ʼU Tehina—Kotou Tō Maʼa Te Laumālie Pea Mo Faiga Ki He ʼu Gāue Lelei!
“Ko ʼaē ʼe ina tō maʼa te laumālie, ʼe ina utu anai . . . ia te maʼuli heʼegata.”—KAL. 6:8.
1, 2. ʼE lolotoga hoko feafeaʼi ia te ʼu palalau ʼaē iā Mateo 9:37, 38, ʼo tupu ai ia te fakatuʼutuʼu fea ʼi te ʼu kōkelekāsio?
ʼE KOTOU mamata nei ki te fakahoko ʼo te ʼu meʼa maʼuhiga! Ko te gāue neʼe fakakikite e Sesu Kilisito ʼe lolotoga hoko nei pea ʼe tuputupu fakavilivili. Neʼe ʼui fēnei e Sesu: “Ko te taʼukai ʼe lahi, kae ʼe tokosiʼi te kau gāue. Kotou faikole ki te ʼAliki ʼo te taʼukai ke ina fekauʼi mai he kau gāue ki tana taʼukai.” (Mat. 9:37, 38) ʼI te temi nei, kua makehe ʼaupitō ia te tali e Sehova ʼAtua ki te ʼu faikole ʼaia. ʼI te taʼu gāue 2009, neʼe fakatuʼu te ʼu kōkelekāsio foʼou e 2 031, pea ko te lahi ʼo te ʼu kōkelekāsio ʼa te kau Fakamoʼoni ʼa Sehova ʼi te mālamanei neʼe aʼu ki te 105 298. Ko tona fakafuafua, neʼe papitemaʼi ʼi te ʼaho fuli ia te toko 757!
2 ʼAki te tuputupu ʼaia, pea ʼe tonu ai ke maʼu he ʼu tehina faiva moʼo takitaki ʼi te ʼu kōkelekāsio te faiakonaki pea mo te gāue fakatauhi ovi. (Efe. 4:11) Lolotoga te ʼuafulu sēkulō, neʼe filifili e Sehova ia te ʼu tagata faiva ke natou tōkakaga ki te ʼu ovi, pea ʼe tou falala ʼe hoko atu pē anai ia tana fai te faʼahi ʼaia. ʼO ʼuhiga mo te ʼu ʼaho fakamuli, ʼe fakapapauʼi mai ʼi te lea fakapolofetā ʼaē iā Mikea 5:5, ko te hahaʼi ʼa Sehova ʼe natou maʼu anai tonatou ‘ ʼu tauhi ovi e fitu’ pea mo te ‘ ʼu tama ʼaliki e valu,’ ʼe natou fakatātā te ʼu tagata faiva e tokolahi ʼe natou takitaki anai nātou.
3. Fakamahino ia te fakaʼuhiga ʼo te ʼui ʼaē ke tou “tō maʼa te laumālie.”
3 Kapau ko koutou ko he ʼu tagata Kilisitiano kua papitema, koteā ʼaē ʼe feala ke tokoni atu mo kapau ʼe kotou faiga ki he ʼu gāue Fakateokalatike? Ko te fakatuʼutuʼu maʼuhiga, ke kotou “tō maʼa te laumālie.” (Kal. 6:8) ʼE fakamaʼua kiai ke kotou tuku ia te laumālie māʼoniʼoni ʼo te ʼAtua ke gāue kātoa ʼi tokotou maʼuli. Kotou fakatotonu ke ʼaua naʼa kotou “tō maʼa te kakano.” Kotou tōkakaga naʼa kotou tuku he ʼu meʼa ohagē ko te maʼuli fakafīmālie, pea mo te fakafiafia ke natou fakavaivaiʼi takotou holi ʼaē ke kotou kau ki te tauhi ki te ʼAtua. Ko te kau Kilisitiano fuli ʼe tonu ke natou “tō maʼa te laumālie,” pea ʼaki te temi, ko te hahaʼi tagata ʼaē ʼe natou fai fēia ʼe natou lava fakahoko anai he ʼu maʼua ʼi te kōkelekāsio. Mai tona ʼaluʼaga ʼaē, ʼe ʼaoga ʼaupitō ke maʼu he ʼu tagata faifekau fakaminisitelio pea mo he ʼu tagata ʼāfea iā ʼaho nei, koia neʼe fai tāfito te ʼalatike ʼaenī maʼa te hahaʼi tagata Kilisitiano. Koia, ʼu tehina, ʼe fakalotomālohiʼi atu koutou ke kotou metitāsioʼi ia te ʼalatike ʼaenī ʼi te faikole.
