ʼE Tohi Te Lao ʼo Te ʼOfa ʼi Te ʼu Loto
“ ʼE au ʼai anai taku lao kiā nātou, pea ʼe au tohi anai ʼi ʼonatou loto.”—Selemia 31:33.
1, 2. (a) Koteā ʼaē ka tou vakaʼi ʼi te alatike ako ʼaenī? (b) Neʼe fakaʼiloga feafeaʼi e Sehova tana hifo ifo ki te Moʼuga ʼo Sinai?
ʼI TE ʼu alatike ako ʼaē kua tou vakaʼi, neʼe tou talanoa ai ki te temi ʼaē neʼe hifo mai ai Moisese mai te Moʼuga ʼo Sinai, neʼe ʼiloga te kolōlia ʼo Sehova ʼi tona fofoga. Neʼe tou toe talanoa ai ki te kie ʼaē neʼe pūlouʼi ʼaki te fofoga ʼo Moisese. ʼI te temi nei, tou vakaʼi age muʼa tona faka ʼuhiga ki te kau Kilisitiano ia ʼaho nei.
2 ʼI te temi ʼaē neʼe nofo ai ia Moisese ʼi te moʼuga, neʼe ina maʼu ai te ʼu fakatotonu mai ia Sehova. Ko te kau Iselaele neʼe nātou māʼopoʼopo ʼi te vaʼe Moʼuga ʼo Sinai, pea neʼe nātou sio ki te ʼu gāue fakaofoofo ʼa te ʼAtua. “Neʼe ʼuʼulu te ʼu mana pea mo tapa te ʼuhila, pea neʼe ʼi ai te toe ʼao mātolu ʼi te fuga moʼuga, pea mo te logo mālohi ʼo te puhi tala, koia neʼe mātataku ai ia te hahaʼi fuli ʼaē neʼe nonofo ʼi te nofoʼaga. . . . Pea neʼe kohu te moʼuga kātoa ʼo Sinai, he neʼe hifo kiai ia Sehova ʼi te afi; pea neʼe hake tona kohu ohage ko he kohu ʼo he gutuʼumu, pea neʼe galulu te moʼuga kātoa.”—Ekesote 19:16-18.
3. Ko ai ʼaē neʼe fakaʼaogaʼi e Sehova moʼo foaki te ʼu Folafola e Hogofulu ki te kau Iselaele, pea koteā ʼaē neʼe mahino kiai te hahaʼi ʼaia ʼo Iselaele?
3 Neʼe fakaʼaogaʼi e Sehova tana ʼāselo moʼo palalau ki te kau Iselaele, ʼo ina tuku age te ʼu Folafola e Hogofulu. (Ekesote 20:1-17) Koia, ko te ʼu folafola ʼaia neʼe haʼu moʼoni mai te Māfimāfi. Neʼe tohi e Sehova te ʼu folafola ʼaia ki te ʼu maka—te ʼu maka ʼaē neʼe maumauʼi e Moisese ʼi tana sio ʼaē neʼe atolasio te kau Iselaele ki te ʼuhiʼi pipi aulo. Neʼe toe tohi e Sehova ki te ʼu maka ia te ʼu folafola ʼaia. ʼI te temi ʼaē neʼe hifo mai ia Moisese mai te moʼuga, neʼe tapa gigila tona fofoga. Pea neʼe mahino leva ki te hahaʼi fuli ko te ʼu folafola ʼaia neʼe maʼuhiga ʼaupito.—Ekesote 32:15-19; 34:1, 4, 29, 30.
4. He koʼe neʼe maʼuhiga ʼaupito ia te ʼu Folafola e Hogofulu?
4 ʼI te Potu Taputapu ʼAupito ʼo te tapenakulo pea ki muli age ʼi te fale lotu, neʼe tuku ʼi te aleka ʼo te fuakava ia te ʼu maka e lua ʼaē neʼe tohi ai te ʼu Folafola e Hogofulu. Ko te ʼu lao ʼaē neʼe tohi ʼi te ʼu maka neʼe ko te ʼu pelesepeto tāfito ʼo te fuakava ʼo te Lao ʼa Moisese pea neʼe ko te tāfitoʼaga ʼaia ʼo te fakatuʼutuʼu faka teokalatike ʼo te puleʼaga ʼo Iselaele. Ko te ʼu lao ʼaia neʼe nātou fakamoʼoni ko Sehova neʼe felogoi mo te hahaʼi neʼe ina filifili ke nātou liliu ko hana hahaʼi.
