Tou Maʼu Te Loto Fia Foaki
ʼE MOLE tupu he tahi mo te loto fia foaki. Ko he kiʼi tamasiʼi ʼe ʼuluaki tokaga muʼa ki te ʼu meʼa ʼaē ʼe loto kiai pea mo ʼaoga kia ia, kae ʼe mole ina tokagaʼi te ʼu meʼa ʼaē ʼe lelei maʼa te hahaʼi ʼaē ʼe tokakaga kia ia. Kae ʼaki te temi, ʼe ako e te tamasiʼi ʼe mole ko ia tokotahi pe ʼaē ʼe ʼaoga kia ia he ʼu meʼa. ʼE tonu ke ina tokagaʼi te ʼu meʼa ʼaē ʼe ʼaoga ki ʼihi, pea ʼe tonu ke ina ako te foaki pea mo te vaevae, kae mole gata pe ki tana tali he ʼu meʼa mai niʼihi. ʼE tonu ke ina maʼu he loto fia foaki.
Māʼia mo te hahaʼi ʼaē ʼe nātou foaki, peʼe nātou foaki lahi, ʼe mole nātou maʼu fuli he loto fia foaki. Ko ʼihi ʼe feala ke nātou foaki ki he kautahi ke nātou maʼu mai ai he ʼu lelei. Ko ʼihi ʼe lagi nātou fai te faʼahi ʼaia ke laupisiʼi nātou e te hahaʼi. Kae ko te fia foaki ʼaē ʼe fai e te kau Kilisitiano moʼoni ʼe kehe ia. Koia, e feafeaʼi te fia foaki ʼaē ʼe fakaloto mālohi e te Tohi-Tapu ke tou fai? ʼE tou tali anai ki te fehuʼi ʼaia ʼaki tatatou vakaʼi fakanounou te loto fia foaki ʼaē neʼe maʼu e te ʼu Kilisitiano ʼo te ʼuluaki sēkulō.
Ko Te ʼu Faʼifaʼitaki Faka Kilisitiano ʼo Te Loto Fia Foaki
Ko te loto fia foaki faka Kilisitiano, ʼaē ʼe fakamatala ʼi te Tohi-Tapu, ʼi te agamāhani neʼe ko te “vaevae mo niʼihi” ʼaē neʼe ʼaoga moʼoni kia nātou. (Hepeleo 13:16, MN; Loma 15:26) Neʼe mole fakakinauʼi nātou ke nātou foaki. Neʼe tohi fēnei e te ʼapositolo ko Paulo: “Ke tahi foakipe o fai ki te mea kua tonu ki ai tona loto, aua naa fai mo te loto mamahi, pe ko he maua, koteuhi e ofa te Atua kia ia ae e ina foaki fakafiafia.” (2 Kolonito 9:7) Neʼe mole nātou foaki ke sioʼi nātou e te hahaʼi. Neʼe manatu feiā ia Anania pea mo Safila pea neʼe fua kovi kia nāua.—Gaue 5:1-10.
Neʼe ʼaoga ʼaupito te fia foaki ʼi te temi ʼaē neʼe fakatahitahi ai ʼi Selusalemi ia te kau Sutea pea mo te kau poloselite tokolahi mai te ʼu koga meʼa mamaʼo, ki te ʼaho lahi ʼo te Penikosite ʼo te taʼu 33 ʼo totatou temi. ʼI te temi ʼaia ko te ʼu tisipulo ʼa Sesu “nee natou fonu katoa i te Laumalie-Maonioni, o natou lea ki ihiʼage lea.” Neʼe ʼatakai nātou e te toe hahaʼi tokolahi ʼo nātou logo ki te faiakonaki fakaloto mālohi ʼa Petelo ʼo ʼuhiga mo Sesu Kilisito. Ki muli age, neʼe sio te hahaʼi ki te fakamālōlō e Petelo pea mo Soane te tagata ketu ʼi te matapā ʼo te fale lotu, pea mo nātou logo ki te toe faiakonaki ʼa Petelo ʼo ʼuhiga mo Sesu pea mo te ʼaoga ʼaē ke nātou fakahemala. Ko te ʼu lauʼi afe hahaʼi neʼe nātou fakahemala pea mo papitemaʼi nātou ko he ʼu tisipulo ʼa Kilisito.—Gaue, kapite 2 pea mo te 3.
