He Koʼe Koa ʼe Mole Logo Tahi Te Malamanei?
“Talu mai te Lua Tau Faka Malamanei, ko te hoki logo tahi ʼaenī ʼo te ʼu puleʼaga ʼo te ʼu fenua fuli pe. . . . ʼE feala ai ki te malamanei ke ina maʼu te faigamālie moʼo fakatuʼu te fakapapau ʼaē neʼe fai talu mai fualoa ʼo ʼuhiga mo he mālama foʼou.”
KO TE ʼu palalau ʼaia neʼe fai e te pelesita ʼo Amelika ʼi te ʼu taʼu fakamuli e hogofulu ʼo te 20 sēkulō. ʼI te temi ʼaia, neʼe hage neʼe kua ʼamanaki logo tahi ia te malamanei ʼuhi ko te ʼu meʼa ʼaē neʼe hoko ʼi te ʼu fenua fuli. Neʼe kamata fakahifo takitahi te ʼu puleʼaga ʼaē neʼe aga fefeka. Neʼe kamata te temi foʼou ʼi Eulopa, he neʼe maumauʼi te Kaupā ʼo Berlin. Neʼe punamaʼuli ia te malamanei ʼi tanatou sio ki te molehi ʼo te Puleʼaga Sovietike, ʼaē neʼe ʼui ʼi te ʼu fenua lalahi ʼaē ʼe mole Komunisi, neʼe ina fakatupu te ʼu tau ʼaē ʼe hoko ʼi te malamanei. Neʼe fakaʼosi te Tau Momoko, pea neʼe fai te ʼu akonaki fakafiafia ʼo ʼuhiga mo te maumauʼi ʼo te ʼu mahafu tau, pea mo te ʼu pulu faka nukeleʼea. ʼE moʼoni, neʼe hoko te tau ʼi te Golfe Persique, kae neʼe ko he fihifihia faka temi pe ia, he neʼe toe faiga mālohi ia te malamanei ke maʼuli ʼi te tokalelei.
Neʼe mole gata pe ʼi te faʼahi faka politike ia te ʼu fetogi lelei ʼaē neʼe hoko, kae neʼe kau ai mo te tahi ʼu faʼahi ʼo te maʼuli. Neʼe lahi te ʼu fenua ʼi te malamanei neʼe hikihiki ai te ʼaluʼaga ʼo te maʼuli ʼa te hahaʼi. ʼAki te haʼele ki muʼa ʼo te ʼu gāue faka tōketā neʼe feala ai ke fakahoko he ʼu faitoʼo foʼou neʼe mole feala ke fai ʼi te ʼu taʼu ʼi muʼa atu. Neʼe lahi te ʼu fenua neʼe tuputupu vave tonatou maʼuli faka ekonomika, ʼo manatu ai e te hahaʼi ʼe maʼuli koloaʼia anai te malamanei kātoa. Neʼe hage neʼe hoko lelei ia te ʼu fakatuʼutuʼu fuli pe.
Ia ʼaho nei, hili ni ʼu taʼu, ʼe feala ke tou fai te ʼu fehuʼi ʼaenī: ‘Kua feafeaʼi ʼi te temi nei? Kofea koa te malamanei logo tahi ʼaē neʼe fakapapauʼi mai?’ ʼE hage ia ʼe mole fakaʼalu te malamanei ki te logo tahi. Kua tou sio putuputu ʼi te ʼu tala logo, ki te ʼu hahaʼi ʼe nātou fakapāʼulu ia nātou ke mamate ai niʼihi, mo te ʼu agamālohi, te mafola ʼo te ʼu mahafu ʼaē ʼe mamate ai te hahaʼi kaugamālie, pea mo te tahi ʼu ʼaluʼaga fakatuputupu maveuveu. Ko te ʼu meʼa ʼaē ʼe hoko ʼe hage ia ʼe mole nātou fakahoko te logo tahi ʼo te malamanei. Mole heʼeki faʼa fualoa, ko te tagata gāue paʼaga ʼiloa neʼe ina ʼui fēnei: ‘ ʼE mole feala ke tou tāʼofi te hoholo ʼo te agamālohi pea mo tona fakaʼāsili kovi.’
Ko Te Malamanei ʼe Logo Tahi Koa Peʼe Mavetevete?
ʼI te temi ʼaē neʼe fakatuʼu ai te ʼAtu Puleʼaga Fakatahi, neʼe fakatuʼutuʼu e te kautahi ʼaia ke ina “fakatuputupu he ʼu felogoi fakakaumeʼa ʼi te ʼu fenua, ʼo fakatafito ki te fakaʼapaʼapa ki te ʼu meʼa ʼaē ʼe feala ke fai e te hahaʼi pea mo tanatou filifili te puleʼaga ʼaē ʼe nātou loto kiai.” Hili kiai teitei taʼu e 60, neʼe ʼi ai koa hona fua? Kailoa ia! Neʼe mole hoko “he ʼu felogoi fakakaumeʼa,” kae ko te meʼa ʼaē neʼe hage neʼe tokaga tāfito kiai te ʼu puleʼaga, ko te ‘filifili faʼifaʼitaliha e te hahaʼi ia te puleʼaga ʼaē ʼe nātou loto kiai.’ Ko te hahaʼi pea mo te ʼu kūtuga lanu tahi ʼaē ʼe nātou faiga ke nātou fakatuʼu tonatou puleʼaga ʼa nātou totonu, neʼe nātou faka ʼāsili te mavetevete ʼa te malamanei. ʼI te temi ʼaē neʼe fakatuʼu ai te ʼAtu Puleʼaga Fakatahi neʼe ko puleʼaga e 51. Ia ʼaho nei, ko puleʼaga e 191.
Ohage ko te meʼa ʼaē neʼe tou vakaʼi, ʼi te fakaʼosi ʼo te 20 sēkulō, neʼe manatu e te tokolahi ʼe logo tahi anai te malamanei. Talu mai ai, kua puli te ʼamanaki ʼaia he neʼe sio te hahaʼi ki te mavetevete māmālie ʼa te malamanei. Ko te molehi ʼo te puleʼaga ʼo Iukoselavia ʼi te tau fakamataku ʼaē neʼe hoko, te fetauʼaki ʼo Tchétchénie pea mo Lusia, te tau ʼi Ilakia, pea mo te hoholo ʼo te mātea ʼi te ʼu tau ʼaē ʼe fai ʼi te ʼu fenua Alape ʼo Te Potu Esite—ʼe ko he ʼu fakamoʼoni ʼaia ʼo he toe mavetevete lahi.
ʼE mahino ia neʼe lahi te ʼu faiga fakamalotoloto pea mo lelei moʼo fakatuʼu te tokalelei. Kae ʼe hage ʼe mole feala ke maʼu te logo tahi. Tokolahi ʼe nātou feʼekeʼaki fēnei: ‘He koʼe ʼe faigataʼa te maʼu ʼo te logo tahi? ʼE feafeaʼi anai te ʼaluʼaga ʼo te malamanei?’
[Haʼuʼaga ʼo te ʼu paki pasina 3]
AP Photo/Lionel Cironneau
Arlo K. Abrahamson/AFP/ Getty Images