Kotou Akoʼi Takotou Fānau Ke Natou ʼOʼofa Kiā Sehova
“Ohagē ko he ʼu kauʼi nahau ʼi te nima ʼo he tagata mālohi, ʼe toe fēia mo te ʼu foha ʼo te temi tūpulaga.”—Pesalemo 127:4.
1, 2. Koteā te ʼu faʼahi ʼaē ʼe lava fakatatau ai te fānau ki “he ʼu kauʼi nahau ʼi te nima ʼo he tagata mālohi”?
KO TE tagata ʼe teuteu ke ina kauʼi nahauʼi ʼo fakatatau ki he meʼa. ʼE ina ʼai fakalelei tana kauʼi nahau pea mo faoʼi tana nahau. Logolā ʼe mole ko he meʼa faigafua, kae ʼe ina toʼo hona temi moʼo fakahaga lelei tana kauʼi nahau. Pea ina kaloloʼi leva! ʼE ʼalu anai koa te kauʼi nahau ki te meʼa ʼaē neʼe ina fakahaga kiai? ʼE ʼi ai te ʼu faʼahi ʼe fakalogo kiai, ohagē ko te faiva ʼo te tagata, te mālohi ʼo te matagi, pea mo te agaaga ʼo te kauʼi nahau.
2 Ko te hau ko Salomone neʼe ina fakatatau ia te fānau ki “he ʼu kauʼi nahau ʼi te nima ʼo he tagata mālohi.” (Pesalemo 127:4) Tou vakaʼi te faka ʼuhiga ʼo te lea fakatātā ʼaia. ʼE mole puke fualoa e te tagata te kauʼi nahau. Ke feala ki te kauʼi nahau ke tau ki te meʼa ʼaē neʼe fakahaga kiai, ʼe tonu ke ina kaloloʼi vave. ʼO toe fēia, ʼe maʼu e te ʼu mātuʼa he temi nounou moʼo fakatuputupu ʼi te loto ʼo tanatou fānau te ʼofa ʼaē kiā Sehova. Hili ni ʼu taʼu, kua lalahi te fānau pea mo natou mavae ʼi te loto fale. (Mateo 19:5) ʼE natou aʼu anai koa ki te meʼa ʼaē neʼe fakahaga kiai—ko tona faka ʼuhiga peʼe haga ʼoʼofa anai koa ia te fānau ki te ʼAtua pea mo natou tauhi kiā te ia ʼi tanatou ʼosi mavae ʼi te loto fale? ʼE fakalogo kiai te ʼu faʼahi kehekehe, ohagē ko te ʼu faʼahi ʼaenī e tolu: te faiva ʼa te ʼu mātuʼa, te ʼaluʼaga ʼo te loto fale ʼaē ʼe lahilahi ake ai tanatou fānau, pea mo te faʼahiga tali ʼa te fānau tonatou akoʼi e tanatou ʼu mātuʼa. Tou vakavakaʼi fakalelei te ʼu faʼahi takitahi ʼaia. ʼUluaki, ʼe tou vakaʼi anai he ʼu agaaga ʼo he ʼu mātuʼa faiva.
Ko He ʼu Mātuʼa Faiva ʼe Natou Tuku He Faʼifaʼitaki Lelei
3. He koʼē ʼe tonu ke ʼalutahi te ʼu palalau ʼa te ʼu mātuʼa mo tanatou ʼu gāue?
3 Ko Sesu neʼe ina tuku he faʼifaʼitaki lelei ki te ʼu mātuʼa he neʼe ina maʼuliʼi te ʼu meʼa ʼaē neʼe ina akoʼi ki te hahaʼi. (Soane 13:15) ʼI te tahi faʼahi, neʼe ina tauteaʼi ia te kau Faliseo ʼaē neʼe natou “ ʼui” kae “mole natou fai.” (Mateo 23:3) Moʼo fakaloto mālohiʼi tanatou fānau ke natou ʼoʼofa kiā Sehova, ʼe tonu ke ʼalutahi te ʼu palalau ʼa te ʼu mātuʼa mo tanatou ʼu gāue. Kapau ʼe mole ʼalutahi te ʼu palalau pea mo te ʼu gāue, pea ʼe mole hona ʼaoga anai, ohagē pē ko he nahau ʼe mole hona kauʼi ivi.—1 Soane 3:18.
