“Koutou Fakaovi Ki Te Atua Pea e Fakaovi Atu Anai Kia Koutou”
Tona Maʼuli ʼi Muʼa Pea Ki Muli Age—Mai Te Fakapōʼuli Ki He Ka Haʼu Taulekaleka
“KO TE folafola ʼa te ʼAtua ʼe maʼuli pea mo mālohi, pea ʼe māsila age ia ʼi te heletā mata lua fuape . . . pea ʼe feala ke ina ʼiloʼi lelei te ʼu manatu pea mo te ʼu fakatuʼutuʼu ʼo te loto.” (Hepeleo 4:12, MN ) Neʼe fai te palalau ʼaia e te ʼapositolo ko Paulo ʼo ʼuhiga mo te hū loloto ʼo te logo ʼa te ʼAtua. Neʼe ʼiloga tāfito te lava hū ʼo te Folafola ki te ʼu loto, ʼi te ʼuluaki sēkulō ʼo totatou temi. Logope te ʼu mālohi fakahala ʼo te temi ʼaia, kae ko nātou ʼaē neʼe liliu ko te kau Kilisitiano neʼe nātou kofuʼi te ʼuhigaʼi tagata foʼou.—Loma 1:28, 29; Kolose 3:8-10.
Ohage ko tona fakamatala ʼi te Tohi-Tapu, ko te mālohi ʼa te Folafola ʼa te ʼAtua moʼo fetogi te maʼuli ʼo te hahaʼi, ʼe toe ʼiloga pe foki ʼi te temi nei. Ohage la tou tokagaʼi age muʼa te faʼifaʼitaki ʼo te tagata lahi pea mo mālohi ko Richard. Mai tona ʼuhiga ʼaē neʼe hoko ʼita, neʼe fuhu ia Richard ʼi he kiʼi fakafifihi noa pe. Neʼe maʼuli pe ia ki te agamālohi. Neʼe kau ia Richard ki te kau fai fuhu. Neʼe ina akoako lelei te fai fuhu pea neʼe liliu ai ʼo champion (ko te tagata ʼaē neʼe mālohi tāfito) ʼi te kūtuga mamafa ʼo Westphalie, ʼi Siamani. Neʼe toe kovi foki mo te ʼinu kava ʼa Richard pea neʼe tau kau ki te ʼu fuhu. ʼI te tahi tokakovi feiā, neʼe mate ai te tagata, pea neʼe pilisoniʼi ai ia Richard.
Kae neʼe feafeaʼi tona maʼuli faka taumatuʼa? ʼE fakamatala fēnei e Richard: “ ʼI muʼa ʼo taku ako te Tohi-Tapu mo Heike, neʼe ma tahi fai pe te meʼa neʼe ma loto kiai. Neʼe lahi te temi neʼe nofo ai ia Heike mo tona ʼu kau fafine, kae ko ʼau neʼe ʼau maʼumaʼua ki te ʼu meʼa neʼe ʼau leleiʼia—tāfito te fai fuhu, mo te surf, pea mo te uku.”
ʼI te temi ʼaē neʼe kamata ako ai e Richard mo Heike ia te Tohi-Tapu mo te kau Fakamoʼoni ʼa Sehova, neʼe hage kia Richard neʼe lahi fau te ʼu fetogi neʼe tonu ke ina fai ʼi tona maʼuli, he neʼe hage kia ia ʼe mole feala ke ina faka ʼalutahi mo te ʼu pelesepeto ʼaē ʼe tuʼu ʼi te Folafola ʼa te ʼAtua. Kae ʼi tana ʼiloʼi lelei ia Sehova ʼAtua, neʼe lotomālohi ia Richard ke ina fakafiafia te ʼAtua. Neʼe mahino ai kia Richard ʼe mole tali e te ʼAtua ia nātou ʼaē ʼe nātou leleiʼia te agamālohi peʼe ko nātou ʼaē ʼe nātou fakahoko te taʼi fakafiafia ʼaia. Neʼe ako e Richard, “ko ʼaē ʼe manako ki te agamālohi, ʼe mahino ia, ʼe fehiʼa ki ai Tona nefesi [ʼo Sehova].”—Pesalemo 11:5.
Pea tahi ʼaē meʼa, ko Richard mo Heike neʼe nā leleiʼia ia te ʼamanaki ki he maʼuli ʼo heʼegata ʼi he palatiso ʼi te kele. Neʼe nā fakaʼamu ke nā maʼuʼuli fakatahi ai! (Isaia 65:21-23) Ko te fakaafe ʼaenī, “Koutou fakaovi ki te Atua pea e fakaovi atu anai kia koutou,” neʼe malave ki te loto ʼo Richard. (Sakopo 4:8) Neʼe ina tokagaʼi ai te maʼuhiga ʼo te tokoni faka Tohi-Tapu ʼaenī: “ ʼAua naʼa ke fakaʼamu ki te tagata agamālohi pea ʼaua naʼa ke fili he ala e tahi ʼi tona ʼu ala. He ko te tagata ʼaē ʼe haʼele fakapikopiko ʼe ko he meʼa fakalialia kia Sehova, kae ʼe kaumeʼa ia mo te hahaʼi faitotonu.”—Tāʼaga Lea 3:31, 32.
