Tonatou Maʼuli

Ko Te Tauhi Ki Niʼihi ʼe Ina Fakamaʼamaʼa Te Mamahi

NEʼE FAKAMATALA E JULIÁN ARIAS

ʼI te taʼu 1988, ʼi toku taʼu 40, neʼe hage neʼe lelei ʼaupito ia taku gāue faka mālama. Neʼe ʼau gāue ʼi te sosiete ʼe teitei pe ke tuʼu tona ʼu pilō ʼi te malamanei katoa, pea neʼe ʼau pule ʼi te fale gāue ʼaia ʼi te koga meʼa ʼaē neʼe ʼau nofo ai. Moʼo fakapale ʼo taku gāue lelei, neʼe foaki mai e te sosiete taku motokā matalelei, mo toku totogi lelei, pea mo toku pilō matalelei ʼi te loto kolo ʼo Madrid, ʼi Sepania. Neʼe loto e te sosiete ke hiki toku tuʼulaga ke ʼau liliu ko tonatou pule ʼi te sosiete ʼi te fenua ʼaē ʼe ʼau nofo ai. Neʼe mole ʼau ʼamanaki ʼe fetogi katoa anai toku maʼuli.

ʼI TE tahi ʼaho ʼo te taʼu pe ʼaia, neʼe fakahā mai e taku tōketā ʼe ʼau maʼu te mahaki ʼe mole ʼi ai hona faitoʼo, ko te sclérose en plaques. Neʼe ʼau lotomamahi ʼaupito. Ki muli age neʼe ʼau mataku ʼi taku lau te ʼu fua kovi ʼo te mahaki ko te sclérose en plaques.a Neʼe hage kia ʼau ʼe ʼau maʼuli anai mo te mahaki fakamataku ʼaia ʼi toku maʼuli katoa. ʼE ʼau taupau feafeaʼi anai ki toku ʼohoana ko Milagros, mo toku foha ʼaē neʼe taʼu tolu, ko Ismael? ʼE mātou fakaʼaluʼalu feafeaʼi anai te ʼaluʼaga ʼaia ke to lelei? ʼI taku faiga ke ʼau maʼu he ʼu tali ki te ʼu fehuʼi ʼaia, neʼe hoko mai kia ʼau te tahi meʼa fakaʼofaʼofa.

Lagi hili te māhina ʼi te ʼosi palalau mai ʼa taku tōketā ʼo ʼuhiga mo toku mahaki, neʼe pāui ia ʼau e toku pule ke ma palalau ʼi tona pilō, pea mo ina fakahā mai te ʼaoga ki te sosiete ia he ʼu hahaʼi “ ʼe matalelei tonatou sino.” Pea ko he tahi ʼe ina maʼu he taʼi mahaki ʼe ina fakapopo tona sino​—tatau aipe pe ko te kamata ʼaia ʼo te mahaki​—kae ʼe mole ina taupau anai te matalelei ʼo tona sino. Neʼe fakamavae atu aipe ia ʼau e toku patolo. Fokifā pe, ʼe mole kei ʼi ai haku gāue!

ʼI taku fakatahi mo toku famili, neʼe ʼau faigaʼi ke ʼau hā ʼe ʼau lotomālohi, he neʼe kua ʼau fia nofo ʼāteaina, ke ʼau fakakaukauʼi toku ʼaluʼaga foʼou pea mo metitasio ki toku ka haʼu. Neʼe ʼau tauʼi te ʼāsili ʼo toku lotovaivai. Ko te meʼa ʼaē neʼe ʼau mamahi ʼaupito ai, ko te fokifā pe ʼaē kua ʼau liliu ʼo mole kei hoku ʼaoga ki taku sosiete.

