

⁸ ʼE mole feʼauga pe hatatou loto moʼoni ke tou nonofo ʼalaʼala, ohage ko tona fakahā e te faʼifaʼitaki ʼa Petelo, mo Sakopo, pea mo Soane. Ko te ʼu tagata e toko tolu ʼaia neʼe nātou manatu fakalaumālie, neʼe nātou mulimuli agatonu kia Sesu, pea neʼe nātou ʼoʼofa mamahi kia te ia. Kae ʼi te po ʼo te ʼaho 14 ʼo Nisani ʼo te taʼu 33 ʼo totatou temi, neʼe mole feala ke nātou nonofo ʼalaʼala. ʼI tanatou mavae ʼi te kogafale fata ʼaē neʼe nātou fai ai te Pāsikate, neʼe kaugā ʼolo te ʼu ʼapositolo ʼaia e toko tolu mo Sesu ki te ʼōloto ʼo Setesemane. Neʼe ʼui fēnei age ai e Sesu kia nātou: “Kua lotomamahi ʼaupito toku nefesi, ʼio, ʼo aʼu ki te mate. Koutou nonofo ʼi henī pea ke koutou nonofo fakaonoono mo ʼau.” (Mateo 26:38, MN ) Tuʼa tolu neʼe faikole fakamalotoloto ia Sesu ki tana Tāmai ʼaē ʼe ʼi selo, pea tuʼa tolu neʼe toe liliu age ki tona ʼu kaumeʼa, ʼo ina maʼu atu ia nātou ʼe nātou lolotoga momoe.—Mateo 26:40, 43, 45.

9. Koteā ʼaē neʼe lagi tupu ai te māʼumoea ʼa te kau ʼapositolo?

⁹ ʼI te po ʼaia, koteā ʼaē neʼe tupu ai te lotomamahi ʼa Sesu ki te ʼu tagata agatonu ʼaia? Ko tanatou gaʼegagaʼe. Neʼe kua pōʼuli, lagi neʼe kua hili te māʼupō, pea “neʼe mamafa ʼonatou mata” ʼi te fia moe. (Mateo 26:43, MN ) Kae neʼe ʼui e Sesu: “Koutou nonofo fakaonoono pea ke koutou faikole tuʼumaʼu, ke ʼaua naʼa koutou tō ki he fakahala. Ko te laumālie, ʼe moʼoni, ʼe mālohi ia, kaʼe ko te kakano ʼe vaivai.”—Mateo 26:41, MN.

10, 11. (a) Logola tona gaʼegaʼe, kae koteā ʼaē neʼe tokoni kia Sesu ke haga nofo fakaonoono ʼi te ʼōloto ʼo Setesemane? (b) Koteā ʼaē ʼe feala ke tou ako mai te meʼa ʼaē neʼe hoko ki te kau ʼapositolo e toko tolu, ʼi te kole ʼa Sesu ke nātou nofo fakaonoono?

¹⁰ ʼE mahino papau ia, neʼe toe gaʼegaʼe mo Sesu ʼi te po maʼuhiga ʼaia. Kae neʼe mole tulemoe ia, neʼe ina fakaʼaogaʼi te ʼu hola fakamuli ʼaē neʼe kei ʼāteaina ai, moʼo faikole fakamalotoloto. ʼI he ʼu ʼaho ki muʼa atu, neʼe ina uga tana kau tisipulo ke nātou faikole, ʼo ʼui maʼana: “Ke koutou nonofo ʼalaʼala pea mo koutou kole mamahi ʼi te temi fuli pe, ke feala ai hakotou hāo ʼi te ʼu meʼa fuli ʼaia ʼaē ʼe tonu ke hoko mai, pea mo koutou tutuʼu ia muʼa ʼo te Foha ʼo te tagata.” (Luka 21:36, MN; Efeso 6:18) Kapau ʼe tou tokagaʼi te tokoni ʼa Sesu pea mo tou mulimuli ki tana faʼifaʼitaki lelei ʼo ʼuhiga mo te faikole, pea ko tatatou ʼu faikole fakamalotoloto kia Sehova, ʼe tokoni mai anai ke tou nonofo ʼalaʼala ʼi te faʼahi fakalaumālie.