4. Ko te ʼu fehuʼi fea ʼaē ʼe lelei ke fai e te ʼu mātuʼa, pea koteā tona tupuʼaga?
4 He koʼē ʼe maʼuhiga ʼaupitō te faʼifaʼitaki ʼaē ʼe tuku e te ʼu mātuʼa? Ohagē pē ko te ako ʼa te hahaʼi lalahi ke natou ʼoʼofa ki te ʼAtua ʼi tanatou mulimuli ki te faʼifaʼitaki ʼa Sesu, ʼo toe fēia pē, ʼe ako e te fānau ke natou ʼoʼofa kiā Sehova ʼi tanatou mulimuli ki te faʼifaʼitaki lelei ʼo tanatou ʼu mātuʼa. Ko te hahaʼi ʼaē ʼe fakatahitahi mo te tamasiʼi ʼe feala ke natou fakaloto mālohiʼi ia ia peʼe natou “maumauʼi te ʼu agamāhani ʼaoga.” (1 Kolonito 15:33) ʼI te koga lahi ʼo te maʼuli ʼo te tamasiʼi, pea tāfito lolotoga tona ʼu ʼuluaki taʼu, ko te hahaʼi ʼaē ʼe feōvi lelei mo ia pea mo natou lava fakaneke ia ia ʼe ko tana ʼu mātuʼa. Koia ʼu mātuʼa, ʼe lelei ke kotou fai te ʼu fehuʼi ʼaenī: ‘ ʼE malave feafeaʼi koa taku aga ki taku tamasiʼi? ʼAki taku faʼifaʼitaki, ʼe au fakaloto mālohiʼi koa ia ia ke ina maʼu he ʼu agamāhani lelei? Koteā te faʼifaʼitaki ʼaē ʼe au tuku ʼo ʼuhiga mo te ʼu faʼahi maʼuhiga ʼaē ko te faikole pea mo te ako ʼo te Tohi-Tapu?’
Ko He ʼu Mātuʼa Faiva ʼe Natou Faikole Mo Tanatou Fānau
5. Koteā ʼaē ʼe feala ke ako e te fānau ʼi te ʼu faikole ʼo tanatou ʼu mātuʼa?
5 ʼI takotou ʼu faikole, ʼe lahi te ʼu meʼa ʼe feala ke ako e takotou fānau ʼo ʼuhiga mo Sehova. Kapau ʼe natou fakalogo atu ki takotou fakafetaʼi ki te ʼAtua ʼi te ʼu temi kai pea mo faikole ʼi te ʼu temi ako ʼo te Tohi-Tapu, koteā anai tanatou manatu? ʼE natou ako ai anai ʼe foaki e Sehova te ʼu meʼa ʼaē ʼe ʼaoga kiā tātou ʼi te faʼahi fakasino—koia ʼe tonu ai ke natou fakafetaʼi ki te faʼahi ʼaia—pea ʼe ina akoʼi mai te ʼu moʼoni ʼo te Tohi-Tapu. ʼE ko he ʼu faʼahi maʼuhiga ʼaia.—Sake 1:17.
6. ʼE lava tokoni feafeaʼi te ʼu mātuʼa ki tanatou fānau ke natou logoʼi ʼe tokaga Sehova kiā nātou takitokotahi?
6 Kae kapau ʼe kotou faikole mo takotou fāmili ʼi tuʼa atu ʼo te temi kai pea mo te ako faka fāmili pea mo kotou talanoa ʼi takotou ʼu kole ki te ʼu faʼahi ʼaē ʼe kotou hoha kiai peʼe hoha kiai takotou fānau, ʼe kotou toe tokoni ʼaupitō anai kiā nātou. ʼE kotou tokoni ai ki takotou fānau ke natou logoʼi ʼe nofo Sehova mo tokotou fāmili pea ʼe tokaga moʼoni kiā kotou takitokotahi. (Efesi 6:18; 1 Petelo 5:6, 7) ʼE ʼui fēnei e te tamai: “Talu te tupu ʼo tamā taʼahine, neʼe matou faikole fakatahi. ʼI tana lahilahi ake, ʼi tamatou ʼu faikole neʼe mā talanoa ʼo ʼuhiga mo te ʼu fakakaugā pea mo ʼihi atu ʼu faʼahi neʼe malave kiā ia. Neʼe matou faikole ʼi te ʼaho fuli mo ia ʼo aʼu ki tana ʼohoana pea mo mavae ʼi te loto fale.” ʼE feala koa hakotou faikole mo takotou fānau ʼi te ʼaho fuli pē? ʼE kotou lava tokoni koa kiā nātou ke natou faka ʼuhiga ia Sehova ohagē ko honatou Kaumeʼa, ʼe tokaga kiā nātou ʼi te faʼahi fakasino pea mo te faʼahi fakalaumālie, pea mo toe tokaga ki te ʼu meʼa ʼaē ʼe natou logoʼi ʼi tonatou loto?—Filipe 4:6, 7.
