Te Maʼuli Fiafia ʼi He Loto Fale ʼe Mole Lotu Tahi

“E ke iloi feafeai, . . . pe e ke haofaki anai tou ohoana?”—1 KO. 7:16.

ʼE KOTOU LAVA MAʼU KOA TE ʼU TALI?

․․․․․

Koteā ʼaē ʼe lava fai e nātou ʼaē kua tui ke natou maʼuliʼi te tokalelei ʼi he loto fale ʼe mole lotu tahi?

․․․․․

Koteā ʼaē ʼe lava fai e he Kilisitiano moʼo tokoni kiā nātou ʼo tona fāmili ʼe mole heʼeki tui ke natou tafoki ki te tauhi moʼoni?

․․․․․

Koteā ʼaē ʼe lava fai e ʼihi moʼo tokoni ki ʼonatou tehina mo tuagaʼane ʼaē ʼe māʼuʼuli ʼi he loto fale ʼe mole lotu tahi?

1. ʼE feala ke malave feafeaʼi ki he fāmili ia te tali ʼo te logo ʼo te Puleʼaga?

ʼI TE tahi lakaga ʼi te fekauʼi ʼaē e Sesu tana kau ʼapositolo ke natou ʼolo ʼo fakahoko te gāue, neʼe ina ʼui fēnei age: “Kotou olo, koutou fakaha, o kotou ui: Kua fakaovi mai te puleaga o te atu lagi.” (Mat. 10:1, 7) ʼE maʼu anai te tokalelei mo te fiafia e nātou ʼaē kā natou tali anai mo he loto fakafetaʼi moʼoni te logo lelei ʼaia. Kae neʼe fakatokaga e Sesu ki tana kau ʼapositolo, tokolahi ʼe natou fakafehagai anai ki tanatou fakamafola ia te Puleʼaga. (Mat. 10:16-23) ʼE ʼi ai te faʼahiga fakafehagai ʼe fakatupu lotomamahi tāfito lā mokā ʼe fakafisi te fāmili ki te logo ʼo te Puleʼaga.—Lau ia Mateo 10:34-36.

2. He koʼē ko te maʼuli fiafia ʼe feala pē tona maʼu e te kau Kilisitiano ʼaē ʼe māʼuʼuli ʼi he ʼu loto fale ʼe mole lotu tahi?

² Ko tona fakaʼuhiga koa ʼe mole feala anai ke maʼu te maʼuli fiafia e te ʼu tisipulo ʼa Kilisito ʼaē ʼe māʼuʼuli ʼi he ʼu loto fale ʼe mole lotu tahi? Kailoa ia! Logolā te fakafehagai ʼo te fāmili ʼe feala ke kovi, kae ʼe mole hoko tuʼumaʼu te faʼahi ʼaia. Pea ʼe feala pē ke gata te fakafehagai ʼo te fāmili. ʼE fakalogo kiā nātou ʼaē kua tui peʼe feafeaʼi tanatou tali ki te fakafehagai, peʼe ko te mole fia logo ʼo te fāmili. Pea tahi ʼaē faʼahi, ʼe tapuakina e Sehova ia nātou ʼaē ʼe natou nofo agatonu kiā te ia, ʼo ina fakafiafiaʼi ia nātou ʼaia logolā te ʼu ʼaluʼaga faigataʼa. Ko te hahaʼi tui ʼe feala ke natou fakalahi age tonatou fiafia (1) ʼaki tanatou faigaʼi ʼaē ke natou maʼuliʼi te tokalelei ʼi tonatou loto fale pea (2) ke natou faigaʼi fakamālotoloto ke natou tokoni kiā nātou ʼo te fāmili ʼaē ʼe mole heʼeki tui ke natou tali te tauhi moʼoni.