5. Ko te ʼu ʼaluʼaga fea ʼaē neʼe fakatapa ai e te ʼu lao ʼa te ʼAtua ia tona ʼofa ki Iselaele?
5 ʼAki te ʼu lao ʼaia neʼe feala ke kita ʼiloʼi lelei age ia Sehova, tāfito la ia tona ʼofa ʼaē ki tana hahaʼi. Ko te ʼu lao ʼaia neʼe ko he meʼa ʼofa kiā nātou ʼaē neʼe fakalogo kiai! Neʼe ʼui e te tagata faitohi Tohi-Tapu, neʼe maʼuhiga age te ʼu lao ʼaia ʼi te ʼu lao ʼaē neʼe faʼu e te tagata. ʼO ʼuhiga mo te Lao ʼa Moisese, neʼe ʼui e Sehova: “Kapau ʼe koutou fakalogo lelei ki toku leʼo pea mo koutou taupau fakalelei taku fuakava, pea ʼe koutou liliu moʼoni anai ko taku koloā makehe ʼi te lotolotoiga ʼo te ʼu hahaʼi fuli, heʼe ʼaʼaku te kele kātoa. Pea ko koutou, ʼe koutou liliu anai maʼaku ko he puleʼaga faka pelepitelo pea ʼe ko he puleʼaga maʼoniʼoni.”—Ekesote 19:5, 6.
Ko Te Lao ʼe Tohi ʼi Te Loto
6. Ko te lao fea ʼaē neʼe maʼuhiga age ʼi te ʼu lao ʼaē neʼe tohi ʼi te ʼu maka?
6 Neʼe maʼuhiga ʼaupito te ʼu lao fakaʼatua ʼaia. Kae ʼe maʼu e te kau Kilisitiano fakanofo ia te meʼa ʼe maʼuhiga age ʼi te ʼu lao ʼaē neʼe tohi ʼi te maka. Neʼe fakakikite e Sehova te kehekehe ʼo te fuakava foʼou pea mo te fuakava ʼo te Lao ʼaē neʼe fai mo te puleʼaga ʼo Iselaele. “ ʼE au ʼai anai taku lao kiā nātou, pea ʼe au tohi anai ʼi ʼonatou loto.” (Selemia 31:31-34) Ko Sesu te Tagata Fakafofoga ʼo te fuakava foʼou, neʼe mole ina foaki ki tana ʼu tisipulo he ʼu lao neʼe tohi. ʼAki tana ʼu faiakonaki pea mo tana ʼu gāue, neʼe ina fakahū te lao ʼa Sehova ki te ʼatamai pea mo te loto ʼo tana ʼu tisipulo.
7. Neʼe ʼuluaki foaki kiā ai “te lao ʼa Kilisito,” pea ko ai ki muli age ʼaē neʼe toe fakakau kiai?
7 Ko te lao ʼaia neʼe fakahigoaʼi ko “te lao ʼa Kilisito.” Ko te lao ʼaia, neʼe mole foaki ʼuluaki ki te puleʼaga ʼo Iselaele ʼaē neʼe ko te hōloga ʼo Sakopo, kae neʼe foaki ki te puleʼaga fakalaumālie, ia “te Iselaele ʼa te ʼAtua.” (Kalate 6:2, 16, MN; Loma 2:28, 29) Ko te Iselaele ʼa te ʼAtua ʼe faʼufaʼu e te kau Kilisitiano ʼaē neʼe fakanofo ʼaki te laumālie. Ki muli age, neʼe fakatahiʼi ki te kau Kilisitiano ʼaia ia “he toe hahaʼi tokolahi” mai te ʼu puleʼaga kehekehe ʼe nātou fia tauhi mo nātou kiā Sehova. (Apokalipesi 7:9, 10, MN; Sakalia 8:23) Kua nātou liliu ko ‘te faga ōvi e tahi’ ʼe takitaki e te ‘tagata tauhi ōvi e tahi,’ ʼo mulimuli tanatou ʼu gāue fuli ki “te lao ʼa Kilisito.”—Soane 10:16.
