ʼAua Naʼa Kotou Tuku Ke Momoko Tokotou ʼOfa

1, 2. (1) Ko ai ʼae neʼe ʼuluaki fai ki ai e Sesu te ʼu palalau ʼae ʼe tuʼu ia Mateo 24:12? (2) ʼE fakaha feafeaʼi ʼi te tohi ʼo gaue, neʼe taupau e te ʼu ʼuluaki Kilisitiano tonatou ʼofa ke malohi? (Vakaʼi te ʼuluaki pāki.)

ʼI TANA kei ’i te kele, neʼe fakamahino e Sesu pe ʼe lava iloʼi feafeaʼi e te hahaʼi kua hoko mai te temi “fakaʼosi ʼo te tuʼu ʼo te ʼu faʼahiga meʼa ʼaeni.” Neʼe lahi te ʼu fakailoga neʼe palalau ki ai, ohage la neʼe ina ui fenei: “ ʼE momoko anai ia te ʼofa ʼo te tokolahi.” (Mateo 24:​3, 12) Neʼe lau e te kau Sutea ko natou ko te hahaʼi ʼa te ʼAtua, kaʼe neʼe natou tuku tonatou ʼofa ʼae ki te ʼAtua ke liliu ʼo momoko.

² Kaʼe ʼi te temi ʼaia, tokolahi te kau Kilisitiano neʼe mole feia ʼanatou aga. He neʼe natou faʼafai ʼi te fakamafola ʼo “te logo lelei ʼo ʼuhiga mo Kilisito,” pea neʼe natou ʼoʼofa ʼi te ʼAtua, mo ʼonatou tehina mo tuagaʼane, ʼo feia pe ki te hahaʼi ʼae ʼe mole tauhi kia Sehova. Neʼe natou taupau ke malohi tonatou ʼofa ʼae kia Sehova. (Gaue 2:​44-47; 5:42) Kaʼe neʼe ʼi ai pe ʼihi ʼo te ʼu ʼuluaki Kilisitiano kua natou tuku tonatou ʼofa ke liliu ʼo momoko. ʼE tou iloʼi feafeaʼi te faʼahi ʼaia?

3. He koʼe neʼe kua liliu te ʼofa ʼo ʼihi Kilisitiano ʼo momoko?

³ Neʼe ui fenei e Sesu ki te kau Kilisitiano ʼo Efeso: ‘ ʼE mole kei kotou maʼu te ʼofa ʼae neʼe kotou maʼu ʼi te kamata.’ (Fakaha 2:⁠4) Neʼe lagi kua maʼu e te kau Kilisitiano ʼo Efeso ia te faʼahiga manatu ʼa te hahaʼi, ʼae ko te fai pe te ʼu meʼa ʼae ʼe natou holi ki ai. (Efeso 2:​2, 3) Ko Efeso neʼe ko te kolo neʼe koloaʼia. Pea neʼe tokaga tafito pe te hahaʼi ki tonatou maʼuli fifimalie pea mo te ʼu koloa. Tokolahi te kau Efeso neʼe natou fai he ʼu aga heʼe ʼaoga pea neʼe mole natou fakaʼapaʼapa ki te ʼu lao ʼa te ʼAtua. Neʼe tokakaga pe natou ki te ʼu meʼa ʼae ʼe natou leleiʼia, kaʼe neʼe mole kei natou ʼoʼofa fakamalotoloto ki te ʼAtua pea mo te hahaʼi.

4. (1) ʼE feafeaʼi te liliu ʼae ʼo te ʼofa ʼo momoko ia ʼaho nei? (2) Kotea te ʼu faʼahi ʼe tolu ʼe tonu ke tou taupau ai totatou ʼofa ke malohi?

