ʼE Feafeaʼi Anai Te ʼAluʼaga ʼo Te Malamanei?
TE LOGO TAHI ʼO TE MALAMANEI, ko he faʼahi ʼe tou leleiʼia. ʼE mole fakaʼamu koa te hahaʼi fuli ki te faʼahi ʼaia? ʼE moʼoni, ʼe lahi te palalau ʼo ʼuhiga mo te logo tahi. Neʼe lahi te ʼu fono neʼe fai e te kau takitaki ʼo te malamanei moʼo talanoa ʼo ʼuhiga mo te logo tahi. ʼI ʼAukusitō 2000, ko te kau takitaki lotu e toko 1 000 tupu neʼe nātou fakatahitahi ʼi te fale ʼo te ʼAtu Puleʼaga Fakatahi ʼi New York, ki te Fono Maʼuhiga ʼo Te Tokalelei Faka Malamanei ʼo Te ʼu Taʼu e Afe. Neʼe nātou tālaga ʼo ʼuhiga mo te ʼu puleʼaki ki te ʼu tau ʼi te malamanei. Kae neʼe hā ʼi te fono ʼaia te ʼu fihi ʼaē kei hoko ʼi te malamanei. Ko te tagata mai Selusalemi ʼe ina fakamahino te lao Mahometa neʼe mole fia kau ki te fono ʼaia he neʼe kau ai te tagata lapi Sutea. Ko ʼihi ʼo te fono neʼe mole nātou leleiʼia te mole fakaafe ʼa te Dalaï-Lama ki te ʼu ʼuluaki ʼaho e lua, heʼe ko nātou ʼaē neʼe nātou fakatuʼutuʼu ia te fono ʼaia neʼe nātou tuʼaniaʼi naʼa nātou tokakovi mo Siaina.
ʼI ʼOketopeli 2003, ʼi Tailani, neʼe fai ʼi te Coopération économique Asie-Pacifique (Ko Te Gāue Tahi ʼo Asia Mo Pasifika ʼi Te Maʼuli Faka Ekonomike, APEC), te ʼu tālaga ʼo te ʼu fenua ʼo te Pasifika ʼo ʼuhiga mo te tokalelei ʼi te malamanei. Ko te ʼu fenua e 21 ʼaē neʼe kau kiai, neʼe nātou fakapapau ke nātou molehi te ʼu kūtuga fai fakapō pea mo nātou tali te ʼu fakatuʼutuʼu ʼaē moʼo fakatuputupu te maʼuli fīmālie ʼi te malamanei kātoa. Kae lolotoga te fono ʼaia, tokolahi ʼi te kau fakafofoga neʼe nātou meo ʼo ʼuhiga mo te palalau ʼo te tahi ʼuluaki minisi, ʼaē neʼe ʼui neʼe leakovi ʼo ʼuhiga mo te kau Sutea.
He Koʼe ʼe Mole He Logo Tahi?
Logola te tuʼuga tālaga ʼaē ʼe fai ʼo ʼuhiga mo te logo tahi ʼo te malamanei, kae ʼe mole lahi he ʼu fua moʼoni ʼo te ʼu fai tālaga ʼaia. Logola te faiga fakamalotoloto ʼa te tokolahi, he koʼe ʼe mole feala ke logo tahi te malamanei ʼi te 21 sēkulō ʼaenī?
ʼE maʼu fakakoga tona tali ʼi te ʼu palalau ʼaē neʼe fai e te tahi ʼuluaki minisi ʼaē neʼe kau ki te fono APEC. Neʼe ina ʼui fēnei, “ ʼE tupu ko tatatou tauhi fakavale ki totatou fenua.” ʼE moʼoni, ʼe tauhi fakavale te hahaʼi ki tonatou fenua. ʼE tahi loto e te ʼu fenua pea mo te ʼu lanu ke nātou filifili te meʼa ʼaē ʼe nātou loto kiai. ʼE tupu te ʼu fihi, ʼuhi ko te fia pule faʼitaliha ʼa he fenua ʼo fakatahi mo te fefakataupiepieʼaki pea mo te mānumānu. ʼE lahi te ʼu ʼaluʼaga, ka tonu ke fakamuʼamuʼa peʼe ko te puleʼaga peʼe ko te hahaʼi, pea ko te puleʼaga ʼaē ʼe fakamuʼamuʼa.
