Ko Sehova, Te ʼAtua ʼo Te Moʼoni

“Neʼe ke totogi ʼau, Ê Sehova, te ʼAtua ʼo te moʼoni.”​—Pesalemo 31:5.

1. Neʼe feafeaʼi te ʼaluʼaga ʼi selo pea mo te kele ʼi te temi ʼaē neʼe mole heʼeki he tahi neʼe loi?

NEʼE ʼi ai te temi neʼe mole ʼi ai he tahi neʼe loi. ʼI selo, neʼe maʼuʼuli ai te ʼu laumālie haohaoa pea neʼe nātou tauhi ki tonatou Tupuʼaga, “te ʼAtua ʼo te moʼoni.” (Pesalemo 31:5) Neʼe mole he loi, peʼe ko he aga fakakākā. Neʼe fakahā e Sehova te meʼa ʼaē ʼe moʼoni ki tona ʼu foha fakalaumālie. Neʼe ina fai feiā, he neʼe ʼofa kia nātou pea neʼe loto moʼoni ke nātou maʼuʼuli lelei. Neʼe toe feiā ʼo ʼuhiga mo te kele. Neʼe fakatupu e Sehova te ʼuluaki tagata pea mo te ʼuluaki fafine, pea ʼaki te fakatuʼutuʼu ʼaē neʼe ina filifili, neʼe palalau fakahagatonu tuʼumaʼu mo nāua, ʼaki te moʼoni pea neʼe nā mahino lelei kiai. Neʼe fakaofoofo ʼaupito te faʼahi ʼaia!

2. Ko ai ʼaē neʼe kamata loi, pea koteā tona tupuʼaga?

² Kae ki muli age, neʼe ʼi ai te foha fakalaumālie ʼo te ʼAtua neʼe fialahi, ʼo liliu ko he ʼatua ʼe fakafeagai kia Sehova. Ko te laumālie ʼaia, ʼaē neʼe higoa ki muli age ko Satana te Tevolo, neʼe loto ke tauhi age te hahaʼi kia te ia. Moʼo fakahoko te faʼahi ʼaia, neʼe loi ke feala ki te hahaʼi ke nātou fakalogo kia te ia. ʼI tana fai te faʼahi ʼaia, neʼe liliu ai ʼo “gutuloi, pea . . . ko te tāmai ʼo te loi.”​—Soane 8:​44, MN.

3. Koteā ʼaē neʼe fai e Atama mo Eva ʼi te ʼu loi ʼa Satana, pea neʼe koteā tona ʼu fua?

³ ʼAki te gata, neʼe ʼui e Satana kia Eva, te ʼuluaki fafine, kapau ʼe talagataʼa ki te fakatotonu ʼa te ʼAtua pea mo ina kai te fua ʼo te fuʼu ʼakau ʼaē neʼe tapuʼi, pea ʼe mole mate anai. Kae neʼe ko te loi ia. Pea neʼe ina toe ʼui age kia ia, kapau ʼe ina kai pea ʼe liliu anai ohage ko te ʼAtua, ʼo ina ʼiloʼi te meʼa ʼaē ʼe lelei pea mo te meʼa ʼaē ʼe kovi. Neʼe ko te tahi loi ʼaia. Logola neʼe mole logo ia Eva ki he loi ʼi muʼa atu, kae neʼe tonu ke mahino kia ia ko te meʼa ʼaē neʼe ʼui age e te gata neʼe mole ʼalutahi mo te meʼa ʼaē neʼe ʼui age e te ʼAtua kia Atama, tona ʼohoana. Kae neʼe ina filifili ke fakalogo kia Satana, kae mole fia fakalogo kia Sehova. ʼI tona kākāʼi ʼaia, neʼe ina toʼo te fua ʼo te fuʼu ʼakau pea neʼe ina kai. Ki muli age, neʼe toe kai mo Atama ia te fua ʼo te fuʼu ʼakau. (Senesi 3:​1-6) Ohage ko Eva, neʼe mole heʼeki logo ia Atama ki he loi ʼi muʼa atu, kae neʼe mole kākāʼi ia ia. (1 Timoteo 2:​14) ʼAki te meʼa ʼaē neʼe ina fai, neʼe ina fakahā ai ʼe lītuʼa ki tona Pule. Neʼe fua kovi ʼaupito ki te malamanei katoa. ʼUhi ko te talagataʼa ʼa Atama, ko te agahala pea mo te mate​—mo te agakovi pea mo te masiva lahi​—neʼe mafola ki tona hākoga fuli pe.​—Loma 5:​12.