Ko te ʼu tisipulo foʼou ʼaia neʼe nātou fia nonofo ʼi Selusalemi ke lahi age tonatou akoʼi e te kau ʼapositolo ʼa Sesu. Kae ʼe tokaga feafeaʼi anai ia te kau ʼapositolo ki te ʼu meʼa ʼaē ʼe ʼaoga ki te hahaʼi fuli ʼaia? ʼE ʼui fēnei mai e te Tohi-Tapu: “Ko te kaugamalie o natou nee mau kele, pe ko honatou u api, nee natou fakatau ia pea nee natou ave te totogi o mea nee fakatau o tuku kia vae o te kau apositolo, pea nee vahevahe ia kia natou o faipe ki te mea e aoga ki te tagata takitahi.” (Gaue 4:33-35) ʼE moʼoni, neʼe maʼu e te kokelekasio foʼou ʼaia ʼo Selusalemi te loto fia foaki!
Ki muli age, neʼe maʼu e te tahi ʼu kokelekasio te loto fia foaki ʼaia. Ohage la, ko te kau Kilisitiano ʼo Masetonia, logola neʼe nātou māsisiva, kae neʼe nātou fakalaka ʼi te ʼu meʼa ʼaē neʼe nātou lavaʼi moʼoni, ʼo nātou foaki te ʼu meʼa ʼaē neʼe ʼaoga ki tonatou ʼu tēhina ʼi Suta. (Loma 15:26; 2 Kolonito 8:1-7) Neʼe lahi ʼaupito te tokoni ʼa te kokelekasio ʼo Filipe ki te minisitelio ʼa Paulo. (Filipe 4:15, 16) Ko te kokelekasio ʼo Selusalemi neʼe ina tufa ʼi te ʼaho fuli te meʼa kai ki te ʼu fafine vitua ʼaē neʼe nonofo ʼi te faigataʼaʼia, pea neʼe hinoʼi e te kau ʼapositolo te ʼu tagata popoto e toko fitu ke nātou vakaʼi ke mole galo he fafine vitua.—Gaue 6:1-6.
Ko te ʼu ʼuluaki kokelekasio faka Kilisitiano neʼe nātou teuteu fakatomuʼa ki te ʼu temi faigataʼa ʼaē ka ʼamanaki hoko. Ohage la, ʼi te temi ʼaē neʼe fakakikite ai e te polofeta ko Akapo ʼe hoko anai te hoge lahi, ko te ʼu tisipulo ʼo te kokelekasio ʼo Silia Atiokia “nee natou tonu leva ke faiofa te tagata takitahi o faipe ki te mea e ina mau, ko he tokoni ke natou momoli ki te u tehina nee mauli i Sutea.” (Gaue 11:28, 29) Neʼe ko he manatu lelei ʼaia neʼe nātou fakahā, ʼo nātou teuteuʼi fakatomuʼa te ʼu meʼa ʼaē ka ʼaoga ki te hahaʼi.
Koteā ʼaē neʼe ina uga ai te ʼu ʼuluaki Kilisitiano ke nātou fakahā te loto fia foaki lahi pea mo ʼofa feiā? ʼE lava maʼu feafeaʼi e he tahi te loto fia foaki? ʼE lahi te ako ʼe tou tāʼofi mai te vakaʼi fakanounou ʼo te faʼifaʼitaki ʼo te Hau ko Tavite?
Ko Te Fia Foaki ʼa Tavite Moʼo Lagolago Ki Te Tauhi Moʼoni
Lolotoga taʼu e 500 tupu, ko te aleka ʼo te fuakava—ko te puha taputapu neʼe ina fakatātā te ʼafio ʼa Sehova—neʼe mole maʼu hona kogafale ke tuku kiai. Neʼe tuku ʼi te falelā, peʼe ko te tapenakulo, ʼaē neʼe feʼāveʼaki lolotoga te haʼele ʼa Iselaele ʼi te toafa pea ki muli age ʼi te Kele ʼo Te Fakapapau. Neʼe loto ʼaupito e te Hau ko Tavite ke ina toʼo te aleka ʼaē neʼe tuku ʼi te falelā, pea mo ina laga he ʼapi ʼe tāu mo feʼauga maʼa Sehova, ʼo tuku kiai te aleka taputapu. ʼI tana palalau ki te polofeta ko Natane, neʼe ʼui fēnei e Tavite: “Koʼeni ʼe ʼau nofo ʼi te ʼapi neʼe faʼu ʼaki te ʼu setele, kae ko te aleka ʼo te fuakava ʼa Sehova ʼe tuku ʼi te lalo falelā.”—1 Fakamatala 17:1.
