Ko Takotou Agatonu ʼe Fakafiafia Ai Ia Te Loto ʼo Sehova
“Ke ke fakapotopoto ê toku foha, pea mo ke fakafiafia toku loto, ke feala haku tali kiā ia ʼaē ʼe fakalaga fihi mai kiā te au.”—TAAG. 27:11.
1, 2. (a) Koteā ia te fakafifihi neʼe lagaʼi e Satana pea ʼe talanoa kiai ia te tohi ʼo Sopo? (b) Koteā ʼaē ʼe hā mai neʼe haga fakalaga fihi ia Satana kiā Sehova logolā te kua ʼosi mate ʼo Sopo?
NEʼE fakagafua e Sehova ke ʼahiʼahiʼi e Satana ia tana kaugana agatonu ko Sopo. Neʼe kaihaʼa ai te faga manu ʼa Sopo pea mo mamate ai ia tana fānau, pea neʼe mahaki. Kae ʼi te temi ʼaē neʼe ʼahiʼahiʼi ai e Satana ia te agatonu ʼa Sopo, neʼe mole ko Sopo pē ʼaē neʼe ina fakatuʼutuʼu ke ina ʼahiʼahiʼi. Neʼe ʼui fēnei e Satana: “Ko te kili maʼa te kili, pea ko meʼa fuli ʼaē ʼe maʼu e te tagata, ʼe ina foaki anai ia moʼo haofaki ia tona maʼuli.” Ko te fakafifihi ʼaia neʼe lagaʼi, neʼe mole gata pē ia mo Sopo, kae neʼe toe pipiki atu kiai mo ʼihi ʼi te kua ʼosi mate ʼa Sopo.—Sopo 2:4.
2 Hili taʼu e 600 ki te ʼu ʼahiʼahi ʼaē neʼe fai kiā Sopo, ʼaki te takitaki ʼa te laumālie neʼe tohi fēnei e Salomone: “Ke ke fakapotopoto ê toku foha, pea mo ke fakafiafia toku loto, ke feala haku tali kiā ia ʼaē ʼe fakalaga fihi mai kiā te au.” (Taag. 27:11) ʼE hā mai, ʼi te temi ʼaia neʼe kei fakafeagai pē ia Satana kiā Sehova. Tahi ʼaē, ʼi te meʼa ʼaē neʼe hā ki te ʼapositolo ko Soane, neʼe sio kiā Satana ʼe laukovi ki te ʼu kaugana ʼa te ʼAtua ʼi tona kapu ifo mai te lagi, ʼi te kua ʼosi fakatuʼu ia te Puleʼaga ʼo te ʼAtua ʼi te taʼu 1914. ʼEī, māʼiapē lā mo te temi nei, ʼaē kua tou lolotoga nei ʼi te ʼu ʼaho fakamuli ʼo te tuʼu agakovi ʼaenī, ʼe kei fakafihiʼi aipē e Satana ia te agatonu ʼa te ʼu kaugana ʼa te ʼAtua!—Fakh. 12:10.
3. Koteā ia te ako maʼuhiga ʼe feala ke tou maʼu mai te tohi ʼo Sopo?
3 Koia, tou vakaʼi age muʼa ia te ʼu ako maʼuhiga e tolu ʼe tou lava tāʼofi mai te tohi ʼo Sopo. ʼUluaki, ʼe hā lelei mai ʼi te ʼu ʼahiʼahi ʼaē neʼe felāveʼi mo Sopo, pe ko ai ia te fili moʼoni ʼo te mālamanei pea mo te tupuʼaga ʼo te fakafeagai ʼaē ʼe fai ki te hahaʼi ʼa te ʼAtua. Ko te fili ʼaia, ʼe ko Satana te Tēvolo. Lua, tatau aipē peʼe koteā hotatou fihifihia, kae kā tou maʼu he ʼu felōgoi lelei mo te ʼAtua pea ʼe tokoni mai anai ke tou nonofo agatonu. Tolu, kā hoko he ʼu fihifihia pea mo ʼahiʼahiʼi tātou, ʼe tokoni mai ia te ʼAtua kiā tātou ohagē ko tana fai ʼaē kiā Sopo. Iā ʼaho nei, ʼe fai e Sehova ia te faʼahi ʼaia ʼaki ia tana Folafola, tana kautahi, pea mo tona laumālie māʼoniʼoni.