Kua ʼAu Liliu ʼo Mālohi ʼi Te Temi ʼAē Neʼe ʼAu Vaivai Ai

Meʼa lelei, heʼe ʼi te temi mamahi ʼaia, neʼe ʼau lava falala ki te ʼu meʼa fakatupu mālohi. Neʼe kua hili kiai te ʼu taʼu e 20 ki muʼa atu, neʼe ʼau liliu ko te Fakamoʼoni ʼa Sehova. Koia neʼe ʼau faikole ai kia Sehova, ʼo ʼau fakahā age te ʼu meʼa ʼi toku loto, pea mo taku ʼu tuʼania ʼo ʼuhiga mo te ka haʼu. Ko toku ʼohoana, mo ia foki ko te Fakamoʼoni ʼa Sehova, neʼe lagolago tuʼumaʼu mai ʼo ina fakaloto mālohiʼi ia ʼau, pea neʼe tokoni mai toku ʼu kaumeʼa lelei ʼo ʼaoga ʼaupito tonatou ʼu manavaʼofa.​—Tāʼaga Lea 17⁠:⁠17.

Neʼe toe tokoni pe foki takita ʼiloʼi ʼaē tokita maʼua ki niʼihi. Neʼe ʼau fia akoʼi fakalelei toku foha, mo gaoʼi mo ia, pea mo akoako age te fai faka mafola. Koia neʼe mole lava ai ke hake ia ʼau te heʼe ʼamanaki. Tahi ʼaē meʼa, neʼe ʼau tagata ʼāfea ʼi te kokelekasio, pea neʼe ʼaoga taku tokoni ki toku ʼu tēhina mo tuagaʼane Kilisitiano. Kanapaula neʼe vaivai ifo taku tui ʼuhi ko toku mamahi, koteā anai he faʼifaʼitaki ʼe ʼau tuku ki niʼihi?

ʼE moʼoni ia, neʼe fetogi toku maʼuli ʼi te faʼahi fakasino pea mo te faʼahi faka ekonomika​—ki ʼihi ʼaluʼaga neʼe tō kovi, kae ki ʼihi ʼaluʼaga neʼe to lelei. ʼI te tahi lakaga neʼe ʼau logo ki te tōketā neʼe ina ʼui fēnei: “Ko te mahaki ʼe mole ina maumauʼi he tahi, kae ʼe ina fetogi ia ia.” Pea neʼe ʼau fakatokagaʼi, ko ʼihi fetogi ʼe fua lelei.

ʼI toku maʼuli katoa, neʼe tokoni mai toku “tala ʼi te kakano” ke ʼau mahino lelei ki te ʼu mahaki ʼe tau mo ʼihi, pea ke ʼau felogoi lelei mo nātou. (2 Kolonito 12⁠:​7, MN ) Neʼe hoki ʼau mahino lelei ki te ʼu palalau ia Tāʼaga Lea 3⁠:5: “Falala kia Sehova ʼaki tou loto katoa pea ʼaua naʼa ke falala ki tou ʼatamai totonu.” Ko te faʼahi ʼaē ʼe maʼuhiga tāfito, ko te akoʼi mai e toku ʼu ʼaluʼaga foʼou ke ʼau mahino ki te ʼu meʼa ʼaē ʼe maʼuhiga ʼaupito ʼi te maʼuli, pea ke ʼau logoʼi takita fakaʼapaʼapa kia kita. Neʼe lahi te ʼu meʼa neʼe kei ʼau lava fai ʼi te kautahi ʼa Sehova. Neʼe ʼau maʼu katoa te faka ʼuhiga ʼo te ʼu palalau ʼaenī ʼa Sesu: “ ʼE lahi age te fiafia ʼi te foaki, ʼi takita tali.”​—Gaue 20⁠:​35, MN.

Ko Te Faʼahiga Maʼuli Foʼou

Mole faʼa fualoa ʼi te ʼosi fakahā mai ʼo toku mahaki, neʼe fakaafe ʼau ki te fono ʼi Madrid, neʼe akoʼi ai te kau Kilisitiano lotolelei ke nātou fakatuputupu he felogoi tahi ʼi te kau tōketā mo tanatou kau mahaki ʼaē ko te kau Fakamoʼoni. Ki muli age, ko te kau Kilisitiano lotolelei ʼaia neʼe nātou faʼufaʼu te ʼu Komite Faka Felogoi Mo Te Lopitali. Kia ʼau, neʼe to tonu te fono ʼaia. Neʼe ʼau maʼu ai te gāue ʼe lelei age, ko he gāue ʼe lahi age ai toku fiafia ʼi te fiafia ʼaē ʼe ʼau maʼu ʼi he gāue fakamālama.

