“Ke Kātoa Takotou Aga Fakapotopoto”

“Ko ʼaē ʼe mole heʼeki fakapotopoto ʼe tui ia ki te ʼu palalau fuli, kae ko ʼaē ʼe fakasiosio poto ʼe tokaga ia ki tana haʼele.”​—Tāʼaga Lea 14:⁠15.

1, 2. (a) Koteā ʼaē ʼe tou ako mai te meʼa ʼaē neʼe hoko kiā Lote ʼi Sotoma? (b) Koteā te faka ʼuhiga ʼo te kupu ‘ke koutou aga fakapotopoto’?

ʼI TE tuku ʼaē e Apalahamo kiā Lote ke ina ʼuluaki fili te fenua ʼaē ʼe fia ʼalu kiai, neʼe sio Lote ki te fenua neʼe fakavai lelei, neʼe “hage ia ko te ʼōloto ʼo Sehova.” Neʼe ko he koga meʼa lelei ke nonofo ai tona famili, koia “neʼe fili ai e Lote maʼa ia te Tisitilike kātoa ʼo Solotane” pea neʼe ina fakatuʼu ōvi tona nofoʼaga ki Sotoma. Neʼe tokagaʼi pe ia e Lote ia te ʼu meʼa ʼaia, kae neʼe mole ina tokagaʼi ko te kolo ʼaē neʼe ōvi age ki te kolo ʼaia neʼe ko “te hahaʼi ʼo Sotoma [ʼaē] neʼe . . . agahala mamafa kiā Sehova.” (Senesi 13:​7-13) ʼI te fakaʼaluʼalu ʼo te temi, neʼe hoko te ʼu faigataʼaʼia kiā Lote pea mo tona famili. Ki muli age, ko ia pea mo tona ʼu ʼofafine neʼe nātou nonofo ʼi te ana. (Senesi 19:​17, 23-26, 30) Ko te meʼa ʼaē ʼi te kamata neʼe sio kiai ʼe matalelei, neʼe liliu ia ki muli age ko he meʼa ʼe kovi.

² Ko te fakamatala ʼo te meʼa ʼaē neʼe hoko kiā Lote ʼe ina foaki he ako ki te kau kaugana ʼa te ʼAtua iā ʼaho nei. Ka tou fai he ʼu tonu, tou tōkakaga ki te ʼu tuʼutāmaki ʼaē ʼe feala ke hoko pea mo ʼaua naʼa kākāʼi tatou e te ʼu meʼa ʼaē ʼe tou sio kiai. Koia ʼe tāu mo feʼauga ke uga fēnei tatou ʼi te Folafola ʼa te ʼAtua: “Ke kātoa takotou aga fakapotopoto.” (1 Petelo 1:​13, MN ) Ko te kupu faka Keleka ʼaē neʼe fakaliliu ʼi henī ʼaki te kupuʼi palalau ‘ke koutou aga fakapotopoto,’ ko tona faka ʼuhiga fakahagatonu ke “ ʼaua naʼa koutou konahia.” ʼE ʼui e te tagata sivi Tohi-Tapu ko R.C.H. Lenski, ko te hāo ʼaia mai te konahia ʼe “ko he ʼatamai ʼe mālama lelei, ʼe totonu tana fakafuafua ia te ʼu meʼa pea ʼe ina fai he ʼu tonu ʼe lelei.” Tou vakaʼi he ʼu ʼaluʼaga ʼe tonu ai ke tou aga fakapotopoto.