Tou Manatuʼi Tuʼumaʼu Pe Ko Ai Ia Te Fili Moʼoni
4. Ko ai ʼaē ʼe tupu ai ia te ʼu ʼaluʼaga ʼe hoko ʼi te mālamanei?
4 Tokolahi ʼe mole natou tui ko Satana ʼe maʼuli moʼoni. Koia, logolā tanatou lagi mātataku ki te ʼu ʼaluʼaga ʼaē ʼe hoko ʼi te mālamanei, kae ʼe mole natou ʼiloʼi ʼe ko Satana te Tēvolo ʼaē ʼe tupu tāfito ai ia te ʼu faʼahi ʼaia. ʼE moʼoni, ʼe lahi te ʼu malaʼia ʼe hoko pē ʼuhi ko tātou totonu. Ko tatatou ʼu ʼuluaki mātuʼa, ia Atama mo Eva, neʼe nā filifili ke nā māʼuʼuli faʼifaʼitaliha mai tonā Tupuʼaga. Pea talu mai ai, ko te ʼu taʼiake ʼaē neʼe tutupu ki muli mai, neʼe mole kei natou aga fakapotopoto. Kae neʼe ko te Tēvolo tāfito ʼaē neʼe ina fakahalaʼi ia Eva ke fakafeagai ki te ʼAtua. Ko ia ʼaē neʼe ina fakatuʼu ia he mālama ke ina puleʼi ʼi te lotolotoiga ʼo te hahaʼi heʼe haohaoa pea mo mamate. Koteʼuhi ko Satana ʼe ko “te ʼatua ʼo te tuʼu ʼo te ʼu faʼahiga meʼa ʼaenī,” koia lā ʼaē ko te hahaʼi ʼe natou maʼu ia tona ʼu agaaga: te fialahi, te fiameʼameʼa, te maheka, te mānumānu, te kākā pea mo te agatuʼu. (2 Ko. 4:4; 1 Tim. 2:14; 3:6; lau ia Sake 3:14, 15.) Ko te ʼu agaaga ʼaia, neʼe hoko ai te ʼu fihi fakapolitike pea mo fakalotu, te loto fehiʼa, te aga fakahehema, pea mo te ʼu maveuveu, ʼo tupu tāfito ai ia te maʼuli fakaʼofaʼofa ʼa te mālamanei.
5. Koteā ʼaē ʼe tou fia fai ʼaki ia te ʼatamai mālama maʼuhiga ʼaē ʼe tou maʼu?
5 Ko he toe ʼatamai mālama maʼuhiga ʼe maʼu e te ʼu kaugana ʼa Sehova! ʼEī, ʼe tou mahino pe ko ai ʼaē ʼe tupu ai ia te ʼu maveuveu ʼo te mālamanei. Koia, ʼe mole ina uga ai koa tātou ke tou kau ki te fai fakamafola, ke tou fakahā ai ki te hahaʼi pe ko ai ia te fili lahi ʼo te mālamanei? Pea ʼe mole tou fiafia koa lā ʼi tatatou lagolago ki te ʼAtua moʼoni ko Sehova, pea mo fakamahino ki te hahaʼi peʼe feafeaʼi anai tana fakaʼauha ia Satana pea mo pulihi ia te ʼu malaʼia ʼo te mālamanei?
6, 7. (a) Ko ai ʼaē ʼe tupu ai ia te fakatagaʼi ʼo te kau ʼatolasio moʼoni? (b) ʼE feafeaʼi hatatou lava faʼifaʼitakiʼi ia Eliu?
