Koutou Agaʼofa ʼi Te Malamanei ʼAē ʼe Agakovi
Ko te meʼa ʼaē ʼe leleiʼia ai te tagata ʼe ko tana agaʼofa.”—Tāʼaga Lea 19:22.
1. He koʼe ʼe feala ke faigataʼa te fakahā ʼo te agaʼofa?
ʼE KOUTOU manatu koa ʼe koutou agaʼofa? Kapau koia, pea ʼe feala ke faigataʼa kia koutou te maʼuli ʼi te malamanei ia ʼaho nei. ʼE moʼoni, ʼe ʼui e te Tohi-Tapu ʼe kau te agaʼofa ʼi “te fua ʼo te laumālie,” kae he koʼe ʼe maʼugataʼa te agaʼofa ʼi te ʼu fenua ʼaē ʼe ʼui ʼe lotu faka Kilisitiano? (Kalate 5:22, MN ) Ohage ko te meʼa ʼaē neʼe tou vakaʼi ʼi te alatike ki muʼa atu, ʼe tou lava maʼu te koga ʼo te tali ʼi te ʼu palalau ʼaē neʼe tohi e te ʼapositolo ko Soane: Ko te malamanei katoa ʼe puleʼi e te laumālie agakovi, ko Satana te Tevolo. (1 Soane 5:19) Neʼe ʼui e Sesu Kilisito ko Satana “te pule o te malama-nei.” (Soane 14:30) Koia ʼaē ʼe tatau ai te agakovi ʼa te malamanei pea mo ia ʼaē ʼe ina puleʼi.—Efeso 2:2.
2. Ko te ʼu faigataʼaʼia fea ʼaē ʼe feala ke malave ki tatatou fia agaʼofa?
2 ʼE tou maʼuli mamahi mokā gaohi koviʼi tatou. ʼE feala ke agakovi mai he tahi ʼi totatou vāhaʼa fale, peʼe ko he kau matāpule, māʼiape la mo he ʼu kaumeʼa pea mo te famili. ʼE feala ke tou lotomamahi ʼi tatatou logo tuʼumaʼu ki te tauvele ʼa te hahaʼi pea mo tanatou kalaga, pea mo palalau ki he ʼu meʼa heʼeʼaoga. ʼI te mole agaʼofa ʼa te hahaʼi ʼe feala mo tatou ke mole tou agaʼofa, pea ʼe lagi tou manatu anai kapau ʼe nātou agakovi mai pea ʼe tonu ke tou agakovi age kia nātou. Ko te aga ʼaia ʼe feala ke fua kovi kia tatou ʼi te faʼahi fakalaumālie pea mo fakasino.—Loma 12:17.
3. Koteā te ʼu fihifihia maʼuhiga ʼaē ʼe hoko ki te hahaʼi ʼo faigataʼa ai tanatou fakahā te agaʼofa?
3 ʼE toe lagi faigataʼa kia tatou hatatou agaʼofa, ʼuhi ko te ʼu ʼaluʼaga fakatupu hoha ʼi te malamanei. Ohage la, ʼe maʼuli hoha te malamanei ʼuhi ko te hahaʼi fai fakapō, ʼaē ʼe nātou fia fakaʼaogaʼi te ʼu mahafu faka nukeleʼea peʼe ko te ʼu mahafu ʼaē ʼe nātou faka mafola te mahaki. Tahi ʼaē meʼa, ko te ʼu lauʼi miliona hahaʼi māsisiva, ʼe mole lahi tanatou meʼa kai, mole lelei tonatou nofoʼaga, mo tonatou ʼu mutuʼi meʼa, pea mo te ʼu meʼa faitoʼo. ʼE faigataʼa hatatou fakahā te agaʼofa ʼi te ʼaluʼaga fakaʼofaʼofa ʼo te malamanei.—Tagata Tānaki 7:7.