7. Ke feala hanatou talanoa ki he ʼu faʼahi tāfito ʼi tanatou ʼu faikole, koteā ʼaē ʼe ʼaoga ke ʼiloʼi e te ʼu mātuʼa?
7 ʼE mahino ia ke feala hakotou talanoa ki he ʼu faʼahi tāfito ʼi takotou ʼu faikole, ʼe tonu ke kotou ʼiloʼi peʼe koteā ʼaē ʼe hoko ʼi te maʼuli ʼo takotou tamasiʼi. Kotou tokagaʼi te ʼu palalau neʼe fai e te tamai neʼe ina taupau tana ʼu tamaliki e lua: “ ʼI te fakaʼosi ʼo te ʼu vāhaʼa fuli, neʼe au fai kiā au te ʼu fehuʼi ʼaenī e lua: ‘ ʼI te vāhaʼa ʼaenī, koteā ʼaē neʼe hoha kiai taku ʼu toe? Pea koteā te meʼa lelei neʼe hoko kiā nāua?’ ” ʼU mātuʼa, ʼe kotou lava fai koa te ʼu fehuʼi ʼaia pea mo kotou talanoa kiai ʼi takotou ʼu faikole ʼaē mo takotou fānau? Kapau ʼe kotou fai fēia, pea ʼe kotou akoʼi anai kiā nātou ke natou faikole kiā Sehova—ʼaē ʼe fakalogo ki te faikole—pea ke natou ʼoʼofa kiā te ia.—Pesalemo 65:2.
Ko He ʼu Mātuʼa Faiva ʼe Natou Fakaloto Mālohiʼi He ʼu Agamāhani Lelei Ki Te Ako
8. He koʼē ʼe tonu ke tokoni te ʼu mātuʼa ki tanatou fānau ke natou māhani ʼi te ako ʼo te Folafola ʼa te ʼAtua?
8 Ko te manatu ʼa te ʼu mātuʼa ʼo ʼuhiga mo te ako ʼo te Tohi-Tapu ʼe malave feafeaʼi ki te ʼu felōgoi ʼa te tamasiʼi mo te ʼAtua? Ke tuputupu pea mo tologa he ʼu felōgoi ʼa he toko lua, ʼe tonu ke nā fai palalau pea ke nā fakalogo foki. ʼE tou fakalogo kiā Sehova ʼi tatatou ako te Tohi-Tapu ʼaki te ʼu tohi faka Tohi-Tapu ʼaē ʼe foaki mai e “te tagata kaugana agatonu.” (Mateo 24:45-47; Tāʼaga Lea 4:1, 2) Koia, moʼo tokoni ki tanatou fānau ke natou fakatuputupu pea mo natou fakatologa tana ʼu felōgoi ʼofa mo Sehova, ʼe tonu anai ki te ʼu mātuʼa ke natou fakaloto mālohiʼi nātou ke natou māhani ʼi te ako ʼo te Folafola ʼa te ʼAtua.