TOU MAʼULIʼI TE TOKALELEI ʼI TE LOTO FALE

3. He koʼē ʼe tonu ke maʼuliʼi e he Kilisitiano ia te tokalelei ʼi he loto fale ʼe mole lotu tahi?

³ Ke fua te pulapula ʼo te faitotonu ʼi he maʼuli fakafāmili, ʼe ʼaoga ke maʼu he ʼu ʼaluʼaga tokalelei ʼi te loto fale. (Lau ia Sakopo 3:18.) Tatau aipē pe mole heʼeki fakatahi te fāmili ʼo he Kilisitiano ʼi te tauhi maʼa, kae ʼe tonu ke faiga mālohi ke ina maʼuliʼi te tokalelei ʼi tona loto fale. ʼE feafeaʼi hana lava fakahoko ia te faʼahi ʼaia?

4. ʼE lava taupau feafeaʼi e te kau Kilisitiano ia te tokalelei ʼi tonatou loto?

⁴ ʼE tonu ke taupau maʼu e te kau Kilisitiano ia te tokalelei ʼi tonatou loto. ʼE fakamaʼua kiai ia te faikole fakamālotoloto, ʼaē ʼe feala ke tou maʼu ʼaki ai ia te “tokalelei o te Atua” ʼaē ʼe mole ʼi ai hona fakatatau. (Filp. 4:6, 7) Ko te fiafia pea mo te tokalelei ʼe maʼu mai te ʼiloʼi ʼaē ʼo Sehova, pea mo te maʼuliʼi ʼo te ʼu pelesepeto Fakatohi-tapu. (Esa. 54:13) Kapau ʼe tou fia maʼu ia te tokalelei mo te fiafia pea ʼe maʼuhiga ke tou lagolago ki te ʼu fono ʼo te kōkelekāsio pea mo tou faʼafai ʼi te gāue fai fakamafola. ʼI te agamāhani, ʼe feala pē ke kau ia te hahaʼi tui ʼaē ʼe nonofo ʼi te ʼu loto fale ʼaē ʼe mole lotu tahi ki te ʼu gāue Fakakilisitiano. Ohagē lā ko Enza,a ko tona ʼohoana ʼe fakafeagai ʼaupitō ia. ʼE hoki kau pē Enza ʼi te gāue fai fakamafola mokā kua ina ʼosi fakahoko tona ʼu maʼua ʼi te loto fale. ʼE ʼui fēnei e Enza: “ ʼE tapuakina lahi au e Sehova ʼi te temi fuli pē ʼaē ʼe au faiga ai ke au fakamafola te logo lelei ki te hahaʼi.” Ko te ʼu tapuakina ʼaia ʼe iku moʼoni ia ki te tokalelei, mo te fīmālie pea mo te fiafia.

5. Ko te faigataʼaʼia fea ʼaē ʼe tautau felāveʼi mo te kau Kilisitiano ʼaē ʼe māʼuʼuli ʼi he loto fale ʼe mole lotu tahi, pea koteā te tokoni ʼe natou maʼu?

⁵ ʼE tonu ke tou faiga mālohi ke tou maʼuliʼi he ʼu felōgoi tokalelei mo nātou ʼaē ʼe mole ko ni hahaʼi tui ʼi te fāmili. ʼE feala ke faigataʼa heʼe ko te ʼu faʼahi ʼaē ʼe natou loto ke tou fai ʼi ʼihi temi, ʼe lagi fakafeagai ki te ʼu pelesepeto Fakatohi-tapu. Ko tatatou pipiki maʼu ki te ʼu pelesepeto ʼe lagi fakatupu ʼita ki ʼihi ʼo totatou fāmili ʼaē ʼe mole tui, kae ko tatatou aga ʼaia ʼe lagolago ki te tokalelei ʼaki te temi. ʼE moʼoni, ko te mole fia fakahoko ʼo he meʼa kae mole fakafeagai ki te ʼu pelesepeto Fakatohi-tapu, ʼe feala pē ke fakatupu ai he ʼu tokakovi ʼe mole ʼi ai hona ʼuhiga. (Lau ia Taaga Lea 16:7.) Kā hoko he fihifihia, ʼe maʼuhiga ke kumi te tokoni Fakatohi-tapu mai te ʼu tohi ʼo te kalasi ʼa te tagata kaugana agatonu mo poto pea mo te kau tagata ʼāfea.—Taag. 11:14.