¹¹ Neʼe mahino kia Sesu kua ōvi mai te temi ʼaē ʼe tonu ke puke ai pea mo fakatūʼa ai ia ia ki te mate, kae neʼe mole mahino kiai te kau tisipulo ʼi te temi ʼaia. ʼE ʼahiʼahiʼi anai ia ia ʼo aʼu ki tona tutuki ki te pou fakamamahi. Neʼe fakatokagaʼi e Sesu te ʼu meʼa ʼaia ki tana kau tisipulo, kae neʼe mole nātou mahino ki tana ʼu palalau. Koia neʼe nātou tulemomoe ai kae neʼe mole nonofo ʼalaʼala ʼo faikole. (Maleko 14:27-31; Luka 22:15-18) Ohage pe ko te kau ʼapositolo, ko totatou kakano ʼe toe gaʼegaʼe pea ʼe ʼi ai te ʼu meʼa ʼe mole heʼeki tou mahino kiai. Kae kapau ʼe mole tou mahino ki te temi maʼuhiga ʼaē ʼe tou maʼuʼuli ai, pea ʼe feala ke tou tulemomoe ʼi te faʼahi fakalaumālie. Kapau ʼe tou nonofo tokaga pea ʼe feala anai ke tou nonofo ʼalaʼala.

Te ʼu Kalitate Maʼuhiga e Tolu

12. Koteā te ʼu kalitate e tolu ʼe fakahā e Paulo ʼe tonu ke tou maʼu ke feala hatatou nonofo ʼalaʼala?

¹² ʼE lava feafeaʼi hatatou haga manatuʼi te maʼuhiga ʼo te ʼu temi? Neʼe kua tou ʼosi vakaʼi te maʼuhiga ʼaē ke tou faikole pea mo te ʼaoga ʼaē ke tou manatuʼi tuʼumaʼu te ʼaho ʼo Sehova. ʼO hilifaki kiai, ʼe talanoa ia Paulo ki te ʼu kalitate maʼuhiga e tolu ʼe tonu ke tou maʼu. ʼE ina ʼui fēnei: “Kae kia tatou ʼaē ʼe tou kau ki te ʼaho, tou aga fakapotopoto, pea mo tou kofuʼi te kofu tau ʼo te tui pea mo te ʼofa pea mo toʼo te puloga ʼo te ʼamanaki ki te maʼuli.” (1 Tesalonika 5:8, MN ) Tou vakaʼi fakanounou te ʼaoga ʼo te tui, mo te ʼamanaki, pea mo te ʼofa ke tou nonofo ʼalaʼala ʼi te faʼahi fakalaumālie.

13. Koteā te faʼahi ʼe feala ke tokoni mai ai te tui ke tou nonofo ʼalaʼala ai?

¹³ ʼE tonu ke tou tui mālohi ko Sehova ʼe maʼuli moʼoni pea “e ina fakapale natou e natou kumi iaʼia.” (Hepeleo 11:6) Ko te ʼuluaki fakahoko ʼo te lea faka polofeta ʼa Sesu ʼi te ʼuluaki sēkulō, ʼo ʼuhiga mo te fakaʼosi, ʼe ina fakaloto mālohiʼi ai tatatou tui ki tona hoko ʼi hona ʼaluʼaga ʼe lahi age ʼi totatou temi. Pea ʼaki tatatou tui, ʼe tou haga atalitali ʼaki he fakaʼamu lahi ki te ʼaho ʼo Sehova, heʼe tou ʼiloʼi papau “ ʼe hoko moʼoni anai [te lea faka polofeta]. ʼE mole tauhala anai ia.”—Hapakuke 2:3.