8. Koteā ʼaē neʼe kehekehe ai te Lao ʼa Moisese pea mo te lao ʼa Kilisito?
8 Neʼe tonu ki te kau Iselaele ke nātou fakalogo ki te Lao ʼa Moisese he neʼe nātou tutupu ake ʼi te puleʼaga ʼo Iselaele, kae ko te kau Kilisitiano ʼe nātou fakalogo ki te lao ʼa Kilisito heʼe ko he meʼa neʼe nātou filifili, ʼo mole lauʼia tonatou lanu peʼe ko tonatou haʼuʼaga. ʼE nātou ako ke nātou ʼiloʼi ia Sehova pea mo tana ʼu lao, pea ʼe nātou fia fai tona finegalo. ʼE mole fakalogo te kau Kilisitiano fakanofo ki te ʼAtua ʼuhi heʼe ina tautea anai ia nātou mo kapau ʼe mole nātou fakalogo; pea ʼe mole nātou fakalogo ʼuhi pe heʼe ko honatou maʼua, kailoa, ʼe nātou fakalogo heʼe tohi te lao ʼa te ʼAtua “ ʼi ʼonatou loto.” Ko tanatou fakalogo ʼe fakatafito ki te meʼa ʼe maʼuhiga age pea mo mālohi age, pea ʼe toe fakalogo mo te tahi ʼu ōvi heʼe ko te lao ʼa te ʼAtua ʼe toe tohi ʼi ʼonatou loto.
Ko Te ʼu Lao ʼe Fakatafito Ki Te ʼOfa
9. Neʼe fakahā feafeaʼi e Sesu ko te ʼofa ʼe ko te tāfitoʼaga ʼaia ʼo te ʼu lao ʼa Sehova?
9 Ko te ʼu lao pea mo te ʼu pelesepeto fuli ʼa Sehova ʼe feala pe ke fakanounou ʼaki te kupu ʼaenī: te ʼofa. Neʼe ko he koga maʼuhiga ʼaia ʼo te tauhi moʼoni pea ʼe kei hoko atu pe. ʼI te fehuʼi age ʼaē kiā Sesu pe kofea te folafola ʼaē ʼe lahi age ʼi te Lao, neʼe ina tali fēnei age: “ ʼE tonu ke ke ʼofa kiā Sehova, tou ʼAtua, ʼaki tou loto kātoa, pea mo tou nefesi kātoa, pea mo tou laumālie kātoa.” Ko te lua folafola: “ ʼE tonu ke ke ʼofa ki tou kāiga ohage pe ko koe totonu.” ʼOsi pea neʼe ina toe ʼui fēnei: “Ki te ʼu folafola ʼaia e lua ʼe tautau kiai te Lao kātoa, pea mo te kau Polofeta.” (Mateo 22:35-40, MN ) ʼE ʼasi mai, ko te ʼu Tohi Faka Hepeleo kātoa ʼaē neʼe fakatafito ki te ʼofa, kae neʼe mole gata ʼaki pe ia te Lao ʼa Moisese pea mo te ʼu Folafola e Hogofulu.
10. ʼE tou ʼiloʼi feafeaʼi ko te ʼofa ʼe ko te fakatafitoʼaga ʼaia ʼo te lao ʼa Kilisito?
10 Ko te ʼofa ki te ʼAtua pea mo totatou tatau ʼe ko te tāfitoʼaga koa ʼaia ʼo te lao ʼaē neʼe tohi ʼi te ʼu loto ʼo te kau Kilisitiano? Ei! ʼE fakamaʼua ʼi te lao ʼa Kilisito ke kita ʼofa mo tota loto kātoa ki te ʼAtua pea ʼe pipiki kiai mo te fakatotonu foʼou—ʼe tonu ki te kau Kilisitiano ke nātou feʼofaʼofani ʼaki he loto faka sākilifisio. ʼE tonu ke nātou feʼofaʼofani ʼohage ko te ʼofa ʼaē ʼa Sesu ki tana ʼu tisipulo, pea neʼe ina foaki tona maʼuli maʼa tona ʼu kaumeʼa. Neʼe ina akoʼi tana ʼu tisipulo ke nātou ʼoʼofa ki te ʼAtua pea mo feʼofaʼofani, ohage pe ko tona ʼofa ʼaē kiā nātou. Ko te ʼofa makehe ʼaē ʼe nātou fefakahaʼaki ʼe ko te fakaʼiloga tāfito ʼaia ʼo te kau Kilisitiano moʼoni. (Soane 13:34, 35; 15:12, 13) Neʼe toe akoʼi age foki e Sesu ke nātou ʼoʼofa ki tonatou ʼu fili.—Mateo 5:44.