Kotou Faiga Ke Kotou Fai He Gāue ʼe Lelei
4, 5. (a) Koteā te ʼu pilivilēsio ʼaē ʼe tonu ke faiga kiai ia te ʼu tehina ʼi te kōkelekāsio? (b) ʼE tou ʼiloʼi feafeaʼi te faiga ʼa he tehina ki he gāue fēia?
4 Ko he tagata Kilisitiano kua papitema ʼe mole ʼui leva ʼe liliu atu aipē ia ko he tehina taupau. Kae ʼe tonu ke faiga mālohi ke ina fakahoko he “gāue matalelei” fēia. (1 Tim. 3:1) Ko tona fakaʼuhiga ke gāue maʼa tona ʼu tehina mo tuagaʼane ʼi te tui ʼaki he tokaga moʼoni ki te ʼu meʼa ʼaē ʼe ʼaoga kiā nātou. (Lau ia Isaia 32:1, 2.) Ko he tehina ʼe faiga ke ina fakahoko he ʼu gāue fēia ʼaki he ʼu manatu ʼe lelei, ʼe mole fakaʼuhiga anai ia ʼe fialahi. Kailoa ia, ʼe ina fakahoko te faʼahi ʼaia heʼe fia tokoni ia ki niʼihi.
5 Ko he tahi ʼe fia liliu ko he tagata faifekau fakaminisitelio peʼe ko he tagata ʼāfea, ʼe ʼiloga anai ʼi tana faiga ke ina maʼuliʼi muʼa ia te ʼu fakamaʼua ʼaē ʼe fai ʼi te Tohi-Tapu ʼo ʼuhiga mo te ʼu gāue ʼaia. (1 Tim. 3:1-10, 12, 13; Tito 1:5-9) Kapau ko koutou ko he tehina, kotou fai te ʼu fehuʼi ʼaenī kiā koutou totonu: ‘ ʼE au kau kātoa koa ki te gāue fai fakamafola, pea ʼe au tokoni koa ki ʼihi ke natou kau ki te gāue ʼaia? ʼE au fakalotomālohiʼi koa toku ʼu tehina mo tuagaʼane ʼaki haku tokaga moʼoni ki te ʼu meʼa ʼaē ʼe ʼaoga kiā nātou? ʼE ʼiloʼi koa e te kōkelekāsio ko au ko he tahi ʼe ina ako tuʼumaʼu te Folafola ʼa te ʼAtua? ʼE au hikihiki koa te lelei ʼo taku ʼu tali ʼaē ʼi te ʼu fono? ʼE au fakahoko fakalelei koa toku ʼu maʼua ʼaē ʼe foaki mai e te ʼu tagata ʼāfea?’ (2 Tim. 4:5) ʼE maʼuhiga ke kotou fai ia te ʼu fehuʼi ʼaia.
6. Koteā te fakatuʼutuʼu tāfito ke feala ai hakotou fakahoko he ʼu gāue ʼi te kōkelekāsio?
6 Ko te tahi fakatuʼutuʼu ke fai moʼo fakahoko he ʼu gāue ʼi te kōkelekāsio, “ke kotou liliu ʼo mālolohi ʼi tokotou ʼuhiga tagata ʼaē ʼo loto ʼaki te mālohi ʼo [te] laumālie [ʼo te ʼAtua].” (Efe. 3:16) Ko te liliu ʼaē ko he tagata faifekau fakaminisitelio peʼe ko he tagata ʼāfea ʼi te kōkelekāsio Fakakilisitiano ʼe mole ko he faʼahi ia ʼe fakahoko ʼaki he vote. ʼE maʼu te pilivilēsio ʼaia, ʼaki pē te tuputupu fakalaumālie ʼa he tahi. ʼE hoko feafeaʼi te tuputupu fakalaumālie ʼaia? Ko hona faʼahiga fai ke kotou “haga haʼele ʼaki te laumālie” pea mo maʼuliʼi tona ʼu fua. (Kal. 5:16, 22, 23) Kapau ʼe ʼiloga ʼi tokotou maʼuli ia te ʼu kalitātē fakalaumālie ʼaē ʼe ʼaoga moʼo fakahoko he tahi age ʼu gāue, pea kapau ʼe kotou muliʼi te ʼu tokoni ʼaē ʼe fai atu ke kotou tuputupu ʼi te faʼahi fakalaumālie, pea ʼe “ ʼiloga [anai] ki te hahaʼi fuli [takotou] tuputupu.”—1 Tim. 4:15.