Logope tona lotomālohi ʼaē ke ina fetogi tana ʼu aga, kae neʼe mahino kia Richard ʼe mole ina lava fakahoko te koga ʼaia ʼaki pe tona mālohi totonu. Neʼe mahino kia ia ʼe ʼaoga ke kumi tokoni ki te ʼAtua ʼi te faikole. Neʼe ina muliʼi te ʼu palalau ʼaē neʼe fai e Sesu ki Tana kau ʼapositolo: “Koutou faikole tuʼumaʼu, ke ʼaua naʼa koutou tō ki he fakahala. Ko te laumālie, ʼe moʼoni, ʼe mālohi ia, kaʼe ko te kakano ʼe vaivai.”—Mateo 26:41, MN.
ʼI tana mahino ki te manatu ʼa te ʼAtua ʼo ʼuhiga mo te agamālohi pea mo te ʼita, neʼe ina ʼiloʼi ai ko te fai fuhu ʼe mole ko he faigaoʼi ʼe lelei. ʼAki te tokoni ʼa Sehova pea mo te fakaloto mālohi mai ia nātou ʼaē neʼe nātou fai tana ako, neʼe fakagata ai leva e Richard te ʼu meʼa fuli ʼe ʼi ai tona pikipikiga mo te agamālohi. Neʼe ina tuku te fai fuhu pea kua ina lava lolomi tana fia fuhu, pea neʼe ina fakatotonu ke hikihiki tona maʼuli faka famili. ʼE ʼui fēnei e Richard: “Ko taku ako te moʼoni, neʼe tokoni mai ke ʼau fakakaukau ʼi muʼa ʼo haku fai he meʼa.” ʼI te temi nei, ʼe ko he tagata taupau agamālū ʼi te kokelekasio ʼo te kau Fakamoʼoni ʼa Sehova. ʼE ina toe ʼui fēnei: “ ʼI te temi nei, ko taku ʼu felogoi mo toku ʼohoana pea mo taku fānau kua takitaki e te ʼu pelesepeto ʼo te ʼofa pea mo te fakaʼapaʼapa. Koia ʼaē kua lelei ai tamatou ʼu felogoi.”
ʼI ʼihi temi, ko te hahaʼi ʼaē ʼe mole mālama lelei ki te kau Fakamoʼoni ʼa Sehova, ʼe nātou tukugakoviʼi nātou ʼe ko he ʼu hahaʼi ʼe nātou fakamavete te ʼu famili. Kae ko te ʼu faʼifaʼitaki ohage ko Richard, ʼe nātou fakahā ʼe hala te ʼu fakamatala ʼaia. ʼI tona fakahagatonu, ʼe feala ke fakatupu e te moʼoni ʼo te Tohi-Tapu ia he tokalelei ʼi he loto fale pea mo he ka haʼu taulekaleka kia nātou ʼaē neʼe maʼuʼuli ʼāfea atu ʼi te fakapōʼuli.—Selemia 29:11.
[Talanoa ʼo te pasina 9]
Te ʼu Pelesepeto Faka Tohi-Tapu ʼe Nātou Fetogi Te Maʼuli
ʼE lava fetogi te maʼuli ʼo te hahaʼi e te Tohi-Tapu. Koʼeni he ʼu pelesepeto faka Tohi-Tapu neʼe tokoni kia nātou ʼaē neʼe agamālohi ke nātou fetogi:
“Ko ia ʼaē ʼe tuai ʼi te ʼita ʼe lelei age ia ʼi he tagata mālohi, pea ko ia ʼaē ʼe ina lolomi tona laumālie [ʼe lelei age ia] ʼi he tahi ʼe ina ʼohofi he kolo.” (Tāʼaga Lea 16:32) Ko he ʼita ʼe mole lolomi ʼe ko he fakaʼiloga ʼo te vaivaiʼaga, kae ʼe mole ko he fakaʼiloga ʼo te mālohi.
“Ko te fakasiosio poto ʼa he tagata, ʼe mahino ia ʼe ina fakatuai tona ʼita.” (Tāʼaga Lea 19:11) Ko te fakasiosio tonu pea mo te mahino ki he ʼaluʼaga ʼe tokoni mai ke ʼaua naʼa kita sio pe ki te ʼu meʼa ʼaē ʼe hā ki tuʼa ʼaē ʼe tupu ai te fihi, pea ʼe ina lava tāʼofi he ʼita ke mole iku ki he tokakovi.
‘ ʼAua naʼa ke fakakaumeʼa mo ia ʼaē ʼe aga ʼitaʼia, naʼa ke māhani ki tona ʼu ala.’ (Tāʼaga Lea 22:24, 25) Ko te kau Kilisitiano ʼe nātou fakapotopoto ʼo mole fakakaugā mo nātou ʼaē ʼe hoko ʼita.
[Paki ʼo te pasina 9]
“Neʼe ʼau maʼu te mālohi ke ʼau fetogi, mai te ʼamanaki ki he palatiso ʼe tuʼu ʼi te kele”