Tou Fakakaukauʼi Lelei Te ʼu Faigamālie Moʼo Fai Koloā

3. He koʼe ʼe tonu ke tou tōkakaga mo kapau ʼe tuku mai he faigamālie moʼo fai koloā?

³ Koutou fakakaukauʼi age muʼa ʼo ʼuhiga mo he tahi ʼe logona lelei, lagi ko he tēhina peʼe ko he tuagaʼane ʼe toʼo maʼua ia koutou ke koutou fai koloā mo ia. ʼE fiafia ʼi tana fakaʼamu ʼaē ʼe fua manuʼia anai ia te gāue ʼaia, pea ʼe ina fakaloto mālohiʼi koutou ke koutou foimo fai he puleʼaki ʼo ʼuhiga mo te faigamālie ʼaia. ʼE lagi koutou manatu aipe ki te maʼuli lelei ʼaē ka koutou maʼu mo takotou famili, mo lagi koutou manatu ʼe lahi age anai te temi ʼaē ka koutou fakaʼaogaʼi ki te ʼu gāue fakalaumālie. Kae ʼe fakatokaga fēnei mai ia Tāʼaga Lea 14:15: “Ko ʼaē ʼe mole heʼeki fakapotopoto ʼe tui ki te ʼu palalau fuli, kae ko ʼaē ʼe fakasiosio poto ʼe tokaga ia ki tana haʼele.” ʼI takotou fiafia ʼi te kamata ʼo te gāue fai koloā ʼaia, ʼe lagi mole koutou fakakaukauʼi fakalelei ki te ʼu puli ʼaē ʼe feala ke hoko, mo koutou meʼa noaʼi te ʼu tuʼutāmaki, pea ʼe mole koutou ʼiloʼi papau peʼe feafeaʼi anai mo kapau ʼe mole haʼele lelei te gāue ʼaia. (Sakopo 4:​13, 14) ʼI te ʼaluʼaga ʼaia, ʼe maʼuhiga ʼaupito ke tou nonofo kātoa ʼi te agapoto!

4. Ka faka fealagia mai e he tahi ke tou fai koloā mo ia kae toʼo maʼua iā kita, ʼe feafeaʼi hatatou fakakaukauʼi tatatou faʼahiga haʼele?

⁴ Ko he tahi ʼe fakasiosio poto, ʼi muʼa ʼo hana fai he tonu, ʼe ina vakavakaʼi fakalelei anai mokā ʼe tuku age he faigamālie moʼo fai koloā. (Tāʼaga Lea 21:5) ʼI te agamāhani, ka kita vakavakaʼi he gāue feiā, ʼe kita sio ai ki te ʼu tuʼutāmaki ʼaē neʼe mole lagi kita tokagaʼi. ʼE feala ke hoko te ʼaluʼaga ʼaenī: ʼE fia toʼo maʼua he tahi ʼo ʼuhiga mo hana ʼu fakatuʼutuʼu gāue, pea ina ʼui atu ʼe koutou maʼu paʼaga anai mo kapau ʼe koutou foaki age te falā ʼaē ʼe ʼaoga kiā ia. ʼE hage ʼe lelei te faʼahi ʼaia, kae koteā ʼaē ʼe feala ke hoko? Ko ia ʼaē ʼe toʼo maʼua iā koutou, ʼe loto lelei anai koa ke ina huʼi atu takotou falā, peʼe haʼele lelei anai tana gāue peʼe kailoa, peʼe fakalogo anai tana huʼi atu ki te haʼele lelei ʼo tana gāue? ʼI tona fakahagatonu, ʼe koutou tali anai koa ke mole huʼi atu takotou falā mo kapau ʼe tō kovi ia te gāue? ʼE toe feala foki ke koutou feʼekeʼaki fēnei: “He koʼe ʼe taka kumi maʼua? ʼE lagi mata faigataʼa fau ki te ʼu fale paʼaga?” Kapau ʼe koutou toʼo he temi ke koutou vakavakaʼi te ʼu tuʼutāmaki ʼaē ʼe feala ke hoko, ʼe feala anai hakotou fakakaukauʼi lelei ia te faigamālie ʼaia ʼe tuku atu moʼo fai koloā.​—Tāʼaga Lea 13:16; 22:⁠3.

5. (a) Koteā ʼaē neʼe fai e Selemia ʼi te temi ʼaē neʼe ina totogi ai tona moʼi kele? (b) He koʼe ʼe lelei ke tohi ki he moʼi pepa te ʼu fakatuʼutuʼu fuli ʼo ʼuhiga mo he gāue?