ʼE Fakamaʼua Atu Ke Kotou Maʼuli Fakasākilifisio
7. Koteā ʼaē ʼe fakamaʼua kiai te gāue maʼa ʼihi?
7 Ko te gāue maʼa ʼihi, ʼe fakamaʼua kiai ia he toe gāue lahi pea mo he maʼuli fakasākilifisio. Mai tona ʼaluʼaga ʼaē ko te ʼu taupau Kilisitiano ʼe ko he kau tauhi ovi fakalaumālie, koia ʼe natou tōkakaga tāfito ki te ʼu fihifihia ʼa te faga ovi. Kotou fakatokagaʼi pe neʼe malave feafeaʼi te gāue fakatauhi ovi ki te ʼapositolo ko Paulo. Neʼe ina ʼui fēnei ki tona ʼu tehina ʼaē ʼi Kolonito: “ ʼAki te ʼu mamahi lahi pea mo te loto tuʼania, neʼe au faitohi atu kiā koutou ʼaki te ʼu loʼimata, ke ʼaua naʼa kotou lotomamahi, kae ke kotou ʼiloʼi te ʼofa ʼaē neʼe au maʼu tāfito ʼo ʼuhiga mo koutou.” (2 Ko. 2:4) ʼE ʼiloga lelei ia te tokaga fakamālotoloto ʼaē ʼa Paulo ki tana gāue.
8, 9. Tuku mai he ʼu faʼifaʼitaki ʼi te Tohi-Tapu, pe neʼe feafeaʼi te tokaga ʼa te ʼu tehina ki te ʼu meʼa ʼaē ʼe ʼaoga ki niʼihi.
8 Talu mai fualoa, ko te maʼuli fakasākilifisio neʼe ko te fakaʼiloga ʼaia ʼo te ʼu tagata ʼaē neʼe gāue kinakina maʼa te ʼu kaugana ʼa Sehova. Ohagē lā, ʼe faigataʼa hatatou fakakaukau ko Noe neʼe ina ʼui age ki tona fāmili: ‘Pea kotou fakahā mai mokā kua ʼosi faʼu ia te ʼaleka ke au ʼalu atu.’ Neʼe mole feala ke ʼui fēnei age e Moisese ki te kau Iselaele ʼi Esipito: ‘ ʼE hoki au ʼalu atu anai kiā koutou ʼi te Tai Kula. Kotou fai he puleʼaki ke kotou aʼu kiai.’ Pea neʼe mole ʼui e Sosue: ‘Pea kotou fakahā mai leva te temi ʼaē kā holo ai ia te kaupā ʼo Seliko.’ Pea neʼe mole fakanofo e Isaia he tahi ʼo ina ʼui: ‘Koʼenī ia ia! Fekauʼi ia ia.’—Isa. 6:8.
9 ʼE ko Sesu Kilisito, te faʼifaʼitaki lahi ʼo he tagata neʼe ina tuku te laumālie ʼo te ʼAtua ke ina taki ia ia. Neʼe ina tali fakalelei tana gāue ʼaē ke liliu ko he Totogi maʼa te mālamanei. (Soa. 3:16) ʼE mole tonu koa lā ke tou tali ʼaki he loto fakafetaʼi ki te ʼofa fakasākilifisio ʼaē neʼe maʼu e Sesu? ʼO ʼuhiga mo tona ʼofa ʼaē ki te faga ovi, neʼe ʼui fēnei e te tagata ʼāfea kua fualoa: “Neʼe malave ʼaupitō kiā au ia te ʼu palalau ʼaē ʼa Sesu kiā Petelo ke tokaga ʼo fafaga tana ʼu ovi. Lolotoga te ʼu taʼu, neʼe au sio ʼe feala ke toe mālohi te ʼatamai ʼo he tahi ʼaki pē he ʼu kiʼi palalau ʼofa pea mo he ʼu kiʼi aga ʼe lelei. Ko te tokaga ki te ʼu ovi ʼe ko he gāue ʼe au leleiʼia ʼaupitō.”—Soa. 21:16.