14. ʼE maʼuhiga feafeaʼi ia te ʼamanaki mo kapau ʼe tou fia nonofo ʼalaʼala?

¹⁴ Ko tatatou ʼamanaki moʼoni ʼe hage ko “he taula ki te nefesi”, ʼe feala ai ke tou kātakiʼi te ʼu faigataʼaʼia, tatau aipe peʼe tonu ke tou talitali ke hoko moʼoni te ʼu fakapapau ʼa te ʼAtua. (Hepeleo 6:18, 19, MN ) Ko Margaret, ko te tuagaʼane fakanofo ʼe taʼu 90 pea kua ʼosi ia taʼu e 70 ki tona papitema, ʼe ina ʼui fēnei: “ ʼI te mate ʼo toku ʼohoana ʼi te kosea ʼi te 1963, neʼe ʼau manatu ʼe lelei anai mo kapau ʼe hoko vave mai te fakaʼosi. Kae ʼi te temi nei, ʼe ʼau mahino neʼe ʼau manatu pe ʼau kia ʼau totonu. Neʼe mole mātou ʼiloʼi ʼi te temi ʼaia peʼe feafeaʼi anai te faka mafola ʼo te gāue ʼi te malamanei katoa. Māʼia mo te temi nei, ʼe kei ʼi ai te ʼu tuʼuga fenua neʼe hoki avahi ai pe te gāue. Koia ʼe ʼau fiafia ʼi te atalitali ʼa Sehova.” ʼE fakamoʼoni fēnei mai e te ʼapositolo ko Paulo: “[ʼE fakatupu e] te faʼa kātaki te ʼuhigaʼi tagata ʼaē kua ʼahiʼahiʼi; pea ko te ʼuhigaʼi tagata ʼaē kua ʼahiʼahiʼi [ʼe ina fakatupu ia] te ʼamanaki; pea ko te ʼamanaki ʼe mole ina fai he meʼa ke tou mamahi ai.”—Loma 5:3-5, MN.

15. ʼE uga feafeaʼi anai tatou e te ʼofa, tatau aipe peʼe hage kua tou atalitali talu mai fualoa?

¹⁵ Ko te ʼofa faka Kilisitiano ʼe ko he kalitate maʼuhiga ʼaupito, heʼe ko te faʼahi ʼaia ʼe ina uga tatou ʼi te ʼu gāue fuli ʼaē ʼe tou fai. ʼE tou tauhi kia Sehova heʼe tou ʼofa kia te ia, ʼo mole tou tokagaʼi pe neʼe feafeaʼi tana fakatuʼutuʼu ia te temi. Ko totatou ʼofa ki totatou kāiga ʼe ina uga tatou ke tou faka mafola te logo lelei ʼo te Puleʼaga, tatau aipe peʼe kua fualoa tatatou fai ia te finegalo ʼo te ʼAtua, pea tatau aipe peʼe kua tuʼa fia tatatou toe liliu ki te ʼu ʼapi. Ohage ko tona tohi e Paulo: “ ʼI te temi nei, ʼe maʼu te tui, te ʼamanaki, te ʼofa, te ʼu meʼa ʼaia e tolu; kae koia ʼaē ʼe lahi ake ia nātou ʼaia, ko te ʼofa.” (1 Kolonito 13:13, MN ) ʼAki te ʼofa, ʼe feala ke tou kātakiʼi pea ʼe tokoni mai ke tou nonofo ʼalaʼala. “[Ko te ʼofa] ʼe ʼamanaki kia meʼa fuli, ʼe ina kātakiʼi ia meʼa fuli. Ko te ʼofa ʼe mole puli ia ʼi he lakaga.”—1 Kolonito 13:7, 8, MN.

‘Koutou Taupau Mālohi Te Meʼa ʼe Koutou Maʼu’

16. ʼE mole tonu ke tou fakasiʼisiʼi tatatou gāue, kae koteā te aga ʼe tonu ke tou maʼu?

