Neʼe Nātou Tutupu Ake ʼi He Puleʼaga Kua Filifili e Te ʼAtua

“Ko koe ʼaē neʼe filifili e Sehova tou ʼAtua ke ke liliu ko tana hahaʼi.” ​—Teutalonome 7:⁠6.

1, 2. Koteā te ʼu gāue fakaofoofo ʼaē neʼe fakahoko e Sehova maʼa tana hahaʼi, pea neʼe feafeaʼi te felogoi ʼa Iselaele pea mo te ʼAtua?

ʼI TE taʼu 1513 ʼi muʼa ʼo totatou temi, neʼe felogoi Sehova mo tana ʼu kaugana ʼi te kele ʼi hona ʼaluʼaga foʼou. ʼI te taʼu ʼaia, neʼe ina fakalainoaʼi te mālohi ʼaē neʼe ina puleʼi te malamanei ʼi te temi ʼaia pea mo ina faka ʼāteainaʼi te kau Iselaele mai tanatou nonofo popūla. ʼI tana fai te faʼahi ʼaia, neʼe liliu ai ko tonatou Hāofaki pea mo tonatou Pule. ʼI muʼa ʼo tana fakahoko te faʼahi ʼaia, neʼe ʼui fēnei e te ʼAtua kiā Moisese: “Tala age ki te ʼu foha ʼo Iselaele, ‘Ko au ia Sehova, pea ʼe au fakamavae moʼoni mai koutou mai te ʼu kavega ʼa te kau Esipito pea ʼe au hāofaki anai koutou mai te maʼuli popūla, pea ʼe au hāofaki moʼoni anai koutou ʼaki ʼoku nima pea mo he ʼu fakamāu lahi. Pea ʼe au taupau moʼoni anai koutou ko taku hahaʼi, pea ʼe au liliu moʼoni anai ko tokotou ʼAtua.’ ”​—Ekesote 6:​6, 7, kiʼi nota ʼi te lalo pasina; 15:​1-7, 11.

² Hili pe tanatou Mavae mai Esipito, neʼe fai e te kau Iselaele he fuakava mo Sehova, tonatou ʼAtua. Neʼe mole kei felogoi ia Sehova mo he ʼu tagata, peʼe ko he ʼu famili, peʼe ko he kūtuga. Neʼe kua ʼi ai te hahaʼi ʼa Sehova ʼi te kele, kua fakatuʼutuʼu ohage ko he puleʼaga. (Ekesote 19:​5, 6; 24:7) Neʼe ina foaki ki tana hahaʼi he ʼu lao ʼo ʼuhiga mo tonatou maʼuli pea tāfito, ʼo ʼuhiga mo tanatou tauhi. Neʼe ʼui fēnei e Moisese kiā nātou: “Kofea te fenua lahi ʼaē ʼe ʼi ai tona ʼu ʼatua ʼe ōvi kiai ohage ko Sehova, totatou ʼAtua, ʼi te ʼu lakaga fuli pe ʼaē ʼe tou kalaga ki ai? Pea kofea koa he fenua lahi ʼe ina maʼu te ʼu pelesepeto pea mo te ʼu tonu fakamāu faitotonu, ohage ko te lao kātoa ʼaenī ʼe au tuku atu kiā koutou ʼi te ʼaho nei?”​—Teutalonome 4:​7, 8.

Neʼe Tutupu Ake ʼi He Puleʼaga ʼe Ko Tana Kau Fakamoʼoni

3, 4. Koteā te tupuʼaga tāfito ʼo te liliu ʼa Iselaele ko he puleʼaga?

