Koutou Tokakaga Ki Te Fakaʼaogaʼi ʼo Te Internet!

¹ ʼE leleiʼia e te hahaʼi ʼa Sehova tanatou fakakaugā mo tonatou ʼu tēhina mo tuagaʼane. ʼE nātou leleiʼia te fefakamatalaʼaki ʼo te ʼu meʼa ʼaē neʼe hoko ʼi tanatou fai faka mafola pea ʼe nātou fia logo ki te ʼu fakamatala ʼo ʼuhiga mo te kau Fakamoʼoni ʼa Sehova pea mo te gāue ʼo te Puleʼaga ʼaē ʼe fai ʼi te malamanei katoa. ʼE nātou leleiʼia ke fakahā age kia nātou te ʼu meʼa maʼuhiga ʼaē neʼe lagi hoko ki totatou ʼu tēhina, ohage la ko he lakilisi peʼe ko he tuʼutāmaki faka natula, pea mo nātou fia ʼiloʼi peʼe koteā ʼaē ʼe feala ke nātou fai moʼo tokoni kia nātou ʼaia. Ko te lototokaga ʼaia ʼe ina fakahā te logo tahi ʼo te ʼu tēhina mo tuagaʼane, pea ʼe ko he fakamoʼoni ʼaia ki tatatou feʼofaniʼaki.​—Soa. 13:34, 35.

² Ia ʼaho nei, kua tou lava ʼiloʼi vave te ʼu meʼa ʼaē ʼe hoko ʼi te malamanei. ʼAki te ʼu polokalama lātio pea mo televisio, ʼe ʼiloʼi lelei ai e te hahaʼi fuli ʼi te kele katoa te ʼu meʼa ʼaē ʼe lolotoga hoko. ʼAki te telefoni ʼe toe feala foki ke tou fai palalau mo te hahaʼi ʼi te potu fuli pe ʼo te kele. Ko te Internet ko te tahi meʼa foʼou ʼaia kua kaugamālie te hahaʼi ʼaē ʼe nātou fakaʼaogaʼi moʼo felogoi mo ʼihi.​—Vakaʼi te Réveillez-vous! ʼo te ʼaho 22 ʼo Sūlio 1997.

³ ʼAki te telefoni ʼe feala ke tou fai palalau mo te tokolahi ʼi te malamanei katoa. Logope la ʼe ʼaoga te telefoni, kae ʼe tonu ke tou tokakaga ki tona faʼahiga fakaʼaogaʼi, heʼe feala ke tou fakakaugā ai mo he ʼu hahaʼi ʼe māmio kovi peʼe tou fai ai he ʼu meʼa kovi, pea ʼe feala ke totogi kovi mokā lahi fau tona fakaʼaogaʼi. ʼE ʼi ai te ʼu polokalama ʼi te televisio pea mo te lātio ʼe ʼaoga moʼo akoʼi tatou. Kae meʼa fakaʼofaʼofa foki, heʼe lahi age te ʼu polokalama heʼeʼaoga ʼaē ʼe fakahā ai, pea ʼe tonu ke tou tokakaga ki te temi ʼaē ʼe tou fakaʼaogaʼi kiai. ʼE uga tatou e te poto ke tou tokakaga fakalelei ki tatatou fakaʼaogaʼi te televisio pea mo te lātio.

⁴ ʼAki te Internet, ʼe feala ki he tahi ke fai palalau mo te lauʼi miliona hahaʼi ʼi te malamanei katoa, pea ʼe feala ke maʼu ʼi loto he ʼu tuʼuga naunau ʼaoga. (Réveillez-vous! ʼo te ʼaho 8 ʼo Sanualio 1998) Kae ko te fakaʼaogaʼi ʼo te Internet, ʼe feala ke tuʼutāmaki ai he tahi ʼi te faʼahi fakalaumālie pea mo tupu hana fai ʼo he ʼu aga ʼe kovi. ʼO feafeaʼi?

⁵ Tokolahi te hahaʼi ʼe nātou tuʼania heʼe feala ke fakahā ʼi te Internet peʼe feafeaʼi te faʼu ʼo he ʼu mahafu, ohage ko te ʼu foʼi pulu. ʼE meo te ʼu matani gāue ʼo ʼuhiga mo te fakaʼaogaʼi lahi e te hahaʼi gāue tonatou temi ki te Internet. ʼI te ʼu tohi ʼaē ʼe mātou tā, neʼe lahi ai tamatou talanoa ʼo ʼuhiga mo te ʼu tuʼutāmaki fakalaumālie ʼaē ʼe hoko moʼoni ʼaki te Internet. ʼE lahi te ʼu polokalama ʼe fakahā ai te agamālohi pea mo te ʼu paki heʼeʼaoga, ʼe mole tāu mo te kau Kilisitiano. (Pes. 119:37) ʼO hilifaki ki te ʼu tuʼutāmaki ʼaia, ʼe ʼi ai te tahi tuʼutāmaki ʼe kovi age ia, pea ʼe tonu ke tokaga tāfito kiai te kau Fakamoʼoni ʼa Sehova. Koteā te tuʼutāmaki ʼaia?