6 Ko Satana ʼaē ʼe tupu ai ia te ʼu mamahi ʼo te mālamanei pea mo te fakafeagai ʼaē ʼe fai ki te hahaʼi ʼa te ʼAtua. Kua ina fakatotonu ke ina ʼahiʼahiʼi tātou. Neʼe ʼui fēnei e Sesu Kilisito ki te ʼapositolo ko Petelo: “Simone, Simone, koʼenī! Neʼe koleʼi fakamālohi mai ia koutou e Satana ke ina lulu koutou ohagē ko te lulu ʼo te fulumeto ke fakamaʼa.” (Luka 22:31) ʼO toe fēia pē kiā tātou fuli ʼaē ʼe tou muliʼi ia te ʼu tapugā vaʼe ʼo Sesu, ʼe tou tau anai mo te ʼu ʼahiʼahi kehekehe. Neʼe fakatatau e Petelo ia te Tēvolo ki “he laione e gugulu, ʼe feʼaluʼaki ʼo kumi he tahi ke ina kai.” Pea neʼe ʼui fēnei e Paulo: “Ko nātou fuli ʼaē ʼe fia pipiki ki te ʼAtua ʼi te lototahi mo Kilisito Sesu ʼe toe fakatagaʼi anai mo nātou.”—1 Pet. 5:8; 2 Tim. 3:12.
7 ʼE tou fakahā feafeaʼi ʼe tou ʼiloʼi ia te fili moʼoni mokā hoko he tuʼutāmaki ki hokita tehina? ʼE mole tou fakamamaʼo anai mai he tehina ʼe tau mo he fihifihia, kae ʼe tou hagē ko Eliu ʼaē neʼe palalau kiā Sopo ohagē ko hona kaumeʼa moʼoni. ʼE tou tokoni ki totatou tehina ʼaia ʼi te tau ʼaē ʼe tou fai kiā Satana, te fili ʼo tātou fuli. (Taag. 3:27; 1 Tes. 5:25) ʼE tou fakatuʼutuʼu ke tou tokoni ki ʼotatatou tehina ke natou nonofo agatonu, logolā he fihifihia ʼe hoko, pea ʼe tou fakafiafia ai ia te loto ʼo Sehova.
8. He koʼē neʼe mole ʼi ai he fua ʼo te ʼu faiga ʼaē ʼa Satana ke tuku e Sopo ia tana fakamaʼuhigaʼi ia Sehova?
8 Ko te ʼuluaki meʼa ʼa Sopo ʼaē neʼe fakatuʼutuʼu e Satana ke ina maumauʼi, ʼe ko tana faga manu. Neʼe maʼuhiga ia te ʼu manu ʼaia ʼi te faʼahi fakakoloa, lagi neʼe maʼu ai e Sopo hana falā. Kae neʼe toe fakaʼaogaʼi e Sopo ia tana faga manu moʼo fai ʼaki tana tauhi. ʼI te kua ʼosi fakamaʼa e Sopo tana ʼu fānau, “neʼe tuʼuake ia ʼi te kei māfoatā ʼo momoli he ʼu holokosetā, ʼo mulimuli ki tonatou kaugamālie; he neʼe ʼui fēnei e Sopo, ‘lagi neʼe agahala toku ʼu foha ki te ʼAtua pea mo natou leakovi kiā te ia ʼi tonatou loto.’ Pea ko he aga ʼaia ʼa Sopo neʼe ina fai tuʼumaʼu pē.” (Sopo 1:4, 5) Koia, neʼe sākilifisioʼi tuʼumaʼu e Sopo ia te ʼu manu kiā Sehova. ʼI te temi ʼaē neʼe kamata ai tona ʼu ʼahiʼahiʼi, neʼe mole kei feala leva ke ina fai te faʼahi ʼaia. Neʼe mole kei maʼu e Sopo hona “ ʼu koloa maʼuhiga” moʼo fakamaʼuhigaʼi ia Sehova. (Taag. 3:9) Kae neʼe feala pē hana fakamaʼuhigaʼi ia Sehova pea neʼe ina fai ʼaki tona ʼu laugutu!