9. Koteā te faʼahiga tokoni ʼaē ʼe ʼaoga ki te fānau ke natou maʼu he ʼu agamāhani lelei ki te ako ʼo te Tohi-Tapu?
9 Koteā te faʼahiga tokoni ʼaē ʼe ʼaoga ki te fānau ke natou maʼu he ʼu agamāhani lelei ki te ako ʼo te Tohi-Tapu? ʼE toe ʼaoga ʼi te faʼahi ʼaia ia te faʼifaʼitaki ʼa te ʼu mātuʼa. ʼE sio koa takotou fānau ʼe kotou leleiʼia te lau pea mo te ako ʼo te Tohi-Tapu? ʼE moʼoni, ʼe lagi kotou maʼumaʼua ʼaupitō moʼo taupau takotou fānau, pea ʼe lagi kotou feʼekeʼaki peʼe kotou lava maʼu feafeaʼi he temi moʼo lautohi pea mo ako takitokotahi. Kae kotou fai te fehuʼi ʼaenī: ‘ ʼE sio mai koa taku fānau ʼe au sioʼi tuʼumaʼu pē te televisio?’ Kapau koia, pea ʼe feala koa ke kotou fakaʼaogaʼi te temi ʼaia moʼo tuku he faʼifaʼitaki lelei kiā nātou ʼo ʼuhiga mo te ako takitokotahi?
10, 11. He koʼē ʼe tonu ke fai tuʼumaʼu e te ʼu mātuʼa tanatou ako Tohi-Tapu faka fāmili?
10 Ko te fai tuʼumaʼu ʼo tanatou ako faka fāmili, ʼe ko te tahi ʼaia faʼahi lelei ki te ʼu mātuʼa moʼo akoʼi ki tanatou fānau ke natou fakalogo kiā Sehova (Isaia 30:21) Kae ʼe lagi fai anai e ʼihi te fehuʼi ʼaenī: ‘He koʼē ʼe ʼaoga anai ki te fānau he ako faka fāmili mo kapau ʼe ʼave tuʼumaʼu nātou e tanatou ʼu mātuʼa ki te ʼu fono?’ ʼE ʼi ai tona ʼu tupuʼaga lelei. Neʼe foaki e Sehova ki te ʼu mātuʼa te maʼua tāfito ʼaē ke natou akoʼi tanatou fānau. (Tāʼaga Lea 1:8; Efesi 6:4) ʼAki te ako Tohi-Tapu faka fāmili, ʼe akoʼi ai ki te fānau ko te tauhi ʼaē ki te ʼAtua ʼe mole fai pē mokā ʼolo ki te fale fono, kae ʼe ko he koga ʼaia ʼo te maʼuli faka fāmili.—Teutalonome 6:6-9.
11 Tahi ʼaē meʼa, ko he ako faka fāmili ʼe fai fakalelei ʼe ko he fealagia ʼaia ki te ʼu mātuʼa ke natou ʼiloʼi te manatu ʼa tanatou fānau ʼo ʼuhiga mo te ʼu faʼahi fakalaumālie pea mo te aga ʼaē ʼe tonu ke fai. Ohagē lā, ʼi te kei liliki ʼo tanatou fānau, ʼe feala ke fakaʼaogaʼi e te ʼu mātuʼa te ʼu tohi ohagē ko te tohi Écoute le grand Enseignant.a ʼI te ʼu teitei palakalafe fuli ʼo te tohi ako faka Tohi-Tapu ʼaia, ʼe kole ki te fānau ke natou fakahā tanatou manatu ʼo ʼuhiga mo te faʼahi ʼaē ʼe talanoa kiai te kāpite. ʼAki tanatou fakakaukauʼi ki te ʼu vaega Tohi-Tapu ʼaē ʼe tuʼu ʼi te tohi, ʼe feala ki te ʼu mātuʼa ke natou tokoni ki tanatou fānau ke tuputupu tanatou ʼu fealagia fakakaukau “ke natou ʼiloʼi te meʼa ʼaē ʼe lelei pea mo te meʼa ʼaē ʼe kovi.”—Hepeleo 5:14.
12. ʼE lava faka ʼalutahi feafeaʼi e te ʼu mātuʼa te ako faka fāmili pea mo te ʼu meʼa ʼaē ʼe ʼaoga ki tanā tamasiʼi, pea kiā koutou, koteā te faʼahiga fai ʼaē ʼe kotou maʼu ai hona fua lelei?