6, 7. (a) He koʼē ʼe fakafeagai ʼihi kiā nātou ʼo te fāmili ʼaē ʼe kamata ako mo te kau Fakamoʼoni ʼa Sehova? (b) ʼE tonu ke tali feafeaʼi e he tahi ʼe ina ako te Tohi-Tapu peʼe ko he fakamoʼoni ki te fakafeagai ʼa te fāmili?

⁶ Ko te maʼuliʼi ʼo te tokalelei ʼi te loto fale ʼe fakamaʼua kiai ia te falala ʼaē kiā Sehova, pea mo te mahino ki te ʼu meʼa ʼaē ʼi te loto ʼo nātou ʼe mole tui ʼi te fāmili. (Taag. 3:13; 16:20) Māʼia mo te kau ako foʼou ʼo te Tohi-Tapu ʼe natou lava fakahā te fakasiosio tonu ʼo ʼuhiga mo te faʼahi ʼaia. Lagi ko ʼihi tagata ʼohoana peʼe ko ʼihi fafine ʼohoana ʼaē ʼe mole ko ni hahaʼi tui, ʼe mole natou koviʼia te ako Tohi-Tapu ʼo tonatou hoa. ʼE feala ke natou toe fakamoʼoni kiai ʼo lagi natou ʼui ʼe lelei ki te fāmili. Kae ʼe lagi ʼi ai leva te tahi faʼahiga ʼe natou fehiʼa ki te faʼahi ʼaia. Ko Esitele, ʼaē kua liliu ʼi te temi nei ko te Fakamoʼoni, ʼe ina fakahā ko ia neʼe “ ʼita kovi” ʼi te kamata ako ʼaē ʼo tona ʼohoana ia te Tohi-Tapu mo te kau Fakamoʼoni ʼa Sehova. ʼE ina ʼui fēnei: “Neʼe au laku tana ʼu tohi pe neʼe au tutu.” Ko Howard, ʼaē ʼi te kamata neʼe fakafeagai ki te ako ʼo tona ʼohoana, ʼe ina fakamatala fēnei: “ ʼE tokolahi te ʼu tagata ʼohoana ʼe natou tuʼania naʼa kau ʼonatou ʼohoana ʼi he magaʼi lotu. ʼE lagi mole ʼiloʼi e te tagata ʼohoana peʼe feafeaʼi hana tali ki te faʼahiga tuʼania ʼaia pea liliu ai ʼo fakafeagai.”

⁷ ʼE tonu ke tou tokoni kiā ia ʼaē ʼe ako ʼaē ʼe fakafeagai kiai tona ʼohoana, ke mahino ʼe mole tonu ke ina fakagata tana ako ia te Tohi-Tapu. ʼI te agamāhani ʼe feala pē anai ke ina fakatokatoka te ʼu ʼaluʼaga faigataʼa, ʼo agamalū pea mo fakaʼapaʼapa ki tona hoa ʼaē ʼe mole heʼeki tui. (1 Pet. 3:15) ʼE ʼui fēnei e Howard: “ ʼE au fakafetaʼi ʼaupitō ki toku ʼohoana ʼi tana agamalū aipē pea mo tana mole ina liufaki ʼaki te kovi!” ʼE fakamahino fēnei e tona ʼohoana: “Neʼe kole mai e Howard ke au liʼaki taku ako ia te Tohi-Tapu. Neʼe ina ʼui mai neʼe fakahēʼi toku ʼatamai. Kae neʼe mole au fakafihiʼi, pea neʼe au ʼui age ʼe lagi tonu pē ia, kae neʼe au toe ʼui age ʼe mole au ʼiloʼi pe neʼe feafeaʼi tona fakahoko. Pea neʼe au kole age leva ke ina lau te tohi ʼaē neʼe au lolotoga ako. Neʼe ina lau pea neʼe mole feala hana fakafihiʼi te meʼa ʼaē neʼe ina lau. Neʼe malave ʼaupitō kiā ia te faʼahi ʼaia.” ʼE lelei ke tou manatuʼi ʼe lagi hagē ki te ʼu ʼohoana ʼaē ʼe mole heʼeki tui kua liʼakina ia nātou peʼe natou tuʼania mokā kau tonatou hoa ki he ʼu gāue Fakakilisitiano, kae ʼe feala pē ke puli ia te ʼu faʼahiga manatu ʼaia mokā ʼe fai age e tonatou hoa, he ʼu palalau fakalotofīmālie ʼaki te ʼofa.