⁵ ʼI te temi ʼaē neʼe totogi ai e te polofeta ko Selemia tona moʼi kele ʼi tona tēhina mataʼi tama, ʼaē neʼe tauhi kiā Sehova, neʼe ina tohi ki te moʼi pepa iā muʼa ʼo te ʼu hahaʼi. (Selemia 32: 9-12) Ko he tahi ʼe poto iā ʼaho nei ʼe tokaga anai ʼo tohi lelei ki he moʼi pepa te ʼu fakatuʼutuʼu fuli ʼaē neʼe nā fefakapapauʼaki, tatau aipe peʼe ko hona famili peʼe ko he ʼu tēhina.a Kapau ʼe mahino lelei te ʼu meʼa ʼaē ʼe tohi ʼi te moʼi pepa, pea ʼe mole ʼi ai anai he femahinohalaʼaki pea ʼe nā taupau anai tanā logo tahi. ʼI te tahi faʼahi, kapau ʼe mole tohi fakalelei te ʼu tonu ʼaē neʼe fai, pea ʼi te agamāhani ʼe hoko te ʼu fihifihia ʼi te ʼu kaugana ʼa Sehova. Meʼa fakaʼofaʼofa foki, heʼe feala ʼaki te ʼu fihifihia ʼaia ke fakatupu lotomamahi, ke fakatupu ʼita, pea mo fakatupu ai he lotovaivai ʼi te faʼahi fakalaumālie.

6. He koʼe ʼe tonu ke tou tōkakaga ki te loto mānumānu?

⁶ ʼE tonu ke koutou toe tōkakaga ki te loto mānumānu. (Luka 12:15) Ko te fakapapau ʼaē ʼe fai atu e he tahi ʼo ʼuhiga mo he gāue ʼe koutou maʼu ai anai he paʼaga lahi, ʼe ina tāʼofi koutou ke mole koutou sisio ki te ʼu tuʼutāmaki ʼo he gāue ʼe mole feala ke kita falala kiai. Māʼiape la mo nātou ʼaē neʼe ʼi ai honatou ʼu pilivilesio lalahi ʼi te tauhi kiā Sehova neʼe nātou tō ki te hele ʼaia. ʼE fakatokaga fēnei mai ʼi te Folafola ʼa te ʼAtua: “Ke pulihi ʼi tokotou faʼahiga maʼuli ia te manako ʼaē ki te paʼaga, koutou fakafeauga pe ki te meʼa ʼaē ʼe maʼu.” (Hepeleo 13:​5, MN ) Ka fakakaukauʼi e he Kilisitiano ʼo ʼuhiga mo he faigamālie moʼo fai koloā, ʼe tonu ke ina fai te fehuʼi ʼaenī: “ ʼE ʼaoga moʼoni koa kiā au ia te gāue ʼaenī?” Ko te faka faigafua ʼo totatou maʼuli ʼo fakatafito ki te tauhi ʼaē kiā Sehova, ʼe ina puipui anai tatou mai “te kovi fuape.”​—1 Timoteo 6:​6-10.

Te ʼu Faigataʼaʼia ʼAē ʼe Felāveʼi Mo Te Kau Kilisitiano Selipatea

7. (a) Koteā te ʼu faigataʼaʼia ʼaē ʼe felāveʼi mo te kau Kilisitiano selipatea? (b) ʼE tou fakahā feafeaʼi tatatou agatonu kiā Sehova mokā tou filifili hotatou ʼohoana?