⁶ ʼE koutou fakaafe anai koa he matāpule kiō koutou kae mole koutou ʼuluaki vakaʼi muʼa pe ko ai ia ia? E feafeaʼi mo kapau ʼe mole koutou maʼu he meʼa ʼo ʼuhiga mo ia? ʼE koutou tuku anai koa te matāpule ʼaia ke nofo tokotahi mo takotou fānau? ʼE feala ke hoko moʼoni te faʼahi ʼaia ʼaki te Internet.

⁷ ʼE feala ke koutou fefaitohiʼaki ʼi te olotinatea mo he ʼu hahaʼi ʼe mole koutou ʼiloʼi. ʼE toe moʼoni te faʼahi ʼaia mokā koutou hū ki he polokalama ʼi te olotinatea, ʼo koutou fefaitohiʼaki mo te tokolahi ʼe nātou fakahā tanatou manatu ki he faʼahiga puani. ʼI ʼihi temi, ko nātou ʼaia ʼe feala ke nātou ʼui ko he Fakamoʼoni ʼa Sehova, kae mole moʼoni. Ko he tahi ʼe feala ke ina ʼui ʼe kei tūpulaga kae mole koia ia. Peʼe feala ke ʼui e he tahi ko he tagata pe ko he fafine, kae ko tana loi.

⁸ Ko te logo ʼaē ʼe koutou maʼu ʼe lagi ko te fakamatala ʼo he meʼa neʼe hoko, peʼe fakahā ai he ʼu manatu ʼo ʼuhiga mo tatatou tui. ʼE toe fakahā te logo ʼaia ki ʼihi, pea ʼe nātou toe fakahā te logo ʼaia ki ʼihi atu. ʼI te agamāhani ʼe mole feala ke vakaʼi peʼe moʼoni te logo ʼaia. Ko te ʼu manatu ʼaē ʼe fakahā ai ʼe lagi ko he faka mafola fakafūfū ʼo he ʼu manatu faka ʼaposita.​—2 Tes. 2:​1-3.

⁹ Kapau ʼe koutou manatuʼi te tuʼutāmaki ʼaia, pea mo koutou fakaʼaogaʼi te Internet, koutou fai te ʼu fehuʼi ʼaenī: ‘He koʼe ʼe ʼau fakaʼaogaʼi? ʼE feala koa ke fua kovi kia ʼau ʼi te faʼahi fakalaumālie mokā ʼe ʼau fakaʼaogaʼi? ʼE feala koa ke toe fua kovi ki ʼihi?’

¹⁰ Te ʼu Polokalama Olotinatea ʼa Te Kau “Fakamoʼoni ʼa Sehova”: Ohage la, koutou fakatokagaʼi te ʼu polokalama ʼi te Internet ʼaē ʼe faʼu e ʼihi ʼe nātou ʼui ko he kau Fakamoʼoni ʼa Sehova. ʼE nātou fakaafe koutou ke koutou vakaʼi tanatou polokalama ke koutou lau ai he ʼu meʼa neʼe hoko ki ʼihi ʼe nātou ʼui ko he kau Fakamoʼoni. ʼE fakaloto mālohi ai koutou ke koutou fakahā takotou manatu ʼo ʼuhiga mo te ʼu tohi ʼa te Sosiete. ʼE foaki e ʼihi he ʼu tokoni ʼo ʼuhiga mo te ʼu palalau ʼaē ʼe feala ke tou fai ʼi tatatou minisitelio. ʼE feala ʼaki te ʼu polokalama ʼaia ke kita fai palalau mo te tokolahi, ohage pe ko hakita fai palalau ʼi te telefoni. ʼE nātou tautau fakahā atu he tahi ʼu polokalama ʼe feala ke koutou fakatahi ai mo he kau Fakamoʼoni ʼa Sehova ʼi te malamanei katoa. Kae ʼe feala koa ke koutou ʼiloʼi peʼe mole ko he kau ʼaposita ʼaē neʼe nātou fai te ʼu meʼa ʼaia?

¹¹ Ko te fakakaugā ʼi te Internet mo te tahi ʼu hahaʼi, ʼe feala ke mole ʼalutahi mo te tokoni ʼaē ʼe tou maʼu ia Efeso 5:​15-​17. Neʼe tohi fēnei e te ʼapositolo ko Paulo: “Koutou vakai fakapotopoto, pe feafeai te agaaga fai o toutou mauli: aua naʼa hage ko te hahai galivale, kae hage ko te hahai galipoto, e natou fakaʼaoga lelei te temi-nei, koteuhi ko te u aho e kovi. Koia, aua naa koutou vavale, kae koutou mahino pe kotea te finegalo o te Aliki.”