TOU TOKONI KIĀ NĀTOU KE NATOU TALI TE TAUHI MOʼONI

8. Koteā te tokoni neʼe fai e te ʼapositolo ko Paulo ki te kau Kilisitiano ʼaē ʼe mole heʼeki tui ʼonatou hoa?

⁸ Neʼe tokoniʼi e te ʼapositolo ko Paulo ia te kau Kilisitiano ke ʼaua naʼa natou liʼaki tonatou ʼohoana ʼuhi pē ʼe mole ko he fakamoʼoni.b (Lau ia 1 Kolonito 7:12-16.) Ko te manatu tuʼumaʼu ʼaē ʼe feala pē anai ʼi he temi ki te hoa ʼaē ʼe mole heʼeki tui ke liliu ko he Kilisitiano, ʼe feala ke tokoni ki ʼaē kua tui ke ina taupau maʼu tana fiafia, logolā ʼe maʼuli ʼi he loto fale ʼe mole lotu tahi. Kae ʼe tonu aipē ke tokaga mokā faiga ke palalau ʼo ʼuhiga mo te moʼoni ki tona hoa ʼaē ʼe mole heʼeki tui, ohagē ko tona hā ʼi te ʼu faʼifaʼitaki ʼaenī.

9. Kā fakahā te moʼoni Fakatohi-tapu kiā nātou ʼo te fāmili ʼe mole tui, koteā ʼaē ʼe mole tonu ke fai e he Kilisitiano?

⁹ ʼI te fakakaukau ʼaē ʼa Jason ki tana fiafia ʼaupitō ʼi tana ako te moʼoni ʼo te Tohi-Tapu, ʼe ina ʼui fēnei: “Neʼe au fia tala ki te hahaʼi fuli!” Kā mahino he tahi ʼe ina ako te Tohi-Tapu ki te ʼu moʼoni ʼaē ʼe ina ako, pea ʼe feala ke lahi ʼaupitō tona fiafia ʼo tupu ʼaki ai tana palalau tuʼumaʼu ki te moʼoni. ʼE lagi ina ʼamanaki kiā nātou ʼaē ʼe mole tui ʼi tona fāmili ke natou foimo tali atu aipē te logo ʼo te Puleʼaga, kae ʼe lagi mole natou tali anai. Neʼe lave feafeaʼi te fiafia ʼo Jason ki tona ʼohoana ʼi te kamata? ʼE manatuʼi fēnei e te ʼohoana ʼo Jason: “Neʼe au lotomamahi ai.” ʼE ʼui fēnei e te fafine neʼe ina tali te moʼoni hili taʼu e 18 ʼi te kua ʼosi maʼu ʼaē ʼo te moʼoni e tona ʼohoana: “Ki toku faʼahi, neʼe tonu ia ke au akoako māmālie te moʼoni.” Kapau ʼe kotou fai he ako ʼa he tahi kae ko tona ʼohoana ʼe mole fia kau ki te tauhi moʼoni, he koʼē koa ʼe mole kotou akoʼi age he ʼu faʼahiga tokoni ʼaoga ʼo ʼuhiga mo te ʼaveʼave māmālie ʼo te ʼu palalau ʼo ʼuhiga mo te moʼoni? Neʼe ʼui fēnei e Moisese: “Ke hifo taku akonaki o hage ko he ua, ke hifo taku palalau o hage ko he hahau, o hage ko he vao fuluihega.” (Tet. 32:2) ʼE malave age ia he ʼu palalau fakalaumālie ʼe ʼaveʼave māmālie ʼi he ʼu tuʼuga palalau ʼo ʼuhiga te moʼoni.