10. Koteā ʼaē ʼe feala ke ina uga he ʼu tehina Kilisitiano ke natou muliʼi te faʼifaʼitaki ʼa Sesu pea mo natou gāue maʼa ʼihi?
10 ʼO ʼuhiga mo te faga ovi ʼa te ʼAtua, ko te ʼu tehina ʼi te kōkelekāsio ʼe natou loto anai ke natou maʼu ia te manatu ʼa Sesu, ʼaē neʼe ina ʼui fēnei: “ ʼE au fakafīmālie anai koutou.” (Mat. 11:28) ʼE loto e te ʼu tehina Kilisitiano ke natou fai ia te ʼu gāue lelei ʼuhi ko tanatou tui ʼaē ki te ʼAtua pea mo tonatou ʼofa ʼaē ki te kōkelekāsio, ʼo mole natou manatu ko te ʼu gāue ʼaia ʼe mamafa fau peʼe fakakinakina fau kiā nātou. Kae ʼe feafeaʼi mo kapau ʼe mole fakaʼamu he tehina ki te ʼu gāue ʼaia? ʼE feala koa ki he tehina ke ina fakatuputupu ʼi tona loto hana fia gāue maʼa te kōkelekāsio?
Kotou Fakatuputupu ʼi Tokotou Loto Te Fia Gāue ʼAē Maʼa ʼIhi
11. ʼE feafeaʼi ki he tahi hana fakatuputupu ʼi tona loto ia te fia gāue maʼa ʼihi?
11 Kapau ʼe kotou tuʼaniaʼi te faiga ʼaē ki he pilivilēsio ʼi te kōkelekāsio ʼuhi heʼe kotou manatu ʼe mole kotou popoto anai ʼi te gāue ʼaia, pea ʼe lagi lelei ke kotou kole ia te laumālie māʼoniʼoni. (Luka 11:13) Ko te laumālie ʼo Sehova ʼe tokoni atu anai ke ʼaua naʼa kotou hoha ʼo ʼuhiga mo te faʼahi ʼaia. Ko te fia gāue moʼoni ʼaē maʼa ʼihi ʼe foaki mai e te ʼAtua, heʼe ko te laumālie ʼo Sehova ʼaē ʼe ina foaki te mālohi ki he tehina ke ina fai hana gāue pea ke ina fakahoko ia te tauhi taputapu. (Filp. 2:13; 4:13) Koia, ʼe lelei he kole kiā Sehova ke tokoni atu ke kotou tali ia te ʼu gāue ʼaia.—Lau ia Pesalemo 25:4, 5.
12. ʼE lava feafeaʼi ki he tahi hana maʼu te poto feʼauga moʼo fakahoko te ʼu maʼua ʼaē neʼe foaki age ki ai?
12 ʼE feala ki he Kilisitiano ke mole loto ki te faʼahi ʼaia, ʼi tana sio ʼaē ʼe mamafa fau te tokoni ʼaē ʼe ʼaoga ki te faga ovi. Peʼe lagi ʼi tana manatu ʼe mole faʼa poto lelei ia ʼi te fakahoko ʼo te ʼu maʼua. Kapau koia, pea ʼe feala hana maʼu te poto mo kapau ʼe ina ako fakamālotoloto te Folafola ʼa te ʼAtua pea mo te ʼu tohi Fakatohi-tapu. ʼE lagi feala hana fai te ʼu fehuʼi ʼaenī ʼo ʼuhiga mo ia totonu: ‘Kua au tuku koa he temi moʼo ako te Folafola ʼa te ʼAtua, pea ʼe au kole koa ke au maʼu te poto?’ Neʼe tohi fēnei e te tisipulo ko Sake: “Kapau ʼe iā koutou he tahi ʼe mole ina maʼu te poto, ke ina haga kole ki te ʼAtua, heʼe ina foaki ki te hahaʼi fuli ʼaki te manavaʼofa pea ʼe mole ina lau ia; pea ʼe ina foaki age anai kiā te ia.” (Sake 1:5) ʼE kotou fakatui koa ki te manatu ʼaia ʼe haʼu mai te ʼAtua? Moʼo tali ki te faikole ʼa Salomone, neʼe foaki e te ʼAtua kiā ia “he loto ʼe poto pea mo ʼatamai” ke feala ai hana ʼiloʼi ʼi te temi ʼaē ʼe faifakamāu ai, ia te meʼa ʼaē ʼe lelei mai te meʼa ʼaē ʼe kovi. (1 Hau 3:7-14) ʼE moʼoni, ko te poto ʼo Salomone neʼe makehe ʼaupitō. Kae ʼe tou lava falala ko te ʼAtua ʼe ina foaki anai te poto ki te hahaʼi tagata ʼaē ʼe natou fakahoko te ʼu maʼua ʼi te kōkelekāsio, ke natou tōkakaga fakalelei ki tana faga ovi.—Taag. 2:6.