ʼE moʼoni te ʼu palalau ʼaē neʼe fai e te tagata fai pesalemo ʼo ʼuhiga mo te tauhi fakavale ki te fenua, he neʼe ina ʼui fēnei ʼe ko “te mahaki ʼaē ʼe ina fakatupu te ʼu faigataʼaʼia.” (Pesalemo 91:3) ʼE hage ko he malaʼia ki te malamanei, ʼe ina taki ki he ʼu mamahi lahi. Ko te tauhi fakavale ki tota fenua pea mo te fehiʼa ʼaē ki te tahi ʼu fenua ʼe ko he meʼa kua hoko talu mai ni ʼu sēkulō. Ia ʼaho nei, ʼe kei hoko atu pe te fakatupu mavetevete ʼa te tauhi fakavale ki te fenua, pea ʼe mole feala ki te ʼu pule fakatagata ke nātou fakagata.
Tokolahi te kau pule ʼe nātou ʼiloʼi ko te tauhi fakavale ki tota fenua pea mo te manatu pe kiā kita, ʼe ko te tafitoʼaga ʼaia ʼo te ʼu fihifihia ʼo te malamanei. Ohage la ko te sikalaipe lahi ʼo te ʼAtu Puleʼaga Fakatahi ʼi te temi muʼa, ko U Thant neʼe ina ʼui fēnei: “ ʼE lahi te ʼu fihifihia ʼe tou tau mo ia ia ʼaho nei ʼuhi ko te fua ʼo te ʼu aga ʼe mole lelei . . . ʼE kau ʼi te ʼu aga ʼaia te tauhi fakavale ki tota fenua—‘ ʼe au lagolago ki toku fenua, ʼi te meʼa ʼaē ʼe lelei pea mo te meʼa ʼaē ʼe kovi.’ ” Pea ko te ʼu fenua ia ʼaho nei, ʼaki te tahi manatu pe kiā kita, ʼe nātou kole mālohi ke nātou pule faʼifaʼitaliha. Ko nātou ʼaē ʼe pule ʼe mole nātou fia tuku age te pule faʼifaʼitaliha, māʼiape la mo he kiʼi potu veliveli. Ohage la, neʼe ʼui fēnei ʼi te nusipepa International Herald Tribune ʼo ʼuhiga mo te Fakatahi ʼo Te Eulopa: “Ko te fakataupiepie pea mo te mole fefalalaʼaki ʼe ko te ʼu faʼahi tāfito ʼaia ʼo te ʼu faʼahi faka politike ʼo te Eulopa. Tokolahi te ʼu fenua ʼo te Fakatahi ʼo Te Eulopa ʼe mole nātou tali ke mālohi age pea mo lahi age te pule ʼo he tahi fenua.”
Ko te Folafola ʼa te ʼAtua, te Tohi-Tapu, ʼe ina fakamatala lelei te ikuʼaga ʼo te ʼu faʼahiga pule fakatagata kehekehe, ʼo ina ʼui fēnei: “Ko te tagata ʼe ina puleʼi te tagata ki tona malaʼia.” (Tagata Tānaki 8:9) ʼI tanatou faka mavetevete ia te malamanei ke liliu ko he ʼu puleʼaga kehekehe, ko te ʼu kūtuga tagata pea mo te hahaʼi takitokotahi neʼe nātou sisio ki te fakahoko ʼo te pelesepeto faka Tohi-Tapu ʼaenī: “Ko ia ʼaē ʼe fakatōtō tokotahi ʼe ina kumi pe anai tona lelei ʼo ia totonu, pea ʼe fakafeagai anai ki te ʼu tonu fakapotopoto fuli.”—Taʼaga Lea 18:1.
Ko totatou Tupuʼaga, ʼaē ʼe ina ʼiloʼi te meʼa ʼaē ʼe lelei maʼa tatou, neʼe mole ina fakatuʼutuʼu ke fakatuʼu e te tagata hona puleʼaga pea mo ina puleʼi ia ia totonu. ʼI tanatou fai te faʼahi ʼaia, neʼe mole tokagaʼi e te tagata te fakatuʼutuʼu ʼa te ʼAtua pea mo galo kiā natou ko meʼa fuli ʼe ʼaʼana. ʼE ʼui fēnei iā Pesalemo 95:3-5: “Ko Sehova ko te ʼAtua lahi, pea ko te Hau lahi ʼe māʼoluga age ʼi te ʼu ʼatua fuli ʼaē, ʼe maʼu ʼi tona nima te ʼu potu loloto pea mo fakalilo ʼo te kele, pea ʼe ʼaʼana ia te ʼu tumutumu ʼo te ʼu moʼuga; ʼe ʼaʼana ia te tai ʼaē neʼe ina fakatupu pea ko tona ʼu nima ʼaē neʼe nātou faʼu te kele.” Ko te ʼAtua te Tuʼi ʼAliki ʼaē ʼe tonu ke tou fakalogo fuli ki ai. ʼI tanatou tahi faiga ki tonatou pule, ʼe fakafeagai te ʼu puleʼaga ki tona finegalo.—Pesalemo 2:2.