12 ʼI te lahilahi ake ʼo takotou fānau, kotou faka ʼalutahi te ako mo te ʼu meʼa ʼaē ʼe ʼaoga kiā nātou. Koʼenī te faʼifaʼitaki ʼa te taumātuʼa ʼo ʼuhiga mo tana tokoni ki tanā ʼu taʼahine ke nā fakakaukauʼi ʼo ʼuhiga mo te kau ʼaē ki te fakafiafia ʼi te faleako. ʼE ʼui fēnei e te tamai: “Neʼe mā ʼui age ki tamā ʼu toe, ʼi te ako faka fāmili ʼo te vāhaʼa kā haʼu, lolotoga he kiʼi temi, ko au mo toku ʼohoana ʼe mā fai anai ohagē ko māua te ʼu tamaliki, pea ko tamā ʼu taʼahine ʼe ko nāua te ʼu mātuʼa. ʼE nā filifili anai peʼe ko ai te tamai pea ko ai te faʼē, kae neʼe tonu ke nā fai fakatahi he ʼu kumi pea mo foaki he ʼu tokoni ʼo ʼuhiga mo te ʼu fakafiafia ʼi te faleako.” Koteā ʼaē neʼe hoko? ʼE toe ʼui fēnei e te tamai: “Neʼe mā punamaʼuli ki te ʼiloʼi ʼo tamā ʼu taʼahine te meʼa ʼaē ʼe lelei mo te meʼa ʼaē ʼe kovi (ʼi tanā gaoʼi ʼaē ohagē ko nāua te ʼu mātuʼa) he neʼe nā faka mahino mai kiā māua (ʼaē neʼe mā fai ohagē ko māua te ʼu toe) te ʼu tupuʼaga faka Tohi-Tapu ʼo te mole fakapotopoto ʼaē ʼo te ʼolo ki te fakafiafia. Ko te tahi meʼa ʼaē neʼe mā punamaʼuli ai, neʼe ko tanā fakahā tanā manatu ʼo ʼuhiga mo he tahi ʼu fakafiafia lelei ʼe feala ke fetogi ʼaki te fakafiafia ʼaia ʼi te faleako. Neʼe mā mahino lelei ai ki tanā ʼu manatu pea mo te ʼu meʼa neʼe nā loto kiai.” ʼE moʼoni, ʼe fakamaʼua he faʼa kātaki pea mo he fakakaukau ʼa te ʼu mātuʼa ke haga fai te ako faka fāmili pea ke ʼi ai hona ʼaoga, kae ʼe lahi te ʼu fakapale ʼe natou maʼu ai.—Tāʼaga Lea 23:15.
Ke Maʼu Te Tokalelei ʼi Te Loto Fale
13, 14. (a) ʼE lava maʼu feafeaʼi e te ʼu mātuʼa ia te tokalelei ʼi te loto fale? (b) Koteā anai tona ʼu fua lelei mo kapau ʼe fakahā fakahagatonu e te ʼu mātuʼa tanatou faihala?
13 ʼE feala anai ke tau te kauʼi nahau ki te meʼa ʼaē neʼe fakahaga kiai mo kapau ʼe fakahaga fakalelei e te tagata pea mo kapau ʼe mole fakaleluʼi. ʼO toe fēia, ʼe feala anai ke ako e te fānau ke natou ʼoʼofa kiā Sehova mo kapau ʼe faiga e te ʼu mātuʼa ke tokalelei te loto fale. Neʼe tohi fēnei e Sake: “Ko te pulapula ʼo te faitotonu ʼe tō ʼi te ʼu ʼaluʼaga tokalelei maʼa nātou ʼaē ʼe natou fakahoko te tokalelei.” (Sake 3:18) ʼE lava maʼu feafeaʼi e te ʼu mātuʼa ia te tokalelei ʼi te loto fale? ʼE tonu ke felōgoi leleiʼaki te taumātuʼa. Ko he ʼu mātuʼa ʼe feʼofaʼaki pea mo fefakaʼapaʼapaʼaki, ʼe feala anai tanā akoʼi ki tanā fānau te ʼofa pea mo te fakaʼapaʼapa ki te hahaʼi, ʼo fēia mo te ʼofa pea mo te fakaʼapaʼapa ʼaē kiā Sehova. (Kalate 6:7; Efesi 5:33) ʼAki te ʼofa pea mo te fakaʼapaʼapa ʼe maʼu ai te tokalelei. Pea ko he taumātuʼa ʼe nā māʼuʼuli tokalelei, ʼe faigafua anai tanā fakatokatoka ia te ʼu fihifihia ʼaē ʼe feala ke hoko ʼi te fāmili.