⁴ Ia ʼaho nei, ʼe kei moʼoni pe te ʼu palalau ʼae neʼe fai e Sesu. ʼE mole kei ʼoʼofa te hahaʼi ʼi te ʼAtua. ʼE mole kei natou kumi tana takitaki moʼo fakatokatoka te ʼu fihifihia ʼo te malamanei. Kaʼe kua natou falala pe natou ki te ʼu kautahi fakatagata. Koia kua ʼaʼasili momoko ai tonatou ʼofa. Maʼia pe la mo te ʼu kaugana ʼa Sehova ʼe feala pe ke liliu tonatou ʼofa ʼo momoko, ohage pe ko te aluʼaga ʼae neʼe hoko ʼi te kokelekasio ʼo Efeso ʼi te temi muʼa. ʼE tou vakaʼi anai te ʼu faʼahi ʼe tolu, ʼe tonu anai ke tou taupau ai totatou ʼofa ke malohi: (1) totatou ʼofa ʼae kia Sehova, (2) totatou ʼofa ki te ʼu moʼoni Fakatohi-tapu, pea (3) totatou ʼofa ki ʼotatou tehina mo tuagaʼane.

TOTATOU ʼOFA ʼAE KIA SEHOVA

5. He koʼe ʼe tonu ke tou ʼoʼofa ki te ʼAtua?

⁵ Ko ai ʼae ʼe tonu ke lahi age totatou ʼofa ki ai? Neʼe ui fenei e Sesu: “ ‘ ʼE tonu ke ke ʼofa kia Sehova tou ʼAtua, ʼaki tou loto katoa, mo tou maʼuli katoa pea mo tou ʼatamai katoa.’ ʼE ko te ʼuluaki fakatotonu ʼaia pea mo lahi age.” (Mateo 22:​37, 38) Kapau ʼe tou ʼoʼofa ki te ʼAtua, ʼe tou fakalogo anai ki ʼana fakatotonu, mo faʼa kataki pea mo fehiʼa ki te meʼa ʼae ʼe kovi. (Lau ia Pesalemo 97:10.) Kaʼe ʼe faigaʼi e Satana pea mo tana malama, ke ina fakavaivaiʼi peʼe ke ina maumauʼi totatou ʼofa ʼae ki te ʼAtua.

6. Kotea ʼae ʼe hoko mo kapau ʼe mole kei ʼoʼofa te hahaʼi ki te ʼAtua?

⁶ ʼE mole kei maʼu e te hahaʼi ʼo te malama ia te ʼofa moʼoni. ʼE mole kei natou ʼoʼofa ʼi te ʼAtua. Tokolahi te hahaʼi ʼe natou ‘ ʼoʼofa pe kia natou totonu.’ (2 Timoteo 3:⁠2) ʼE natou fakamuʼamuʼa “te holi ʼo te kakano, mo te holi ʼo te ʼu mata pea mo te fakahaha e he tahi ʼona koloa.” (1 Soane 2:16) Neʼe fakatokaga e te apositolo ko Paulo pe kotea ʼae ʼe feala ke hoko mo kapau ʼe tou fia fai pe te ʼu meʼa ʼae ʼe tou holi ki ai. Neʼe ina ui fenei: “Ko te manatu ki te kakano ʼe iku ia ki te mate.” Kotea tona tupuʼaga? Koteʼuhi ko natou ʼae ʼe natou fai te faʼahi ʼaia, ʼe natou liliu ko he ʼu fili ʼo te ʼAtua. (Loma 8:​6, 7) Ko natou ʼae ʼe faiga malohi ke natou maʼu koloa peʼe ke natou fakahoko ʼonatou holi kovi, ʼe natou lotomamahi anai ki muli age.​​—1 Kolonito 6:18; 1 Timoteo 6:​9, 10.

7. Kotea te ʼu manatu ʼe feala ke fakatupu kovi ki te kau Kilisitiano ia ʼaho nei?

⁷ ʼE ʼi ai ʼihi hahaʼi ʼe mole natou tui ʼe ʼi ai he ʼatua, pea ko ʼihi ʼe tui natou neʼe hifo mai te tagata mai te ʼu manu. Pea ʼe natou fakalotoʼi te hahaʼi ke ʼaua naʼa natou ʼoʼofa ki te ʼAtua peʼe ke ʼaua naʼa natou tui ʼe maʼuli moʼoni. ʼE natou ui ko he tahi ʼe tui ʼe ʼi ai he ʼAtua neʼe ina fakatupu ia meʼa fuli, ʼe ko he tahi ʼe vale pe neʼe mole ako. Pea tahi, tokolahi ʼe natou fakamaʼuhigaʼi te hahaʼi popoto kaʼe mole ko te ʼAtua. (Loma 1:25) Kaʼe ʼe feala pe ke maʼu e te kau Kilisitiano te ʼu manatu ʼaia. ʼE feala pe ke mole kei malohi tatatou tui ʼae ki te ʼAtua pea ke liliu ai totatou ʼofa ʼo momoko.​​—Hepeleo 3:⁠12.