11. Neʼe feafeaʼi te ʼofa ʼa Sesu ki te ʼAtua pea mo te malamanei?
11 Neʼe tuku e Sesu ia te faʼifaʼitaki lelei ʼo ʼuhiga mo te fakahā ʼo te ʼofa. Logola neʼe ko te ʼāselo mālohi ʼi te lagi, kae neʼe ina tali fakafiafia te faigamālie ʼaē ke haʼu ki te kele ʼo fakatuputupu ia te ʼu gāue ʼa tana Tāmai. ʼO mole gata pe ʼi tana sākilifisioʼi ʼo tona maʼuli ke feala ki te hahaʼi ke nātou māʼuʼuli ʼo heʼegata, neʼe ina toe fakahā ki te hahaʼi ia te faʼahiga maʼuli ʼaē ʼe tonu ke nātou fai. Neʼe agavaivai, mo agaʼofa pea mo agalelei, ʼo tokoni kiā nātou ʼe mafasia pea mo lotomamahi. Neʼe ina toe fakahā “te u folafola o te mauli heegata,” pea neʼe mole fiu ʼi te tokoni ki te hahaʼi ke nātou ʼiloʼi ia Sehova.—Soane 6:68.
12. He koʼe ʼe tou ʼui ko te ʼofa ki te ʼAtua pea mo totatou tatau ʼe nā pipiki tahi?
12 Ko te ʼofa ki te ʼAtua pea mo totatou tatau ʼe nā pipiki tahi. Neʼe ʼui fēnei e te ʼapositolo ko Soane: “E haù te ofa mai te Atua . . . Kapau e lau e he tahi: ‘E au ofa ki te Atua’, pea fehia ki tona tehina, e ko he tagata kaka. He ko ae e mole ofa ki tona tehina e sio ki ai, e mole feala tana ofa ki te Atua ae e mole sio ki ai.” (1 Soane 4:7, 20) Ko Sehova ʼe ko te matapuna pea mo te ʼulugaaga ʼo te ʼofa. Ko meʼa fuli ʼe ina fai, ʼe ina fai ʼaki te ʼofa. ʼE tou ʼofa he neʼe faʼu tatou ʼo mulimuli ki tona pāki. (Senesi 1:27) Kapau ʼe tou ʼofa ki totatou tatau, pea ʼe tou ʼofa ki totatou ʼAtua.
Ko Te ʼOfa ʼe Faka ʼUhiga Ke Tou Fakalogo
13. Kapau ʼe tou ʼofa ki te ʼAtua, pea koteā ʼaē ʼe tonu ke tou ʼuluaki fai?
13 E feafeaʼi hatatou ʼofa ki te ʼAtua ʼaē ʼe mole tou lava sio ki ai? Ko te faʼahi ʼaē ʼe maʼuhiga, ke tou ako ke tou ʼiloʼi ia ia. ʼE mole feala ke tou ʼofa peʼe tou falala ki he tahi ʼe mole tou ʼiloʼi. Koia, ko te Folafola ʼa te ʼAtua ʼe ina fakaloto mālohiʼi tatou ke tou ako ke tou ʼiloʼi te ʼAtua ʼi tatatou lau ia te Tohi-Tapu, ʼi tatatou faikole, ʼi tatatou fakatahi mo nātou ʼaē kua nātou ʼiloʼi ia ia pea mo ʼofa kiā te ia. (Pesalemo 1:1, 2; Filipe 4:6; Hepeleo 10:25) ʼE maʼuhiga ʼaupito ia te ʼu Evaselio e fā, heʼe nātou fakahā ʼaki te ʼulugaaga ʼo Sehova ʼi te maʼuli pea mo te minisitelio ʼo Sesu Kilisito. ʼE tou fia fakalogo ki te ʼAtua pea mo fia faʼifaʼitakiʼi tona ʼulugaaga ʼi tatatou ʼiloʼi ia ia pea mo fakafetaʼi ki tona ʼofa ʼaē kiā tatou. ʼIo, ʼe fakamaʼua te ʼofa ʼo te ʼAtua ke tou fakalogo.