¹⁶ ʼE tou maʼuʼuli ʼi te ʼu temi maʼuhiga, pea ko te ʼu meʼa ʼaē ʼe hoko ʼi te malamanei ʼe nātou fakamanatuʼi tuʼumaʼu mai ʼe tou maʼuʼuli ʼi te ʼu ʼaho fakamuli. (2 Timoteo 3:1-5) ʼE mole ko te temi ʼaenī ke tou fakasiʼisiʼi ai tatatou gāue kae ke tou haga ‘tāʼofi mālohi te meʼa ʼaē ʼe tou maʼu.’ (Apokalipesi 3:11) Kapau ʼe tou nonofo “tokakaga ki te ʼu faikole” pea mo tou maʼu te tui, te ʼamanaki pea mo te ʼofa, ʼe tou teuteu lelei anai ki te hola ʼo te ʼahiʼahi. (1 Petelo 4:7) ʼE lahi te ʼu meʼa ʼe feala ke tou fai ʼi te gāue ʼa te ʼAliki. Ko tatatou maʼumaʼua ʼi te ʼu gāue ʼaē ʼe fakaʼiloga ʼaki tatatou pipiki ki te ʼAtua, ʼe tokoni mai anai ke tou nonofo ʼalaʼala.—2 Petelo 3:11.

17. (a) He koʼe ʼe mole tonu ke tou lotovaivai mo kapau ʼe mole hoko ʼi ʼihi temi tatatou ʼu ʼamanaki? (Vakaʼi te talanoa ʼi te pasina 21.) (b) ʼE tou lava faʼifaʼitakiʼi feafeaʼi ia Sehova, pea koteā te ʼu tapuakina ka maʼu anai e nātou ʼaē ʼe nātou fai te faʼahi ʼaia?

¹⁷ Neʼe tohi fēnei e Selemia: “Ko Sehova ʼe ko toku vaega, . . . koia ʼe ʼau nofo anai ʼi te atalitali kia te ia. ʼE agalelei ia Sehova kia ia ʼaē ʼe ʼamanaki kia te ia, ki te nefesi ʼaē ʼe ina haga kumi ia ia. ʼE lelei te atalitali, iō ʼi te fakalogologo, ki te hāofaki ʼo Sehova.” (Tagilāulau 3:24-26) Ko ʼihi ia tatou neʼe mole heʼeki faʼa fualoa tatatou atalitali. Ko ʼihi kua lauʼi taʼu tanatou atalitali ke nātou sio ki te hāofaki mai ia Sehova. Kae ʼe ko he temi nounou ʼaia ʼaē ʼe tou atalitali ai, mokā ʼe tou fakatatau ki te ʼu temi heʼegata ʼaē ka tou maʼuʼuli ai! (2 Kolonito 4:16-18) Pea ʼi tatatou atalitali ki te temi tonu ʼa Sehova, ʼe feala ke tou gāueʼi te ʼu kalitate faka Kilisitiano maʼuhiga pea mo tokoni ki te hahaʼi ke nātou fakaʼaogaʼi lelei te atalitali ʼa Sehova pea ke nātou tali te moʼoni. Koia, ʼofa pe ke tou nonofo fakaonoono fuli. Tou faʼifaʼitakiʼi ia Sehova pea mo tou atalitali, ʼo tou fakafetaʼi ki te ʼamanaki neʼe ina foaki mai. Pea ʼi tatatou nonofo ʼalaʼala tuʼumaʼu, ʼofa pe ke tou tapiki maʼu ki te ʼamanaki ki te maʼuli heʼegata. Pea ʼe hoko moʼoni anai kia tatou te ʼu fakapapau ʼaenī neʼe fakakikite: “[Ko Sehova] ʼe ina hikihiki anai koe ke ke maʼu te kele. Ka toʼo kehe anai te hahaʼi agakovi, ʼe ke sio anai ki ai.”—Pesalemo 37:34.

[Kiʼi nota]

ʼE Koutou Tali Feafeaʼi Anai?