³ ʼI ni ʼu sēkulō ki muli age, ʼaki tana polofeta ko Isaia, neʼe fakamanatuʼi e Sehova ki te kau Iselaele ia te tupuʼaga tāfito ʼo tanatou liliu ko he puleʼaga. Neʼe ʼui fēnei e Isaia: “Koʼeni te meʼa ʼaē neʼe ʼui e Sehova, tou Tupuʼaga, Ê Sakopo, ia ia ʼaē neʼe ina Faʼu koe, Ê Iselaele: ‘ ʼAua naʼa ke manavasiʼi, he neʼe au totogi koe. Neʼe au pāuiʼi koe ʼaki tou huafa. Ko koe ʼe ʼa ʼaku. Heʼe ko au ko Sehova tou ʼAtua, te Maʼoniʼoni ʼo Iselaele tou Hāofaki. . . . ʼAumai toku ʼu foha mai mamaʼo, pea mo toku ʼu ʼofafine mai te potu taupotu ʼo te kele, ia nātou fuli ʼaē ʼe higoa ki toku huafa pea neʼe au fakatupu ki toku kolōlia, ʼaē neʼe au faʼu, ei, ʼaē neʼe au fai. Ko koutou ko taku kau fakamoʼoni,’ ko te tala ʼaia ʼa Sehova, ‘ ʼei, ko taku kaugana ʼaē neʼe au fili, . . . ko te hahaʼi ʼaē neʼe au faʼu maʼa ʼaku, ke nātou fakamatala toku vikiviki.’ ”​—Isaia 43:​1, 3, 6, 7, 10, 21.

⁴ ʼI tonatou ʼuhiga hahaʼi ʼaē ʼe nātou toʼo te huafa ʼo Sehova, neʼe liliu te kau Iselaele ko he ʼu fakamoʼoni ʼo tana pule faʼitaliha iā muʼa ʼo te ʼu puleʼaga. Neʼe ko he hahaʼi ‘neʼe fakatupu ki te kolōlia ʼo Sehova.’ Neʼe tonu ke nātou ‘fakamatala te vikiviki ʼo Sehova,’ tana hāofaki fakaofoofo ia nātou pea mo faka kolōliaʼi ai tona huafa taputapu. ʼI tona fakanounou, neʼe tonu ke nātou liliu ko he puleʼaga ʼe nātou fakamoʼoni kiā Sehova.

5. He koʼe ko Iselaele neʼe ko he puleʼaga neʼe kua foaki ki te ʼAtua?

⁵ ʼI te 11 sēkulō ʼi muʼa ʼo totatou temi, neʼe fakahā e te Hau ko Salomone ko Sehova neʼe ina fakatuʼutuʼu ia Iselaele ko he puleʼaga neʼe vaheʼi keheʼi. ʼI tana faikole kiā Sehova, neʼe ina ʼui fēnei: “Ko koe ʼaē neʼe ke tuku keheʼi mai te hahaʼi fuli ʼo te kele ko hou tofiʼa.” (1 Hau 8:53) Neʼe toe maʼu e te kau Iselaele takitokotahi he felogoi makehe mo Sehova. Ki muʼa atu, neʼe ʼui fēnei e Moisese kiā nātou: “Ko koutou ko te ʼu foha ʼo Sehova tokotou ʼAtua. . . . Heʼe ko koutou ko te hahaʼi maʼoniʼoni ʼa Sehova tokotou ʼAtua.” (Teutalonome 14:​1, 2) Koia, ko te kau tūpulaga Iselaele neʼe mole ʼaoga ke nātou foaki tonatou maʼuli kiā Sehova. Neʼe nātou tutupu ake ʼi te hahaʼi kua foaki ki te ʼAtua. (Pesalemo 79:13; 95:7) Ko te ʼu taʼiake foʼou fuli neʼe akoʼi kiā nātou te ʼu lao ʼa Sehova pea neʼe fakamaʼua ke nātou taupau ʼuhi ko te fuakava ʼaē ʼe haʼi ai ia Iselaele kiā Sehova.​—Teutalonome 11:​18, 19.