14. He koʼe ʼe tou lava ʼui ko te ʼu lao ʼa te ʼAtua ʼe mole mamafa?
14 Ka tou ʼofa ki niʼihi, ʼe tou fia ʼiloʼi te ʼu meʼa ʼaē ʼe nātou leleiʼia pea mo te ʼu meʼa ʼaē ʼe nātou fehiʼa kiai, pea ʼe tou faka ʼalutahi kiai totatou maʼuli. ʼE mole tou fia fai he meʼa ke lave kovi kiā nātou ʼaē ʼe tou ʼoʼofa kiai. Neʼe tohi fēnei e te ʼapositolo ko Soane: “Koʼenī te faka ʼuhiga ʼo te ʼofa ʼaē ki te ʼAtua: ke tou maʼuliʼi tana ʼu fakatotonu; pea ko tana ʼu fakatotonu ʼe mole mamafa ia.” (1 Soane 5:3, MN ) Ko tana ʼu fakatotonu ʼe mole mamafa pea mo lahi fau. Ko te ʼofa ʼaē ʼe ina takitaki tatatou ʼu aga. ʼE mole tou ako fakaʼatamai he ʼu tuʼuga lēkula moʼo takitaki tatatou ʼu aga fuli; ko totatou ʼofa ki te ʼAtua ʼaē ʼe ina takitaki tatou. Kapau ʼe tou ʼoʼofa ki te ʼAtua, pea ʼe tou fiafia anai ʼi te fai ʼo tona finegalo. Koia, ʼe tapuakina ai tatou e te ʼAtua, pea ʼaki tana takitaki ʼe tou maʼu tuʼumaʼu ai tona ʼu fua lelei.—Isaia 48:17.
15. Koteā ʼaē ka ina uga anai tatou ke tou faʼifaʼitakiʼi ia Sehova? Koutou fakamahino.
15 Ko te ʼofa ʼo te ʼAtua ʼe ina uga tatou ke tou faʼifaʼitakiʼi tona ʼu kalitātē. Ka tou ʼofa ki he tahi, ʼe tou leleiʼia tona ʼu kalitātē pea ʼe tou faiga ke tou hage ko ia. Tou vakaʼi age muʼa te ʼu felogoi ʼa Sehova pea mo Sesu. Neʼe nā māʼuʼuli fakatahi ʼi selo lagi ia taʼu e lauʼi afe miliale mo miliale. Neʼe tuputupu ia nāua he ʼofa ʼe lahi, mo loloto pea mo maʼa. Koia ko te ʼulugaaga ʼo Sesu neʼe tatau mo tana Tāmai ʼaē ʼe ʼi selo, ʼo feala ai tana ʼui fēnei ki tana ʼu tisipulo: “Ko ʼaē kua sio kiā te au, kua sio ia ki te Tāmai.” (Soane 14:9, MN ) Ka tou ʼiloʼi lelei ia Sehova mo tona ʼAlo pea mo tou loto fakafetaʼi kiā nāua, ʼe tupu ai hatatou fia faʼifaʼitakiʼi ia nāua. Ko totatou ʼofa kiā Sehova, pea mo te tokoni mai ʼo tona laumālie maʼoniʼoni, ʼe ina faka fealagia anai kiā tatou ke tou “toʼo kehe [totatou] ʼulugaaga ʼāfea pea mo ʼana gāue, pea ke [tou] kofuʼi te ʼulugaaga foʼou.”—Kolose 3:9, 10, MN; Kalate 5:22, 23.
Ko Te ʼOfa ʼe Mālohi
16. ʼE tou fakahā feafeaʼi ʼi te fai faka mafola pea mo tatatou faiako, ʼe tou ʼofa ki te ʼAtua pea mo totatou tatau?