Kae ko Tavite neʼe ko he tagata tau. Koia neʼe fakatotonu ai e Sehova ko tona foha ko Salomone, lolotoga tona temi pule tokalelei, ʼaē ka ina laga anai he fale lotu ke tuku kiai te aleka ʼo te fuakava. (1 Fakamatala 22:7-10) Kae neʼe mole tāʼofi e te faʼahi ʼaia te loto fia foaki ʼo Tavite. Neʼe ina fakatuʼutuʼu te fakatahitahi, he neʼe ina fia foaki te ʼu meʼa ʼaē ka ʼaoga anai ki te laga ʼo te fale lotu. Ki muli age, neʼe ina ʼui fēnei kia Salomone: “Neʼe ʼau teuteuʼi maʼa te ʼapi ʼo Sehova te ʼu taleta aulo e teau afe pea mo te ʼu taleta siliva e tahi miliona, pea mo te kapa pea mo te ukamea, ʼe mole feala hona fua, he neʼe lahi ʼaupito; neʼe ʼau teuteuʼi te ʼakau pea mo te ʼu maka.” (1 Fakamatala 22:14) ʼO mole gata ai, ʼo hilifaki ki tona ʼu koloā ʼo ia totonu, neʼe foaki e Tavite te aulo pea mo te siliva, ʼo fakafuafua ʼi te temi nei, ko te ʼu meʼa ʼofa ʼaia ko te 119 332 000 000 falā. Tahi ʼaē meʼa, neʼe toe lahi mo te ʼu meʼa ʼaē neʼe foaki e te kau tama ʼaliki. (1 Fakamatala 29:3-9) ʼE mahino papau ia, neʼe lahi ʼaupito te loto fia foaki ʼaē neʼe fakahā e Tavite!
Koteā ʼaē neʼe ina uga ai ia Tavite ke ina foaki lahi? Neʼe mahino kia ia ko te meʼa fuli ʼaē neʼe ina maʼu pea mo lava fai, neʼe ko te fua ʼaia ʼo te tapuakina ʼa Sehova. Neʼe ina fakamoʼoni fēnei ʼi tana faikole: “Ê Sehova, tomatou ʼAtua, ko te meʼa lahi ʼaenī neʼe mātou teuteuʼi ke laga ʼaki he ʼapi ki tou huafa taputapu, ʼe haʼu mai tou nima, pea ʼe ʼa koe ia meʼa fuli ʼaenī. ʼE ʼau ʼiloʼi lelei, Ê toku ʼAtua, ko koe ko he ʼAtua ʼe ina vakaʼi te loto, pea ʼe ke leleiʼia te faitotonu. Ko ʼau, neʼe ʼau foaki te ʼu meʼa fuli ʼaia ʼaki he loto faitotonu, pea ʼi te temi nei ko tau hahaʼi ʼaē ʼe fakatahitahi ʼi henī, neʼe ʼau sio ki tanatou foaki fakafiafia te ʼu meʼa ʼofa, ʼaki he lotolelei.” (1 Fakamatala 29:16, 17) Neʼe maʼuhiga kia Tavite tana ʼu felogoi mo Sehova. Neʼe mahino kia ia te ʼaoga ʼaē ke tauhi ki te ʼAtua, “ ʼaki he loto katoa pea mo he nefesi fiafia,” pea neʼe fiafia ʼi tana fai te meʼa ʼaia. (1 Fakamatala 28:9) Neʼe ko te ʼu kalitate ʼaia ʼaē neʼe nātou uga te ʼu ʼuluaki Kilisitiano ke nātou fakahā ai te loto fia foaki.
Ko Sehova—Ia Ia ʼAē ʼe Foaki Lahi
Ko Sehova te faʼifaʼitaki lelei ʼo te loto fia foaki. ʼE lahi tona ʼofa pea mo tana loto tokaga koia ʼe ina “fakahopoʼake tana laa ki te hahai agakovi mo te hahai agalelei, pea e ina fakaʼua ifo ki te hahai agatonu mo te hahai agahala.” (Mateo 5:45) ʼE ina foaki ki te malamanei katoa “te mauli mo te manava.” (Gaue 17:25) Koia, ohage ko tona fakahā lelei e te tisipulo ko Sakopo, “ko te faiofa taulekaleka fuape mo meaofa lelei fuape e fakahifo mai oluga, mai te Tamai o te u malama.”—Sakopo 1:17.