8. (1) Kotea te ʼu aluʼaga ʼe feala ke lotovaivai ai te hahaʼi ʼa Sehova? (2) Kotea te fakalotomalohi ʼe tou maʼu ʼi te Pesalemo 136?

⁸ ʼE tou maʼuʼuli nei ʼi te malama agakovi ʼa Satana. Koia ʼae ʼi ʼihi temi ʼe feala ai ke hoko he ʼu aluʼaga ʼe ina fakalotovaivaiʼi tatou. (1 Soane 5:19) Pea kapau ʼe lahi fau totatou lotovaivai, ʼe feala pe ke vaivai ai tatatou tui pea mo liliu ai totatou ʼofa ʼae ki te ʼAtua ʼo momoko. Ohage la, ʼe feala ke tou tau mo he ʼu faigataʼaʼia ʼuhi ko te vaivai matuʼa, peʼe ko te mahaki, peʼe ko he ʼu fihifihia ʼi te faʼahi ʼo te falā. Peʼe lagi tou lotovaivai he ʼe mole kei tou lava fai te ʼu gaue ohage ko te mahani. Peʼe lagi tou lotomamahi he neʼe ʼi ai te ʼu fakatuʼutuʼu neʼe mole lava lelei. Kaʼe tatau aipe pe kotea te ʼu faigataʼaʼia ʼe tau mo tatou, ʼaua naʼa tou ui kua liakī tatou e Sehova. Kotou tokagaʼi te ʼu palalau fakalotomalohi ʼe tou maʼu ia Pesalemo 136:23: “Ko ia ae nee manatu kia tatou i te temi nee tou mamahi ai, koteuhi e heegata tona manavaofa.” Koia ʼe feala ai ke tou tui papau ʼe fagono Sehova ki ʼatatou “tagi” pea ʼe tali mai anai.​​—Pesalemo 116:1; 136:​24-26.

9. He koʼe neʼe lava taupau e Paulo tona ʼofa ʼae ki te ʼAtua ke malohi?

⁹ Neʼe fakakaukauʼi lelei e te apositolo ko Paulo ia te tokoni ʼa Sehova kia ia, koia la ʼae neʼe nofo malohi ai. Neʼe ina tohi fenei: “Ko Sehova ʼe ko toku tokoni. ʼE mole au mataku anai. Kotea ʼae ʼe feala ke fai mai e te tagata?” (Hepeleo 13:⁠6) Neʼe falala ia Paulo kia Sehova, ʼo ina lava tauʼi ai ʼona fihifihia. Pea ʼi tana tau leva mo te ʼu aluʼaga faigataʼa, neʼe ina taupau tana falala ʼae kia Sehova. Maʼia mo te temi ʼae neʼe pilisoni ai, neʼe ina momoli he ʼu tohi ki te ʼu kokelekasio moʼo fakalotomalohiʼi te kau Kilisitiano. (Efeso 4:1; Filipe 1:7; Filemone 1) ʼI te ʼu fihifihia takitahi neʼe tau mo Paulo, neʼe ina taupau tona ʼofa ʼae kia Sehova ke malohi. Neʼe falala ki “te ʼAtua ʼae ʼe ina fakafimalieʼi te hahaʼi ʼi te ʼu faʼahiga aluʼaga kehekehe, mo ina fakafimalieʼi tatou ʼi ʼotatou ʼahiʼahi fuli.” (2 Kolonito 1:​3, 4) ʼE feafeaʼi hatatou faʼifaʼitakiʼi ia Paulo?