4. (a) Koteā te ʼu loi ʼaē neʼe fai ʼi Eteni? (b) Koteā ʼaē ʼe tonu ke tou fai ke mole fakahēʼi tatou e Satana?

⁴ Neʼe toe mafola mo te loi. ʼE tou mahino ko te ʼu loi ʼaē neʼe fai ʼi te ʼōloto ʼo Eteni neʼe fakafeagai ki te ʼuhiga moʼoni ʼa Sehova. Neʼe lau e Satana neʼe fufū e te ʼAtua he meʼa ʼe lelei ki te ʼuluaki taumatuʼa. Neʼe mole moʼoni te faʼahi ʼaia. Neʼe mole maʼu e Atama pea mo Eva he fua lelei mai tana talagataʼa. Neʼe nā mamate, ohage pe ko tona ʼui e Sehova kia nāua. Kae neʼe hoko atu te ʼu loi ʼaē neʼe fai e Satana ʼo ʼuhiga mo Sehova, pea hili te ʼu sēkulō, neʼe tohi ai e te ʼapositolo ko Soane ʼaki te takitaki ʼa te ʼAtua, ko Satana “ ʼe ina fakahēʼi te kele katoa.” (Apokalipesi 12:​9, MN ) Ke mole fakahēʼi tatou e Satana te Tevolo, ʼe tonu ke tou falala katoa ki te ʼuhiga moʼoni ʼo Sehova pea mo tana Folafola. E feafeaʼi hakotou fakatuputupu pea mo toe fakamālohiʼi age takotou falala kia Sehova pea ke koutou toe lotomālohi moʼo tauʼi te kākā pea mo te ʼu loi ʼo tona Fili?

ʼE ʼIloʼi e Sehova Te Moʼoni

5, 6. (a) Koteā te ʼatamai mālama ʼaē ʼe maʼu e Sehova? (b) E feafeaʼi te poto ʼo te tagata mokā fakatatau ki te poto ʼo Sehova?

⁵ ʼE ʼui tuʼumaʼu pe e te Tohi-Tapu ʼe ko Sehova “te Tupuaga o meafuape.” (Efeso 3:9) Ko ia “ae nee [ina] fakatupu te lagi, mo te kelekele, mo te tai pea mo naunau fuape e i ai.” (Gaue 4:​24) Mai tona ʼuhiga ʼaē ko Sehova te Tupuʼaga, ʼe ina ʼiloʼi te moʼoni ʼo ʼuhiga mo te ʼu meʼa fuli pe. Koʼeni tona fakatātā: Ohage la ko he tagata ʼe ina tohi pea mo ina laga tona ʼapi, ʼo ina hili te ʼu koga papa fuli pe, pea mo ina fai e ia totonu te ʼu gāue fuli. ʼE ina ʼiloʼi lelei anai te ʼapi pea mo mahino lelei age kiai, ia nātou ʼaē ʼe sio kiai. ʼE ʼiloʼi lelei e te hahaʼi te ʼu meʼa ʼaē neʼe nātou tohi pea mo faʼu. ʼO toe feiā pe, ʼe ʼiloʼi e te Tupuʼaga ia meʼa fuli ʼaē neʼe ina fakatupu.