¹² Ko te kokelekasio faka Kilisitiano ʼe ko te meʼa ʼaia ʼaē ʼe fakaʼaogaʼi e te ʼAtua moʼo fafaga tatou ʼi te faʼahi fakalaumālie, ʼaki “te kaugana agatonu mo fakapotopoto.” (Mat. 24:45-​47) ʼI te loto kautahi ʼa te ʼAtua, ʼe tou maʼu ai te takitaki pea mo te puipui, ke mole tou kau ki te mālama pea ʼe ina uga tatou ke tou maʼumaʼua ʼi te gāue ʼo te ʼAliki. (1 Ko. 15:58) Neʼe fakahā e te tagata fai pesalemo tana fiafia pea mo tana nofo fīmālie ʼi te lotolotoiga ʼo te hahaʼi ʼa te ʼAtua. (Pes. 27:​4, 5; 55:14; 122:1) ʼE toe foaki e te kokelekasio he tokoni ʼi te faʼahi fakalaumālie pea ʼe lagolago kia nātou ʼaē ʼe fakatahitahi kiai. ʼE feala ke koutou maʼu ai he ʼu kaumeʼa ʼofa, mo loto tuʼania, pea mo lototokaga​—ko he ʼu hahaʼi ʼe koutou ʼiloʼi ʼe nātou fia tokoni pea mo fakaloto fīmālie ʼihi ʼi te ʼu temi faigataʼa. (2 Ko. 7:​5-7) ʼE puipui te hahaʼi ʼo te kokelekasio ʼaki te fakatuʼutuʼu faka Tohi-Tapu, ʼaē ko te fakamavae ʼo te kau agahala ʼaē ʼe mole fakahemala, peʼe ko nātou ʼaē ʼe nātou faka mafola he ʼu manatu faka ʼaposita. (1 Ko. 5:​9-​13; Tito 3:​10, 11) ʼE feala koa ke koutou maʼu he ʼu fakatuʼutuʼu ʼofa feiā mokā koutou fakakaugā mo ʼihi ʼi te Internet?

¹³ Kua tou ʼiloʼi ʼe mole lelei kia tatou te taʼi faʼahiga fai ʼaia. Ko ʼihi polokalama ʼi te olotinatea ʼe nātou faka mafola moʼoni te ʼu manatu faka ʼaposita. Ko te ʼu polokalama olotinatea ʼaia ʼe mole lagi nātou ʼui fakahagatonu te faʼahi ʼaia, pea ko nātou ʼaē ʼe nātou totogi he polokalama, ʼe lagi nātou fakahā ai he ʼu manatu moʼo fakamoʼoni ʼe ko he kau Fakamoʼoni ʼa Sehova. ʼE lagi nātou kole atu anai ke koutou fakahā age he manatu ke nātou ʼiloʼi ai peʼe koutou kau ʼi te kau Fakamoʼoni ʼa Sehova.

¹⁴ ʼE loto e Sehova ke koutou maʼu te fakasiosio tonu. Koteā tona tupuʼaga? Heʼe ina ʼiloʼi ʼe puipui ai anai koutou mai te ʼu tuʼutāmaki kehekehe. ʼE kamata fēnei ia Tāʼaga Lea 2:​10-​19: “Ka hū anai te poto ki tou loto pea ka liliu anai te ʼatamai mālama ko he meʼa ʼe leleiʼia e tou nefesi, pea ko te fealagia fakakaukau ʼe ina leʼoleʼo anai koe, pea ko te fakasiosio tonu ʼe ina taupau anai koe.” ʼE ina puipui koutou mai teā? Mai “te ala ʼaē ʼe kovi,” mai te hahaʼi ʼaē ʼe nātou līaki te faitotonu, pea mo te hahaʼi ʼaē ʼe nātou fai te ʼu aga heʼeʼaoga pea mo aga fakapikopiko.