Tou Fakatuputupu Ia He ʼu Felōgoi Lelei Mo Sehova
9. Koteā ʼaē ʼe maʼuhiga tāfito ʼi totatou maʼuli?
9 Peʼe tou koloaʼia peʼe tou māsisiva, peʼe kei tou tūpulaga peʼe kua tou mātutuʼa, peʼe tou māʼuʼuli haohaoa peʼe tou māhahaki, kae ʼe tou lava fakatuputupu ia he ʼu felōgoi lelei mo Sehova. Logolā hotatou fihifihia, kae ko tatatou felōgoi lelei ʼaē mo te ʼAtua ʼe tokoni mai anai ke tou taupau maʼu ia tatatou agatonu pea mo tou fakafiafiaʼi ia te loto ʼo Sehova. Logolā ko ʼihi ʼe mole lahi ia te ʼu meʼa ʼaē kua natou mālama kiai ʼi te moʼoni kae ʼe natou lototoʼa pea mo nonofo agatonu.
10, 11. (a) Neʼe feafeaʼi totatou tuagaʼane ki te ʼu ʼahiʼahi ʼaē ʼo tana agatonu? (b) Koteā ia te tali mālohi ʼaē neʼe fai e Valentina kiā Satana?
10 Tou vakaʼi age muʼa ia te faʼifaʼitaki ʼa te Tuagaʼane ko Valentina Garnovskaya, neʼe kau ʼi te ʼu Fakamoʼoni e tokolahi ʼi Lusia ʼaē neʼe natou hagē ko te tagata agatonu ko Sopo ʼaē neʼe natou nonofo agatonu, logolā te ʼu fihifihia neʼe tau mo nātou. ʼI te taʼu 1945, ʼi tona taʼu 20, neʼe fai fakamafola age ia te tehina ki ai. Neʼe tuʼa lua pē tana toe liliu age, ʼo fai palalau mo ia ki te Tohi-Tapu, ʼosi ʼaia neʼe mole nā toe fesioʼaki. Logolā te faʼahi ʼaia, kae neʼe kamata fai fakamafola ia Valentina ki tona ʼu vāhaʼa fale. ʼO tupu ai tona puke pea mo fakatūʼā ke pilisoni iā taʼu e valu. ʼI te taʼu 1953, neʼe fakaʼāteaina mai pea neʼe toe hoko atu pē ia tana fai fakamafola. Neʼe toe puke ʼo pilisoniʼi kiā taʼu leva e hogofulu. Hili te ʼu taʼu fualoa ki tona pilisoniʼi, neʼe hiki ia ki te tahi nofoʼaga pilisoni. ʼI te nofoʼaga pilisoni ʼaia, neʼe ʼi ai te ʼu tuagaʼane mo tanatou Tohi-Tapu. ʼI te tahi ʼaho, neʼe fakahā age e te tuagaʼane ia te Tohi-Tapu kiā Valentina. ʼI lakaga fakafiafia ʼaupitō! Kotou fakakaukauʼi age muʼa, ko te lua Tohi-Tapu ʼaia neʼe sio kiai ia Valentina talu mai te tehina ʼaē neʼe fai fakamafola age kiā ia ʼi te taʼu 1945!