10-12. (a) Koteā te tokoni neʼe fai e te ʼapositolo ko Petelo ki te kau Kilisitiano ʼaē ko tonatou hoa ʼe mole heʼeki tui? (b) Neʼe maʼuliʼi feafeaʼi te tokoni iā 1 Petelo 3:1, 2 e te fafine neʼe ina ako te Tohi-Tapu?

¹⁰ ʼAki te takitaki ʼa te ʼAtua neʼe fai e te ʼapositolo ko Petelo te tokoni ki te ʼu fafine Kilisitiano ʼaē ʼe māʼuʼuli ʼi te ʼu loto fale ʼe mole lotu tahi. Neʼe ina tohi fēnei: “Kotou fakamalalo i te u mea fuli ki okotou ohoana, koteuhi, kapau e mole fakalogo ni ihi ki te folafola, ke aumai natou ki te tui e te aga a te fafine, hala folafola, i tanatou sisio ki tokotou mauli maa mo fakaapaapa.” (1 Pet. 3:1, 2) ʼE lagi feala pē ki he fafine ke ina ʼaumai tona ʼohoana ki te tauhi moʼoni ʼaki tana fakalogo pea mo tana fakaʼapaʼapa lahi ki ai, tatau aipē peʼe aga fefeka tona ʼohoana kiā ia. ʼO fēia pē mo he tagata ʼohoana, ʼe tonu ke hā ʼi tana aga tona maʼuli fakalotu, pea mo fakahoko tona maʼua pule fāmili ʼo te loto fale ʼaki te ʼofa, logolā te fakafehagai ʼe lagi tau mo ia mai tona hoa ʼaē ʼe mole heʼeki tui.—1 Pet. 3:7-9.

¹¹ ʼE lahi te ʼu faʼifaʼitaki ʼi te temi nei ʼe natou fakamoʼoni ki te maʼuhiga ʼo te maʼuliʼi ʼo te tokoni ʼa Petelo. Tou vakaʼi age muʼa te faʼifaʼitaki ʼo Selma. ʼI te temi ʼaē neʼe ina kamata ako ai te Tohi-Tapu mo te kau Fakamoʼoni ʼa Sehova, neʼe mole leleiʼia e tona ʼohoana, ia Steve. Neʼe ina ʼui fēnei: “Neʼe au ʼita, mo maheka, mo au loto pē ke nofo toku ʼohoana mo au, pea mo hagē ia kiā au kua au lotolotolua.” Neʼe ʼui fēnei e Selma: “ ʼI muʼa ʼo taku ʼiloʼi te moʼoni, neʼe au maʼuli fakaʼeteʼete mo Steve. Neʼe aga ʼitaʼia. ʼI te temi ʼaē neʼe au kamata ako ai te Tohi-Tapu, neʼe lēsili age tana aga ʼitaʼia.” Koteā ʼaē neʼe tokoni ki te ʼaluʼaga ʼaia?

¹² ʼE manatuʼi e Selma te ako neʼe ina tāʼofi mai te Fakamoʼoni ʼaē neʼe ina fai tana ako. Neʼe ʼui fēnei e Selma: “ ʼI te tahi ʼaho, neʼe mole au loto ke fai taku ako. ʼI te pō ʼi muʼa atu, neʼe au kē mo Steve pea neʼe ina tā au, neʼe au lotomamahi ʼaupitō ai ki te meʼa ʼaē neʼe hoko pea kiā au totonu pē. ʼI taku ʼosi fakamatala ki te tehina te meʼa ʼaē neʼe hoko pea mo te meʼa ʼaē neʼe au logoʼi, neʼe ina kole mai ke au lau ia 1 Kolonito 13:4-7. ʼI taku lau te vaega ʼaia, neʼe au kamata fakakaukau ai, ‘Neʼe mole heʼeki fai mai e Steve kiā au he aga ʼofa fēia ʼi he temi.’ Kae neʼe tokoni mai te tehina ke kehe age taku fakakaukau, ʼo ina fehuʼi mai kiā au, ‘Koteā lā he ʼu aga ʼofa ʼi te ʼu aga ʼaenī kua ke fakahā ki tou ʼohoana?’ Neʼe au tali age, ‘ ʼE mole ʼi ai he aga ʼofa kua au fakahā age ki ai, koteʼuhi ʼe faigataʼa tona fakahoko mo ia.’ Neʼe ʼui mai e te tehina mo he agamalū, ‘Selma, ko ai ʼi te loto fale nei ʼe faiga ke liliu ko he Kilisitiano? Ko koe peʼe ko Steve?’ ʼI taku mahino leva ʼaē neʼe tonu ke fetogi taku faʼahiga manatu, neʼe au faikole ai kiā Sehova ke tokoni mai ke lahi age taku aga ʼofa ʼaē kiā Steve. Neʼe fetogi māmālie ai te ʼu ʼaluʼaga.” Hili taʼu e 17, pea neʼe tali e Steve te moʼoni.