Ko te meʼa ʼofa lahi ʼa Sehova kia tatou ʼe ko tana fekauʼi ifo tona “Alo Ulutokotahi, ke aua naa mate ia natou fuape e tui kia te ia, kae ke natou maù te mauli heegata.” (Soane 3:16) ʼE mole he tahi ʼe feala ke ina ʼui ʼe tau mo te meʼa ʼofa ʼaia, koteʼuhi “ko tatou fuli neʼe tou agahala pea mole tou aʼu ki te kolōlia ʼo te ʼAtua.” (Loma 3:23, 24, MN; 1 Soane 4:9, 10) Ko te totogi ʼaē neʼe foaki e Kilisito ʼe ko te tafitoʼaga pea ko te meʼa ʼaia ʼaē neʼe fakaʼaogaʼi e te ʼAtua moʼo foaki tona “meʼa ʼofa fakatalakitupua ʼaē ʼe ina foaki noa,” ʼaē ko te “ ʼofa makehe lahi ʼo te ʼAtua.” (2 Kolonito 9:14, 15, MN ) ʼI te loto fakafetaʼi ʼa Paulo ki te meʼa ʼofa ʼa te ʼAtua, neʼe ina fakamuʼamuʼa ai ʼi tona maʼuli “te fakamoʼoni ʼaki te loto katoa ki te logo lelei ʼo te ʼofa makehe ʼo te ʼAtua.” (Gaue 20:24, MN ) Neʼe ina ʼiloʼi neʼe ko te finegalo ʼo te ʼAtua “ke fakamauli te tagata fuape, pea ke natou kaku ki te iloi o te mooni.”—1 Timoteo 2:4.
Ia ʼaho nei, ʼe ko te faʼahi ʼaia ʼaē ʼe lolotoga fakahoko ʼaki te gāue fai faka mafola pea mo te faiako lahi ia fenua e 234. Neʼe fakakikite e Sesu te tuputupu ʼaia ʼi tana ʼui fēnei: “Ko te logo lelei ʼaenī ʼo te puleʼaga ʼe faka mafola anai ʼi te kele katoa, ko he meʼa fakamoʼoni ia ki te ʼu puleʼaga katoa; pea hoko mai ai leva te fakaʼosi.” (Mateo 24:14, MN ) Ei, “e maua muà ke fagonogono te evaselio ki te atu puleaga.” (Maleko 13:10) ʼI te taʼu ʼaenī kua hili, ko te toko ono miliona tupu kau kaugā fai faka mafola ʼo te logo lelei neʼe nātou fai hola e 1 202 381 302 ʼi te gāue ʼaia pea mo nātou fai te ʼu ako Tohi-Tapu e 5 300 000 tupu. ʼUhi ʼaē heʼe tonu ke hāofaki te hahaʼi, koia ko te akoʼi ʼo te logo lelei ki te hahaʼi, ʼe ko te gāue maʼuhiga ʼaupito.—Loma 10:13-15; 1 Kolonito 1:21.
Moʼo tokoni kia nātou ʼaē ʼe nātou fia fai ki te moʼoni ʼa te Tohi-Tapu, ʼe tā ʼi te taʼu fuli te ʼu lauʼi miliona tohi—ʼo kau kiai mo te ʼu Tohi-Tapu, mo te ʼu tohi, pea mo te ʼu kaupepa. Tahi ʼaē meʼa, ʼe tā te ʼu nusipepa ʼo Te Tule Leʼo pea mo te Réveillez-vous ! e tahi miliale tupu. ʼI te tali ʼa te hahaʼi ki te logo lelei, ʼe lahi te ʼu Fale ʼo Te Puleʼaga pea mo te ʼu Fale Fakatahi ʼa te kau Fakamoʼoni ʼa Sehova ʼe laga, ke akoʼi ai te Tohi-Tapu ki te hahaʼi. Ko te ʼu fakatahi faka silikosikilipisio pea mo te ʼu fakatahi makehe ʼaho tahi, ʼo feiā mo te ʼu fakatahi faka tisitilike, ʼe fakatuʼutuʼu ʼi te taʼu fuli. Ko te tahi faʼahi ʼaē ʼe fai tuʼumaʼu, ʼe ko te ako ʼo te kau misionea, mo te kau tagata taupau feʼoloʼaki, mo te kau tagata ʼāfea, pea mo te ʼu tēhina faifekau faka minisitelio. ʼE tou loto fakafetaʼi kia Sehova ʼi tana fakatuʼutuʼu ia meʼa fuli ʼaia ʼaki “te kaugana agatonu mo fakapotopoto.” (Mateo 24:45-47) ʼE mahino ia ʼe tou fia fakahā totatou loto fakafetaʼi kia te Ia!