⁶ ʼAki he ʼu palalau matalelei, neʼe fakahā e te polofeta ko Isaia te ʼatamai mālama lahi ʼo Sehova. ʼE tou lau fēnei: “Ko ai ʼaē kua ina fua te ʼu vai ʼi tona ʼalofi nima, mo fuafua te lahi ʼo te lagi ʼaki he haga, mo ʼai ki he meʼa fua te efu ʼo te kele, mo fua te ʼu moʼuga pea mo te ʼu sia ʼi he meʼa fua? Ko ai ʼaē kua ina fua te fakafuafua ʼo te laumālie ʼo Sehova, pea ko ai ʼaē kua fakahā age he meʼa ki ai, ohage ko hana tagata fai tokoni? Ko ai ʼaē kua talaga mo ia moʼo fakamahino age ki ai, peʼe ko ai ʼaē kua ina akoʼi ia ia ʼi te ala ʼo te faitotonu, peʼe ko ai ʼaē kua ina akoʼi kia ia te ʼatamai mālama, peʼe ko ai ʼaē ʼe ina fakahā age te ala ʼo te ʼatamai moʼoni?” (Isaia 40:12-​14) ʼE moʼoni, ko Sehova ʼe ko “he ʼAtua ʼo te ʼatamai mālama,” pea ʼe “haohaoa tona ʼatamai mālama.” (1 Samuele 2:3; Sopo 36:4; 37:16) ʼE mole lahi te ʼu meʼa ʼaē ʼe tou ʼiloʼi! Logola te poto lahi ʼaē kua maʼu ʼi te malamanei, kae ko tatatou mahino ki te ʼu meʼa ʼaē neʼe fakatupu ʼe mole fakalaka ia ʼi te ʼu tuʼakoi ʼo te ala [ʼo te ʼAtua].” ʼE hage pe ko “he fanafana” mokā ʼe fakatatau ki te “mana mālohi.”​—Sopo 26:14.

7. Koteā ʼaē neʼe fakamoʼoni kiai ia Tavite ʼo ʼuhiga mo te ʼatamai mālama ʼo Sehova, pea koteā ʼaē ʼe tonu ke tou fakamoʼoni kiai?

⁷ ʼUhi ʼe ko Sehova ʼaē neʼe ina fakatupu tatou, ʼe mahino ia ʼe ina ʼiloʼi lelei tatou. Neʼe fakamoʼoni te Hau ko Tavite ki te faʼahi ʼaia. Neʼe ina tohi fēnei: “Ê Sehova neʼe ke sivisivi ʼau pea ʼe ke ʼiloʼi ʼau. Ko koe, ʼe ke ʼiloʼi te temi ʼaē ʼe ʼau nofo ai ki lalo, pea mo te temi ʼaē ʼe ʼau tuʼu ai. Neʼe ke tokaga lelei mai mamaʼo ki taku manatu. Ka ʼau folau pea mokā ʼe ʼau takoto, kua ke ʼosi fua pe, pea ko toku ʼu ala fuli kua ke māhani pe kiai. Koteʼuhi ʼe mole heʼeki he lea ʼi toku ʼalelo, kae koʼeni ia, Ê Sehova, kua ke ʼiloʼi katoa.” (Pesalemo 139:​1-4) ʼE mahino ia neʼe ʼiloʼi e Tavite ʼe maʼu e te hahaʼi te loto faʼifaʼitaliha​—neʼe foaki kia nātou e te ʼAtua te fealagia ke nātou fakalogo, peʼe ke nātou talagataʼa kia te ia. (Teutalonome 30:19, 20; Sosue 24:15) Kae ʼe ʼiloʼi lelei tatou e Sehova, ʼo laka age ia tatou totonu. ʼE loto ia Sehova ki te meʼa ʼaē ʼe lelei maʼa tatou, pea ko ia ʼaē ʼe feala ke ina takitaki tatou. (Selemia 10:23) ʼI tona ʼuhiga moʼoni, ʼe mole he tagata faiako, he poto, peʼe ko he tagata fai tokoni, ʼe feala ke ina akoʼi mai te moʼoni pea mo foaki mai te poto pea mo te fiafia.

ʼE Moʼoni Ia Sehova

8. ʼE tou ʼiloʼi feafeaʼi ko Sehova ʼe moʼoni?

⁸ Kapau ʼe tou ʼiloʼi te moʼoni pea ʼe mole faka ʼuhiga leva ʼe tou palalau tuʼumaʼu anai ʼaki te moʼoni. Ohage la ko te Tevolo, neʼe ina fili ke mole “nofoaki i te mooni.” (Soane 8:​44) Kae ko Sehova ʼe “mohu ʼi . . . te moʼoni.” (Ekesote 34:6) ʼE tala tuʼumaʼu e te Tohi-Tapu te ʼuhiga moʼoni ʼa Sehova. Neʼe ʼui e te ʼapositolo ko Paulo “e mole feala ki te Atua ke lohi,” pea ko te ʼAtua “e mole lohi.” (Hepeleo 6:​18; Tito 1:2) Ko te moʼoni ʼe ko te faʼahi maʼuhiga ʼo te ʼulugaaga ʼo te ʼAtua. ʼE feala ke tou falala kia Sehova heʼe moʼoni, ʼe mole ina kākāʼi tana ʼu kaugana agatonu.