Neʼe mātou ako ʼi te fono ʼaia, ko te ʼu Komite foʼou ʼo te Faka Felogoi Mo Te Lopitali, neʼe tonu ke ʼolo ʼo ʼaʼahi te ʼu lopitali, mo fakafehuʼi te ʼu tōketā, pea mo fai he ʼu felogoi mo te kau gāue ʼi te ʼu lopitali, ke tupu ai he faifaitahi pea ke ʼaua naʼa hoko he ʼu fihi. ʼE tokoni te ʼu komite ki te kau Fakamoʼoni ke nātou maʼu he ʼu tōketā ʼe nātou tali lelei ke nātou faitoʼo kae mole fakaʼaogaʼi te toto. ʼE mahino ia, mai te ʼaluʼaga ʼaē neʼe mole ʼau fai he ako faka tōketā, koia neʼe tonu ai ke ʼau ako te ʼu kupuʼi palalau ʼo te ʼu faitoʼo, mo te ʼu palalau ʼe fakaʼaogaʼi e te kau tōketā mo te lopitali. Kae hili te fono ʼaia, neʼe ʼau liliu kiō ʼoku ʼaki te ʼu fakatuʼutuʼu foʼou, kua ʼau nofo teuteu ki te tauʼi ʼo he faigataʼaʼia foʼou.

Te ʼu ʼAʼahi ʼi Te ʼu Lopitali—Ko He Meʼa Fakafiafia

Logope ko toku mahaki neʼe ina faka palalisia māmālie ia ʼau, kae neʼe fakalahilahi pe toku ʼu maʼua ʼi taku kau ki te Komite Faka Felogoi Mo Te Lopitali. Neʼe lī toku posio mahaki, koia neʼe maʼu toku temi ke ʼau ʼaʼahi te ʼu lopitali. Logope neʼe tautau hoko ai te ʼu lotomamahi, kae neʼe faigafua age te fai ʼo te ʼu ʼaʼahi ʼaia, pea neʼe mole ʼau ʼamanaki ki te ʼu lelei neʼe ʼau maʼu ai. Logope kua ʼau heka maʼu ʼi te hekaʼaga toho, kae neʼe mole ko he faigataʼa ke maʼuhiga ke feafeaʼi. ʼE ʼi ai tuʼumaʼu pe he tahi ʼe kau ki te komite ʼe ma kaugā ʼolo. Pea tahi ʼaē meʼa, kua māhani te ʼu tōketā ʼi te palalau ki te ʼu hahaʼi ʼe heheka ʼi te ʼu hekaʼaga toho, pea ʼi ʼihi temi ʼe hage ʼe nātou fakaʼapaʼapa age ʼo nātou fakalogo mokā ʼau faiga ke ʼau ʼaʼahi ia nātou.

ʼI te ʼu taʼu e hogofulu kua hili, kua ʼau ʼaʼahi te ʼu tōketā e teau tupu. Ko ʼihi tōketā neʼe teitei pe ke nātou tali lelei ke nātou tokoni mai kia mātou talu pe tamatou kamata. Ko te Tōketā ko Juan Duarte​—ko he tōketā ʼo te mafu ʼi Madrid ʼe ʼiloa ʼi tana fakaʼapaʼapa ki te loto ʼo te kau mahaki​—neʼe foimo tokoni mai aipe kia mātou. Talu mai ai, kua ina fai te ʼu tafa e 200 tupu kae mole fakaʼaogaʼi ai te toto ki te kau mahaki ko te kau Fakamoʼoni mai Sepania katoa. ʼAki te hoholo ʼo te ʼu taʼu, kua hahaʼi te ʼu tōketā kua nātou kamata tafa kae mole nātou fakaʼaogaʼi te toto. Ko tamatou ʼaʼahi tuʼumaʼu neʼe tokoni ai ki te tonu ʼaia, kae kua nātou toe fai pe foki te tonu ʼaia ʼuhi ko te ʼu haʼele ki muʼa ʼo te maʼu ʼo te ʼu faitoʼo pea mo te ʼu ikuʼaga lelei ʼo te ʼu tafa ʼaē ʼe mole fakaʼaogaʼi ai te toto. Pea ʼe mātou tui papau ʼe tapuakina tamatou ʼu faiga e Sehova.