⁷ Tokolahi te kau kaugana ʼa Sehova ʼe nātou fia ʼohoana, kae ʼe mole heʼeki nātou maʼu honatou hoa ʼe nātou leleiʼia. ʼI ʼihi fenua, ʼe mālohi ʼaupito ia te fakaneke ʼaē ki te ʼohoana. Kae ʼe lagi mole lahi he ʼu tēhina mo he ʼu tuagaʼane selipatea. (Tāʼaga Lea 13:12) Kae ʼe ʼiloʼi e te kau Kilisitiano, kapau ʼe nātou taupau te fakatotonu faka Tohi-Tapu ʼaē ke ʼohoana “ ʼi te ʼAliki pe,” ʼe nātou fakahā ai tanatou agatonu ʼaē kiā Sehova. (1 Kolonito 7:​39, MN ) Ke feala hanatou mālolohi logola te ʼu fakaneke pea mo te ʼu fakahala, ʼe tonu ke kātoa te aga fakapotopoto ʼa te kau Kilisitiano selipatea.

8. Koteā te ʼu fakaneke ʼaē neʼe fai ki te taʼahine Sulamite, pea koteā te ʼu fakaneke ʼaē ʼe feala ke fai iā ʼaho nei ki te kau tuagaʼane?

⁸ ʼI te tohi ʼo Te Hiva ʼa Salomone, neʼe tokagaʼi e te hau te taʼahine Sulamite neʼe mole maʼu koloā. Neʼe fakaʼaogaʼi e te hau ʼaia tona ʼu koloā, tona ʼalikisia, pea mo tona talavou ke ina maʼu te taʼahine, kae neʼe manako te taʼahine ia ki te tahi tama. (Hiva ʼo Salomone 1:9-11: 3:​7-10; 6:​8-10, 13) ʼE lagi feiā mo koutou ʼu tuagaʼane, ʼe lagi fai gutu kākā atu he tagata kiā koutou kae ʼe koutou fakafisi kiai. Ko he tahi ʼi tokotou fale gāue, lagi ko hokotou pule gāue, ʼe lagi ina vikiʼi koutou, peʼe agalelei kiā koutou, peʼe ina kumi he ʼu faigamālie ke fakatahi ai mo koutou. Koutou tōkakaga ki te ʼu fakanekeneke ʼaia. ʼE moʼoni, tatau aipe mo kapau ko te ʼu fakatuʼutuʼu ʼa he tahi feiā ʼe mole ko te fia felāveʼi fakasino, kae ʼi te agamāhani ko tona tupuʼaga ʼaia. Ohage ko te taʼahine Sulamite, koutou hage ko “he kaupā.” (Hiva ʼo Salomone 8:​4, 10) Koutou fakafisi mālohi ki te ʼu hahaʼi tagata ʼaē ʼe nātou lafilafi atu. Koutou fakahā ki takotou ʼu kaugā gāue ko koutou ko he Fakamoʼoni ʼa Sehova, pea koutou fakaʼaogaʼi te ʼu faigamālie fuli ke koutou faka mafola kiā nātou. ʼE ko he puipui anai kiā koutou.

9. Ko te ʼu tuʼutāmaki fea ʼaē ʼe feala ke kita felāveʼi mo ia mo kapau ʼe kita fakaʼaogaʼi ia te Internet, moʼo fakakaumeʼa mo he tahi ʼe mole tou feʼiloʼiʼaki? (Vakaʼi mo te fakamatala ʼaē ʼe ʼātakai ʼi lalo ifo.)

⁹ ʼI te Internet, kua lahi te ʼu polokalama neʼe fai moʼo tokoni ki te hahaʼi selipatea ke nātou maʼu honatou ʼohoana. Maʼa ʼihi, ʼe ko he fealagia ʼaia ke nātou feʼiloʼiʼaki ai mo he ʼu hahaʼi ʼe mole feala ʼi he tahi ʼu ʼaluʼaga ke nātou felāveʼi ai mo nātou. Kae ko te felogoi mo he tahi ʼe mole koutou feʼiloʼiʼaki ʼe fakatupu tuʼutāmaki moʼoni. ʼI te Internet, ʼe faigataʼa hata ʼiloʼi ia te meʼa ʼaē ʼe moʼoni pea mo ʼaē ʼe loi. (Pesalemo 26:4) ʼAua naʼa tou faka tui ki te ʼu hahaʼi fuli ʼaē ʼe nātou ʼui ʼi te Internet ʼe ko he kau Fakamoʼoni ʼa Sehova. Tahi ʼaē meʼa, ʼi te felogoi ʼaia ʼi te Internet, ʼe feala ke tupu vave ai he femanakoʼaki, pea mo puli ai tata fakasiosio poto. (Tāʼaga Lea 28:26) ʼE mole ko he aga fakapotopoto hata fakakaumeʼa mo he tahi ʼe mole kita ʼiloʼi lelei, peʼe ʼi te Internet peʼe ʼi te tahi age ʼaluʼaga.​—1 Kolonito 15:⁠33.