¹⁵ Ka tou ʼolo ki te Fale ʼo te Puleʼaga, ʼe mole tou loto mahalohalo ʼo ʼuhiga mo tatatou ʼu tēhina. ʼE tou ʼiloʼi nātou. ʼE mole tou kole age kia nātou pe ko he ʼu tēhina moʼoni peʼe kailoa, koteʼuhi heʼe nātou fakahā lelei te ʼofa fakatautehina. ʼE mole kole mai ke kita fakahā age he ʼu pepa moʼo fakamoʼoni ko kita ko he Fakamoʼoni ʼa Sehova. ʼE tou maʼu ʼi te ʼu fono ʼaia te fefakaloto mālohi moʼoni ʼaē neʼe talanoa kiai Paulo ia Hepeleo 10:24, 25. Ko te ʼu polokalama olotinatea ʼaē ʼe nātou fakaloto mālohi ke tou fakakaugā mo ʼihi, ʼe mole feala ke nātou foaki mai te faʼahi ʼaia. Ko te manatuʼi ʼo te ʼu palalau ʼaē ʼe tuʼu ia Pesalemo 26:4, 5 ʼe feala ke ina fakatokaga ai ki te ʼu tuʼutāmaki ʼaē ʼe faigafua tona hoko kia tatou ki te ʼu polokalama olotinatea ʼo te Internet.

¹⁶ ʼE mole he tuʼakoi peʼe ko he tātāʼofi ʼo te ʼu faʼahiga naunau ʼaē ʼe maʼu ʼi te Internet, pea ʼe feala pe ke lau e te hahaʼi ʼaē ʼe nātou fakaʼaogaʼi. ʼI te agamāhani, ko te ʼu fānau pea mo te kau tūpulaga ʼe nātou tō gafua ki te ʼu kākā ʼaia. ʼE falala gafua te tamaliki ki he tahi, mo nātou fia ʼiloʼi meʼa fuli, pea mo nātou fia fakaʼaogaʼi te ʼu meʼa foʼou ʼo te olotinatea. Koia, ʼe tonu ki te ʼu mātuʼa ke nātou leʼoleʼo tanatou fānau pea mo foaki kia nātou he takitaki faka Tohi-Tapu ʼo ʼuhiga mo tanatou fakaʼaogaʼi te Internet, ohage pe ko hanatou tokoni ki tanatou fānau mokā nātou filifili te musika peʼe ko te ʼu ʼata.​—1 Ko. 15:33.

¹⁷ Meʼa fakaʼofaʼofa foki, ko ʼihi ʼo tatatou ʼu tēhina mo tuagaʼane neʼe fakamavae nātou he neʼe nātou kamata fakakaugā mo te ʼu hahaʼi ʼo te mālama ʼi te ʼu polokalama ʼaia ʼo te Internet, pea ki muli age, neʼe nātou fai ai te ʼu aga heʼeʼaoga. Ko ʼihi tagata ʼāfea neʼe nātou punamaʼuli ʼaupito, pea neʼe nātou faitohi ʼo fakahā ko ʼihi neʼe nātou līaki tanatou hoa kae nātou fai feʼauʼaki, pea ko te faʼahi ʼaia neʼe hoko ʼuhi pe ko te Internet. (2 Tim. 3:6) Ko ʼihi neʼe nātou līaki te moʼoni he neʼe nātou faka tui ki te ʼu manatu faka ʼaposita. (1 Tim. 4:1, 2) ʼI tatatou sio ki te ʼu tuʼutāmaki maʼuhiga ʼaenī, ʼe mole tonu ai koa la ke tou tokakaga ki te ʼu polokalama ʼo te Internet, ʼaē ʼe tou fakakaugā ai mo te tahi ʼu hahaʼi? ʼE mahino papau ia, kapau ʼe tou maʼu te poto, mo te ʼatamai mālama, mo te fealagia fakakaukau, pea mo te fakasiosio tonu ʼaē ʼe talanoa kiai ia Tāʼaga Lea 2:​10-​19, pea ʼe puipui ai anai tatou.

¹⁸ ʼE lelei hatatou fakatokagaʼi, neʼe ʼi ai te ʼu hahaʼi neʼe nātou fai he ʼu polokalama ʼi te olotinatea moʼo faka mafola ai te logo lelei. ʼE lahi te ʼu polokalama neʼe totogi e te ʼu tēhina kae mole nātou fakahā tonatou ʼu higoa. Ko ʼihi polokalama ʼe feala pe ke totogi e te ʼu ʼaposita ʼaē ʼe nātou fia kākāʼi nātou ʼaē ʼe mole nofo tokaga. (2 Soa. 9-​11) ʼI tana talanoa ʼo ʼuhiga mo te fehuʼi ʼaē peʼe tonu ki he ʼu tēhina ke nātou fakahā te ʼu naunau ʼaia ʼi te olotinatea, neʼe ʼui fēnei e Te Minisitelio ʼo Te Puleʼaga ʼo Novepeli 1997, ʼi te pasina 3: “ ʼE mole ʼaoga ke teuteuʼi e he tahi he ʼu naunau ʼi te Internet ʼo ʼuhiga mo te kau Fakamoʼoni ʼa Sehova, mo tanatou gāue, pea mo tanatou ʼu akonaki. Kua fakatuʼutuʼu e te Sosiete ke fakahā ʼi te Internet [www.watchtower.org] he ʼu naunau ʼe totonu ke fakaʼaogaʼi e te hahaʼi fuli.”