Neʼe ʼau lotomālohi ʼi te tali lelei e ʼihi tōketā ʼo te mafu ʼaē ʼe nātou faitoʼo te tamaliki. Lolotoga te ʼu taʼu e lua neʼe mātou ʼaʼahi te ʼu tōketā fai tafa e lua mo te tōketā ʼe ina fakamoe te hahaʼi ʼaē ka tafa. Neʼe mātou fakatoʼo age kia nātou te ʼu tohi ʼo ʼuhiga mo te ʼu faitoʼo ʼe nātou fakamahino ai te ʼu meʼa ʼaē ʼe fai e ʼihi tōketā. Neʼe fakapale tamatou ʼu faiga ʼi te taʼu 1999 lolotoga te Fono Lahi ʼo ʼUhiga Mo Te ʼu Tafa ʼo Te Mafu ʼo Te Tamaliki. Ko te ʼu tōketā ʼaia e lua ʼaē neʼe mātou tokoni ki ai​—ʼaki te takitaki fakapotopoto ʼa te tahi tōketā mai Pilitania—​neʼe nā fai te tafa maʼuhiga ki te kiʼi toe Fakamoʼoni, neʼe tonu ke faitoʼo tona ʼu valvules de lʼaorte.b Neʼe ʼau fakafiafia mo te ʼu mātuʼa ʼi te haʼu ʼa te tahi ʼo te ʼu tōketā fai tafa mai te fale tafa ʼo fakahā mai, neʼe maui mālie te tafa pea neʼe mulimuli pe ki te leʼo ʼo loto ʼo te famili. ʼI te temi nei, kua māhani leva te ʼu tōketā ʼaia e lua ki te faitoʼo ʼo he kau mahaki Fakamoʼoni mai te fenua katoa ʼo Sepania.

Ko te meʼa ʼaē ʼe ʼi ai tona ʼu fua lelei ʼi te ʼu taʼi ʼaluʼaga ʼaia, ʼe ko taku mahino ʼaē ki taku tokoni ki toku ʼu tēhina Kilisitiano. ʼI te agamāhani, mokā fia palalau te ʼu tēhina ki he Komite Faka Felogoi Mo Te Lopitali, he ko he ʼaluʼaga faigataʼa ʼaupito ʼi tonatou maʼuli. ʼE tonu ke tafa ia nātou, pea ko te ʼu tōketā ʼo te lopitali ʼo te kolo, ʼe mole nātou tali peʼe mole nātou lavaʼi te faitoʼo ʼo nātou kae mole fakaʼaogaʼi te toto. Kae mokā ʼiloʼi e te ʼu tēhina ʼe ʼi ai te ʼu tōketā fai tafa ʼe fakaʼapaʼapa ki te koga ʼaia ʼi Madrid, pea ʼe nātou logoʼi he fīmālie lahi. Neʼe kua ʼau sio ki te fetogi fofoga ʼo te tēhina, neʼe hoha ʼi muʼa atu pea ʼaki pe tamatou nonofo mo ia ʼi te lopitali, neʼe liliu ʼo loto fīmālie.

Te Faʼahi ʼo Te Kau Tuʼi Fakamāu Pea Mo Te Kau Tōketā

ʼI te ʼu taʼu pe ʼaenī, ko nātou ʼe kau ki te ʼu Komite Faka Felogoi Mo Te Lopitali neʼe nātou ʼaʼahi mo te ʼu tuʼi fakamāu. ʼI tamatou ʼu ʼaʼahi ʼaia, ʼe mātou fakatoʼo age kia nātou te dossier ko te Soins familiaux et gestion des dossiers médicaux des Témoins de Jéhovah, neʼe teuteuʼi tāfito moʼo fakamahino ki te hahaʼi ʼaia ʼe maʼu tuʼulaga ke nātou mahino ki tatatou mole fakaʼaogaʼi ʼo te toto pea mo te puleʼaki moʼo fakaʼaogaʼi ʼo he ʼu faitoʼo ʼe nātou fetogi te toto. Neʼe ʼaoga te ʼu ʼaʼahi ʼaia, koteʼuhi ʼi muʼa atu neʼe ko he agamāhani ki te ʼu tuʼi fakamāu ʼi Sepania hanatou fakagafua ki te kau tōketā ke nātou ʼai he ʼu foʼi huki toto, tatau aipe peʼe mole loto kiai te mahaki.