9. ʼE pipiki feafeaʼi te huafa ʼo Sehova ki te moʼoni?

⁹ Ko te huafa ʼo Sehova ʼe ina fakamoʼoni ki tona ʼuhiga moʼoni. Ko te huafa ʼo te ʼAtua ʼe faka ʼuhiga “ ʼE Ina Fakahoko.” ʼO hā ʼaki mai ko Sehova, ʼe liliu ʼaki te temi ʼo ina Fakahoko ia meʼa fuli pe ʼaē ʼe ina fakapapauʼi mai. ʼE mole he tahi age ʼe feala ke ina fai te faʼahi ʼaia. Mai tona ʼaluʼaga ʼaē ko Sehova ʼe ko Te Māfimāfi, ʼe mole he meʼa ʼe feala ke ina tāʼofi te fakahoko ʼo tana ʼu fakapapau. Ko Sehova ʼe moʼoni pea ʼe ko ia tokotahi pe ʼaē ʼe ina maʼu te mālohi pea mo te poto moʼo fakahoko tana ʼu folafola fuli.

10. (a) Neʼe sio mata feafeaʼi ia Sosue ki te ʼuhiga moʼoni ʼa Sehova? (b) Koteā te ʼu fakapapau ʼo Sehova neʼe koutou sio neʼe hoko?

¹⁰ Neʼe kau ia Sosue ia nātou ʼaē neʼe sio mata ki te ʼu meʼa fakaofoofo neʼe hoko, ko te ʼu fakamoʼoni ʼaia ki te ʼuhiga moʼoni ʼo Sehova. Neʼe maʼuli Sosue ʼi Esipito ʼi te temi ʼaē neʼe fakahoko ai e Sehova te ʼu tautea e hogofulu ki te puleʼaga ʼaia, ʼo ina fakakikite te ʼu tautea takitahi ʼaia. ʼI te ʼu meʼa ʼaē neʼe fakakikite pea mo hoko, neʼe sio ia Sosue ki te fakahoko ʼo te fakapapau ʼa Sehova ke ina faka ʼāteaina te kau Iselaele mai Esipito pea mo ina taki nātou ki te Kele ʼo Te Fakapapau, ʼo ina maumauʼi te ʼu kautau mālohi ʼo Kanaane ʼaē neʼe fakafeagai kia nātou. ʼI te fakaʼosi ʼo tona maʼuli, neʼe ʼui fēnei e Sosue ki te ʼu tagata matuʼa ʼo te puleʼaga ʼo Iselaele: “ ʼE koutou ʼiloʼi papau ʼaki tokotou loto katoa pea mo tokotou nefesi katoa, neʼe mole hala he folafola ʼi te ʼu folafola lelei fuli ʼaē neʼe ʼui atu e Sehova, tokotou ʼAtua. Neʼe hoko ia meʼa fuli maʼa koutou. Neʼe mole hana folafola ʼi te ʼu folafola ʼaia neʼe mole hoko.” (Sosue 23:14) Logola neʼe mole koutou sio mata ki te ʼu milakulo ʼaē neʼe sio kiai ia Sosue, kae neʼe koutou sio koa ʼi tokotou maʼuli ki te moʼoni ʼo te ʼu fakapapau ʼa te ʼAtua?