13, 14. (a) Fakamahino pe neʼe malave feafeaʼi kiā Paulo ia “te ʼofa ʼaē neʼe maʼu e Kilisito.” (b) ʼE tonu ke malave feafeaʼi kiā tātou ia “te ʼofa ʼo Kilisito”?
13 Ko te tahi tokoni moʼo fakatuputupu ia te fia gāue ʼaē maʼa ʼihi, ke manatuʼi mālohi ia te ʼu gāue fuli ʼaē neʼe fai e Sehova pea mo tona ʼAlo maʼa tātou. Ohagē lā, kotou vakaʼi age muʼa ia te manatu ʼaē iā 2 Kolonito 5:14, 15. (Lau.) ʼE feafeaʼi ki ‘te ʼofa ʼo Kilisito hana uga ia tātou’? ʼI te fakaofoofo ʼaupitō ʼo te ʼofa ʼaē neʼe fakahā e Kilisito ʼi tana foaki ia tona maʼuli maʼa tātou ʼuhi ko te finegalo ʼo te ʼAtua, pea ʼe tuputupu iā tātou he loto fakafetaʼi lahi, pea ʼe malave ʼaupitō ki totatou loto. Neʼe tuku e Paulo ia te ʼofa ʼaia ʼo Kilisito ke ina taki tona maʼuli. Ko te ʼofa ʼaia neʼe ina tāʼofi ia ia ke ina kumi pē te meʼa ʼaē ʼe ʼaoga kiā ia, pea neʼe toe tokoni ki ai ke tokaga ʼāteaina pē ki te tauhi ʼo te ʼAtua pea mo te hahaʼi ʼaē ʼi te loto kōkelekāsio pea mo tuʼa atu.
14 Ko te metitāsioʼi ʼo te ʼofa ʼo Kilisito ʼaē ki te hahaʼi, ʼe ina fakatupu iā tātou te loto fakafetaʼi. Koia ʼe tou mahino ai ʼe mole lelei ke tou “tō maʼa te kakano” ʼo tou kumi pē ia te ʼu meʼa ʼaē ʼe ʼaoga kiā tātou totonu pea mo tou fakaʼaogaʼi pē ia totatou maʼuli ki te ʼu meʼa ʼaē ʼe tou leleiʼia. Kailoa ia, kae ʼe tou fetogi totatou maʼuli, ke tou fakamuʼamuʼa te gāue ʼaē neʼe foaki mai e te ʼAtua ke tou fakahoko. ʼE uga tātou ke tou “kaugana” maʼa totatou ʼu tehina ʼaki totatou ʼofa. (Lau ia Kalate 5:13.) Kapau ʼe tou fakaʼuhiga ko tātou ko he ʼu kaugana ʼe gāue ʼaki he agavaivai maʼa te hahaʼi tauhi ʼa Sehova, pea ʼe tou gaohi fakalelei anai nātou pea mo fakaʼapaʼapa kiā nātou. ʼE mahino ia, ʼe mole tou muliʼi anai ia te aga ʼa Satana, ʼaē ko te fai fatufatu pea mo te valokiʼi ʼo niʼihi.—Fakh. 12:10.