Ko te ʼu pilō ʼo te ʼu tuʼi fakamāu ʼe ko he ʼu koga meʼa fakamamalu, pea ʼi taku ʼuluaki ʼaʼahi, neʼe hage kia ʼau neʼe ʼau pulinoa ʼi taku feʼaluʼaki ai ʼi toku hekaʼaga toho. Moʼo faka lēsili kovi taku ʼu manatu ʼo ʼuhiga mo ʼau, neʼe hoko te kiʼi tuʼutāmaki pea neʼe ʼau to ʼi toku hekaʼaga ʼo to ki toku ʼu tuli. Ko te ʼu tuʼi fakamāu mo te ʼu avoka neʼe nātou tokagaʼi mai te meʼa ʼaē neʼe hoko kia ʼau pea neʼe nātou ʼōmai ʼo tokoni mai kia ʼau, kae neʼe ʼau ufiufi ʼosi ia nātou.

Logope neʼe mole faʼa falala te kau tuʼi fakamāu ki te ʼu tupuʼaga ʼo tamatou ʼolo age ʼo ʼaʼahi ia nātou, kae tokolahi neʼe nātou tali fakaleleiʼi mātou. Ko te ʼuluaki tuʼi fakamāu ʼaē neʼe ʼau ʼaʼahi neʼe kua ina fakakaukauʼi tomatou ʼaluʼaga, pea neʼe ina ʼui mai ʼe fia palalau mo mātou. ʼI tamatou tahi ʼaʼahi, neʼe ina toho tonu toku hekaʼaga ki te pilō pea mo fakalogo fakalelei mai. Ko te ʼu fua lelei ʼi te ʼaʼahi ʼaia neʼe ina fakaloto mālohiʼi ia ʼau mo toku ʼu kaugā gāue ke mātou lolomi tamatou tuʼania, pea neʼe mātou sisio ki te tahi ʼu fua lelei.

Lolotoga pe te taʼu ʼaia, neʼe mātou tuku te dossier ʼo te Soins familiaux ki te tahi tuʼi fakamāu neʼe ina tali fakaleleiʼi mātou pea mo ʼui mai ʼe ina lau anai te kaupepa. Neʼe ʼau fakatoʼo age ki ai toku numelo telefoni, ke feala hana telefoni mai mo kapau ʼe ʼi ai he meʼa ʼe fakavilivili. Hili kiai te ʼu vāhaʼa e lua, neʼe telefoni mai, ʼo ina ʼui mai neʼe kole age e te tōketā fai tafa ʼo te kolo ke fakagafua ke ina ʼai he foʼi huki toto ki te fafine Fakamoʼoni neʼe tonu ke tafa. Neʼe ʼui mai e te tuʼi fakamāu, ʼe ina loto ke mātou tokoni age ki ai ke ina maʼu he puleʼaki ke faitoʼo te fafine Fakamoʼoni kae mole fakaʼaogaʼi te toto. Neʼe faigafua pe tamatou maʼu te tahi lopitali, neʼe fakahoko lelei ai e te ʼu tōketā te tafa ʼaē ʼe mole fakaʼaogaʼi ai te toto. Neʼe fiafia te tuʼi fakamāu ʼi tanatou logo ki te maui mālie ʼo te tafa, pea neʼe ina fakapapau mai ʼe ina kumi anai he ʼu puleʼaki feiā ʼi te ʼu taʼi ʼaluʼaga ʼaia.