10. Koteā ʼaē ʼe tou lava fai moʼo fakaloto mālohiʼi te kau Kilisitiano selipatea?

¹⁰ Ko Sehova “ ʼe fonu ʼi te ʼofa pea mo te manavaʼofa” ki tana ʼu kaugana. (Sakopo 5:​11, MN ) ʼE ina ʼiloʼi ʼi ʼihi temi ʼe felāveʼi te kau Kilisitiano selipatea mo te ʼu ʼaluʼaga fakatupu lotovaivai, pea kiā ia ʼe maʼuhiga tanatou agatonu. Koteā ʼaē ʼe tou lava fai moʼo fakaloto mālohiʼi ʼo nātou? Tou vikiʼi tuʼumaʼu ia nātou ʼo ʼuhiga mo tanatou fakalogo pea mo tonatou maʼuli faka sākilifisio. (Kau Tuʼi Fakamāu 11:​39, 40) ʼE feala ke tou fakaafe nātou ki he ʼu fakafiafia fakaloto mālohi. Neʼe kua koutou fai koa ia te faʼahi ʼaia? Tahi ʼaē meʼa, tou hūfakiʼi nātou, ʼo kole kiā Sehova ke tokoni kiā nātou ke nātou mālolohi ʼi te faʼahi fakalaumālie, pea mo nātou fiafia ʼi tanatou tauhi kiā te ia. ʼI tatatou ʼofa moʼoni kiā nātou, ʼofa pe ke tou mulimuli ki te faʼifaʼitaki ʼa Sehova, ʼo fakafetaʼi ki te nonofo agatonu ʼa te kau selipatea ʼaia.​—Pesalemo 37:⁠28.

Te ʼu Faigataʼaʼia ʼUhi Ko Te Mahaki

11. Koteā te ʼu faigataʼaʼia ʼaē ʼe feala ke felāveʼi mo ia ʼaē ʼe mahaki kovi?

¹¹ ʼE fakaloto mamahi mokā ko tatou peʼe ko he tahi ʼe tou ʼoʼofa ai, ʼe tau mo he mahaki kovi! (Isaia 38:​1-3) Logola ʼe tou kumi he ʼu faitoʼo ʼe lelei, kae ʼe maʼuhiga ke tou mulimuli ki te ʼu pelesepeto ʼo te Tohi-Tapu. Ohage la, ʼe fakalogo lelei te kau Kilisitiano ki te fakatotonu ʼa te Tohi-Tapu ke nātou fakafisi ki te toto, pea mo te ʼu faitoʼo ʼaē ʼe fai ʼaki he ʼu meʼa fakatemonio. (Gaue 15:​28, 29; Kalate 5:​19-21) Kae kiā nātou ʼaē ʼe mole nātou maʼu honatou faitoʼo, ʼe feala ke faigataʼa ia te faʼahi ʼaia pea mo fakatupu tuʼania. Koteā ʼaē ʼe lava tokoni mai ke kātoa tatatou aga fakapotopoto?