4. Koteā te ʼu manatu hala ʼaē ʼe feala ke maʼu e ʼihi ki te fakahā ʼo te agaʼofa ki te hahaʼi?
4 ʼE faigafua ki he tahi hana manatu ʼe mole maʼuhiga ke agaʼofa pea ʼe ko he fakaʼiloga ʼaia ʼo he vaivaiʼaga. ʼE feala hana manatu ʼe gaohi koviʼi ia ia, tāfito la mo kapau ʼe mole tokagaʼi e he tahi te ʼu meʼa ʼaē ʼi tona loto. (Pesalemo 73:2-9) Kae ʼe foaki mai e te Tohi-Tapu te takitaki ʼaē ʼe lelei ʼo ina ʼui fēnei: “Mokā malū he tali, pea ʼe ina tekeʼi te ʼita, kae ko he palalau fakatupu lotomamahi, ʼe ina fakahake te ʼita.” (Tāʼaga Lea 15:1) Ko te agamālū pea mo te agaʼofa ʼe kau ki te fua ʼo te laumālie pea ʼe nā ʼalutahi pea mo ʼaoga mokā tou tau mo te ʼu fihifihia peʼe ko he ʼu ʼaluʼaga faigataʼa.
5. Koteā ʼihi ʼaluʼaga ʼo te maʼuli ʼe tonu ai ke tou fakahā te agaʼofa?
5 Mai tona ʼaluʼaga ʼaē ʼe maʼuhiga ʼaupito kia tatou kau Kilisitiano ke tou fakahā te fua ʼo te laumālie maʼoniʼoni ʼo te ʼAtua, koia ʼe tonu ke tou vakaʼi peʼe tou lava fakahā feafeaʼi te kalitate ʼaē ko te agaʼofa. ʼE feala koa ke tou agaʼofa ʼi he mālama ʼe agakovi? Kapau ʼe feala, pea ko te ʼu ʼaluʼaga fea ʼaē ʼe feala ai ke tou fakamoʼoni ʼe mole tou tuku ke malave te mālohi ʼo Satana ki tatatou fakahā te agaʼofa, tāfito la ʼi te ʼu ʼaluʼaga faigataʼa? Tou vakaʼi peʼe feafeaʼi hatatou fakahā te agaʼofa ʼi te famili, ʼi te fale gāue, ʼi te faleako, ki ʼotatou ʼu vāhaʼa fale, ʼi totatou minisitelio, pea ki totatou ʼu tēhina mo tuagaʼane.
Te Agaʼofa ʼi Te Famili
6. He koʼe ʼe maʼuhiga ʼaupito ke maʼu te agaʼofa ʼi te famili, pea ʼe lava fakahā feafeaʼi?
6 Ke feala ke tapuakina tatou pea mo takitaki tatou e Sehova, ʼe tonu ke tou maʼu katoa te fua ʼo te laumālie. (Efeso 4:32) Tou talanoa ki te ʼaoga ʼaē ki te famili ke nātou feagaʼofaʼaki. ʼI tanā ʼu felogoi ʼi te ʼaho fuli, ʼe tonu ki te tagata ʼohoana pea mo tona ʼohoana ke nā feagaʼofaʼaki pea mo fefakaʼapaʼapaʼaki ia nāua mo tanā fānau. (Efeso 5:28-33; 6:1, 2) ʼE hā te agaʼofa ʼaia ʼi tanatou palalau, ʼo fakaʼapaʼapa te fānau ki tanatou ʼu mātuʼa pea mo gaohi fakalelei e te ʼu mātuʼa tanatou ʼu fānau. Koutou vikiʼi ia nātou kae ʼaua naʼa koutou valokiʼi tuʼumaʼu ia nātou.