TE TOKONI ʼE LAVA FOAKI E ʼIHI

13, 14. Koteā ʼaē ʼe lava fai e ʼihi ʼi te kōkelekāsio moʼo tokoni kiā nātou ʼe māʼuʼuli ʼi he loto fale ʼe mole lotu tahi?

¹³ Ohagē pē ko he mosimosi ʼe ina palapalaʼi te kele mo tokoni ki te maʼuli ʼa te ʼulu ʼakau, ʼe feala kiā kita takitokotahi ʼi te kōkelekāsio ke tou tokoni ki te kau Kilisitiano ʼaē ʼe māʼuʼuli ʼi he loto fale ʼe moke lotu tahi ke natou maʼu te fiafia. ʼE ʼui fēnei e Elvina mai Pelesile: “Neʼe tokoni mai kiā au te ʼofa ʼo ʼoku tehina mo tuagaʼane ke au haga pipiki maʼu ki te moʼoni.”

¹⁴ ʼE feala ki te agalelei pea mo te loto tokaga ʼa te ʼu tehina mo tuagaʼane ke malave lahi ki te loto ʼo nātou ʼo te fāmili ʼaē ʼe mole heʼeki tui. ʼE ʼui fēnei e te tagata ʼohoana ʼi Niselia neʼe hoki ina tali te moʼoni hili taʼu e 13 ʼi tona kua ʼosi tali ʼaē e tona ʼohoana: “ ʼI taku tahi fagona ʼi te ala mo te Fakamoʼoni, neʼe mate leva tana motokā. Neʼe ina kumi te kau Fakamoʼoni ʼi te kolo neʼe tuʼu ovi mai, pea neʼe natou fakaʼapi māua ʼi te pō ʼaia. Neʼe hagē pē tanatou tōkakaga mai ʼaē kiā māua neʼe kua matou feʼiloʼiʼaki talu mai tamatou kei liliki. Neʼe au logoʼi atu aipē te ʼofa Fakakilisitiano ʼaē neʼe palalau tuʼumaʼu mai kiai ia toku ʼohoana.” ʼI Pilitānia, ʼe manatuʼi e te fafine ʼohona neʼe hoki haʼu ki te moʼoni hili taʼu e 18 ʼi te kua ʼosi haʼu ʼaē ʼo tona ʼohoana ki te moʼoni, ʼo ina ʼui fēnei: “Neʼe fakaafe māua toko lua e te kau Fakamoʼoni ke matou kakai fakatahi. Tuʼumaʼu pē neʼe tali leleiʼi au.”c ʼI te fenua pē ʼaia, ʼe fakamatala fēnei e te tagata ʼohoana neʼe liliu ko he Fakamoʼoni: “Neʼe ʼaʼahi māua e te ʼu tehina mo tuagaʼane, pe neʼe fakaafe māua kiō nātou, pea neʼe au sio ai ki tanatou loto tokaga. Neʼe au tokagaʼi tāfito te faʼahi ʼaia ʼi taku takoto ʼi te lōpitali, neʼe kaugamālie ia nātou ʼaē neʼe ʼomai ʼo ʼaʼahi au.” ʼE kotou ʼiloʼi koa he ʼu faʼahiga puleʼaki ke kotou fakahā ai he loto tokaga fēia ki ʼihi ʼo he fāmili ʼe mole heʼeki tui?