11 ʼI te taʼu 1967, neʼe fakaʼāteaina leva ia Valentina pea ki muli age kua feala leva ke ina foaki ia tona maʼuli kiā Sehova ʼaki ia te papitema. Neʼe ina fakaʼaogaʼi fakalelei ia tona ʼāteaina ke kau ki te minisitelio ʼo aʼu ki te taʼu 1969. Kae ʼi te taʼu ʼaia, neʼe toe puke ia ia, pea neʼe fakatūʼā ke pilisoniʼi iā taʼu e tolu. Neʼe hoko atu pē ia te fai fakamafola ʼa Valentina. Neʼe mate ʼi te taʼu 2001, kae neʼe tokoni ki te toko 44 hahaʼi ke natou ako ia te moʼoni. Neʼe nofo iā taʼu e 21 ʼi te ʼu fale pilisoni pea mo te ʼu nofoʼaga pilisoni. Neʼe lotolelei ia ke lītuʼa kiā meʼa fuli, ʼo kau ai mo tona ʼāteaina, ke ina taupau tuʼumaʼu aipē ia tana agatonu. ʼI te fakaʼosi ʼo tona maʼuli, neʼe ʼui fēnei e Valentina: “Neʼe mole ʼi ai hoku ʼapi ke au nofo ai. Ko taku ʼu meʼa fuli neʼe fafaʼo pē ʼi te pasikete, kae neʼe au fiafia pea mo maʼuli fakafeʼauga ʼi taku tauhi ʼaē kiā Sehova.” ʼE ko he tali mālohi neʼe fai e Valentina kiā Satana, ʼaē ʼe ina lau ko te tagata ʼe mole nofo agatonu anai ki te ʼAtua mo kapau ʼe tau mo ni ʼu ʼahiʼahi! (Sopo 1:9-11) ʼE tou tui papau neʼe fakafiafia e te tuagaʼane ia te loto ʼo Sehova pea ʼe fakaʼamu te ʼAtua ki te temi ʼaē kā ina toe fakatuʼuake ai anai ia Valentina pea mo te kau agatonu fuli ʼaē kua mamate.—Sopo 14:15.
12. Koteā te ʼaoga ʼo te ʼofa ʼi tatatou ʼu felōgoi ʼaē mo Sehova?
12 ʼE tou kaumeʼa mo Sehova ʼuhi ko totatou ʼofa ʼaē kiā te ia. ʼE tou leleiʼia te ʼu kalitātē ʼo te ʼAtua pea ʼe tou fai ia meʼa fuli ʼe tou lavaʼi moʼo mulimuli ki tana ʼu fakatuʼutuʼu. ʼO mole hagē ko te ʼu meʼa ʼaē ʼe lau e te Tēvolo, ʼe tou ʼofa kiā Sehova ʼaki he lotolelei pea ʼe tou foaki noa. Ko te taʼi ʼofa ʼaia, ʼe ina fakamālohiʼi tātou ke tou nonofo agatonu mokā ʼahiʼahiʼi tātou. Pea kiā Sehova, ʼe ina “taupau anai te ala ʼo tana ʼu hahaʼi faitotonu.”—Taag. 2:8; Pes. 97:10.
13. ʼE feafeaʼi kiā Sehova ia te ʼu gāue ʼaē ʼe tou fai age kiā te ia?
13 Ko te ʼofa, ʼe ina uga tātou ke tou fakamaʼuhigaʼi ia te huafa ʼo Sehova, tatau aipē mokā tou logoʼi ʼe mole feala ke lahi age ia te ʼu meʼa ʼaē ʼe tou fai. ʼE ina ʼiloʼi ia te meʼa ʼaē ʼi totatou loto pea ʼe mole ina valokiʼi tātou mo kapau ʼe mole tou lava fai ia meʼa fuli ʼaē ʼe tou loto kiai. Ko te meʼa ʼaē ʼe maʼuhiga, ʼe mole gata pē ia ʼi te meʼa ʼaē ʼe tou fai kae he koʼē ʼe tou fai te meʼa ʼaia. Logolā ia te lotomamahi ʼaupitō ʼo Sopo pea mo te ʼu ʼahiʼahi ʼaē neʼe ina ʼūtakiʼi, kae neʼe lea age ia ki tona ʼu kaumeʼa loi ʼo ʼuhiga mo tona ʼofa ʼaē ki te ʼu ala ʼo Sehova. (Lau ia Sopo 10:12; 28:28.) ʼI te kāpite fakaʼosi ʼo te tohi ʼo Sopo, neʼe fakahā e te ʼAtua ia tona ʼita ʼaē kiā Elifasi, Pilitate, mo Sofale koteʼuhi neʼe mole natou fakahā ia te moʼoni. ʼI te lakaga ʼaia, neʼe fakahā e Sehova ia tona ʼofa ʼaē kiā Sopo, ʼaki tana fakaʼaogaʼi tuʼa fā ia te kupusiga palalau ko “taku tagata kaugana” ʼo ʼuhiga mo Sopo, pea mo tana fakatotonu age ke ina kolekole ʼo ʼuhiga mo te ʼu kaumeʼa agakovi ʼaia. (Sopo 42:7-9) ʼOfa pē ke tou fai mo tātou ia te aga ʼaē ʼe leleiʼia ai tātou e Sehova.