7, 8. (a) Ko te faʼahiga aga fea ʼaē ʼe tonu ke tou tekeʼi mo kapau ʼe tou fia fakahā he agaʼofa moʼoni ʼi te famili? (b) ʼE tokoni feafeaʼi te felogoi lelei ʼa te famili ke liliu ko he famili mālohi? (c) ʼE koutou lava fakahā feafeaʼi te agaʼofa ʼi tokotou famili?
7 Moʼo fakahā te agaʼofa ki totatou famili, ʼe tonu ke tou mulimuli ki te tokoni ʼaenī ʼa te ʼapositolo ko Paulo: “Koutou situà kia meafuape alâ: te itaita, te agakovi, te tauvele mai outou gutu.” ʼI te ʼaho fuli pe, ʼe tonu ki te famili ke fepalalauʼaki ʼaki he aga fakaʼapaʼapa. Koteā tona tupuʼaga? Ka felogoi lelei te famili pea ʼe liliu ko he famili mālohi. Ka hoko he ʼu tokakovi faka famili, koutou faigaʼi ke koutou fakatokatoka te fihifihia, kae ʼaua naʼa koutou faiga ke koutou mālo ʼi te fihi ʼaia. Ko he loto fale ʼe fiafia ʼe nātou faiga anai ke nātou agaʼofa pea mo tokaga ki te ʼu meʼa ʼaē ʼi te loto ʼo ʼihi.—Kolose 3:8, 12-14.
8 Ko te agaʼofa ʼe ko he kalitate ʼe fakaloto mālohi pea mo ina uga tatou ke tou fai te meʼa ʼaē ʼe lelei ki te hahaʼi. Koia, tou faiga ke tou tokoni pea mo tokakaga fakalelei ki totatou famili. ʼE tonu ke tou tahi faiga fuli ke tou fakahā ia te agaʼofa ʼaē ka fua lelei ki te famili. ʼE nātou maʼu anai te tapuakina ʼa te ʼAtua, pea ʼi te kokelekasio pea mo te kolo, ʼe nātou faka maʼuhigaʼi ai ia Sehova, te ʼAtua ʼo te agaʼofa.—1 Petelo 2:12.
Te Agaʼofa ʼi Te Fale Gāue
9, 10. Koutou fakamatala he ʼu fihifihia ʼe feala ke hoko ʼi te fale gāue, pea koutou fakahā peʼe feafeaʼi tona fakatokatoka ʼaki he agaʼofa?
9 Ki he Kilisitiano, ʼe feala ke faigataʼa hana fakahā te agaʼofa ki tona ʼu kaugā gāue. Ko te fakataupiepie ʼa te kau gāue ʼe feala ke fakatupu kovi ki te gāue ʼa he tahi ʼuhi ko te aga kākā ʼa he tagata gāue, ʼo talanoa kovi ki te patolo ʼo ʼuhiga mo ia. (Tagata Tānaki 4:4) ʼE mole faigafua te fakahā ʼo te agaʼofa ʼi te ʼu ʼaluʼaga ʼaia. Kae koutou manatuʼi, ko he kaugana ʼa Sehova ʼe tonu ke faiga ke felogoi lelei mo nātou ʼaē ʼe mole faʼa agalelei, koteʼuhi ʼe lelei age ke koutou fai tuʼumaʼu te aga ʼaē ʼe lelei. ʼE tou lava fai te faʼahi ʼaia mo kapau ʼe tou agaʼofa. ʼE lagi feala ke koutou ʼofa ki he kaugā gāue mo kapau ʼe mahaki peʼe ko he tahi ʼi tona famili. ʼE feala ke ʼi ai hona ʼu fua lelei ki he tahi mo kapau ʼe tou fehuʼi age peʼe lelei pe peʼe feafeaʼi tona famili. ʼE moʼoni, kapau ʼe nātou lotolelei kiai, pea ʼe feala ki te kau Kilisitiano ke nātou faiga ki te felogoi lelei ʼaki pea mo te tokalelei. ʼI ʼihi temi ʼe tupu he ʼu felogoi lelei he neʼe tou fai he ʼu palalau lelei.