Tou Fakahā Totatou Loto Fakafetaʼi Kia Sehova
Ohage pe ko te laga ʼo te fale lotu pea mo te foaki ʼo te ʼu meʼa ʼaē neʼe ʼaoga ki te ʼu ʼuluaki kokelekasio, ko te falā ʼaē ʼe fakaʼaogaʼi ki te ʼu fakatuʼutuʼu fuli ʼaia ʼe ko te ʼu meʼa ʼofa ʼaē ʼe foaki e te ʼu tēhina mo tuagaʼane. Kae ʼe tonu ke tou manatuʼi, ʼe mole he tahi ʼe feala ke ina foaki he ʼu koloā kia Sehova, heʼe ʼa ʼaʼana ia meʼa fuli pe. (1 Fakamatala 29:14; Asea 2:8) Koia ko te ʼu meʼa ʼofa ʼe ko te fakamoʼoni ʼaia ʼo totatou ʼofa kia Sehova pea mo tatatou loto ʼaē ke fakahaʼele ki muʼa te tauhi moʼoni. ʼE ʼui e Paulo, ko te fakahā ʼaia ʼo te loto fia foaki ʼe ina fakatupu “te fakafetai ki te Atua.” (2 Kolonito 9:8-13) ʼE fakaloto mālohi e Sehova te loto fia foaki ʼaia heʼe fakahā ai ʼe lelei tatatou manatu pea mo totatou loto kia te ia. Ko nātou ʼaē ʼe loto fia foaki pea mo falala kia Sehova ʼe ina tapuakinaʼi anai ia nātou pea mo nātou mahu ʼi te faʼahi fakalaumālie. (Teutalonome 11:3-15; Tāʼaga Lea 3:9, 10; 11:25) ʼE fakapapau mai e Sesu ʼe tou maʼu anai te fiafia, ʼi tana ʼui fēnei: “ ʼE lahi age te fiafia ʼi takita foaki, ʼi takita tali.”—Gaue 20:35, MN.
Ko te kau Kilisitiano ʼaē ʼe loto fia foaki ʼe mole nātou atalitali pe ke hoko mai te ʼu temi faigataʼa. Kailoa, kae ʼe nātou kumi te ʼu faigamālie ke nātou “fai ia te lelei ki te tagata fuape, kae tafito ia te lelei o te kaiga o te tui.” (Kalate 6:10) ʼI te fakaloto mālohi e Paulo te loto fia foaki ʼaē ʼe leleiʼia e te ʼAtua, neʼe ina tohi fēnei: “Vakai naa koutou galoi te fai o te mea e lelei pea mo te mauli vaevae, koteuhi ko te u faahiga sakilifisio aia e leleiʼia e te Atua.” (Hepeleo 13:16) ʼI tatatou fakaʼaogaʼi totatou temi, mo totatou mālohi pea mo tatatou falā moʼo tokoni ki te hahaʼi pea mo faka haʼele ki muʼa te tauhi maʼa, ʼe fiafia lahi ai ia Sehova ʼAtua. ʼE moʼoni, ʼe ina leleiʼia te loto fia foaki.
[Talanoa ʼo te pasina 28, 29]
Te ʼu Faʼahiga Fai Moʼo Foaki
HE ʼU MEʼA ʼOFA KI TE GĀUE FAKA MALAMANEI
Ko te tokolahi ʼe nātou tānaki kehe hanatou foʼi falā ke nātou ʼai ki te ʼu kesi ʼaiʼaga meʼa ʼofa ʼaē ʼe tohi ai: “Te ʼu meʼa ʼofa ki te gāue faka malamanei.—Mateo 24:14.”