Koteā ʼAē ʼe ʼAoga Ke Feala He Logo Tahi?
Ko te faʼahi pe e tahi ʼe feala ai ke logo tahi ai te malamanei, ʼe ko te maʼu ʼo he pule e tahi ʼi te kele kātoa ʼe tokaga moʼoni ki te ʼu meʼa ʼaē ʼe ʼaoga ki te hahaʼi. ʼE fakamoʼoni kiai te tokolahi ʼo te hahaʼi ʼaē ʼe nātou tokagaʼi te ʼaluʼaga ʼo te malamanei. Kae ko nātou ʼaia ʼi te agamāhani ʼe nātou falala ki he ʼu kautahi ʼe mole lelei. Ohage la, tokolahi ia nātou ʼaē ʼe gāue ʼi te ʼu sulunale, pea mo te kau takitaki lotu, ʼe nātou fakaloto mālohiʼi te hahaʼi ke nātou falala ki te ʼAtu Puleʼaga Fakatahi moʼo maʼu te logo tahi ʼo te malamanei. Kae ko te ʼu kautahi fakatagata, tatau aipe peʼe lelei tanatou ʼu fakatuʼutuʼu, kae neʼe mole feala ʼi he temi ke nātou fakatokatoka te ʼu fihifihia faka malamanei. Neʼe hā tāfito ʼi te ʼu kautahi ʼaia te mole felogoi tahi ʼo te ʼu puleʼaga.
ʼE fakatokaga mai ʼi te Tohi-Tapu ke ʼaua naʼa tou kumi puleʼaki ki te ʼu fakatuʼutuʼu fakatagata, heʼe ʼui fēnei ai: “ ʼAua naʼa ke tuku tau falala ki te kau ʼaliki, peʼe ki te foha ʼo te tagata ʼaē neʼe toʼo mai te kele, ʼaē ʼe mole ʼa ia te fakamaʼuli.” (Pesalemo 146:3) Ko tona faka ʼuhiga koa ʼe mole logo tahi anai ʼi he temi ia te malamanei? Kailoa, heʼe ʼi ai te ʼamanaki ʼo ʼuhiga mo te tahi puleʼaga.
Tokolahi ʼe mole nātou ʼiloʼi kua ʼosi fakatuʼu e te ʼAtua te puleʼaga ʼe feala ke ina fakalogo tahiʼi ia te malamanei. ʼE ʼui ʼi te Tohi-Tapu ʼo ʼuhiga mo Sehova ʼAtua: “Ko au, ʼio, kua au fakanofo taku hau ki Sione, toku moʼuga taputapu. Kole mai kiā te au, ke au foaki atu kiā te koe te ʼu puleʼaga ko hou tofiʼa pea mo te ʼu potu taupotu ʼo te kele ko hau ʼu koloā.” (Pesalemo 2:6, 8) Koutou tokagaʼi ʼe ʼui ʼi te vaega ʼaia ko Sehova ʼAtua kua ina ‘fakanofo tana hau,’ ʼaē ʼe ina ʼui ʼi te vaega 7 ko “[tona] ʼalo.” ʼE ko Sesu Kilisito, te ʼAlo fakalaumālie ʼaē ʼe lahi tokotahi ʼi te ʼu foha fakalaumālie ʼo te ʼAtua, pea ko ia ʼaē neʼe foaki ki ai te pule ki te ʼatu ʼu puleʼaga fuli.