Neʼe Feala Ke Nātou Filifili Ke Nātou Fakalogo Peʼe Kailoa

6. Koteā ʼaē neʼe tonu ke filifili e te kau Iselaele takitokotahi?

⁶ Logola neʼe tutupu ake te kau Iselaele ʼi he puleʼaga kua foaki ki te ʼAtua, kae neʼe tonu ke nātou filifili takitokotahi ke nātou tauhi ki te ʼAtua. ʼI muʼa ʼo tanatou hū ki te Kele ʼo Te Fakapapau, neʼe ʼui fēnei e Moisese kiā nātou: “Iā ʼaho nei, ʼe au toʼo te lagi pea mo te kele ko he ʼu fakamoʼoni ʼe fakafeagai kiā koutou, neʼe au tuku atu ki ʼou muʼa te maʼuli pea mo te mate, te tapuakina pea mo te malaʼia, pea ʼe tonu ke ke fili te maʼuli ke feala ai hau maʼuli, ia koe pea mo tou hōloga, ʼo ke ʼofa kiā Sehova, tou ʼAtua, ʼo ke fakalogo ki tona leʼo pea mo ke pipiki maʼu kiā te ia, he ko ia tou maʼuli pea mo te loaloaga ʼo tou ʼu ʼaho, ke ke maʼuli ʼi te kele ʼaē neʼe fakapapau e Sehova ke ina foaki age ki tau ʼu kui, ia Apalahamo, mo Isaake pea mo Sakopo.” (Teutalonome 30:​19, 20) Koia, neʼe tonu ke filifili e te kau Iselaele takitokotahi ke nātou ʼoʼofa kiā Sehova, mo fakalogo ki tona leʼo, pea mo pipiki kiā te ia. Mai tona ʼaluʼaga ʼaē neʼe feala ke filifili e te kau Iselaele, koia neʼe nātou tali ke nātou ʼamo mo te ʼu fua ʼo te ʼu meʼa ʼaē neʼe nātou filifili.​—Teutalonome 30:​16-18.

7. Koteā ʼaē neʼe hoko ʼi te ʼosi puli ʼa te taʼiake ʼo Sosue?

⁷ Ko te temi ʼo te kau Tuʼi Fakamāu ʼe ko he faʼifaʼitaki lelei ʼaia moʼo fakahā te ʼu fua ʼo te agatonu pea mo te heʼe agatonu. ʼI muʼa pe ʼo te kamata ʼo te temi ʼaia, neʼe mulimuli te kau Iselaele ki te faʼifaʼitaki lelei ʼa Sosue pea neʼe tapuakina nātou. “Neʼe tauhi te hahaʼi kiā Sehova ʼi te ʼu ʼaho fuli pe ʼo Sosue pea mo te ʼu ʼaho ʼa te kau tagata mātuʼa ʼaē neʼe hoko atu tonatou maʼuli hili ia Sosue pea neʼe nātou mamata ki te gāue lahi kātoa ʼa Sehova, ʼaē neʼe ina fai maʼa Iselaele.” Kae hili te mate ʼo Sosue, “neʼe tupu ake te taʼiake neʼe mole nātou ʼiloʼi ia Sehova, pea mo te gāue ʼaē neʼe ina fai ki Iselaele. Pea neʼe fai e te ʼu foha ʼo Iselaele ia te meʼa ʼaē ʼe kovi kiā mata ʼo Sehova.” (Kau Tuʼi Fakamāu 2:​7, 10, 11) ʼE hā mai, ko te taʼiake foʼou ʼaē neʼe mole sio ki te ʼu gāue ʼa Sehova, neʼe mole maʼuhiga kiā nātou tonatou tofiʼa, tanatou kau ki he hahaʼi kua foaki ki te ʼAtua, ki te hahaʼi ʼaē neʼe fai e Sehova ʼAtua maʼa nātou he ʼu gāue lalahi ʼi te temi muʼa.​—Pesalemo 78:​3-7, 10, 11.

Te ʼu Fakamaʼua ʼi Tanatou Kau Ki He Puleʼaga Kua Foaki Ki Te ʼAtua

8, 9. (a) Koteā te fakatuʼutuʼu neʼe feala ai ke fakahā e te kau Iselaele tanatou fia tauhi kiā Sehova? (b) Koteā ʼaē neʼe maʼu e nātou ʼaē neʼe nātou fai he ʼu sākilifisio ʼaki he lotolelei?

⁸ Neʼe foaki e Sehova he ʼu faigamālie ki tana hahaʼi ke nātou fakahoko te ʼu fakamaʼua ʼi tanatou kau ki he puleʼaga kua foaki ki te ʼAtua. Ohage la, neʼe ʼi ai ʼi te Lao te ʼu sākilifisio neʼe feala ke fai, peʼe ko he ʼu mōlaga, ko ʼihi neʼe fakamaʼua pea ko ʼihi neʼe fai ʼaki he lotolelei. (Hepeleo 8:3) Neʼe kau ʼi te ʼu sākilifisio ʼaia te ʼu holokoseta, te ʼu mōlaga pulapula, pea mo te ʼu sākilifisio ʼo te logo tahi, pea neʼe fai ʼaki he lotolelei​—ko he ʼu meʼa ʼofa neʼe fai kiā Sehova moʼo maʼu tona ʼofa pea mo fakahā he loto fakafetaʼi.​—Levitike 7:​11-13.