10 ʼI ʼihi ʼaluʼaga, ko he patolo ʼe lagi ina fakakinauʼi ke tali e tana kau gāue tana ʼu manatu, ke nātou kau ki he ʼu meʼa faka politike peʼe ko he ʼu lafeti ʼe mole ʼalutahi mo te Tohi-Tapu. Ka mole tali e te leʼo ʼo loto ʼo he Kilisitiano ke kau kiai, ʼe feala ke hoko ai he fihifihia mo te patolo. ʼI te temi ʼaia, ʼe mole fakapotopoto anai te fakamatala fuli ʼo te kovi ʼo te ʼu meʼa ʼaē ʼe loto kiai ia te patolo. Maʼa nātou ʼaē ʼe mole nātou lotu tahi mo tatou, ʼe mole nātou koviʼia mo kapau ʼe tou kau ki tanatou ʼu gaohi meʼa. (1 Petelo 2:21-23) ʼE lagi feala ke koutou fakamahino ʼaki he agaʼofa te ʼu tupuʼaga ʼo takotou mole kau kiai. Kapau ʼe nātou fai atu he ʼu palalau kovi, pea ʼaua naʼa koutou tali ʼaki he ʼu palalau kovi. ʼE lelei ki he Kilisitiano ke mulimuli ki te tokoni ʼaē ia Loma 12:18 (MN ): “Kapau ko he meʼa ʼe feala, tāfito mo kapau ko he meʼa ʼe fakalogo kia koutou, koutou maʼuli ʼi te tokalelei mo te tagata fuape.”
Te Agaʼofa ʼi Te Faleako
11. Koteā te ʼu faigataʼaʼia ʼe tau mo te kau tūpulaga ʼi te fakahā ʼo te agaʼofa ki te ʼu kaugā ako?
11 ʼE feala ke faigataʼa ʼaupito ki te kau tūpulaga hanatou agaʼofa ki tonatou ʼu kaugā ako. ʼI te agamāhani, ʼe kumi e te kau tūpulaga ke tali ia nātou e tonatou ʼu kaumeʼa. Ko ʼihi tama ʼe nātou faigaʼi ke fakaʼapaʼapaʼi nātou, ʼo nātou fai he ʼu agamālohi pea mo gaohi koviʼi ʼihi kau ako ʼi te faleako. (Mateo 20:25) Ko ʼihi tūpulaga ʼe nātou leleiʼia te fakahā ʼo tanatou poto ʼi te ako, peʼe ʼi te faigaoʼi, peʼe ʼi te tahi atu ʼu gāue. ʼI tanatou fakahāhā tanatou poto, ʼi te agamāhani ʼe nātou agakovi ki te tahi kau ako, heʼe nātou manatu hala ʼe nātou māʼoluga age ʼi ʼihi, ʼuhi ko tanatou poto. ʼE tonu ke tokaga te tūpulaga Kilisitiano naʼa faʼifaʼitaki kia nātou ʼaia. (Mateo 20:26, 27) Neʼe ʼui e te ʼapositolo ko Paulo ko “te ʼofa ʼe kātaki fualoa pea mo agaʼofa” pea ko te ʼofa “ ʼe mole laupisi, ʼe mole fialahi.” Koia ʼe tonu ai ki te Kilisitiano ke mole mulimuli ki te faʼifaʼitaki kovi ʼo nātou ʼaē ʼe agakovi, kae ke fakalogo ki te fakatokaga ʼa te Tohi-Tapu ʼo ʼuhiga mo tana ʼu felogoi mo te kau ako.—1 Kolonito 13:4, MN.
12. (a) He koʼe ʼe feala ke faigataʼa ki he kau tūpulaga ke nātou agaʼofa ki tonatou kau faiako? (b) Ko ai ʼaē ʼe tonu ke kumi tokoni kiai te kau tūpulaga ʼi te temi ʼaē ʼe faigataʼa ai hanatou agaʼofa?