¹⁹ E Feafeaʼi Ki Te ʼu Polokalama Ako ʼAē ʼe Tou Maʼu ʼi Te Internet? Neʼe manatu e ʼihi ʼe nātou tokoni ki tonatou ʼu tēhina mokā nātou fakahā te ʼu kumi ʼaē neʼe nātou fai ʼo ʼuhiga mo te ʼu gāue faka teokalatike kehekehe. Ohage la, ʼe lagi fai e he tahi he ʼu kumi ʼo ʼuhiga mo he akonaki pea ina fakahā leva ʼi te olotinatea, ʼi tana manatu ʼaē ʼe ʼaoga anai te ʼu naunau ʼaia kia nātou ʼaē ka nātou teuteuʼi te akonaki ʼaia. Ko ʼihi ʼe nātou fakahā te ʼu vaega faka Tohi-Tapu fuli ʼo te alatike ako ʼo Te Tule Leʼo ʼaē ka vakaʼi, peʼe nātou fakahā te ʼu tohi ʼaē ʼe fakaʼaogaʼi ki te Ako ʼo te Minisitelio Faka Teokalatike peʼe ki te Ako Tohi ʼo te Kokelekasio. ʼE lagi foaki e ʼihi he ʼu tokoni ʼo ʼuhiga mo te ʼu palalau ʼaē ʼe feala ke kita fai ʼi te fai faka mafola. ʼE ʼaoga moʼoni koa te ʼu meʼa ʼaia?

²⁰ Ko te ʼu tohi pea mo te ʼu meʼa ʼaē neʼe foaki mai e te kautahi ʼa Sehova moʼo fai ʼaki he ʼu kumi, ʼe nātou gāueʼi tatatou fakakaukau, ʼaki he ʼu manatu ʼe ʼaoga pea ʼe ina akoʼi tatou ke tou “iloi te kehekehe o te lelei pea mo te kovi.” (Hep. 5:​14) ʼE tou lava ʼui koa ʼe tou fakahoko te faʼahi ʼaia mokā tou tuku ki ʼihi ke nātou fai he ʼu kumi maʼa tatou?

²¹ Neʼe ʼui ʼo ʼuhiga mo te kau Pelea ʼe nātou “fakaapaapaʼage i te hahai o Tesalonika.” Koteā tona tupuʼaga? Koteʼuhi “nee natou tali fuli pe te Folafola mo te lotolelei, pea i te aho fuape nee natou vakaʼi i te Tohitapu, te mooni o mea aia.” (Gaue 17:11) Logope la neʼe ko Paulo pea mo Silasi ʼaē neʼe nā faka mafola age kia nātou, kae neʼe ko nātou totonu ʼaē neʼe nātou tali te moʼoni, he neʼe nātou fai e nātou totonu ni ʼu kumi.

²² ʼE mole feala ke kita fai hakita ako takitokotahi, mo kapau ʼe kita fakaʼaogaʼi te ʼu kumi ʼaē neʼe fai e he tahi kehe ʼo ʼuhiga mo he faiakonaki peʼe ko te teuteuʼi ʼo he tahi fono! ʼE mole koutou loto koa la ke lagalaga ake takotou tui pea mo takotou falala ʼaē ki te Folafola ʼa te ʼAtua? ʼO fakatafito ki takotou loto ʼaia, ʼe feala ai ke koutou fakahā ki te hahaʼi takotou tui ʼi takotou ʼu faiakonaki, mo te ʼu tali ʼi te ʼu fono, peʼe ʼi te fai faka mafola. (Loma 10:10) Kapau ʼe kita fakaʼaogaʼi te ʼu kumi ʼa he tahi kehe, pea ʼe mole ʼalutahi te faʼahi ʼaia mo te fakamatala ʼaē ʼe tuʼu ia Tāʼaga Lea 2:​4, 5, ke tou ‘haga kumi takitokotahi pea mo kumi tuʼumaʼu te ʼatamai mālama totonu ʼo ʼuhiga mo te ʼAtua ohage ko he ʼu koloā neʼe fufū.’