10. ʼE feafeaʼi hatatou taupau totatou ʼofa ʼae kia Sehova ke malohi?

¹⁰ Neʼe fakamahino e Paulo pe ʼe tou lava taupau feafeaʼi totatou ʼofa ʼae ki te ʼAtua ke malohi. Neʼe ina ui fenei: “Kotou faikole tuʼumaʼu.” Pea ki muli age neʼe ina toe ui fenei: “Kotou kataki ʼi te faikole.” (1 Tesalonika 5:17; Loma 12:12) Ka tou faikole ʼe tou nofo ovi ki te ʼAtua. ʼO feafeaʼi? Ka tou faikole, ʼe tou felogoʼi mo Sehova. Koia ʼe feala ai ke tou maʼu he ʼu felogoʼi lelei mo ia. (Pesalemo 86:⁠3) Ka tou fakaha ki tatatou Tamai ʼae ʼe ʼi selo ʼatatou manatu pea mo te ʼu faʼahi ʼae ʼe tou logoʼi ʼi ʼotatou loto, ʼe tou fakaovi ai kia te ia. (Pesalemo 65:⁠3) Pea ka tou tokagaʼi ʼe tali mai Sehova ki ʼatatou faikole, ʼe tuputupu ai totatou ʼofa ʼae kia te ia. ʼE tou tui papau “e ovi [ia Sehova] kia natou fuli ae e fetapa kia ia.” (Pesalemo 145:18) Kapau ʼe tou tui papau ʼe ʼofa ia Sehova ia tatou pea mo tokoni mai kia tatou, ʼe tou lava tauʼi anai te ʼu faigataʼaʼia fuli ʼe feala ke hoko mai.

TOTATOU ʼOFA KI TE ʼU MOʼONI FAKATOHI-TAPU

11, 12. ʼE feafeaʼi hatatou fakatuputupu totatou ʼofa ki te ʼu moʼoni Fakatohi-tapu?

¹¹ Ko tatou ko te kau Kilisitiano, koia ʼe tou ʼoʼofa ai ki te moʼoni. Pea ʼe tou maʼu ia te moʼoni ʼi te Folafola ʼa te ʼAtua. Neʼe ui fenei e Sesu ki tana Tamai: “Ko tau folafola ʼe ko te moʼoni.” (Soane 17:17) Kapau ʼe tou fia ʼoʼofa ki te ʼu moʼoni Fakatohi-tapu, ʼe tonu foki ke tou iloʼi pe kotea ʼae ʼe ui ʼi te Tohi-Tapu. (Kolose 1:10) Kaʼe ʼe mole gata ai. ʼE fakamahino mai ʼi te Pesalemo 119 pe kotea ʼae ʼe tonu ke tou fai. (Lau ia Pesalemo 119:​97-100.) ʼE tonu ʼi te ʼaho fuli ke tou lau te Tohi-Tapu pea mo metitasio ki ai. Ka tou metitasio ki te ʼu fua lelei ʼo te maʼuliʼi ʼo te ʼu moʼoni Fakatohi-tapu, ʼe tuputupu anai totatou ʼofa ki te ʼu moʼoni ʼaia.

¹² Neʼe toe ui fenei e te tagata faipesalemo: “E hua malie au folafola ki oku kaugao, o lahi age i te meli ki te gutu.” (Pesalemo 119:103) Ko te ʼu tohi Fakatohi-Tapu ʼae ʼe foaki mai e te kautahi ʼa te ʼAtua ʼe hage ko he meʼa kai ʼe kano lelei. Ka tou kakai ki he meʼa kai ʼe kano lelei, ʼe tou fiafia pea mo kaikai mamalie. ʼO toe feia pe, ʼe tonu ke tou toʼo he temi ke tou ako te Tohi-Tapu. Pea ʼi tatatou kua leleiʼia leva te ʼu moʼoni ʼae neʼe tou ako, ʼe faigafua anai tatatou manatuʼi te ʼu faʼahi ʼae neʼe tou lau pea mo toe fakaʼaogaʼi moʼo tokoni ki niʼihi.​​—Ekelesiasi 12:⁠12.