Ko Te Fāmili Kātoa ʼe Tonu Ke Gāue Fakatahi
15, 16. Koteā ʼaē ʼe tonu ke fai e te hahaʼi fuli ʼo he fāmili mo kapau ʼe faiga he tehina ke fakanofo ko he tagata faifekau fakaminisitelio peʼe ko he tagata ʼāfea?
15 Kapau ko he tehina kua ʼohoana pea mo maʼu fānau, ʼe tonu ke tokagaʼi te ʼu ʼaluʼaga ʼaia moʼo fakafuafua peʼe tonu ke hinoʼi ia ia ko he tehina faifekau peʼe ko he tagata ʼāfea. ʼE mahino ia mokā fakanofo he tahi, ʼe maʼuhiga ke tokagaʼi te maʼuli fakalaumālie pea mo te ʼu logo ʼaē ʼe maʼu ʼo ʼuhiga mo te fāmili ʼo te tehina ʼaia. ʼE fakahā ai te maʼuhiga ʼaē ke lagolago te fāmili ki te tehina ʼaē ʼe faiga ke gāue maʼa te kōkelekāsio ohagē ko he tagata faifekau peʼe ko he tagata ʼāfea.—Lau ia 1 Timoteo 3:4, 5, 12.
16 ʼE fakafiafia Sehova mokā kaugā gāue fakatahi he fāmili Kilisitiano. (Efe. 3:14, 15) ʼE ʼaoga ki te pule fāmili ia he fakapotopoto mokā ʼe tonu ke ina fakahoko he ʼu gāue ʼi te kōkelekāsio pea mo ina takitaki “fakalelei” tona loto fale. Koia, ʼe maʼuhiga ai ki he tagata ʼāfea peʼe ko he tagata faifekau fakaminisitelio ke ina ako te Tohi-Tapu mo tona ʼohoana pea mo tana fānau, ke feala kiā nātou fuli ke natou maʼu te ʼu fua lelei ʼo te Tauhi Fakafāmili ʼi te vāhaʼa fuli. ʼE tonu ke kau tuʼumaʼu mo tona fāmili ki te minisitelio. Koia ʼe toe maʼuhiga ai foki kiā nātou fuli ʼi te fāmili ke natou kaugā gāue fakatahi mo te pule ʼo te loto fale.
ʼE Feala Koa Ke Kotou Toe Maʼu He ʼu Pilivilēsio?
17, 18. (a) Kapau ko he tehina ʼe mole kei maʼu hona ʼu pilivilēsio, koteā ʼaē ʼe lagi ʼaoga kiā ia? (b) Koteā te manatu ʼe feala ke maʼu e he tehina neʼe tagata ʼāfea pe neʼe faifekau fakaminisitelio ʼi muʼa atu?
17 ʼE lagi ʼi he tahi temi neʼe kotou tagata ʼāfea, pe neʼe kotou tagata faifekau minisitelio, kae ʼi te temi leva ʼaenī ʼe mole kei kotou fai te ʼu maʼua ʼaia. ʼE kotou ʼofa kiā Sehova pea ʼe feala hakotou tui papau ʼe kei tokaga pē kiā koutou. (1 Pet. 5:6, 7) Neʼe kua ʼui atu koa kiā koutou ʼe tonu ke kotou fai he ʼu fetogi ʼi tokotou maʼuli? ʼAki he lotolelei, kotou fakamoʼoni neʼe kotou faihala pea mo kotou gāueʼi te vaivaiʼaga ʼaia ʼaki te tokoni ʼa te ʼAtua. Kotou tōkakaga naʼa kotou taupau hokotou ʼita. Kotou maʼu he manatu ʼe poto, pea mo he ʼu manatu ʼe lelei. Ko te tagata ʼāfea neʼe ina fai tona maʼua ʼaia lolotoga he ʼu taʼu, kae neʼe puli tona pilivilēsio ʼaia lolotoga he temi, ʼe ina ʼui fēnei: “Neʼe au fakatuʼutuʼu ke au kau tuʼumaʼu pē ki te ʼu fono, mo te fai fakamafola, pea mo te lau ʼo te Tohi-Tapu ohagē pē ko te temi ʼaē neʼe au tagata ʼāfea ai, pea ko he fakatuʼutuʼu ʼaia neʼe feala ke au fakahoko. Neʼe au ako ai te faʼa kātaki koteʼuhi ʼi taku manatu ʼe au toe maʼu pē toku ʼu pilivilēsio hili kiai he taʼu kātoa peʼe lua, kae neʼe au fakatalitali taʼu e fitu ʼi muʼa ʼo haku toe liliu ko he tagata ʼāfea. Lolotoga te temi ʼaia neʼe mole au lotovaivai kae neʼe tokoni ʼaupitō kiā au taku faiga mālohi ki te gāue ʼaia.”