ʼI taku ʼu ʼaʼahi ki te ʼu lopitali, neʼe tau hoko te ʼu fihi mo nātou ʼe gāue ki te ʼu meʼa faka tōketā, koteʼuhi neʼe mātou loto ke fakaʼapaʼapa te kau tōketā ki te ʼu meʼa ʼaē ʼe loto kiai te mahaki pea mo tona leʼo ʼo loto. Neʼe fakaafe ʼau e te lopitali ʼi Madrid ʼe fakaʼapaʼapa ki te faʼahi ʼaia, ke ʼau kau ki te ako ʼe nātou palalau ai ki te hahaʼi ʼe gāue ki te ʼu meʼa faka tōketā. Ko te ako ʼaia neʼe ina faka fealagia mai ke ʼau fakahāhā tatatou manatu faka Tohi-Tapu, ʼo ʼuhiga mo te fakaʼaogaʼi ʼo te toto ki te kau popoto tokolahi. Neʼe toe tokoni mai foki te ako ʼaia ke ʼau mahino ki te ʼu tonu maʼuhiga ʼaē ʼe fai e te kau tōketā.

ʼI te kau faiako ʼo te ako, ko te polofesea ko Diego Gracia, ʼe ina tautau takitaki te ako maʼuhiga ʼaia ki te kau popoto Sepania, pea ʼe lagolago mālohi ki tatatou fealagia ʼaē ke tou filifili he faitoʼo tāfito mokā fakafihiʼi te fakaʼaogaʼi ʼo te toto.c Ko tamatou ʼu felogoi putuputu mo ia neʼe iku ai ki te fakaafe ʼo te kau fofoga ʼo te pilō ʼa te kau Fakamoʼoni ʼa Sehova ʼi Sepania, ke nātou fakamahino ki te kau ako ʼa te polofesea ko Gracia te ʼu tupuʼaga ʼo tatatou fakafisi ki te toto, pea ko ʼihi ia nātou ʼe lau ʼe nātou kau ki te kau tōketā faiva ʼo te fenua.

Ko Te Mahino Ki Te ʼAluʼaga Moʼoni

ʼE moʼoni, ko te gāue fiafia ʼaia neʼe mole ina fakatokatoka toku ʼu fihifihia fuli. ʼE fakahaʼuhaʼu pe te kovi ʼo toku mahaki. Kae meʼa lelei, ʼe hāo toku ʼatamai. ʼAki te tokoni ʼo toku ʼohoana mo toku foha, ʼaē ʼe mole meo ʼi he temi, ʼe ʼau lava fakahoko toku ʼu maʼua. Kanaʼaua tanā tokoni mai pea mo lagolago mai, ʼe mole lava anai haku fakahoko te faʼahi ʼaia. ʼE mole ʼau lava pe la te fakamaʼu ʼo toku vāvaʼe loloa peʼe ko te tui ʼo he māfana. ʼE ʼau leleiʼia tāfito taku fai faka mafola ʼi te ʼu Moeaki fuli mo toku foha ko Ismael, ʼaē ʼe ina toho haʼele ʼau, ʼo lava ai haku palalau mo te hahaʼi kehekehe. Pea ʼe kei ʼau lava fakahoko toku ʼu maʼua ʼi toku ʼuhiga tagata ʼāfea ʼi te kokelekasio.

Neʼe hoko kia ʼau te ʼu lakaga mamahi ʼi te ʼu taʼu e 12 ʼaē kua hili. ʼI ʼihi temi, ʼe lahi age toku ʼu mamahi ʼi te mahaki totonu, mokā ʼau sio ki te mafuliʼaga ʼo toku mahaki ki toku famili. ʼE ʼau ʼiloʼi ʼe nātou mamahi, kae ʼe mole nātou fakahā mai. Mole heʼeki faʼa fualoa, ʼi te taʼu pe e tahi, neʼe mate ai taku tāmai pea mo tona ʼohoana. Lolotoga te taʼu ʼaia, neʼe ʼau heka ai ki te hekaʼaga toho. Ko taku tāmai ʼaē neʼe maʼuli mo mātou, neʼe mate ʼi te tahi mahaki neʼe ina maumauʼi māmālie tona sino. Ko toku ʼohoana, ia Milagros, ʼaē neʼe tokaga ki taku tāmai, neʼe sio ia ki te meʼa ʼaē ka hoko anai kia ʼau ʼi te temi ka haʼu.