ʼE Fakahā e Sehova Ia Te Moʼoni

11. Koteā ʼaē ʼe hā mai ʼe fia fakahā e Sehova te moʼoni ki te malamanei?

¹¹ Koutou fakakaukauʼi age muʼa he tāmai peʼe ko he faʼe ʼe ina maʼu he toe poto lahi kae ʼe tahitahiga tana palalau ki tana fānau. Kae meʼa lelei foki heʼe mole feiā ia Sehova! Ko Sehova, ʼi tona ʼofa, ʼe lahi te ʼu palalau ʼaē ʼe ina fai ki te malamanei. ʼE fakahigoa ia ia e te Tohi-Tapu ko te “Faiako Lahi.” (Isaia 30:20) ʼI tona lotoʼofa, ʼe toe palalau kia nātou ʼaē mole nātou fia logo kia te ia. Ohage la, neʼe hinoʼi ia Esekiele ke ʼalu ʼo faka mafola ki te ʼu hahaʼi neʼe ʼiloʼi pe e Sehova ʼe mole nātou fakalogo anai. Neʼe ʼui fēnei e Sehova: “Foha ʼo te tagata, ʼalu, hū ki te lotolotoiga ʼo te ʼapi ʼo Iselaele, pea ʼe tonu anai ke ke palalau kia nātou ʼaki taku ʼu folafola.” Pea neʼe ina fai te fakatokaga ʼaenī: “ ʼE mole nātou fia fakalogo atu anai kia te koe, heʼe mole nātou fia fakalogo mai kia te ʼau, heʼe ko nātou fuli ʼo te ʼapi ʼo Iselaele ʼe fefeka tonatou ʼulu pea mo fefeka tonatou loto.” Neʼe ko he gāue faigataʼa ʼaia, kae neʼe fakahoko agatonu e Esekiele te gāue ʼaia, pea neʼe ko he fakahā ʼaia ʼo te loto manavaʼofa ʼo Sehova. Kapau ʼe hinoʼi koutou ki he koga meʼa ʼe faigataʼa ai takotou fai faka mafola, pea mo koutou falala ki te ʼAtua, koutou tui papau ʼe ina foaki atu anai te mālohi ohage pe ko tana fai ki te polofeta ko Esekiele.​—Esekiele 3:​4, 7-9.

12, 13. Neʼe palalau feafeaʼi te ʼAtua mo te hahaʼi?

¹² ʼE loto ia Sehova “ke fakamauli te tagata fuape, pea ke natou kaku ki te iloi o te mooni.” (1 Timoteo 2:4) Neʼe palalau ʼaki te kau polofeta, mo te ʼu ʼaselo, pea mo tona ʼAlo ʼofaina, ia Sesu Kilisito. (Hepeleo 1:​1, 2; 2:2) Neʼe ʼui fēnei e Sesu kia Pilato: “Ko te mea aeni, nee au tupu mai ai pea nee au haele mai ai ki te malama-nei, ke au fakamooni ki te mooni. Ko natou fuape o te mooni e natou fakalogo ki toku leo.” Neʼe maʼu e Pilato te faigamālie ke ina ʼiloʼi mai ia Sesu totonu te moʼoni ʼo ʼuhiga mo te fakatuʼutuʼu ʼa Sehova ki te fakamaʼuli. Kae neʼe mole kau Pilato ki te moʼoni pea neʼe mole ina loto ke fakahā age e Sesu. Neʼe tali fēnei age e Pilato ohage ko hana manukinuki: “Kotea ia te mooni?” (Soane 18:37, 38) Neʼe mole fua lelei kia ia tana fai ʼaia! Kae tokolahi neʼe nātou fakalogo ki te moʼoni ʼaē neʼe tala e Sesu. Neʼe ina ʼui fēnei ki tana kau tisipulo: “Manuia outou mata koteuhi e sisio, pea mo outou taliga koteuhi e logo.”​—Mateo 13:16.

¹³ Neʼe taupau e Sehova te moʼoni ʼi te Tohi-Tapu pea neʼe ina faka fealagia ke maʼu e te hahaʼi ʼi te potu fuli pe. ʼE fakahā e te Tohi-Tapu te moʼoni ʼo meʼa fuli pe. ʼE fakamatala ai te ʼu kalitate ʼo te ʼAtua, tana ʼu fakatuʼutuʼu pea mo tana ʼu fakatotonu, ʼo feiā mo te faka ʼuhiga moʼoni ʼo te ʼu meʼa ʼaē ʼe hoko ʼi te kele. Neʼe ʼui fēnei e Sesu ʼi tana faikole kia Sehova: “E ko te Mooni tau folafola.” (Soane 17:17) ʼUhi ko te faʼahi ʼaia, ʼe mole he tahi age tohi ʼe tatau mo te Tohi-Tapu. Ko te tohi pe ʼaia ʼe tahi ʼaē neʼe tohi ʼaki te takitaki ʼa te ʼAtua ʼaē ʼe ina ʼiloʼi ia meʼa fuli pe. (2 Timoteo 3:​16) ʼE ko he meʼa ʼofa maʼuhiga ki te malamanei, ʼo kau ʼi te ʼu koloā ʼaē ʼe maʼu e te ʼu kaugana ʼa te ʼAtua. ʼE ko he agapoto hatatou lau te Tohi-Tapu ʼi te ʼaho fuli.