18 Kapau ʼe fēia tokotou ʼaluʼaga ohagē ko te tehina ʼaenī neʼe tou talanoa ki ai, pea ʼaua naʼa kotou lotovaivai. Kotou metitāsioʼi peʼe tapuakinaʼi feafeaʼi e Sehova ia takotou minisitelio pea mo tokotou loto fale. Kotou fakalotomālohiʼi te maʼuli fakalaumālie ʼo tokotou fāmili, kotou ʼaʼahi te kau mahaki, pea mo fakalotomālohiʼi nātou ʼaē kua vaivai fakalaumālie. Kae iā meʼa fuli, kotou leleiʼia tokotou pilivilēsio ʼaē ko te vikiʼi ʼo te ʼAtua pea mo te tala te logo lelei ʼo te Puleʼaga ʼi tokotou ʼuhiga kau Fakamoʼoni ʼa Sehova.a—Pes. 145:1, 2; Isa. 43:10-12.
Ke Kotou Vakavakaʼi Fakalelei Tokotou Maʼuli
19, 20. (a) Koteā ʼaē ʼe fakalotomālohiʼi kiai te ʼu tagata fuli ʼaē kua papitema? (b) Koteā ʼaē kā tou vakaʼi anai ʼi te ʼalatike kā hoa mai?
19 Kua maʼuhiga ʼaupitō ʼi te temi nei ke fakanofo he ʼu tehina taupau pea mo he ʼu tagata faifekau fakaminisitelio. Koia, ʼe matou fakalotomālohiʼi te ʼu tehina fuli ke natou vakavakaʼi fakalelei tonatou maʼuli pea mo fai te ʼu fehuʼi ʼaenī kiā nātou totonu: ‘Kapau ʼe mole au tagata faifekau fakaminisitelio peʼe tagata ʼāfea, ʼe tonu koa ke au vakavakaʼi te ʼu tupuʼaga ʼaē ʼe mole heʼeki au fakahoko ai te faʼahi ʼaia?’ Kotou tuku te laumālie ʼo te ʼAtua ke tokoni atu ke kotou maʼu he manatu ʼe lelei ʼo ʼuhiga mo te faʼahi maʼuhiga ʼaia.
20 ʼE maʼu anai e te kōkelekāsio kātoa ia te ʼu fua lelei ʼo te ʼu gāue fakasākilifisio ʼo tonatou ʼu tehina ʼaia. Kā tou fai he ʼu gāue ʼe lelei, pea ʼe tou utu ai te fiafia ʼaē ʼe maʼu mai te gāue maʼa ʼihi pea mo te tō ʼaē maʼa te laumālie. Kae ʼi te ʼalatike kā hoa mai, ʼe tou vakaʼi ai anai ʼe mole tonu ke tou fakamamahiʼi te laumālie māʼoniʼoni ʼo te ʼAtua. ʼE feafeaʼi hatatou tekeʼi te faʼahi ʼaia?
[Nota]
ʼE Kotou Tali Feafeaʼi Anai?
• Koteā te fakapapau ʼe tou maʼu ʼi te lea fakapolofetā ʼaē iā Mikea 5:5?
• Kotou fakamahino peʼe koteā te fakaʼuhiga ʼo te maʼuli fakasākilifisio.
• ‘E feafeaʼi ki he tahi hana fakatuputupu ʼi tona loto ia te fia gāue maʼa ʼihi?
• ‘E maʼuhiga feafeaʼi te lagolago ʼa he fāmili mokā ʼe faiga he tehina ke fakanofo ko he faifekau fakaminisitelio peʼe ko he tagata ʼāfea?
[Paki ʼo te pasina 25]
Koteā ʼaē ʼe feala ke kotou fai moʼo faiga ki he gāue?