Te Fakahoko ʼo Te Logo Tahi ʼo Te Malamanei
Tokolahi te hahaʼi ʼe nātou fakafisi ki te pule ʼaia neʼe fakanofo e te ʼAtua ʼi selo. ʼE faiga lahi e te ʼu puleʼaga ke nātou taupau tanatou pule. Kae ʼe mole tali anai e te ʼAtua ia nātou ʼaē ʼe mole nātou fia fakalogo ki tona pule pea mo te puleʼaga ʼaē neʼe ina fakatuʼu. ʼO ʼuhiga mo nātou ʼaē ʼe nātou fakafisi ki te fakatuʼutuʼu ʼaia, ʼe ʼui fēnei iā Pesalemo 2:9: “ ʼE ke [ia te ʼAlo, ia Sesu Kilisito] laliki anai nātou ʼaki te tokotoko ukamea, ʼe ke laliki anai ke nātou lailai ohage ko he ipu maka.” Tatau aipe peʼe nātou ʼiloʼi peʼe kailoa, kae ʼe hoko anai te fefakafeagaiʼaki ʼa te ʼu puleʼaga pea mo te ʼAtua. ʼE ʼui ʼi te tohi fakamuli ʼo te Tohi-Tapu, ko “te ʼu hau ʼo te kele kātoa” ʼe tānaki nātou “ki te tau ʼo te ʼaho lahi ʼo te ʼAtua te Māfimāfi.” (Apokalipesi 16:14, MN ) ʼE pulihi anai te ʼu puleʼaga pea mo tanatou ʼu fakatuʼutuʼu ʼaē ʼe fakatupu maveuveu. ʼE mole ʼi ai anai he tahi moʼo fakafeagai ki te fakahoko ʼo te ʼu gāue ʼo te puleʼaga ʼa te ʼAtua.
ʼI tona ʼuhiga Tuʼi ʼAliki ʼo Te ʼAtulaulau, ko Sehova ʼAtua ʼaki tona ʼAlo, ʼe ina fakaʼaogaʼi fakapotopoto anai tona mālohi moʼo fakahoko te ʼu fetogi ke feala ai ke logo tahi te malamanei. ʼE fakatuʼu anai e te puleʼaga ʼa te ʼAtua te logo tahi moʼoni pea mo ina tapuakina anai ia nātou fuli ʼaē ʼe ʼoʼofa ki te faitotonu. He koʼe ʼe mole koutou toʼo hokotou kiʼi temi moʼo lau ia Pesalemo 72 ʼi takotou Tohi-Tapu? ʼI te kapite ʼaia, ʼe tuʼu ai te lea faka polofeta ʼo ʼuhiga mo te meʼa ʼaē ka fai ʼi te malamanei lolotoga te temi pule ʼo te ʼAlo ʼo te ʼAtua. ʼE logo tahi moʼoni anai ia te hahaʼi ʼi te malamanei kātoa, pea ʼe pulihi anai mo tonatou ʼu fihifihia—te aga fefeka, mo te agamālohi, mo te masiva, pea mo te tahi ʼatu ʼu fihifihia.
Ia ʼaho nei, ʼi te malamanei ʼaē ʼe mavetevete, tokolahi ʼe nātou manatu ʼe mole feala ke hoko te ʼamanaki ʼaia. Kae ʼe nātou faihala. Neʼe hoko tuʼumaʼu pe te ʼu fakapapau ʼa te ʼAtua ʼi te temi muʼa, pea ʼe toe hoko pe anai ʼi te ka haʼu. (Isaia 55:10, 11) ʼE koutou fia sisio koa ki te fetogi ʼaia? ʼE feala anai hakotou sio ki te fetogi ʼaia. Kua ʼi ai te hahaʼi kua nātou nonofo teuteu ki te temi ʼaia. ʼE nātou ʼōmai mai te ʼu puleʼaga fuli pe, kae ʼe mole nātou fetauʼaki, heʼe nātou logo tahi ʼi te temi nei ʼo fakalogo ki te pule ʼa te ʼAtua. (Isaia 2:2-4) Ko ai ia nātou ʼaia? Ko te kau Fakamoʼoni ʼa Sehova. He koʼe ʼe mole koutou tali tanatou fakaafe ʼaē ke koutou ʼolo ki tonatou ʼu fale fono? ʼE koutou fiafia anai ʼi te fakatahi mo te hahaʼi ʼe feala ke nātou tokoni atu ke koutou fakalogo ki te pule ʼa te ʼAtua pea mo maʼu te logo tahi ʼaē ʼe heʼegata.
[Paki ʼo te pasina 7]
Ko te hahaʼi mai te ʼu puleʼaga fuli pe, kua nātou nonofo teuteu ke nātou māʼuʼuli ʼi he malamanei ʼe logo tahi
[Haʼuʼaga ʼo te paki pasina 4]
Saeed Khan/AFP/Getty Images
[Haʼuʼaga ʼo te paki pasina 5]
Woman grieving: Igor Dutina/AFP/Getty Images; protesters: Said Khatib/AFP/Getty Images; armored cars: Joseph Barrak/AFP/Getty Images