Ko Te Kau Fai Faka Mafola ʼo Te Puleʼaga

Ko He Tokoni Moʼo Taupau Te ʼUhiga Taputapu ʼo Te Toto

ʼI TE malamanei katoa, ko te ʼu kaugana ʼa Sehova neʼe nātou agatonu ki te ʼAtua ʼo ʼuhiga mo te ʼuhiga taputapu ʼo te toto. (Gaue 15:28, 29) Neʼe tokoni te kalasi ʼo te kaugana agatonu mo poto ki te kau Kilisitiano fuli. (Mateo 24:45-47) Tou vakaʼi pe neʼe koteā tona ʼu fua ʼi Filipine.

ʼE ʼui fēnei e te filiale ʼo Filipine: “ʼI te taʼu 1990 neʼe fakahā mai ko te kau fakafofoga mai te Petele ʼo Brooklyn ʼe nātou fai anai tanatou fono ʼi henī, ʼi Filipine. Neʼe fakaafe te ʼu tēhina mai te ʼu filiale kehekehe ʼo Asia, ohage ko Kole, mo Taiwan, pea mo Hong Kong. Neʼe fai te fakatuʼutuʼu moʼo tokoni ke fakatuʼu te Selevisi ʼo Te ʼu logo ʼo Te lopitali pea mo toe fakatuʼutuʼu he ʼu Komite Faka Felogoi Mo Te Lopitali. ʼI Filipine neʼe fakatuʼutuʼu ʼi te kamata he ʼu komite ʼi te ʼu kolo lalahi tāfito e fā.” Neʼe faiga e te ʼu komite ke nātou ʼiloʼi te ʼu tōketā ʼaē ʼe nātou fia lagolago ki te manatu ʼa te kau Kilisitiano ʼo ʼuhiga mo te toto. Neʼe nātou toe tokoni ki te ʼu tēhina mokā hoko kia nātou he ʼu fihifihia ʼo ʼuhiga mo te toto.

Neʼe fili ia Remegio ke gāue ʼi te Komite Faka Felogoi Mo Te Lopitali ʼi Baguio. ʼAki te temi, neʼe kamata tokagaʼi e te kau tōketā te ʼaoga ʼo te komite ʼaia. ʼE manatuʼi e Remegio te tahi fono ʼa te kau tōketā mo te Komite Faka Felogoi Mo Te Lopitali, he neʼe nātou fia ʼiloʼi peʼe nātou faitoʼo feafeaʼi anai te kau Fakamoʼoni ʼaē ʼe nātou fakafisi ki te toto. Neʼe ʼui fēnei e Remegio: “Neʼe kamata fai fehuʼi te kau tōketā, kae neʼe faigataʼa kia ʼau he neʼe talanoa ki te ʼu poto ʼo te faʼahi faka tōketā.” Neʼe faikole kia Sehova ke tokoni age ke ina maʼu he puleʼaki ki te fihifihia ʼaia. Neʼe hoko atu fēnei e Remegio: “Ka ʼosi fai pe he fehuʼi, neʼe hiki nima te tahi ʼu tōketā moʼo fakamahino te meʼa ʼaē neʼe nātou fai ʼi te ʼu ʼaluʼaga faigataʼa ʼaia.” Neʼe fiafia ia Remegio ki te tokoni ʼaia, tāfito la he neʼe fai te ʼu fehuʼi pea mo te ʼu tali ia hola e lua.

Ko komite e 21 ʼi te temi nei ʼi te fenua, pea ʼe gāue ai te ʼu tēhina e toko 77. Ko Danilo, ko te Fakamoʼoni pea ʼe tōketā, ʼe ina ʼui fēnei: “ʼE ʼiloʼi e te kau tōketā ko te kau mahaki Fakamoʼoni ʼe lagolago kia nātou te kautahi ʼe ʼofa kia nātou.” Neʼe ʼi ai te tōketā, ʼi te kamata, neʼe ina fia tafa te tēhina kae neʼe ina fia fakaʼaogaʼi te toto. Kae neʼe taupau mālohi e te tēhina te meʼa ʼaē neʼe ina fakatotonu. Neʼe tafa pea neʼe maui mālie. ʼE ʼui fēnei e te Selevisi ʼo Te ʼu Logo ʼo Te Lopitali: “Neʼe punamaʼuli te tōketā ki te fakahaʼuhaʼu ʼo te mālohi ʼo te tēhina. Neʼe ina ʼui fēnei: ‘ʼAki te meʼa ʼaē neʼe hoko ʼi henī, kapau ʼe tonu ke fai te tafa ʼaenī ki he tahi ia koutou kae mole fakaʼaogaʼi te toto, pea ʼe ʼau tali fakafiafia anai.’”