12. Koteā te aga fakapotopoto ʼaē ʼe tonu ke maʼu e he Kilisitiano ʼo ʼuhiga mo he faʼahiga faitoʼo?

¹² “Ko ʼaē ʼe fakasiosio poto ʼe tokaga ia ki tana haʼele,” ʼo ina fai he ʼu kumi ʼi te Tohi-Tapu pea mo te ʼu tohi faka Kilisitiano. (Tāʼaga Lea 14:15) ʼI te ʼu koga meʼa ʼaē ʼe tokosiʼi ai he kau tōketā pea mo he ʼu lopitali, ʼe lagi ko te faitoʼo pe e tahi ʼe maʼu, ko te ʼu faitoʼo ʼaki he ʼu lauʼakau. ʼO ʼuhiga mo te ʼu faʼahiga faitoʼo ʼaia, ʼe tou maʼu anai te ʼu tokoni lelei ʼi Te Tule Leʼo Fakafalani ʼo te ʼaho 15 ʼo ʼApelili 1987, ʼi te pasina 26 ki te 29. ʼE tou maʼu ai te ʼu fakatokaga ʼo ʼuhiga mo te ʼu tuʼutāmaki ʼaē ʼe feala ke hoko. Ohage la, ʼe tonu muʼa ke tou vakavakaʼi lelei ia te ʼu faʼahi ʼaenī: ko ia ʼaē ʼe fai faitoʼo, ʼe ko he tahi koa ʼe faifakalauʼakau? ʼE fakatafito koa te faitoʼo ki te faka tui ʼaē ko te mahaki pea mo te mate ʼe tupu mai he lotokovi peʼe ko he faitutuku? ʼI te ʼu fai faitoʼo ʼaia, ʼe fai ai koa he ʼu faikole, he ʼu mōlaga, peʼe ko he ʼu meʼa fakatemonio? (Teutalonome 18:​10-12) Ko te ʼu kumi ʼaia ʼe tokoni mai anai ke tou mulimuli ki te tokoni fakaʼatua ʼaenī: “Koutou vakaʼi peʼe moʼoni ia meʼa fuli; koutou tapiki maʼu ki te meʼa ʼaē ʼe lelei.”b (1 Tesalonika 5:​21, MN ) ʼAki te tokoni ʼaia ʼe feala anai hatatou fakapotopoto.

13, 14. (a) ʼE feafeaʼi hatatou fakahā ʼe tou aga fakapotopoto ʼo ʼuhiga mo tatatou haohaoa mai te ʼu mahaki? (b) He koʼe ʼe tonu ke tou aga fakapotopoto mokā tou fai palalau mo ʼihi ʼo ʼuhiga mo he ʼu mahaki pea mo he ʼu faʼahiga faitoʼo?

¹³ ʼE tonu ke maʼu te aga fakapotopoto ʼi te ʼu ʼaluʼaga fuli ʼo totatou maʼuli, ʼo feiā mo te tokaga ki totatou maʼuli fakasino. (Filipe 4:5) Ko tatatou tōkakaga fakapotopoto ki totatou ʼaluʼaga fakasino, ʼe fakahā ʼaki ai tatatou loto fakafetaʼi ki te meʼa ʼofa maʼuhiga ʼaē ko te maʼuli. Ka tou tau mo he ʼu mahaki, pea ʼe tonu ke tou kumi he faitoʼo. Kae ʼe hoki tou maʼu anai ia te maʼuli haohaoa ʼi te temi ʼaē kua fakakatofa ai e te ʼAtua ke ina “faitoo . . . te u puleaga.” (Apokalipesi 22:​1, 2) ʼAua naʼa tou fakaʼauʼauganoa ki te ʼu meʼa fakalaumālie ʼaē ʼe maʼuhiga tāfito, ʼi te lahi fau ʼo tatatou tuʼania ke tou haohaoa mai te ʼu mahaki.​—Mateo 5:3; Filipe 1:⁠10.