²³ Ohage la, mokā koutou vakaʼi he ʼu vaega ʼi takotou Tohi-Tapu, pea ʼe feala ke koutou vakaʼi fakanounou te ʼu vaega ʼaē ʼe tuʼu ʼi muʼa atu peʼe ki muli age. ʼE feala ke koutou ‘fekumikumi lelei ia meʼa fuli pe,’ ohage ko tana fai e Luka ʼi tana tohi tana Evaselio. (Luka 1:3) Ko takotou faiga lahi ʼaia ʼe toe tokoni atu anai kia koutou ke koutou popoto ʼi te kumi ʼo te ʼu vaega Tohi-Tapu ʼi te fai faka mafola, pea mokā koutou faiakonaki. Neʼe tokolahi te hahaʼi neʼe nātou ʼui neʼe nātou punamaʼuli ʼo ʼuhiga mo te kau Fakamoʼoni ʼa Sehova, he neʼe nātou popoto ʼi te fakaʼaogaʼi ʼo tanatou Tohi-Tapu. ʼE feala anai ke tou fai te faʼahi ʼaia, mo kapau ʼe tou akoako takitokotahi te kumikumi ʼo te ʼu vaega ʼi tatatou Tohi-Tapu.

²⁴ Tou Fakaʼaogaʼi Fakapotopoto Totatou Temi: Ko te tahi faʼahi ʼe tonu ke tou fakatokagaʼi, ʼe ko te temi lahi ʼaē ʼe tou fakaʼaogaʼi moʼo tohi, mo lau pea mo tali ki te ʼu manatu ʼaē ʼe tuʼu ʼi te Internet. ʼE fakaloto mālohi tatou ia Pesalemo 90:12 ke tou faikole fēnei: “Fakahā mai kia mātou peʼe feafeaʼi te lau ʼo tomatou ʼu ʼaho ke feala ai hamatou maʼu he loto fakapotopoto.” Neʼe ʼui fēnei e Paulo: “[Ko] te temi kua nounou.” (1 Ko. 7:​29, MN) Pea neʼe ina toe ʼui fēnei ki muli age: “Koia leva, i tatatou kei mau te temi, tou fai ia te lelei ki te tagata fuape, kae tafito ia te lelei o te kaiga o te tui.”​—Kal. 6:​10.

²⁵ ʼE fakahā lelei e te ʼu tokoni ʼaia te maʼua ʼaē ke tou fakaʼaogaʼi lelei totatou temi. ʼE lelei age anai hatatou fakaʼaogaʼi totatou temi ki te lau ʼo te Folafola ʼa te ʼAtua! (Pes. 1:1, 2) ʼE lelei age te ʼu fakakaugā ʼaia! (2 Tim. 3:​16, 17) ʼU mātuʼa, ʼe koutou akoʼi koa ki takotou fānau te maʼuhiga ʼaē ke nātou fakaʼaogaʼi fakapotopoto tonatou temi, ke nātou haga kumi te Puleʼaga? (Tnk. 12:1) Ko te temi ʼaē ʼe tou fakaʼaogaʼi ki tatatou ako takitokotahi peʼe ki te ako faka famili ʼo te Tohi-Tapu, mo tatatou kau ki te ʼu fono, pea mo te fai faka mafola, ʼe maʼuhiga age ʼi te ʼu lelei ʼaē ʼe ʼui ʼe tou maʼu mokā tou fakaʼaogaʼi te Internet.

²⁶ ʼO ʼuhiga mo te faʼahi ʼaia, ʼe ko he agapoto anai mo kapau ʼe koutou tokakaga tāfito ki te ʼu meʼa fakalaumālie pea mo te ʼu meʼa ʼaē ʼe pipiki ki totatou maʼuli faka Kilisitiano heʼe maʼuhiga. Ko tona faka ʼuhiga, ʼe tonu ke tou filifili fakalelei te ʼu meʼa ʼaē ʼe tonu ke tou fakaʼaogaʼi kiai totatou temi pea mo tonu ke tou fakakaukauʼi. ʼI totatou ʼuhiga Kilisitiano, ko te meʼa ʼaē ʼe maʼuhiga ʼi totatou maʼuli ko te meʼa ʼaenī neʼe ʼui e Kilisito: “Kae koutou fua kumi te Puleaga o Selo mo tana susitisia pea e foaki atu anai kia koutou ia meafuape alâ.” (Mat. 6:​33) ʼE mole lahi age koa la takotou fiafia mokā koutou fakamuʼamuʼa tāfito ʼi takotou maʼuli te Puleʼaga?

²⁷ Te Faitohi ʼi Te Internet: Logope la ʼe ko he meʼa lelei te fakahā ki tokita famili pe ko te ʼu kaumeʼa ʼaē ʼe nonofo mamaʼo, he ʼu meʼa neʼe hoko kia kita peʼe ko he ʼu manatu, kae ʼe ko he ʼofa moʼoni koa hakita fakahā te ʼu meʼa ʼaia ki he ʼu hahaʼi ʼe mole lagi nātou ʼiloʼi tokita famili pe ko tokita ʼu kaumeʼa? Peʼe tonu koa ke fakahā te ʼu meʼa ʼaia ʼi te olotinatea ke lau e he tahi? ʼE tonu koa ke hiki te ʼu meʼa ʼaia pea mo momoli ki he ʼu hahaʼi ʼe koutou ʼiloʼi peʼe mole koutou ʼiloʼi? ʼO toe feiā pe, kapau ʼe koutou maʼu he ʼu logo mai he ʼu hahaʼi, ka mole ko he tohi maʼa koutou, pea ʼe ko he ʼofa koa mo kapau ʼe koutou momoli te ʼu logo ʼaia ki he tahi ʼu hahaʼi?