⁹ Neʼe tali lelei e Sehova te ʼu sākilifisio ʼaia ʼaē neʼe fai ʼaki he lotolelei. ʼE ʼui ʼi te Tohi-Tapu ko te ʼu holokoseta pea mo te ʼu mōlaga pulapula neʼe hage ko “he ʼaele magoni fakamālōlō kiā Sehova.” (Levitike 1:9; 2:2) ʼI te sākilifisio ʼo te logo tahi, ko te toto pea mo te gako ʼo te manu neʼe momoli kiā Sehova, pea ko te ʼu koga kakano ʼo te manu neʼe kai e te kau pelepitelo pea mo ia ʼaē neʼe ina foaki te sākilifisio. Neʼe ko he kai fakatātā ʼaia moʼo fakahā tanatou felogoi lelei mo Sehova. Neʼe ʼui fēnei ʼi te Lao: “Pea kapau ʼe koutou sākilifisioʼi he sākilifisio ʼo te logo tahi kiā Sehova, ʼe koutou sākilifisioʼi anai ke ina tali lelei koutou.” (Levitike 19:5) Logola ko te kau Iselaele fuli neʼe kua foaki nātou kiā Sehova ʼi tonatou tutupu ake, kae ko nātou ʼaē neʼe nātou fia fakahā tanatou fia tauhi kiā Sehova ʼi tanatou fai he ʼu sākilifisio ʼaki he lotolelei, ‘neʼe tali leleiʼi ai nātou’ pea neʼe tapuakina lahi nātou.​—Malakia 3:⁠10.

10. Neʼe fakahā feafeaʼi e Sehova tana mole fiafia ʼi te temi ʼo Isaia pea mo Malakia?

¹⁰ Kae neʼe tuʼa lahi te heʼe agatonu ʼa te puleʼaga ʼo Iselaele kiā Sehova. ʼAki tana polofeta ko Isaia, neʼe ʼui fēnei e Sehova kiā nātou: “Neʼe mole ke momoli mai te ʼu ōvi ʼo tou holokoseta, pea ʼaki tau ʼu sākilifisio neʼe mole ke faka kolōliaʼi au. Neʼe mole au fakakinauʼi atu ke ke tauhi mai ʼaki he meʼa ʼofa.” (Isaia 43:23) Tahi ʼaē meʼa, ko te ʼu sākilifisio ʼaē neʼe mole fai ʼaki he lotolelei pea mo te ʼofa, neʼe mole maʼuhiga kiā mata ʼo Sehova. Ohage la, hili sēkulō e tolu ki te temi ʼo Isaia, ʼi te temi ʼo te polofeta ko Malakia, neʼe momoli e te kau Iselaele he ʼu manu neʼe māhahaki. Koia neʼe ʼui fēnei ai e Malakia kiā nātou: “ ‘ ʼE mole au fiafia kiā koutou,’ ko te ui ʼaia ʼa Sehova ʼo te ʼatu kautau, ‘pea ʼe mole au fiafia ki te mōlaga ʼo tokotou nima.’ . . . ‘Neʼe koutou ʼaumai te meʼa ʼaē neʼe faʼao, pea mo te manu ʼaē ʼe ketu, pea mo ʼaē ʼe mahaki; ei, neʼe koutou ʼaumai ke momoli. ʼE feala koa ke au fiafia ʼi te ʼu meʼa mai ʼokotou nima?’ ko te ʼui ʼaia ʼa Sehova.”​—Malakia 1:​10, 13; Amosi 5:⁠22.