16 ʼI totatou ʼuhiga Kilisitiano, ʼe tou kau ki te faka mafola ʼo te Puleʼaga pea mo te fai ʼo ni ʼu tisipulo ʼuhi ko totatou ʼofa ki te ʼAtua pea mo totatou tatau. ʼI tatatou fai ia te faʼahi ʼaia, ʼe tou fakafiafia ai ia Sehova ʼAtua, “ ʼaē ʼe ina loto ke hāofaki te faʼahiga tagata fuli pe, pea ke nātou aʼu ki te ʼatamai mālama totonu ʼo te moʼoni.” (1 Timoteo 2:3, 4, MN ) Pea ʼe tou fiafia ʼi tatatou sio ki te fetogi ʼo tonatou maʼuli moʼo fakatapa ʼo te ʼu kalitātē fakaʼatua ʼo Sehova. (2 Kolonito 3:18) ʼIo, ʼe tou lava foaki he meʼa ʼofa lelei ki te hahaʼi mo kapau ʼe tou tokoni kiā nātou ke nātou ʼiloʼi ia te ʼAtua. Ko nātou ʼaē ʼe nātou tali ke nātou kaumeʼa mo Sehova ʼe feala ke nātou maʼu te taʼi felogoi ʼaia ʼo heʼegata.
17. He koʼe ʼe tonu ke tou ʼoʼofa ki te ʼAtua pea mo totatou tatau ʼi hatatou faiga ki te ʼu koloā faka mālama?
17 ʼE tou māʼuʼuli ʼi te mālama ʼe faka maʼuhigaʼi e te hahaʼi pea mo nātou manako ki te ʼu koloā faka mālama. Kae ko te ʼu koloā faka mālama ʼe mole heʼegata. ʼE feala ke kaihaʼa peʼe popo. (Mateo 6:19) ʼE fakatokaga fēnei mai ʼi te Tohi-Tapu: “E fakamole te malama-nei mo [tona] u holi; kae kia ia ae e ina fai te finegalo o te Atua e mauli o talu ai.” (1 Soane 2:16, 17) Ei, ko Sehova ʼe mole puli anai ia ʼi he temi, pea ʼe toe feiā anai mo nātou ʼaē ʼe ʼoʼofa pea mo tauhi kiā te ia. Koia, ʼe tonu ai kiā tatou ke tou ʼoʼofa ki te ʼAtua pea mo te hahaʼi ʼi hatatou faiga ki te ʼu koloā ʼo te mālama ʼaē ko tona ʼu lelei ʼe faka temi pe ia.
18. Neʼe fakahā feafeaʼi e te tuagaʼane misionea tona ʼofa faka sākilifisio?
18 Ko nātou ʼaē ʼe nātou kumi te ʼofa ʼe nātou fakavikiviki ia Sehova. Tou vakaʼi age te faʼifaʼitaki ʼa Sonia, ia te misionea ʼi Senekale. Neʼe ina ako te Tohi-Tapu mo te fafine ko Heidi, ko te fafine ʼaia neʼe ina maʼu te mahaki ʼaē ko te Sita ʼi tona ʼohoana. ʼI te ʼosi mate ʼo tona ʼohoana, neʼe papitema ia Heidi, kae neʼe ʼāsili kovi tona mahaki pea neʼe ʼave ki te lōpitali. ʼE ʼui fēnei e Sonia: “Neʼe tokaga fakalelei te kau afilimie kiā ia, kae neʼe nātou tokosiʼi. Ko te ʼu tēhina mo tuagaʼane ʼo te kokelekasio neʼe ʼōmai ʼo taupau ia ia ʼi te lōpitali. ʼI te lua pō, neʼe au nofo ʼi ʼona tafa pea neʼe au tokaga kiā ia ʼo aʼu ki tona mate. Ko te tōketā ʼaē neʼe tokaga kiā ia, neʼe ina ʼui fēnei: ‘Ko te fihifihia lahi ʼe tau hoko, māʼiape la mo te ʼu kāiga ʼo te kau mahaki ʼe nātou līʼaki tanatou ʼu mahaki ʼaē ʼe nātou maʼu ia te Sita. Kae ko koutou ia ʼaē ʼe mole ko hona ʼu kāiga totonu, pea ʼe mole koutou fenua tahi, ʼe ʼōmai koutou kiā ia logola hakotou lava pikisia ʼi he mahaki.’ Neʼe au fakamahino age, maʼaku ko Heidi neʼe ko toku tēhina moʼoni, neʼe hage pe neʼe mā faʼē tahi pea mo tāmai tahi. Neʼe au fiafia ʼi te tokoni kiā ia, he neʼe au felogoi lelei mo Heidi ohage ko hoku tēhina totonu.” Meʼa fakapunamaʼuli foki, he neʼe mole pikisia ia Sonia ʼi he mahaki ʼi tona ʼofa ʼo taupau mahaki kiā Heidi.