²⁸ E feafeaʼi mo kapau ko te ʼu logo ʼaia ʼe mole moʼoni? ʼE mole koutou kau koa la ki he faka mafola ʼo he loi? (Taag. 12:19; 21:28; 30:8; Kol. 3:9) ʼE mahino papau ia, ʼe tou tokaga anai ki te faʼahi ʼaia mo kapau ʼe tou haga “vakai fakapotopoto, pe feafeai te agaaga fai o [totatou] mauli: [ke] aua naʼa hage ko te hahai galivale, kae hage ko te hahai galipoto.” (Ef. 5:​15) ʼE tou fiafia lahi heʼe tou maʼu ʼi te Annuaire, mo Te Tule Leʼo, pea mo te Réveillez-vous! he ʼatu fakamatala ʼe nātou uga tatou ke tou haga haʼele ʼi “te ala”!​—Isa. 30:20, 21.

²⁹ ʼE ʼi ai mo te tahi tuʼutāmaki. Neʼe ʼui fēnei e te ʼapositolo ko Paulo ʼo ʼuhiga mo ʼihi: “E natou ako ai mo te piko, o feʼoloʼaki i te u api, e mole gata mo te piko pea mo te gutu palalau, mo te gutu vale, o natou lau te u mea e mole tonu ke lau.” (1 Tim. 5:​13) ʼE ko he fakatokaga ʼaenī ki totatou temi pea mo totatou mālohi ʼaē ʼe tou fakaʼaogaʼi moʼo fakahā he ʼu logo ʼe mole honatou ʼaoga ki totatou ʼu tēhina.

³⁰ Koutou fakakaukauʼi age muʼa te temi lahi ʼaē ʼe tonu ke koutou fakaʼaogaʼi moʼo tali ki te ʼu tuʼuga tohi ʼaē ʼe fai ʼi te Internet! ʼE lelei ke tou fakatokagaʼi, neʼe ʼui fēnei e te tohi Le smog de données : survivre à la surinformation (Fakapilitānia): “Ka ʼāsili lahi te temi ʼaē ʼe kita nofo ai ʼi te olotinatea, pea ʼe mole kei tatau ai leva tona faʼahiga fakaʼaogaʼi, heʼe ʼi te kamata ʼe kita fia ʼiloʼi te ʼu meʼa foʼou ʼaē ʼe hoko kae ki muli age, ʼe lahi ʼaupito te temi ʼaē ʼe kita fakaʼaogaʼi, heʼe tonu ke kita lau te ʼu logo ʼe lauʼi hogofulu pea mo tali kiai ʼi te ʼaho fuli, ki takita ʼu kaugā gāue, te ʼu kaumeʼa, te famili . . . pea ʼe nātou momoli atu he ʼu publicités neʼe mole kita kole age.” ʼE toe ʼui fēnei e te tohi ʼaia: “Tokolahi te hahaʼi kua lahi te ʼu logo ʼe nātou maʼu, pea ko hanatou agamāhani te momoli ʼo te ʼu logo fuli ʼaia​—te ʼu meʼa fakakata, te ʼu fagana, te ʼu tohi neʼe fai age ʼi te olotinatea, pea mo te tahi ʼatu ʼu meʼa​—kia nātou fuli ʼaē ʼe ʼi ai tanatou tuʼasila ʼi te olotinatea.”

³¹ ʼE hoko te faʼahi ʼaia ʼi te ʼu fefaitohiʼaki ʼo te tokolahi ʼo te ʼu tēhina ʼi te olotinatea​—ohage ko te fakahā ʼo he ʼu meʼa fakakata, peʼe ko he ʼu hisitolia fakakata ʼo ʼuhiga mo te fai faka mafola; he ʼu fakatuketuke ʼe fakatafito ki te ʼu meʼa ʼaē ʼe tou tui kiai; he ʼu palalau fakatātā neʼe fai ʼi he ʼu faiakonaki kehekehe ʼi te ʼu fakatahi lalahi peʼe ʼi te Fale ʼo te Puleʼaga; ko he ʼu meʼa neʼe hoko ʼi te fai faka mafola, pea mo te tahi atu ʼu meʼa​—ko he ʼu meʼa ʼe hage ʼe mole faʼa kovi. Tokolahi ʼe nātou momoli te ʼu tohi ʼaia ʼi te olotinatea ki te tahi ʼu hahaʼi, ka mole nātou vakaʼi peʼe haʼu maifea, pea ʼe faigataʼa ai te ʼiloʼi pe ko ai ʼaē neʼe ina tohi moʼoni te ʼu meʼa ʼaia, koia ʼe maʼua ai ke kita vakaʼi peʼe moʼoni koa te logo ʼaia.​—Taag. 22:20, 21.