13. He koʼe neʼe ʼofa ia Selemia ki te ʼu folafola ʼa te ʼAtua? Kotea ʼae neʼe ina logoʼi?

¹³ Neʼe ʼofa te polofeta ko Selemia ki te ʼu folafola ʼa te ʼAtua. Neʼe ina ui fenei: “Nee au tali au folafola, pea nee au kai natou; ko au folafola ko te fiafiaaga mo te nekenekeaaga o toku loto; koteuhi kua paui tou huafa kia au, [Sehova], Atua o te atu fua tau.” (Selemia 15:16) Neʼe metitasio loloto ia Selemia ki te Folafola ʼa te ʼAtua, pea neʼe ʼofa ai. Neʼe fiafia ʼi tana fakafofoga ia Sehova pea mo fakaha tana logo. Kapau ʼe tou ʼoʼofa ki te ʼu moʼoni Fakatohi-tapu, ʼe tou mahino ai anai ki te pilivilesio ʼae ke tou Fakamoʼoni kia Sehova pea mo fakamafola te logo lelei ʼo ʼuhiga mo te Puleʼaga ʼi te ʼu ʼaho fakamuli ʼaeni.

14. Kotea te tahi faʼahi ʼe tonu ke tou fai ke tuputupu ai totatou ʼofa ki te ʼu moʼoni Fakatohi-tapu?

¹⁴ Kotea ʼae ʼe toe tokoni mai anai ke tuputupu ai totatou ʼofa ki te ʼu moʼoni Fakatohi-tapu? ʼE tonu ke tou kau tuʼumaʼu ki te ʼu fono, he ʼe akoʼi ai tatou e Sehova. ʼE akoʼi tafito tatou e Sehova ʼi te vahaʼa fuli ʼaki Te Tule Leʼo. Kaʼe kapau ʼe tou fia maʼu te ʼu lelei mai Te Tule Leʼo, ʼe tonu ke tou teuteuʼi fakatomuʼa. Ohage la, ʼe tou faiga anai ke tou lau ia te ʼu vaega Tohi-Tapu takitahi ʼae ʼe tuʼu ai. Tokolahi ia ʼaho nei kua feala ke natou lau peʼe ke natou toʼo mai te Neti ia Te Tule Leʼo. He ʼe kua fakaliliu ʼi te ʼu lea kehekehe pea kua feala tona maʼu ʼi tatatou tuʼasila ʼi te Neti jw.org peʼe ʼi te application JW Library. Koia kua feala leva ke maʼu vave te ʼu vaega ʼae ʼe tonu ke lau. ʼE tonu ke tou ako te ʼu alatike takitahi, mo lau fakalelei te ʼu vaega fuli pea mo tou metitasio ki ai. Kapau ʼe tou fai feia, ʼe tuputupu anai totatou ʼofa ʼae ki te ʼu moʼoni Fakatohi-tapu.​​—Lau ia Pesalemo 1:⁠2.

TOTATOU ʼOFA KI ʼOTATOU TEHINA MO TUAGAʼANE

15, 16. (1) Kotea te fakatotonu neʼe fai mai e Sesu kia tatou ia Soane 13:​34, 35? (2) Kotea te pikipikiga ʼo totatou ʼofa ʼae kia Sehova mo te Tohi-Tapu pea mo totatou ʼofa ʼae ki ʼotatou tehina mo tuagaʼane?

¹⁵ Neʼe ui fenei e Sesu ki ʼana tisipulo, ʼi muʼa ʼo tana hake ʼae ki selo: “ ʼE au foaki atu kia koutou he fakatotonu foʼou, ke kotou feʼofaʼaki. Ohage pe ko taku ʼofa ʼae kia koutou, ke kotou toe feʼofaʼaki mo koutou. ʼAki te faʼahi ʼaia, ʼe iloʼi anai e te hahaʼi fuli ko koutou ko ʼaku tisipulo, mo kapau ʼe kotou feʼofaʼaki.”​​—Soane 13:​34, 35.