ʼI te māhina fuli, ʼe momoli e te ʼu kokelekasio te falā ʼaia ki te ʼu nofoʼaga faka malamanei ʼa te kau Fakamoʼoni ʼa Sehova ʼaē ʼi Brooklyn, ʼi New York, peʼe ki te filiale ʼo tonatou telituale. ʼE toe feala foki ke tou momoli fakahagatonu te ʼu meʼa ʼofa ki te filiale ʼo totatou fenua. ʼE feala ke tou foaki he ʼu faʼahiga koloā kehekehe peʼe ko he tahi age ʼu meʼa maʼuhiga. ʼE tonu ke tou momoli fakatahi mo te ʼu meʼa ʼaia he tohi fakanounou ʼe fakahā ai ʼe ko he ʼu meʼa ʼofa.
TE ʼU MEʼA ʼOFA ʼE FAKA TUʼAKOI
ʼE feala ke tou foaki he paʼaga ʼaki te faka tuʼakoi makehe ʼaenī, kapau ʼe tou kole te paʼaga ʼaia, pea ʼe toe liufaki mai anai. Kapau ʼe koutou fia maʼu he tahi ʼu fakamahino, pea koutou faitohi ki te filiale.
KO HE MEʼA ʼOFA KUA FAKATUʼUTUʼU
ʼO hilifaki atu ki te ʼu meʼa ʼofa faka paʼaga ʼaia ʼaē ʼe mole honatou ʼu faka tuʼakoi pea mo te ʼu meʼa ʼofa ʼaē ʼe faka tuʼakoi, ʼe toe ʼi ai te tahi ʼu faʼahiga fai meʼa ʼofa moʼo lagolago ki te haʼele lelei ʼo te gāue faka malamanei ʼo te Puleʼaga. ʼE kau kiai te ʼu meʼa ʼaenī:
Polices dʼassurance: ʼE feala ke foaki ki te Sosiete Watch Tower he police dʼassurance peʼe ko he letelete / he posio.
Te Falā ʼi Te Fale Paʼaga: ʼO mulimuli ki te ʼu meʼa ʼaē ʼe fakamaʼua e te ʼu fale paʼaga ʼo tokotou fenua, ʼe feala ke koutou tuku te Sosiete Watch Tower ke taupau ki takotou falā ʼi te fale paʼaga, peʼe ko he compte dépôt, peʼe ko he compte de retrait personnel, peʼe feala ke fakatoʼo te ʼu meʼa ʼaia ki te Sosiete ʼi takotou mate.
Te ʼu Vahe ʼo He Matani Gāue: ʼE feala ke foaki ki te Sosiete Watch Tower te ʼu meʼa ʼaia ohage ko he meʼa ʼofa katoa, peʼe ko he fakatuʼutuʼu ʼe faka fealagia ai kia ia ʼaē ʼe ina foaki ke hoholo atu tana maʼu te paʼaga.
Te ʼu Kele Pea Mo Te ʼu Nofoʼaga: ʼE feala ke tou foaki te ʼu koloā ʼaia ʼaē ʼe feala hanatou fakatau, peʼe tou faka tuʼakoi ke feala hatatou fakaʼaogaʼi ʼi totatou temi maʼuli. ʼE tonu ke tou fakahā te faʼahi ʼaia ki te filiale ʼo totatou fenua ʼi muʼa ʼo tatatou foaki kiai te ʼu koloā ʼaia.
Te ʼu Pepa ʼAē ʼe Tohi Ai Te Loto Fakamuli ʼo He Tahi Pea Mo Te ʼu Kotala Fidéicommis: ʼE feala ke tou foaki he kele peʼe ko he paʼaga ki te Sosiete Watch Tower ʼo tou tohi ʼi he pepa totatou loto fakamuli, ʼo mulimuli pe ki te lao, peʼe toe feala ke tou fai te kotala fidéicommis ʼaē ʼe ʼui ai ʼe maʼu anai e te Sosiete totatou ʼu koloā ʼi tatatou ʼosi mate. ʼE lagi feala ke fakasiʼisiʼi te tukuhau ʼaē ʼe tonu ke totogi e ia ʼaē ʼe ina fai te kotala ʼaia, mo kapau ʼe fai mo te kautahi faka lotu. Ko nātou ʼaē ʼe nātou fia ʼiloʼi he faʼahiga meʼa ʼo ʼuhiga mo te ʼu fakatuʼutuʼu ʼo te foaki ʼo he ʼu meʼa ʼofa, ʼe tonu ke nātou faitohi ki te filiale ʼo tonatou fenua.
[Paki ʼo te pasina 26]
Koteā ʼaē neʼe ina uga ai te ʼu ʼuluaki Kilisitiano ke nātou loto fia foaki?