¹⁴ ʼE toe tonu foki ke tou aga fakapotopoto mokā tou fai palalau mo ʼihi ʼo ʼuhiga mo te ʼu mahaki pea mo te ʼu faitoʼo. ʼE mole tonu ke tou fai palalau tāfito ki te ʼu meʼa ʼaia mokā tou fakatahi mo totatou ʼu tēhina mo tuagaʼane ʼi te ʼu fono pea mo te ʼu fakatahi. Tahi ʼaē meʼa, ko he tonu ʼo ʼuhiga mo he faitoʼo, ʼi te agamāhani ʼe tonu ke kita fakakaukauʼi ia te ʼu pelesepeto ʼo te Tohi-Tapu, mo fakalogo ki tokita leʼo ʼo loto pea mo tata ʼu felogoi mo Sehova. Koia ʼe mole ko he aga ʼofa anai hatatou fakakinauʼi hotatou tēhina peʼe ko hotatou tuagaʼane ke ina tali tatatou manatu, peʼe fakamālohiʼi ia ia ke mole fakalogo ki tona leʼo ʼo loto. Logola ʼe feala ke tou fakalavelave ki he kau Kilisitiano kua fakapotopoto ʼi te kokelekasio, kae ʼe ʼa te Kilisitiano takitokotahi te “tahi ʼamo . . . tana ʼāmoga,” pea “ ʼe tou tahi huʼi maʼua anai ki te ʼAtua maʼa tatou takitokotahi.”​—Kalate 6:5; Loma 14:​12, 22, 23, MN.

Ka Hoko Mai He ʼu Faigataʼaʼia

15. Koteā ʼaē ʼe feala ke hoko mokā tou felāveʼi mo ni ʼu faigataʼaʼia?

¹⁵ Ka nātou felāveʼi mo ni ʼu faigataʼaʼia, ʼe feala ke fai e te ʼu kaugana ʼa Sehova he ʼu palalau peʼe ko he ʼu aga ʼe mole fakapotopoto. (Tagata Tānaki 7:7) ʼI te ʼu ʼahiʼahi lahi ʼo Sopo, neʼe liliu ʼo mole kei fakapotopoto pea neʼe fakatonutonuʼi tana ʼu manatu. (Sopo 35:​2, 3; 40:​6-8) Logola “ko Moisese neʼe lahi tokotahi tana agavaivai ʼi te ʼu tagata fuli ʼaē neʼe māʼuʼuli ʼi te fuga kele,” kae ʼi te tahi lakaga neʼe ʼita pea neʼe ina fai he ʼu palalau neʼe mole ko he ʼu palalau fakapotopoto. (Faka au 12:3; 20:​7-12; Pesalemo 106:​32, 33) Ko Tavite neʼe loto lolomi ʼi tana mole matehi ia te Hau ko Saulo, kae ʼi te temi ʼaē neʼe haga ai ia Napale ʼo laukoviʼi ia ia pea mo tana ʼu tagata solia, neʼe ʼita ʼaupito ai pea neʼe mole kei aga fakapotopoto. Neʼe toe fakakaukau poto ʼi te temi ʼaē neʼe ʼalu age ai ia Apikaela ʼo ina tāʼofi tautonu te hala mamafa ʼaē neʼe ina ʼamanaki ke ina fai.​—1 Samuele 24:​2-7; 25:​9-13, 32, 33.

16. Koteā ʼaē ka tokoni mai ke ʼaua naʼa tou fai he aga ʼe mole ko he aga fakapotopoto?

¹⁶ ʼO feiā mo tatou, ʼe tou lava felāveʼi mo he ʼu ʼaluʼaga ʼe mole tou fai he ʼu fakakaukau fakapotopoto. Ohage ko Tavite, kapau ʼe tou fakalogo ki te ʼu manatu ʼaē ʼe fakahā mai e ʼihi, ʼe feala ai anai ke mole tou fai he aga ʼe mole fakapotopoto pea ʼe mole tou agahala anai. (Tāʼaga Lea 19:2) Pea ʼe tuku mai te tokoni ʼaenī ʼi te Folafola ʼa te ʼAtua: “Koutou hoha kae ʼaua naʼa koutou agahala. Koutou palalau ʼi tokotou loto, ʼi tokotou moeʼaga, pea mo nofo fakalogologo.” (Pesalemo 4:4) Kapau ʼe ko he meʼa ʼe feala, ʼe ko he aga fakapotopoto anai te ʼatalitali ke malū ifo tokotou ʼita, ʼi muʼa ʼo hakotou fai he meʼa peʼe ko hakotou fai ʼo he tonu. (Tāʼaga Lea 14:​17, 29) ʼE feala ke tou faikole fakamalotoloto kiā Sehova, “pea ko te tokalelei o te Atua aia e fakalaka i te atamai fuape, e ina malui anai [totatou] loto mo [tatatou] fakakaukau ia Kilisito Sesu.” (Filipe 4:​6, 7) Ko te tokalelei ʼaia mai te ʼAtua ʼe ina fakafīmālieʼi tatou pea mo tokoni mai ke kātoa tatatou aga fakapotopoto.