12 ʼE tonu foki ke agaʼofa te kau tūpulaga ki tonatou kau faiako. ʼE tokolahi te tamaliki ako ʼe nātou leleiʼia te fakakinakinaʼi ʼo tonatou kau faiako. ʼI tanatou manatu ʼe ko he agapoto tanatou mole fakaʼapaʼapa ki tonatou kau faiako, ʼo nātou fai he ʼu aga ʼe fakafeagai ki te ʼu lao ʼa te faleako. ʼE nātou fakamatakuʼi ʼihi kau tūpulaga ke nātou mulimuli ia nātou. Ka fakafisi he Kilisitiano tūpulaga ke mulimuli ia nātou, pea ʼe vāʼi ia ia peʼe laukoviʼi. ʼI te faleako, ʼe ko he ʼahiʼahi ki he Kilisitiano hana fakahā te agaʼofa ʼi te ʼu ʼaluʼaga ʼaia. Kae koutou manatuʼi ʼe maʼuhiga ʼaupito ke koutou kaugana agatonu kia Sehova. ʼAua naʼa galo kia koutou, ko Sehova ʼe tokoni atu anai ʼaki tona laumālie ʼi te ʼu temi faigataʼa ʼaia ʼo tokotou maʼuli.—Pesalemo 37:28.
Tou Agaʼofa Ki Totatou ʼu Vāhaʼa Fale
13-15. Koteā ʼaē ʼe feala ke faigataʼa ai hatatou agaʼofa ki totatou ʼu vāhaʼa fale, pea ʼe tou lava tauʼi feafeaʼi te ʼu faigataʼaʼia ʼaia?
13 Peʼe koutou nonofo ʼi he ʼapi, peʼe ʼi he koga fale, peʼe ʼi he tahi koga meʼa, kae ʼe feala ke koutou fakakaukauʼi te ʼu faʼahi ʼaē ʼe feala ai ke koutou agaʼofa pea mo fakahā ai takotou tokaga ki tokotou ʼu vāhaʼa fale. ʼE mole faigafua tuʼumaʼu te faʼahi ʼaia.
14 E feafeaʼi mo kapau ʼe mole leleiʼia koutou e tokotou vāhaʼa fale ʼuhi ko tokotou lanu peʼe ko takotou lotu? E feafeaʼi mo kapau ʼi ʼihi temi ʼe nātou agakovi atu peʼe mole nātou tokagaʼi koutou? ʼI totatou ʼuhiga kaugana ʼa Sehova, ʼe fua lelei anai mo kapau ʼe tou faiga ke tou fakahā te agaʼofa. ʼE koutou kehe anai mo nātou, ʼo koutou fakavikiviki moʼoni kia Sehova, te faʼifaʼitaki ʼo te agaʼofa. ʼE mole koutou ʼiloʼi te temi ʼaē ka lagi fetogi ai tokotou vāhaʼa fale ʼuhi ko takotou agaʼofa. ʼE feala ke liliu ko he tahi ʼe ina vikiʼi ia Sehova.—1 Petelo 2:12.
15 ʼE tou lava fakahā feafeaʼi te agaʼofa ki totatou ʼu vāhaʼa fale? ʼUluaki, ʼaki te faʼifaʼitaki lelei ʼaē ʼe tuku e te famili, ʼi tana fakahā te fua ʼo te laumālie. ʼE feala ke fakatokagaʼi e tokotou vāhaʼa fale te faʼahi ʼaia. ʼI ʼihi temi, ʼe feala ke koutou fai he meʼa lelei maʼa tokotou vāhaʼa fale. Koutou manatuʼi, ko he tahi ʼe agaʼofa ʼe ina fai he meʼa ʼe lelei maʼa te hahaʼi.—1 Petelo 3:8-12.