ʼE Lagolago Ia Sehova Ki Tana ʼu Kaugana Agatonu
14. Neʼe tokoni feafeaʼi ia Sehova kiā Sopo ke ina fetogi tana ʼu manatu?
14 Neʼe nofo agatonu ia Sopo logolā tona ʼuhiga heʼe haohaoa. ʼI ʼihi temi, ʼi te lahi fau ʼo tona mamahi, neʼe mole kei lelei ia tana ʼu manatu. Ohagē lā, neʼe ina ʼui fēnei kiā Sehova: “E au pāui atu ke ke tokoni mai, kae ʼe mole ke tali mai . . . ʼaki te mālohi ʼo tou nima, ʼe ke ʼita kiā te au.” Tahi ʼaē, neʼe lahi fau ia te fia tonuhia ʼa Sopo ʼi tana ʼui ʼaenī: “ ʼE mole au lakahala,” pea “ ʼe mole ʼi ai he agamālohi ʼi toku ʼu nima, pea ʼe maʼa taku faikole.” (Sopo 10:7; 16:17; 30:20, 21) Kae neʼe ʼofa ia Sehova ʼo tokoni kiā Sopo, ʼo ina fai age ki ai te ʼu tuʼuga fehuʼi ke tupu ʼaki ai hana mole tokaga fau kiā ia totonu. ʼAki te ʼu fehuʼi ʼaia, neʼe toe feala ai kiā Sopo ke mahino lelei ki te māʼoluga age ʼo te ʼAtua ʼi te tagata ʼaē ʼe veliveli. Neʼe tali e Sopo te takitaki pea mo ina fetogi tana manatu.—Lau ia Sopo 40:8; 42:2, 6.
15, 16. Ko te ʼu ʼaluʼaga fea ʼaē ʼe foaki ai e Sehova tana tokoni ki tana ʼu kaugana iā ʼaho nei?
15 ʼE toe foaki e Sehova ia te takitaki agalelei pea mo he ʼu tokoni ʼe ʼaoga ki tana ʼu kaugana iā ʼaho nei. Tahi ʼaē, ʼe tou maʼu mo te ʼu tapuakina lahi. Ohagē lā, neʼe fai e Sesu Kilisito ia te sākilifisio faitotogi pea ko te fakatafitoʼaga ʼaia ʼo te fakamolemole ʼo te ʼu agahala. ʼAki te sākilifisio ʼaia, kua feala ai hatatou felōgoi lelei mo te ʼAtua logolā totatou ʼuhiga heʼe haohaoa. (Sake 4:8; 1 Soa. 2:1) Kā tou tau mo he ʼu ʼahiʼahi, tou faikole foki ke tou maʼu ia te tokoni pea mo te fakalotomālohi ʼa te laumālie māʼoniʼoni ʼo te ʼAtua. Tahi ʼaē, ʼe tou maʼu ia te Tohi-Tapu kātoa, pea kapau ʼe tou lau pea mo metitāsioʼi tana ʼu manatu, ʼe tou nonofo teuteu ai mo kapau ʼe ʼahiʼahiʼi ia tatatou tui. Ko te ako ʼe tokoni mai ke tou mahino ki te ʼu fehuʼi ʼaē neʼe lagaʼi ʼo ʼuhiga mo te pule faʼitaliha pea mo tatatou agatonu takitokotahi.