Tou Taupau Maʼu Te Moʼoni

14. Koteā te ʼu meʼa ʼaē ʼe ʼui e Sehova ʼe ina fai anai, pea he koʼe ʼe tonu ke tou tui kia te ia?

¹⁴ ʼE tonu ke maʼuhiga kia tatou te ʼu meʼa ʼaē ʼe ʼui mai e Sehova ʼi tana Folafola. Ko te ʼu meʼa ʼaē ʼe ina ʼui mai ʼo ʼuhiga mo ia ʼe moʼoni, pea ʼe ina fakahoko anai te ʼu meʼa ʼaē kua ina fakatuʼutuʼu. ʼE lahi te ʼu tupuʼaga ke tou falala ai ki te ʼAtua. ʼE feala ke tou tui mokā ʼui e Sehova ʼe ina fakahoko anai “te lagavaka kia natou e mole natou iloi te Atua, pea mo natou e mole fakalogo ki te Evaselio o totatou Aliki ko Sesu.” (2 Tesalonika 1:8) ʼE toe feala ke tou tui mokā ina ʼui ʼe ʼofa kia nātou ʼaē ʼe nātou kumi te faitotonu, mokā ina ʼui ʼe ina foaki anai te maʼuli heʼegata kia nātou ʼaē ʼe tui kia te ia, pea mokā ina ʼui ʼe ina pulihi anai te mamahi, te lāuga pea mo te mate. Neʼe fakahā lelei mai e Sehova ʼe tonu ke tou falala ki te ʼu fakapapau ʼaia, ʼi tana fakatotonu fēnei ki te ʼapositolo ko Soane: “Haga ʼo tohi, heʼe ko te ʼu folafola ʼaenī ʼe agatonu pea mo moʼoni.”​—Apokalipesi 21:​4, 5, MN; Tāʼaga Lea 15:9; Soane 3:​36.

15. Koteā ʼihi loi ʼaē ʼe fai e Satana?

¹⁵ ʼE kehekehe ʼaupito ia Satana pea mo Sehova. ʼE kākāʼi e Satana te hahaʼi kae mole ina fakahā age te moʼoni. Moʼo fakahoko tana fakatuʼutuʼu pea mo fakamaliu te hahaʼi mai te tauhi maʼa, ʼe lahi ʼaupito te ʼu loi ʼaē ʼe fai e Satana. Ohage la, ʼe loto ia Satana ke tou tui ʼe mamaʼo te ʼAtua pea ʼe mole ina tokagaʼi te ʼu mamahi ʼaē ʼe hoko ʼi te kele. Kae ʼe fakahā e te Tohi-Tapu ko Sehova ʼe tokaga ʼaupito ki te ʼu meʼa ʼaē neʼe ina fakatupu, pea ʼe mole ina leleiʼia te kovi pea mo te ʼu mamahi. (Gaue 17:24-​30) ʼE toe loto ia Satana ke tui te hahaʼi ʼe ko he puli temi te kumi ʼo te ʼu meʼa fakalaumālie. Kae ʼe ʼui papau mai e te Tohi-Tapu “e mole agakovi te Atua pea e mole ina galoi [takotou] gaue mo [tokotou] ofa nee koutou fakaha o uhiga mo tona Huafa.” Pea tahi ʼaē meʼa, ʼe toe tohi lelei ai “e ina fakapale natou e natou kumi iaʼia.”​—Hepeleo 6:​10; 11:6.

16. He koʼe ʼe tonu ki te kau Kilisitiano ke nātou nofo tokaga pea mo taupau maʼu te moʼoni?

¹⁶ ʼO ʼuhiga mo Satana, neʼe tohi fēnei e te ʼapositolo ko Paulo: “Kua fakakivi e te atua o te malama-nei te u fakakaukau a te hahai e mole tui, naa natou mamata ki te huhulu o te malama o te Evaselio o te kololia o Kilisito, iaʼia ko te fakatata o te Atua.” (2 Kolonito 4:4) Ohage ko Eva, ko ʼihi neʼe kākāʼi e Satana te Tevolo. Ko ʼihi neʼe nātou hage ko Atama, ʼaē neʼe mole kākāʼi kae neʼe ina fili ʼaki he loto faʼitaliha ke talagataʼa. (Suta 5, 11) Koia ʼe maʼuhiga ke nofo tokaga te kau Kilisitiano pea ke nātou taupau maʼu te moʼoni.