Neʼe Līaki Te Puleʼaga ʼAē Neʼe Foaki Kiā Sehova

11. Koteā te faigamālie ʼaē neʼe foaki ki Iselaele?

¹¹ ʼI te temi ʼaē neʼe liliu ai te kau Iselaele ko he puleʼaga kua foaki kiā Sehova, neʼe ina fakapapau fēnei kiā nātou: “Kapau ʼe koutou fakalogo lelei ki toku leʼo pea mo koutou taupau fakalelei taku fuakava, pea ʼe koutou liliu moʼoni anai ko taku koloā makehe ʼi te lotolotoiga ʼo te ʼu hahaʼi fuli, heʼe ʼaʼaku te kele kātoa. Pea ko koutou, ʼe koutou liliu anai maʼaku ko he puleʼaga faka pelepitelo pea ʼe ko he puleʼaga maʼoniʼoni.” (Ekesote 19:​5, 6) Neʼe hā te Mesia ʼaē neʼe fakapapau ʼi te puleʼaga ʼo Iselaele pea neʼe ʼuluaki foaki kiā nātou te fealagia ke nātou kau ki te Puleʼaga ʼo te ʼAtua. (Senesi 22:​17, 18; 49:10; 2 Samuele 7:​12, 16; Luka 1:​31-33; Loma 9:​4, 5) Kae tokolahi ʼi te puleʼaga ʼaia neʼe mole kei nātou mulimuli ki te ʼu fakamaʼua ʼo tanatou kua foaki ki te ʼAtua. (Mateo 22:14) Neʼe nātou fakafisi ki te Mesia pea ki muli age neʼe nātou matehi ia ia.​—Gaue 7:​51-53.

12. Koteā ʼaē neʼe ʼui e Sesu ʼe fakahā ai neʼe līaki ia Iselaele ʼi tona ʼuhiga puleʼaga ʼaē kua foaki kiā Sehova?

¹² ʼI ni ʼu ʼaho ʼi muʼa ʼo te mate ʼo Sesu, neʼe ina ʼui fēnei ki te kau takitaki lotu Sutea: “Pe nee heeki mo koutou lau i te Tohi-tapu: Ko te maka nee liaki e te kau tufuga, kua liliu ko te maka agele; ko te tufuga aia a te Aliki, pea e fakaofolele ki otatou mata. Koia, e au tala atu kia koutou: ‘E too anai maia koutou te Puleaga o te Atua pea e foakiʼage anai ki he puleaga e ina fakafua anai.’ ” (Mateo 21:​42, 43) Moʼo fakatātā ia te līaki ʼo nātou e Sehova ʼi tonatou ʼuhiga puleʼaga ʼaē kua foaki kiā te Ia, neʼe ʼui fēnei e Sesu: “Selusalemi, Selusalemi, te [kolo] ʼaē ʼe ina matehi te kau polofeta pea mo ina taumakaʼi ia nātou ʼaē ʼe fekauʼi kiā te ia,​—kua tuʼa fia taku fia tānaki tau ʼu fānau ohage ko he matuʼa moa ʼe ina tānaki tona ʼu ʼuhi ʼi tona ʼu lalo kapakau! Kae neʼe mole koutou loto kiai. Koʼeni ko tokotou ʼapi kua tuku lāvaki atu kiā koutou.”​—Mateo 23:​37, 38, MN.

Ko He Puleʼaga Foʼou Kua Foaki Ki Te ʼAtua

13. Koteā ʼaē neʼe fakakikite e Sehova ʼi te temi ʼo Selemia?

¹³ ʼI te temi ʼo te polofeta ko Selemia, neʼe fakakikite e Sehova he meʼa foʼou ʼo ʼuhiga mo tana hahaʼi. ʼE tou lau fēnei: “ ‘Koʼeni ʼe hoko mai te ʼu ʼaho’, ko te ʼui ʼaia ʼa Sehova, ‘ ʼe au fai anai mo te ʼapi ʼo Iselaele pea mo te ʼapi ʼo Suta te fuakava foʼou; ʼe mole ko he fuakava ohage ko te fuakava ʼaē neʼe au fai mo tanatou ʼu kui, ʼi te temi ʼaē neʼe au fā ai ki tonatou nima moʼo fakahū ia nātou ki tuʼa mai te fenua ko Esipito, “ko te fuakava ʼa ʼaku ʼaē neʼe nātou maumauʼi, logope la, neʼe ko au, ko tona pule mo ʼohoana,” ko te ʼui ʼaia ʼa Sehova.’ ‘Heʼe koʼeni te fuakava ʼaē ʼe au fai anai mo te ʼapi ʼo Iselaele, ʼi te hili ʼo te ʼu ʼaho ʼaia,’ ko te ʼui ʼaia ʼa Sehova. ‘ ʼE au ʼai anai taku lao kiā nātou, pea ʼe au tohi anai ʼi tonatou loto. Pea ʼe au liliu anai ko tonatou ʼAtua pea ko nātou ʼe liliu anai ko taku hahaʼi.’ ”​—Selemia 31:​31-33.

14. Ko te temi fea ʼaē neʼe kamata ai te puleʼaga foʼou ʼaē kua foaki kiā Sehova pea neʼe fakatafito ki tea? Ko ai te puleʼaga foʼou ʼaia?