16 Tahi ʼaē, ʼe tou maʼu ia te tapuakina ʼi tatatou kau ki te foʼi fāmili fale tautēhina, ʼaē ʼe foaki kiai e Sehova ia te meʼa kai fakalaumālie ʼaki te “tagata kaugana agatonu mo poto.” (Mat. 24:45-47) ʼI te ʼu kōkelekāsio e teitei 100 000 ʼa te kau Fakamoʼoni ʼa Sehova, ʼe fai ai ia te ʼu fono ʼe akoʼi ai tātou pea mo fakalotomālohiʼi tātou ke tou tauʼi ia te ʼu ʼahiʼahi ʼo tatatou tui. Tou toʼo te faʼifaʼitaki ʼa Sheila, ko he kiʼi finemui Fakamoʼoni ʼe maʼuli ʼi Siamani.
17. ʼAki te faʼifaʼitaki ʼa te kiʼi taʼahine, ʼe hā feafeaʼi mai ia te maʼuhiga ʼo te kau tuʼumaʼu ki te ʼu fono?
17 ʼI te tahi ʼaho ʼi te faleako, ko te kalasi ʼa Sheila neʼe mole hanatou faiako. Pea neʼe fakatuʼutuʼu e tona ʼu kaugā ako ke natou gaoʼi mo te moʼi papa oui-ja. Neʼe foimo mavae aipē ia Sheila ʼi te kalasi, pea ki muli age ʼi tana logo ki te ʼu meʼa ʼaē neʼe hoko, neʼe fiafia ʼi tana mole kau ki tanatou gaoʼi. ʼI te temi ʼaē neʼe fakaʼaogaʼi ai e tona ʼu kaugā ako ia te moʼi papa oui-ja, ko ʼihi neʼe natou logoʼi te nofo ʼa te kau temonio iā nātou pea neʼe natou feholaki ʼi tanatou mātataku. Koteā ʼaē neʼe tokoni kiā Sheila ke mavae fakavilivili mai tana kalasi? Neʼe ʼui fēnei e Sheila: “Mole heʼeki faʼa fualoa, ʼi te tahi fono ʼi te Fale ʼo Te Puleʼaga, neʼe matou vakaʼi ia te ʼu tuʼutāmaki ʼo te ʼu moʼi papa oui-ja. Koia neʼe au ʼiloʼi ia te meʼa ʼaē ʼe tonu ke au fai. Neʼe au fia fakafiafiaʼi ia te loto ʼo Sehova, ohagē ko tona fakahā mai iā Tāʼaga Lea 27:11.” ʼI meʼa lelei ia te kau ʼa Sheila ki te fono pea mo fakalogo fakalelei ai ki te ʼu akonaki!
18. Koteā ʼaē kā kotou fakatotonu takitokotahi ke kotou fai?
18 Tou fakatotonu ke tou mulimuli fakalelei ki te ako ʼaē ʼe tou maʼu mai te kautahi ʼa te ʼAtua. ʼI tatatou kau tuʼumaʼu ki te ʼu fono, mo lau ia te Tohi-Tapu, mo ako ia te ʼu tohi Fakatohi-tapu, mo faikole, pea mo fakatahi mo totatou ʼu tehina mo tuagaʼane, ʼe tou maʼu ai ia te takitaki pea mo te tokoni ʼaē ʼe ʼaoga kiā tātou. ʼE loto e Sehova ke tou mālo, pea ʼe falala ia ʼe hoko atu pē anai ia tatatou nofo agatonu. ʼE ko he pilivilēsio ia tatatou fakamaʼuhigaʼi ia te huafa ʼo Sehova, mo nonofo agatonu, pea mo fakafiafia ia te loto ʼo Sehova!
ʼE Kei Kotou Manatuʼi Koa?
• Koteā te ʼu ʼaluʼaga pea mo te ʼu ʼahiʼahi ʼaē ʼe tupu ʼuhi ko Satana?
• Koteā ʼaē ʼe maʼuhiga tāfito ʼi totatou maʼuli?
• Koteā ʼaē ʼe fakatafito kiai ia tatatou ʼu felōgoi mo Sehova?
• Ko te ʼu faʼahi fea ʼaē ʼe tokoni mai ai ia Sehova kiā tātou iā ʼaho nei?