• Koteā ʼaē ʼe feala ke tou fai ke mālohi ai tatatou tui ki te kua ōvi mai ʼo te fakaʼosi ʼo te tuʼu ʼaenī?

• Koteā ʼaē ʼe feala ke tou ako mai te faʼifaʼitaki ʼo Petelo, mo Sakopo, pea mo Soane?

• Koteā te ʼu kalitate e tolu ʼe tokoni mai anai ke tou nofo tokaga ʼi te faʼahi fakalaumālie?

• He koʼe ʼe ko te temi ʼaenī ʼaē ʼe tonu ke tou ‘taupau mālohi ai te meʼa ʼaē ʼe tou maʼu’?

[Talanoa ʼo te pasina 21]

“Manuʼia Ia Ia ʼAē ʼe Nofo ʼi Te Fakatalitali.”—Taniela 12:12

Koutou fakakaukauʼi age muʼa mo kapau ʼe mahalohalo te tagata leʼo ʼe fakatuʼutuʼu e he tagata kaihaʼa ke ina kaihaʼa te ʼu fale ʼaē ʼe ina leʼoleʼohi. Ka tō te pōʼuli, ʼe fakalogo lelei e te tagata leʼo te ʼu logoaʼa fuli pe ʼaē ʼe feala ke ina ʼiloʼi ai ʼe ko te tagata kaihaʼa. ʼI te ʼu hola fuli pe ʼe haga fakalogo lelei pea mo nofo ʼo lamalama. ʼE mahino kia tatou, ʼe feala ke faihala—ʼi te logoaʼa ʼo te agi ʼo te matagi ki te ʼu fuʼu ʼakau, peʼe ko he pusi neʼe ina fakatō he meʼa.—Luka 12:39, 40.

Ko te meʼa ʼaia ʼe feala ke hoko kia nātou ʼaē ʼe nātou “fakatalitali ʼaki he loto hoha ki te fakahā ʼo totatou ʼAliki ko Sesu Kilisito.” (1 Kolonito 1:7, MN ) Neʼe manatu e te kau ʼapositolo ko Sesu ʼe ina ‘laga [anai] te puleaga o Iselaele’ hili pe tona fakatuʼuake. (Gaue 1:6) Ko ni ʼu taʼu ki muli age, neʼe tonu ke fakamanatuʼi ki te kau Kilisitiano ʼo Tesalonika ʼe hoko anai te ʼafio ʼa Sesu ʼi te temi ka haʼu. (2 Tesalonika 2:3, 8) Koia logola te ʼu ʼamanaki hala ʼaia ʼo ʼuhiga mo te ʼaho ʼo Sehova, kae neʼe mole līaki e te ʼu ʼuluaki tisipulo ʼaia ʼa Sesu te ala ʼaē ʼe ina taki ki te maʼuli.—Mateo 7:13.

Ia ʼaho nei, ʼaua naʼa tou tuku tatatou nonofo ʼalaʼala, heʼe feala ke tou lotovaivai ʼi te hage ʼe tuai mai te fakaʼosi ʼo te tuʼu ʼaenī. Ko te tagata leʼo ʼaē ʼe nofo tokaga, ʼe feala ke lotovaivai mo kapau neʼe faihala—kae ʼe tonu ke haga nofo fakaonoono! ʼE ko tana gāue ʼaia. ʼE toe feiā mo te kau Kilisitiano.

[Paki ʼo te pasina 18]

ʼE koutou tui papau koa kua ōvi mai te ʼaho ʼo Sehova?

[Paki ʼo te pasina 19]

Ko te ʼu fono, mo te faikole, pea mo te ʼu agamāhani lelei ki te ako, ʼe tokoni mai ke tou nonofo fakaonoono

[Paki ʼo te pasina 22]

Ohage ko Margaret, ʼofa pe ke tou atalitali pea mo nonofo fakaonoono ʼo fai he ʼu gāue