¹⁴ Neʼe fakatuʼu te tafitoʼaga ʼo te fuakava foʼou ʼaia ʼi te temi ʼaē neʼe mate ai Sesu pea mo ina fakahā ki muli age te maʼuhiga ʼo tona taʼataʼa ki tana Tāmai, ʼi te taʼu 33 ʼo totatou temi. (Luka 22:20; Hepeleo 9:​15, 24-26) Kae, neʼe kamata te fuakava foʼou ʼaia ʼi te temi ʼaē neʼe folahi ai te laumālie maʼoniʼoni ʼi te Penikosite ʼo te taʼu 33 ʼo totatou temi, pea neʼe tupu ai te puleʼaga foʼou, ia “te Iselaele a te Atua.” (Kalate 6:16; Loma 2:​28, 29; 9:6; 11:​25, 26) ʼI tana faitohi ki te kau Kilisitiano fakanofo, neʼe tala fēnei e te ʼapositolo ko Petelo: “Ko koutou, ‘ko te faʼahiga hahaʼi kua fili, ko he kau pelepitelo faka hau, ko he puleʼaga maʼoniʼoni, ko he hahaʼi kua tuku ke liliu ko hana koloā makehe, ke koutou faka mafola te ʼu kalitātē’ ʼo ia ʼaē neʼe ina pāui koutou mai te fakapōʼuli ki tona mālama taulekaleka. Heʼe ʼi te temi muʼa neʼe mole ko koutou ko te hahaʼi, kae ʼi te temi nei ko koutou ko te hahaʼi ʼa te ʼAtua.” (1 Petelo 2:​9, 10, MN ) Neʼe kua gata ia te ʼu felogoi makehe ʼa Sehova mo te puleʼaga ʼo Iselaele. ʼI te taʼu 33 ʼo totatou temi, neʼe mole kei tapuakina e Sehova te puleʼaga fakakelekele ʼo Iselaele, kae kua ina tapuakina te Iselaele fakalaumālie, te kokelekasio faka Kilisitiano, ko ‘he puleʼaga ʼe ina fakafua te ʼu fua’ ʼo te Puleʼaga Faka Mesianike.​—Mateo 21:⁠43.

ʼE Foaki e Te Hahaʼi Takitokotahi Tonatou Maʼuli

15. ʼI te Penikosite ʼo te taʼu 33 ʼo totatou temi, ko te papitema fea ʼaē neʼe uga e Petelo ke tali e te hahaʼi ʼaē neʼe fakalogo?

¹⁵ Hili te Penikosite ʼo te taʼu 33 ʼo totatou temi, ko te hahaʼi takitokotahi, Sutea peʼe Senitile, neʼe tonu ke nātou foaki e nātou totonu tonatou maʼuli ki te ʼAtua pea mo papitema “i te Huafa o te Tamai, mo te Alo, mo te Laumalie-Maonioni.”a (Mateo 28:19) ʼI te Penikosite, neʼe ʼui fēnei e te ʼapositolo ko Petelo ki te kau Sutea pea mo te kau poloselite ʼaē neʼe fia logo: “Koutou fakahemala, pea ke koutou tahi papitema ʼi te huafa ʼo Sesu Kilisito moʼo fakamolemole ʼakotou agahala, pea ʼe koutou maʼu anai te meʼa ʼofa ʼo te laumālie maʼoniʼoni.” (Gaue 2:​38, MN ) Ko te kau Sutea pea mo kau poloselite ʼaia neʼe nātou fakahā ʼaki tanatou papitema tanatou kua foaki tonatou maʼuli kiā Sehova, pea mo tanatou tali te fakaʼaogaʼi e Sehova ia Sesu moʼo fakamolemole tanatou ʼu agahala. Neʼe tonu ke nātou fakamoʼoni ko ia te Pelepitelo Lahi ʼa Sehova pea ko ia tonatou Takitaki, mo te Pule ʼo te kokelekasio faka Kilisitiano.​—Kolose 1:​13, 14, 18.

16. ʼI te temi ʼo Paulo, neʼe kau feafeaʼi te ʼu hahaʼi loto moʼoni, te kau Sutea pea mo te kau Senitile, ki te Iselaele fakalaumālie?