ʼE Fakamaʼua e Sehova He “Tui e Mole Loi”

17. Koteā ʼaē ʼe tonu ke tou fai ke ʼofa ia Sehova kia tatou?

¹⁷ Mai tona ʼaluʼaga ʼaē ʼe moʼoni ia Sehova ʼi te ʼu faʼahi fuli pe, koia ʼe ina fakamaʼua ai kia nātou ʼaē ʼe tauhi age kia te ia ke nātou fakahā mo nātou te moʼoni. Neʼe tohi fēnei e te tagata fai pesalemo: “Ê Sehova, ko ai anai ka nofo ʼi tou falelā? Ko ai anai ka maʼuli ʼi tou moʼuga taputapu? Ko ia ʼaē ʼe haʼele agatonu pea mo ina maʼuliʼi te faitotonu, pea mo maʼu te moʼoni ʼi tona loto.” (Pesalemo 15:​1, 2) ʼE mahino papau ia, ko te kau Sutea ʼaē neʼe nātou hiva te ʼu palalau ʼaia, ʼi tanatou talanoa ʼo ʼuhiga mo te moʼuga taputapu, neʼe nātou manatuʼi ai te Moʼuga ʼo Sione, ʼaē neʼe ʼave ki ai e te Hau ko Tavite te aleka ʼo te fuakava, ʼo tuku ki te falelā ʼaē neʼe ina fakatuʼu ai. (2 Samuele 6:​12, 17) Ko te moʼuga pea mo te falelā, neʼe ina fakamanatuʼi te faʼahi ʼaē neʼe nofo ai Sehova, ʼi hona ʼaluʼaga fakatā. Neʼe feala ki te hahaʼi ke nātou fakaōvi ki te ʼAtua moʼo kole tona ʼofa.

18. (a) Koteā ʼaē ʼe fakamaʼua ki he tahi ʼe fia kaumeʼa mo te ʼAtua? (b) Koteā ʼaē ka tou vakaʼi anai ʼi te alatike ka hoa mai?

¹⁸ Ko ia ʼaē ʼe fia kaumeʼa mo Sehova, ʼe tonu ke palalau ʼaki te moʼoni “ ʼi tona loto,” kae mole gata pe ʼi tona gutu. Ko te ʼu kaumeʼa moʼoni ʼo te ʼAtua ʼe tonu ke agatonu tonatou loto pea mo nātou fakahā he “tui e mole loi,” ke uga ai e tonatou loto ke nātou fai he ʼu gāue ʼe lagolago ki te moʼoni. (1 Timoteo 1:5; Mateo 12:34, 35) Ko ʼaē ʼe kaumeʼa mo te ʼAtua ʼe mole aga fakapikopiko peʼe ina kākāʼi te hahaʼi, heʼe “ko te tagata . . . kākā ʼe fehiʼa ki ai ia Sehova.” (Pesalemo 5:6) Ko te kau Fakamoʼoni ʼa Sehova ʼi te kele katoa, ʼe nātou faiga ʼaupito ke nātou fai te meʼa ʼaē ʼe moʼoni moʼo faʼifaʼitaki ki tonatou ʼAtua. ʼE tou vakaʼi anai ʼi te alatike ka hoa mai te faʼahi ʼaia.

ʼE Koutou Tali Feafeaʼi Anai?

• He koʼe ʼe ʼiloʼi e Sehova te moʼoni ʼo ʼuhiga mo meʼa fuli pe?

• Koteā ʼaē ʼe fakahā ai ko Sehova ʼe moʼoni?

• Neʼe fakahā feafeaʼi e Sehova te moʼoni?

• ʼO ʼuhiga mo te moʼoni, koteā ʼaē ʼe fakamaʼua mai kia tatou?

[Paki ʼo te pasina 10]

Ko te ʼAtua ʼo te moʼoni ʼe ina ʼiloʼi ia meʼa fuli pe ʼo ʼuhiga mo te ʼu meʼa ʼaē neʼe ina fakatupu

[Paki ʼo te pasina 12, 13]

ʼE hoko moʼoni anai te ʼu fakapapau ʼa Sehova