14 ʼE mahino ia, ohagē pē ko te mole ʼi ai ʼo he ʼu nofo ʼohoana ʼe haohaoa, ʼe mole toe ʼi ai ʼi te temi nei, he ʼu fāmili haohaoa ʼi te kele. ʼI ʼihi temi, ʼe feala ke mole fakahā e te ʼu mātuʼa te fua ʼo te laumālie mokā natou felōgoi mo tanatou fānau. (Kalate 5:22, 23) Kā hoko he meʼa fēia, koteā ʼaē ʼe tonu ke fai e te ʼu mātuʼa? Kapau ʼe natou fakahā iā muʼa ʼo tanatou fānau neʼe natou faihala, pea ʼe mole kei fakaʼapaʼapa anai koa te fānau kiā nātou? Tou vakaʼi te faʼifaʼitaki ʼa te ʼapositolo ko Paulo. Neʼe hagē ia ko he tamai fakalaumālie maʼa te tokolahi. (1 Kolonito 4:15) Kae neʼe ina fakahā neʼe faihala. (Loma 7:21-25) Koia, ko tana agavaivai pea mo tona loto moʼoni, ʼe fakatupu iā tātou he fakaʼapaʼapa kiā ia kae mole ina pulihi te fakaʼapaʼapa ʼaia. Logolā tana ʼu faihala, neʼe feala ke falala Paulo ʼi tana tohi fēnei ki te kōkelekāsio ʼo Kolonito: “Ke kotou faʼifaʼitaki kiā te au, ohagē pē ko taku faʼifaʼitakiʼi ʼaē kiā Kilisito.” (1 Kolonito 11:1) Kapau ʼe kotou fakahā mo koutou takotou ʼu hala iā muʼa ʼo takotou fānau, pea ʼe natou fakamolemole atu anai.
15, 16. He koʼē ʼe tonu ke akoʼi e te ʼu mātuʼa tanatou fānau ke natou ʼoʼofa ki tonatou ʼu tehina mo tuagaʼane Kilisitiano, pea ʼe lava feafeaʼi hanatou fai ia te faʼahi ʼaia?
15 Koteā ʼaē ʼe feala ke toe fai e te ʼu mātuʼa ʼi te loto fale ke lahilahi ake tanatou fānau ʼo ʼoʼofa kiā Sehova? Neʼe tohi fēnei e te ʼapositolo ko Soane: “Kapau ʼe ʼui e he tahi: ‘ ʼE au ʼofa ki te ʼAtua,’ kae ʼe fehiʼa ia ki tona tehina, ʼe gutuloi. Heʼe ko ʼaē ʼe mole ʼofa ki tona tehina, ʼaē kua sio ki ai, ʼe mole feala ke ʼofa ki te ʼAtua, ʼaē ʼe mole sio ki ai.” (1 Soane 4:20, 21) Koia, kā kotou akoʼi takotou fānau ke natou ʼoʼofa ki tonatou ʼu tehina mo tuagaʼane Kilisitiano, ʼe kotou akoʼi age kiā nātou ke natou ʼoʼofa ki te ʼAtua. ʼE lelei ke fai e te ʼu mātuʼa te fehuʼi ʼaenī: ‘ ʼI taku ʼu fai palalau ʼe au talanoa tāfito koa ki te kōkelekāsio ʼaki he ʼu manatu fakaloto mālohi peʼe au fai fatufatu?’ ʼE feafeaʼi hakotou ʼiloʼi ia te faʼahi ʼaia? Kotou fakalogo lelei peʼe feafeaʼi te palalau ʼa takotou fānau ʼo ʼuhiga mo te ʼu fono pea mo te ʼu tehina mo tuagaʼane ʼi te kōkelekāsio. ʼE mahino ia ʼe hā anai ʼi tanatou ʼu palalau takotou manatu.