19. ʼI tatatou maʼu ia te lao ʼa te ʼAtua ʼi totatou loto, ʼe tonu ke tou fakaʼaogaʼi ʼi te ʼu lakaga fea?
19 ʼE lahi te ʼu faʼifaʼitaki ʼa te ʼu kaugana ʼa Sehova neʼe nātou fakahā ia te ʼofa faka sākilifisio. ʼE mole he lao ia ʼaho nei neʼe tohi ʼe ina fakaʼiloga kehe te hahaʼi ʼa te ʼAtua. Kae ʼe tou sio ki te hoko ʼo te ʼu palalau ʼaē ʼe tohi iā Hepeleo 8:10 (MN ): “ ‘Koʼeni te fuakava ʼe au fai anai mo te ʼapi ʼo Iselaele mokā hili anai te ʼu ʼaho ʼaia,’ ko te ʼui ʼaia ʼa Sehova. ‘ ʼE au tuku anai taku ʼu lao ki tonatou ʼatamai, pea mo tohi ki tonatou loto. Pea ʼe au liliu anai ko tonatou ʼAtua, pea ʼe nātou liliu anai ko taku hahaʼi.’ ” ʼOfa pe ke tou faka maʼuhigaʼi tuʼumaʼu te lao ʼo te ʼofa ʼaē neʼe tohi e Sehova ʼi ʼotatou loto, ʼo tou fakaʼaogaʼi te ʼu faigamālie fuli moʼo fakahā ia te ʼofa.
20. He koʼe ko te lao ʼa Kilisito ʼe ko he koloā maʼuhiga ʼaupito?
20 ʼE ko he meʼa fakafiafia hatatou tauhi ki te ʼAtua mo te fale tautēhina faka malamanei ʼaē ʼe nātou fakahā ia te ʼofa ʼaia! Ko nātou ʼaē ʼe nātou maʼu te lao ʼa Kilisito ʼi tonatou loto, ʼe nātou maʼu te koloā maʼuhiga ʼaupito ʼi te mālama heʼeʼofa ʼaenī. ʼE nātou maʼu ia te ʼofa ʼo Sehova pea ʼe nātou maʼu te ʼofa mālohi ʼi tanatou ʼu felogoi faka tautēhina. “Koutou sisio! ʼE ko he meʼa lelei pea mo fakafiafia ki he ʼu tēhina hanatou nonofo fakatahi ʼi te logo tahi!” Logola ko te kau Fakamoʼoni ʼa Sehova ʼe nātou nonofo ʼi te ʼu fenua kehekehe, ʼe nātou palalau ki te ʼu lea kehekehe, pea mo kehekehe tanatou ʼu agaʼi fenua, kae ʼe nātou logo tahi ʼi te faʼahi faka lotu. Ko te logo tahi ʼaia ʼe ina faka fealagia kiā Sehova ke ina tapuakiʼi nātou. Neʼe tohi fēnei e te tagata fai Pesalemo: “He neʼe fakatotonu e Sehova ke hoko ai te tapuakina [ʼi te lotolotoiga ʼo te hahaʼi logo tahi ʼi te ʼofa], ʼio, te maʼuli ʼo aʼu ki he ʼu temi ʼe mole ʼiloʼi honatou gataʼaga.”—Pesalemo 133:1-3.
ʼE Feala Koa Hakotou Tali?
• He koʼe neʼe maʼuhiga te ʼu Folafola e Hogofulu?
• Koteā te lao ʼaē neʼe tohi ʼi te ʼu loto?
• ʼE gāueʼi feafeaʼi te ʼofa ʼi “te lao ʼa Kilisito”?
• Ko te ʼu ʼaluʼaga fea ʼaē ʼe feala ai ke tou fakahā ia totatou ʼofa ki te ʼAtua pea mo totatou tatau?
[Paki ʼo te pasina 25]
Ko te ʼu lao ʼaē neʼe tuku age ki te kau Iselaele neʼe tohi ʼi te ʼu maka
[Paki ʼo te pasina 26]
Ko te lao ʼa te ʼAtua ʼe tohi ʼi te ʼu loto ʼo te kau Kilisitiano
[Paki ʼo te pasina 28]
Ko Sonia mo te kiʼi finemui Senekale ʼi te fakatahi faka tisitilike ʼi te taʼu 2004