ʼE Feala Koa Ke Kotou ʼIloʼi Lelei Te ʼAtua?

ʼE ko he pilivilēsio kiā tātou mokā fakafealagia mai ke tou ʼalofa ki he tahi ʼe maʼu tuʼulaga pea mo fai palalau mo ia, ʼo tou fakaʼaogaʼi ia tona huafa. ʼI te agamāhani, ʼe pāuiʼi te hahaʼi maʼu tuʼulaga ʼaki he ʼu higoa fakatuʼulaga ohagē ko “Pelesitā,” “Lavelua,” peʼe “ ʼAliki.” Koia kapau ko he tahi ʼe maʼu tuʼulaga ʼe ina ʼui atu fēnei: “Fakalelei siʼi ʼou loto, kae ke toʼo mai toku higoa,” ʼe mole ko he pilivilēsio koa ʼaia?

KO TE ʼAtua moʼoni ʼe ina ʼui fēnei mai ʼi tana Folafola, te Tohi-Tapu: “Ko au ia Sehova. Ko toku huafa ʼaia.” (Isaia 42:8) Logolā tana maʼu ia he ʼu tuʼuga higoa fakatuʼulaga, ohagē lā ko “Tupuʼaga,” mo “Māfimāfi,” pea mo “Tuʼi ʼAliki,” kae neʼe ina fakamaʼuhigaʼi tuʼumaʼu tana ʼu kaugana agatonu ʼaki tana fakafealagia age kiā nātou ke natou toʼo age tona huafa mokā natou felōgoi mo ia.

Ohagē lā, ʼi te tahi lakaga, ko te polofetā ko Moisese neʼe ina kamata kole mamahi fēnei ki te ʼAtua: “Fakalelei mai Sehova.” (Ekesote 4:10) ʼI te fakatapu ʼo te fale lotu ʼi Selusalemi, neʼe kamata e te Hau ko Salomone ia tana faikole, ʼo ina ʼui fēnei: “Ê Sehova.” (1 Hau 8:22, 23) Pea ʼi te palalau ʼa te polofetā ko Isaia ki te ʼAtua ʼo ʼuhiga mo te hahaʼi ʼo Iselaele, neʼe ina ʼui fēnei: “Ko koe, Ê Sehova, ko tamatou Tamai.” (Isaia 63:16) ʼE hā lelei mai, ko tatatou Tamai ʼe ʼi selō ʼe ina fakafealagia mai ke tou palalau age kiā te ia, ʼo tou fakaʼaogaʼi ia tona huafa.

Logolā ko te palalau kiā Sehova ʼo fakaʼaogaʼi tona huafa ʼe maʼuhiga, kae ʼe toe maʼuhiga age ia te ʼiloʼi moʼoni ʼo ia ʼaki tona huafa. ʼO ʼuhiga mo he tahi ʼe ʼofa kiā te ia pea mo falala kiā te ia, ʼe fakapapauʼi fēnei mai e Sehova: “ ʼE au puipui anai ia ia, koteʼuhi kua ina ako te ʼiloʼi ʼo toku huafa.” (Pesalemo 91:14) ʼE hā lelei mai, ko te ʼiloʼi ʼo te huafa ʼo te ʼAtua ʼe lahi tona ʼu fakaʼuhiga kiā tātou, mai tona ʼaluʼaga ʼaē ʼe ko te faʼahi maʼuhiga ʼaia moʼo maʼu ia te puipui ʼa te ʼAtua. Koteā ʼaē ʼe tonu ke kotou fai ke kotou ʼiloʼi lelei ai ia Sehova?