16 Koteā ʼaē ʼe feala ke fai e te ʼu mātuʼa moʼo tokoni ki tanatou fānau ke natou ʼoʼofa ki tonatou ʼu tehina fakalaumālie? Ko Peter, ʼaē ko ʼona foha e lua, ʼe ina ʼui fēnei: “Talu te kei liliki ʼo tamā ʼu tama, neʼe mā fakaafe tuʼumaʼu te ʼu tehina mo tuagaʼane kua fotufotuʼa ʼi te faʼahi fakalaumālie ki tomatou loto fale, ke matou kakai fakatahi pea mo fakaʼaogaʼi he kiʼi temi, pea neʼe matou fiafia lahi ai. Neʼe lahilahi tamā ʼu tama ʼo fakatahi lelei mo te hahaʼi ʼaē ʼe ʼoʼofa kiā Sehova, pea ʼi te temi nei, ʼe nā mahino ko te tauhi ʼaē ki te ʼAtua ʼe ko he faʼahiga maʼuli fakafiafia ʼaia.” Ko Dennis, ʼaē ko tona ʼu ʼofafine e toko nima, ʼe ina ʼui fēnei: “ ʼE mā fakaloto mālohiʼi tamā ʼu taʼahine ke natou kaumeʼa mo te ʼu pioniē kua mātutuʼa ʼo te kōkelekāsio, pea ʼi te ʼu temi ʼaē neʼe feala ai, neʼe mā fakaafe ki tomā ʼapi te ʼu tagata taupau feʼoloʼaki pea mo tonatou ʼohoana.” ʼE toe feala koa mo koutou ke kotou tokoni ki takotou fānau ke natou faka ʼuhiga te kōkelekāsio ohagē ko honatou fāmili?—Maleko 10:29, 30.
Te Maʼua ʼa Te Fānau
17. Koteā te tonu ʼaē ʼe fai e te fānau ki ʼamuli?
17 Tou toe vakaʼi te faʼifaʼitaki ʼo te tagata mo tana nahau. Logolā tana faiva, kae ʼe mole feala anai ke aʼu te kauʼi nahau ki te meʼa ʼaē ʼe fakahaga kiai mo kapau ʼe piko ia te kauʼi nahau. ʼE moʼoni, ʼe kinakina ʼaupitō anai te ʼu mātuʼa moʼo fakatonutonuʼi ia te fakakaukau hala ʼa te fānau. Kae ki muli age, ʼe ʼa te fānau te fai ʼo he tonu, peʼe natou tuku te mālamanei ke ina puleʼi nātou peʼe ke natou tuku ia Sehova ke ina ‘fakatonutonuʼi tonatou ʼu ala foufou.’—Tāʼaga Lea 3:5, 6; Loma 12:2.
18. Ko te filifili ʼa te fānau ʼe malave feafeaʼi ki ʼihi?
18 Logolā ʼe ko he maʼua mamafa ʼaē ʼe maʼu e te ʼu mātuʼa moʼo taupau tanatou fānau ʼi “te akonaki pea mo te ʼu fakatokaga ʼa Sehova,” kae ʼe fakalogo fakamuli leva ki te fānau, te meʼa ʼaē ʼe natou loto kiai ʼi tanatou kua lalahi. (Efesi 6:4) Koia, ʼu fānau, kotou fai ia te fehuʼi ʼaenī: ‘ ʼE au tali anai koa ia te ako fonu ʼi te ʼofa ʼaē ʼe foaki mai e taku ʼu mātuʼa?’ Kapau ʼe kotou tali te ako ʼaia, pea ʼe kotou filifili anai te faʼahiga maʼuli ʼaē ʼe lelei tokotahi. ʼE kotou fakafiafia anai takotou ʼu mātuʼa, kae tāfito, ʼe kotou fakafiafia anai ia te loto ʼo Sehova.—Tāʼaga Lea 27:11.
[Kiʼi nota]
a Neʼe tā e te kau Fakamoʼoni ʼa Sehova.
ʼE Kei Kotou Manatuʼi Koa?
• ʼE lava tuku feafeaʼi e te ʼu mātuʼa he faʼifaʼitaki lelei ʼo ʼuhiga mo te faikole pea mo te ako Tohi-Tapu?
• ʼE lava maʼu feafeaʼi e te ʼu mātuʼa ia te tokalelei ʼi te loto fale?
• Koteā ʼaē ʼe tonu ke filifili e te fānau, pea ko tanatou filifili ʼe malave feafeaʼi anai ki ʼihi?
[Paki ʼo te pasina 30]
ʼE kotou tuku koa he faʼifaʼitaki lelei ki takotou fānau ʼo ʼuhiga mo te ako takitokotahi?
[Paki ʼo te pasina 31]
Ko he maʼuli tokalelei ʼi te loto fale ʼe lagolago ki te fiafia