Kae ʼi tona faʼahi ʼaē ʼe lelei, kua fakatahi tomatou famili ke mātou tauʼi fakatahi te ʼu faigataʼaʼia. Neʼe fakamavae ʼau mai toku ʼuhiga pule pea kua ʼau heka nei ʼi te hekaʼaga toho, kae ʼe laka age te ʼu lelei ʼe ʼau maʼu nei ʼuhi ko taku gāue katoa maʼa niʼihi. Ko te tauhi ki niʼihi ʼe ina lava fakamaʼamaʼa te mamahi, pea ko Sehova ʼe ina haga fakahoko tana fakapapau ʼo ina fakaloto mālohiʼi tatou ʼi tona temi totonu. Ohage ko Paulo, kua ʼau lava ʼui fēnei: “ ʼE ʼau maʼu te mālohi kia meʼa fuli, ʼuhi ko ia ʼaē ʼe ina foaki mai te mālohi.”​—Filipe 4⁠:​13, MN.

[Kiʼi nota]

[Talanoa ʼo te pasina 24]

Te Manatu ʼa Te Fafine ʼOhoana

Maʼa he fafine ʼohoana, ko te maʼuli tahi mo he tagata ʼe ina maʼu te mahaki ʼo te sclérose en plaques ʼe ko he meʼa faigataʼa​—ʼi te faʼahi ʼo te fakakaukau, mo te meʼa ʼe logoʼi ʼi te loto, pea mo te faʼahi fakasino. ʼE tonu ke ʼau fakapotopoto ʼi taku fakatuʼutuʼu, pea ke ʼaua naʼa ʼau hoha noa ki te ka haʼu. (Mateo 6⁠:34) Kae ko te maʼuli mo he tahi ʼe mahaki ʼe fakahā ai te ʼu kalitate maʼuhiga ʼo he tahi. Kua mālohi age tamā nofo ʼohoana, pea kua lelei age taku ʼu felogoi mo Sehova. Ko te ʼu fakamatala ʼo te maʼuli ʼo ʼihi neʼe nātou tau mo te ʼu ʼaluʼaga mamahi feiā neʼe toe tokoni lahi mai foki kia ʼau. ʼE ʼau logoʼi te fiafia ʼaē ʼe maʼu e Julián ʼi tana gāue maʼuhiga maʼa te ʼu tēhina, pea kua ʼau tokagaʼi ʼe mole lītuʼa mai ia Sehova kia tatou ʼi he temi, tatau aipe peʼe takitahi te ʼaho mo tona faigataʼaʼia foʼou.

[Talanoa ʼo te pasina 24]

Te Manatu ʼa Te Foha

Ko te faʼa kātaki ʼo taku tāmai pea mo tana falala tuʼumaʼu, ʼe ko he faʼifaʼitaki lelei kia ʼau, pea ʼe ʼau logoʼi ʼe ʼi ai toku ʼaoga mokā ʼau feʼāveʼaki ia ia. ʼE ʼau ʼiloʼi ʼe mole ʼau fai tuʼumaʼu te meʼa ʼaē ʼe ʼau loto kiai. ʼI te temi nei kua ʼau kaku ki te temi tūpulaga, kae ka ʼau lahi anai, ʼe ʼau fakaʼamu ke ʼau kau ki te Komite Faka Felogoi Mo Te Lopitali. ʼE ʼau ʼiloʼi ʼi te ʼu fakapapau ʼa te Tohi-Tapu ko te mamahi ʼe faka temi pe, pea tokolahi te ʼu tēhina mo tuagaʼane ʼe kovi age te ʼu mamahi ʼe tau mo nātou.

[Paki ʼo te pasina 22]

Ko toku ʼohoana ʼe ko he fakaloto mālohi kia ʼau

[Paki ʼo te pasina 23]

Ko taku fai palalau mo te tōketā ʼo te mafu, ko Juan Duarte

[Paki ʼo te pasina 25]

Ko toku foha mo ʼau ʼe ma fiafia ʼi te gāue fakatahi ʼi te minisitelio