Tou Agaʼofa ʼi Totatou Minisitelio
16, 17. (a) He koʼe ʼe maʼuhiga ke tou agaʼofa mokā tou fai faka mafola ʼi te ʼu koga meʼa ʼaē ʼe kaugamālie ai te hahaʼi? (b) ʼE tou lava fakahā feafeaʼi te agaʼofa ʼi te ʼu faʼahi kehekehe ʼo te minisitelio?
16 ʼE tonu ke tou agaʼofa ʼi totatou minisitelio faka Kilisitiano, ʼo tou faiga ke tou maʼu te hahaʼi ʼi tonatou ʼu ʼapi, ʼi tonatou ʼu fale gāue, pea mo te ʼu koga meʼa ʼaē ʼe feʼoloʼaki ai te hahaʼi. ʼE tonu ke tou manatuʼi ʼe tou fakafofoga ia Sehova, ia ia ʼaē ʼe agaʼofa tuʼumaʼu.—Ekesote 34:6.
17 Ko te ʼu faʼahi fea ʼaē ʼe tonu ke koutou toe faiga ai ke koutou agaʼofa ʼi tokotou minisitelio? Ohage la, ʼi takotou fai faka mafola ʼi te ala, ʼe feala ke koutou agaʼofa ʼo fai palalau fakanounou pea mo koutou aga fakaʼapaʼapa mokā koutou palalau ki te hahaʼi ʼaē ʼe feʼoloʼaki. ʼI te ʼu kauʼala, tou tokakaga ke mole tou tāʼofi te feʼoloʼaki ʼa te hahaʼi. Pea ka tou fai faka mafola ʼi te ʼu fale koloā, tou agaʼofa ʼo tou fakanounou tatatou palalau, ʼo tou manatuʼi ʼe ʼi ai te ʼu hahaʼi ʼe ʼōmai ki te ʼu fale koloā.
18. He koʼe ʼe tonu ke tou fakasiosio tonu mokā tou fakahā te agaʼofa ʼi totatou minisitelio?
18 Tou aga fakaʼeteʼete mokā tou fai faka mafola ʼi te ʼu ʼapi. ʼAua naʼa koutou nonofo fualoa fau ʼi he loto fale, tāfito la mo kapau ʼe tuʼu kovi. ʼI te fai faka mafola, ʼe koutou ʼiloʼi koa te temi ʼaē ʼe mole kei fia fakalogo ai te hahaʼi peʼe ko te temi fea ʼaē ʼe nātou ʼiʼita ai? ʼI tokotou fenua, ʼe lagi fai faka mafola tuʼumaʼu te kau Fakamoʼoni ʼa Sehova. Kapau koia, koutou fakaʼapaʼapa ki te hahaʼi, ʼo koutou agaʼofa pea mo agalelei tuʼumaʼu. (Tāʼaga Lea 17:14) Koutou faiga ke koutou ʼiloʼi te tupuʼaga ʼo te mole fia fakalogo atu ʼa he tahi ʼi te ʼaho ʼaia. Koutou manatuʼi ʼe feala anai ke ʼaʼahi e tokotou ʼu tēhina peʼe tuagaʼane te ʼapi ʼaia ki muli age. Kapau ʼe koutou felāveʼi mo he tahi ʼe agakovi atu, koutou faiga lahi ke koutou agaʼofa. ʼAua naʼa koutou leʼolahi kae ke koutou palalau ʼaki he leʼo mālū. Ko he Kilisitiano ʼe agaʼofa ʼe mole fia fihi anai mo he tahi ʼo ʼuhiga mo he ʼu manatu ʼe mole na felogoi ai. (Mateo 10:11-14) ʼE lagi ʼi ai anai he ʼaho ʼe fakalogo anai ki te logo lelei.
Tou Agaʼofa ʼi Te ʼu Fono
19, 20. He koʼe ʼe ʼaoga ke tou agaʼofa ʼi te kokelekasio, pea ʼe tou lava fakahā feafeaʼi?