¹⁶ ʼI ni ʼu taʼu ki muli age, neʼe ʼui fēnei e te ʼapositolo ko Paulo: “Kiā nātou ʼuluaki ʼi Tamaso pea kiā nātou ʼi Selusalemi, pea ʼi te fenua kātoa ʼi Sutea, pea mo te ʼu puleʼaga, neʼe au ʼave te logo: ke nātou fakahemala pea mo tafoki mai ki te ʼAtua ʼo nātou fai te ʼu gāue ʼe tuha mo te fakahemala.” (Gaue 26:​20, MN ) ʼI te kua tui ʼa te hahaʼi​—te kau Sutea pea mo te kau Senitile​—ko Sesu neʼe ko Kilisito, te Mesia, neʼe tokoni ia Paulo kiā nātou ke nātou foaki tonatou maʼuli pea mo papitema. (Gaue 16:​14, 15, 31-33; 17:​3, 4; 18:8) ʼI tanatou toe tafoki ki te ʼAtua, neʼe liliu ai te ʼu tisipulo foʼou ʼaia ʼo kau ki te Iselaele fakalaumālie.

17. Koteā te gāue fakaʼiloga ʼaē kua vave fakaʼosi, pea koteā te tahi gāue ʼe lolotoga fakahoko?

¹⁷ Iā ʼaho nei, kua ōvi mai te fakaʼiloga fakamuli ʼo te toe ʼo te kau Iselaele fakalaumālie. Ka kātoa anai te fakaʼiloga ʼaia, pea ʼe fakagafua anai ki “te ʼu ʼāselo e toko fā” ke nātou tuku te ʼu matagi ʼo te fakaʼauha ʼo “te mamahi lahi” ʼaē ʼe nātou lolotoga puke nei. ʼO talitali ki te ʼaho ʼaia, ʼe fakahoko fakavilivili te tānaki ʼo te “toe hahaʼi tokolahi,” ʼaē ʼe nātou ʼamanaki māʼuʼuli ʼo heʼegata ʼi te kele. Ko te “tahi ʼu ōvi” ʼaia ʼe nātou filifili ke nātou tui ki “te taʼataʼa ʼo te ʼAkeno” pea mo papitema moʼo fakahā ai tanatou kua foaki tonatou maʼuli kiā Sehova. (Apokalipesi 7:​1-4, 9-15, MN; 22:17; Soane 10:​16, MN; Mateo 28:​19, 20) Iā nātou ʼaia, ʼe kau ai te kau tūpulaga tokolahi neʼe pusiaki e te ʼu mātuʼa Kilisitiano. Kapau ko koe ko he tūpulaga, pea ʼe ke fia lau anai te alatike ʼaē ʼe hoa mai.

[Kiʼi nota]

Moʼo Fakamanatu

• He koʼe neʼe mole ʼaoga ke foaki e te kau tūpulaga Iselaele takitokotahi tonatou maʼuli kiā Sehova?

• Neʼe lava fakahā feafeaʼi e te kau Iselaele tanatou fakahoko tanatou foaki tonatou maʼuli?

• He koʼe neʼe līaki e Sehova ia Iselaele ʼi tona ʼuhiga puleʼaga ʼaē kua foaki kiā te ia, pea ko ai ʼaē neʼe ina fetogi?

• ʼO kamata ʼi te Penikosite ʼo te taʼu 33 ʼo totatou temi, koteā ʼaē neʼe tonu ke fai e te kau Sutea pea mo te kau Senitile ke nātou kau ki te Iselaele fakalaumālie?

[Paki ʼo te pasina 21]

Ko te kau tūpulaga Iselaele neʼe tutupu ake ʼi he puleʼaga kua filifili e te ʼAtua

[Paki ʼo te pasina 23]

Neʼe tonu ki te kau Iselaele takitokotahi ke nātou filifili ke nātou tauhi ki te ʼAtua

[Paki ʼo te pasina 23]

Ko te ʼu sākilifisio ʼaē neʼe fai ʼaki he lotolelei neʼe ko he faigamālie ʼaia ki te kau Iselaele ke nātou fakahā tonatou ʼofa kiā Sehova

[Paki ʼo te pasina 25]

Hili te Penikosite ʼo te taʼu 33 ʼo totatou temi, neʼe tonu ki te ʼu tisipulo ʼa Kilisito ke nātou foaki tonatou maʼuli ki te ʼAtua pea mo nātou papitema