¹⁶ ʼE ʼi ai te pikipikiga ʼo totatou ʼofa ʼae ki ʼotatou tehina mo tuagaʼane pea mo totatou ʼofa ʼae kia Sehova. Kapau ʼe mole tou ʼoʼofa ki te ʼAtua, ʼe mole feala ke tou ʼoʼofa ki ʼotatou tehina. Pea kapau ʼe mole tou ʼoʼofa ki ʼotatou tehina ʼe mole feala ke tou ʼoʼofa ki te ʼAtua. Neʼe tohi fenei e te apositolo ko Soane: “Ko ia ʼae ʼe mole ʼofa ki tona tehina ʼae ʼe sio ki ai, ʼe mole feala ke ʼofa ki te ʼAtua ʼae ʼe mole sio ki ai.” (1 Soane 4:20) ʼE ʼi ai mo te pikipikiga ʼo totatou ʼofa ʼae kia Sehova mo ʼotatou tehina pea mo totatou ʼofa ʼae ki te Tohi-Tapu. ʼO feafeaʼi? He ʼe kapau ʼe tou ʼoʼofa ki te ʼu moʼoni ʼae ʼe tou ako ʼi te Tohi-Tapu, ʼe tou fia fakalogo anai ki te ʼu fakatotonu ʼae ʼe tohi ai. Pea ʼe fakatotonu mai ʼi te Tohi-Tapu ke tou ʼoʼofa kia Sehova pea mo ʼotatou tehina mo tuagaʼane.​​—1 Petelo 1:22; 1 Soane 4:⁠21.

17. ʼE feafeaʼi hatatou fakaha totatou ʼofa ki te ʼu tehina mo tuagaʼane ʼo te kokelekasio?

¹⁷ Lau ia 1 Tesalonika 4:​9, 10. ʼE feafeaʼi hatatou fakaha totatou ʼofa ki te ʼu tehina mo tuagaʼane ʼo te kokelekasio? ʼE feala ke tou ʼave he tehina peʼe ko he tuagaʼane kua vaivai matuʼa ki te ʼu fono. Peʼe lagi ʼaoga ki he vitua ke fai he gaue ʼi tona ʼapi. (Sakopo 1:27) ʼE ʼi ai te ʼu tehina mo te ʼu tuagaʼane ʼe tau mo te ʼu faigataʼaʼia, peʼe natou lotomamahi peʼe natou lotovaivai. ʼE ʼaoga kia natou he tokoni, peʼe ko he fakalotomalohi. (Taaga Lea 12:25; Kolose 4:11) Koia tou fakaha ʼi ʼatatou palalau pea mo ʼatatou gaue ʼe tou ʼoʼofa ʼi “ ʼotatou kaiga ʼae ʼi te tui.”​​—Kalate 6:⁠10.

18. Kotea ʼae ʼe tokoni mai anai ke tou fakatokatoka ʼotatou fihifihia mo ʼotatou tehina mo tuagaʼane?

¹⁸ ʼE ui ʼi te Tohi-Tapu, “ ʼi te ʼu ʼaho fakamuli” ʼo te tuʼu ʼaeni, “ ʼe ʼoʼofa pe anai te hahaʼi kia natou totonu, mo manako ki te paʼaga.” (2 Timoteo 3:​1, 2) ʼE tonu kia tatou Kilisitiano ke tou faiga malohi ʼo taupau ke malohi totatou ʼofa ʼae kia Sehova, mo tana Folafola pea mo ʼotatou tehina mo tuagaʼane. ʼI ʼihi temi, ʼe feala pe ke hoko he fihifihia kia tatou mo hotatou tehina, mai tona aluʼaga ʼae ʼe tou agahala fuli. Kaʼe ʼuhi ʼae ʼe tou feʼofaʼaki, ʼe tou faiga anai ke tou foimo fakatokatoka te ʼu fihifihia ʼi te agalelei. (Efeso 4:32; Kolose 3:14) ʼAua naʼa tou tuku ke momoko totatou ʼofa. Tou faiga tuʼumaʼu ke malohi totatou ʼofa ʼae kia Sehova, mo tana Folafola pea ki ʼotatou tehina mo tuagaʼane.