19 ʼE toe maʼuhiga ke tou agaʼofa ki totatou ʼu tēhina mo tuagaʼane. (Hepeleo 13:1) Mai tona ʼaluʼaga ʼaē ʼe tou kau ki te fale tautēhina ʼi te malamanei, ʼe maʼuhiga ke tou feagaʼofaʼaki.
20 Kapau ʼe fono e he ʼu kokelekasio e lua peʼe laka atu ʼi he Fale ʼo te Puleʼaga e tahi, pea ʼe maʼuhiga ke tou agaʼofa mo nātou ʼo te tahi ʼu kokelekasio, ʼo tou fakaʼapaʼapa kia nātou. Ko te fakataupiepie ʼe mole tokoni ki te gāue tahi, mokā tonu ke felogoi ʼo ʼuhiga mo te ʼu hola fono pea mo te ʼu meʼa ʼaoga ohage ko te fakamaʼa peʼe ko te toe gaohi ʼo te fale. Koutou agaʼofa pea mo fakaʼapaʼapa māʼiape la mokā mole koutou manatu tahi. ʼE mālo anai te agaʼofa, pea ʼe tapuakina moʼoni anai e Sehova takotou tokagaʼi te lelei ʼo ʼihi.
Koutou Haga Fakahā Te Agaʼofa
21, 22. Ohage ko tona ʼui ia Kolose 3:12, koteā ʼaē ʼe tonu ke tou fakatotonu ke tou fai?
21 ʼUhi ʼaē ko te agaʼofa ʼe ko he kalitate ʼe katoa, koia ʼe malave ai ki te ʼu faʼahi fuli ʼo totatou maʼuli. Koia ʼe tonu ai ke liliu ko te koga tāfito ʼaia ʼo totatou ʼulugaaga faka Kilisitiano. ʼE tonu ko he agamāhani hatatou agaʼofa ki te hahaʼi.
22 ʼOfa pe ke tou agaʼofa ki te hahaʼi ʼi te ʼaho fuli pea mo tou maʼuliʼi takitokotahi te ʼu palalau ʼaenī ʼa te ʼapositolo ko Paulo: “Ohage ko he ʼu hahaʼi neʼe filifili e te ʼAtua, ko he ʼu hahaʼi maʼoniʼoni pea mo ʼofainaʼi, koutou kofuʼi te ʼu ʼofa mamahi ʼo te manavaʼofa, te agaʼofa, te agavaivai, te agamālū pea mo te kātaki fualoa.”—Kolose 3:12, MN.
ʼE Kei Koutou Manatuʼi Koa?
• Koteā ʼaē ʼe feala ke faigataʼa ai ki he Kilisitiano hana agaʼofa?
• He koʼe ʼe maʼuhiga ke tou agaʼofa ʼi te famili?
• Koteā ʼaē ʼe feala ke faigataʼa ai te fakahā ʼo te agaʼofa ʼi te faleako, ʼi te fale gāue, pea mo totatou vāhaʼa fale?
• Koutou fakamahino peʼe lava fakahā feafeaʼi e te kau Kilisitiano te agaʼofa ʼi te minisitelio.
[Paki ʼo te pasina 18]
Kapau ʼe feagaʼofaʼaki te famili, pea ʼe maʼu ai te logo tahi pea mo te fetokoniʼaki
[Paki ʼo te pasina 19]
ʼE feala hakotou agaʼofa ʼi te temi ʼaē ʼe mahaki ai hokotou kaugā gāue peʼe ko tona famili
[Paki ʼo te pasina 20]
ʼE tokoni Sehova kia nātou ʼaē ʼe nātou agaʼofa tuʼumaʼu kae mole nātou manukiʼi
[Paki ʼo te pasina 21]
ʼE tou agaʼofa ki te hahaʼi ʼo tokoni kia nātou