17. He koʼe ʼe tonu ke tou falala kiā Sehova ke tou kātoa ʼi te aga fakapotopoto?

¹⁷ Ko tatou fuli ʼe tou faihala, logola tatatou ʼu faiga fakamalotoloto ke ʼaua naʼa tou tō ki he ʼu tuʼutāmaki pea mo tatatou aga fakapotopoto. (Sakopo 3:2) E lagi tou fai anai he meʼa ʼe mole lelei kae ʼe mole tou tokagaʼi. (Pesalemo 19:​12, 13) Tahi ʼaē meʼa, ʼi totatou ʼuhiga agahala, ʼe mole tou maʼu ia te fealagia ʼaē ke tou takitaki ʼāteaina totatou ʼala kae mole tou fakalogo kiā Sehova. (Selemia 10:23) ʼE tou loto fakafetaʼi lahi ʼi tana fakapapau ʼaenī: “ ʼE au fakaliliu anai koe ke ke fakasiosio poto pea mo au akoʼi anai koe ʼi te ala ʼaē ʼe tonu ke ke haʼele ai. ʼE au foaki atu anai he ʼu tokoni, ʼo au leʼoleʼo koe.” (Pesalemo 32:8) Ei, ʼaki te tokoni ʼa Sehova, ʼe feala ai ke tou kātoa ʼi te aga fakapotopoto.

[Kiʼi nota]

ʼE Koutou Tali Feafeaʼi Anai?

ʼE feafeaʼi hatatou aga fakapotopoto?

• mo kapau ʼe tuku mai he faigamālie moʼo fai koloā?

• mokā tou kumi hotatou ʼohoana?

• mokā tou tau mo he mahaki kovi?

• mokā tou felāveʼi mo he ʼu faigataʼaʼia?

[Talanoa ʼo te pasina 23]

ʼE Feala Koa Hakotou Tui Kiai?

Koʼeni te ʼu palalau neʼe tuʼu ʼi te ʼu polokalama ʼaē ʼe fai ʼi te Internet maʼa te kau selipatea:

“ ʼE mole feala hatatou ʼiloʼi moʼoni peʼe ko ai ia ia ʼaē ʼe tou felogoi mo ia, tatau aipe peʼe tou faiga mālohi ki te faʼahi ʼaia.”

“ ʼE mole feala hamatou ʼui papau atu peʼe totonu, peʼe kātoa peʼe moʼoni te ʼu manatu fuli ʼaē ʼe koutou maʼu ʼi ai.”

“Ko te ʼu manatu, mo te ʼu tokoni, mo te ʼu fakamatala, peʼe ko te tahi atu ʼu faʼahi ʼaē ʼe koutou lava maʼu ai, ʼe ko he ʼu meʼa neʼe tohi e te ʼu hahaʼi . . . pea ʼe mole tonu ke koutou falala kātoa kiai.”

[Paki ʼo te pasina 23]

“Ko ʼaē ʼe fakasiosio poto ʼe tokaga ia ki tana haʼele”

[Paki ʼo te pasina 24]

ʼE lava faʼifaʼitakiʼi feafeaʼi e te ʼu fafine Kilisitiano ia te taʼahine Sulamite?