³² Ko te ʼu logo ʼaia, ʼaē ʼi te agamāhani ʼe mole honatou ʼaoga, ʼe mole tatau ia mo te ʼu palalau lelei ʼaē neʼe fai e Paulo kia Timoteo, ʼo ina ʼui fēnei: “Too faifaitakiʼaga maia folafola mauli nee ke logo ki ai maià te au, i te tui mo te ofa e ia Kilisito Sesu.” (2 Tim. 1:​13) Ko te “lea maʼa” ʼo te moʼoni ʼi te Tohi-Tapu ʼe fakatafito tana “faifaitakiʼaga maia folafola mauli” ki te kupu tāfito ʼo te Tohi-Tapu, ʼaē ko te faka lākatonuʼi ʼo te pule faʼitaliha ʼa Sehova ʼaki te Puleʼaga. (Sofo. 3:9) ʼE tonu ke tou faiga katoa ke tou fakaʼaogaʼi totatou temi pea mo totatou mālohi moʼo lagolago ki te faka lākatonuʼi ʼaia ʼo te pule faʼitaliha ʼa Sehova.

³³ Mai tona ʼaluʼaga ʼaē kua tou fakaōvi ki te fakaʼosi ʼo te tuʼu ʼo te ʼu faʼahiga meʼa ʼaenī, koia ʼe ko he temi ke tou nofo tokakaga ai. ʼE fakatokaga fēnei mai e te Tohi-Tapu: “Ke koutou haohaoa mai te konahia, koutou alaala! Ko toutou fili, te temonio, o hage ko he laione e gugulu, e feʼaluʼaki o kumi he tahi ke ina kai.” (1 Pet. 5:8) ʼE ina toe ʼui fēnei ki muli age: “Koutou tui te teu’tau o te Atua ke koutou lava tatali te u puleaki a te temonio.”​—Ef. 6:​11.

³⁴ Kapau ʼe kovi tona fakaʼaogaʼi, pea ʼe feala ke liliu te Internet ko he meʼa ʼe fakaʼaogaʼi e Satana moʼo fakatō ia nātou ʼaē ʼe nātou leleiʼia te faʼahi ʼaia. Logope la ʼe feala ke faka tuʼakoi tona fakaʼaogaʼi, kae ʼe feala ke fakatupu tuʼutāmaki kia kita mo kapau ʼe mole kita tokaga kiai. Ko te ʼu mātuʼa ʼe tonu ke nātou tokaga tāfito ki te ʼu meʼa ʼaē ʼe fai e tanatou fānau ʼi te Internet.

³⁵ Kapau ʼe tou fakahā te fakapotopoto ʼi tatatou fakaʼaogaʼi te Internet pea ʼe puipui ai tatou. ʼE tou leleiʼia te fakamanatu ʼaenī ʼe fai e Paulo ʼo ʼuhiga mo te temi: “[Ko] natou e natou fakaaoga te malama-nei ke mau hanatou mea, ke hage e mole natou mau ai hanatou mea. Koteuhi e fakamole ia fofoga o te malama-nei.” (1 Ko. 7:​29-31) Ko tatatou manatuʼi te ʼu meʼa ʼaia, ʼe tokoni mai anai kia tatou pea mo tatatou famili ke ʼaua naʼa tou tokakaga tāfito ki te ʼu meʼa fuli ʼaē ʼe fakahāhā e te mālama, ʼo kau ai mo te ʼu meʼa ʼaē ʼe feala ke tou maʼu ʼi te Internet.

³⁶ ʼE maʼuhiga ʼaupito ke tou fakakaugā tāfito mo totatou ʼu tēhina ʼi te kokelekasio, pea mo fakaʼaogaʼi fakapotopoto te temi ʼaē kei toe, ʼo tou faiga ke tou kau ki te fakahaʼele ki muʼa ʼo te ʼu gāue ʼo te Puleʼaga. ʼI te ōvi mai ʼo te fakaʼosi ʼo te tuʼu ʼaenī, “aua tautou toe mauli o hage ko te kau pagani, e natou mauli i te fialahi o anatou fakakaukau,” kae ke tou “mahino pe kotea te finegalo o te Aliki.”​—Ef. 4:​17; 5:​17.