15, 16. Koteā ʼaē ʼe lava tokoni ki ʼaē kua tui ke ina taupau ia tana fiafia mo kapau ʼe hoko atu pē te mole tui ʼa nātou ʼaē ʼo te fāmili?

¹⁵ ʼE moʼoni, ʼe mole ko te ʼu ʼohoana fuli peʼe ko te ʼu fānau fuli peʼe ko te ʼu kāiga fuli ʼaē kā natou tafoki anai ki te tauhi moʼoni, tatau aipē peʼe kua fualoa te nofo agatonu ʼo ia ʼaē ʼe tui pea mo palalau ʼaki he aga fakaʼeteʼete ʼo ʼuhiga mo te moʼoni. Ko ʼihi ʼe kei hoko atu pē tanatou mole fia logo peʼe natou liliu ko he kau fakafehagai mālohi. (Mat. 10:35-37) Kae mokā fakahā e te kau Kilisitiano te ʼu kalitātē fakaʼatua, ʼe feala ia ke ʼi ai hona fua lelei. ʼE ʼui fēnei e te tagata ʼohoana neʼe mole tui ʼi muʼa atu: “Kā kamata fakahā e te hoa ʼaē kua tui ia te ʼu kalitātē ʼofa, ʼe mole kotou ʼiloʼi peʼe feafeaʼi tona malave ki te loto pea mo te ʼatamai ʼo te hoa ʼaē ʼe mole heʼeki tui. Koia, ʼaua naʼa kotou tuku ʼi he temi takotou faiga ʼaē ki tokotou hoa ʼe mole heʼeki tui.”

¹⁶ Tatau aipē peʼe hoko atu te mole tui ʼo he tahi ʼo te fāmili, kae ʼe feala pē ke maʼu e ia ʼaē ʼe tui ia te fiafia. Logolā ko tona ʼohoana neʼe mole ina tali te logo ʼo ʼuhiga mo te Puleʼaga hili taʼu e 21 ki te faiga ʼo te tuagaʼane, kae neʼe ina ʼui fēnei: “ ʼE au lava taupau maʼu taku fiafia ʼaki taku faigaʼi ʼaē ke au fakafiafia ia Sehova, ʼaki taku nofo agatonu kiā te ia, pea mo faiga ke au fakamālohi toku maʼuli fakalaumālie. ʼI taku faiga mālohi ʼi te ʼu gāue fakalaumālie, ʼaki te ako takitokotahi, mo te kau ki te ʼu fono, mo te gāue fai fakamafola, pea mo te tokoni ki ʼihi ʼi te kōkelekāsio, neʼe lahi age ai taku fakaovi kiā Sehova pea mo puipui ai toku loto.”—Taag. 4:23.

ʼAUA NAʼA KOTOU LOTOVAIVAI!

17, 18. ʼE feafeaʼi he lava nofo ʼamanaki ʼa he Kilisitiano tatau aipē peʼe maʼuli ʼi he loto fale ʼe mole lotu tahi?

¹⁷ Kapau ko koutou ko he Kilisitiano agatonu ʼe maʼuli ʼi he loto fale ʼe mole lotu tahi, ʼaua naʼa kotou lotovaivai. Kotou manatuʼi, “e mole siaki anai e te Eteleno tana hahai, o tupu ko tona huafa lahi.” (1 Sam. 12:22) ʼE nofo tuʼumaʼu anai ia mo koutou mo kapau ʼe kotou haga pipiki maʼu kiā te ia. (Lau ia 2 Koloniko 15:2.) Koia “ke ke fai ki te Eteleno tou fiafiaaga lahi.” ʼIo, “tuku tou mauli ki te Eteleno, tuku tau falala kia ia.” (Pes. 37:4, 5) “Ke kotou agatonu i te faikole,” pea mo kotou tui ko takotou Tamai ʼofa ʼe ʼi selō ʼe lava tokoni atu ke kotou kātakiʼi te ʼu faʼahiga faigataʼaʼia kehekehe.—Loma 12:12.

¹⁸ Kotou faikole kiā Sehova ke ina foaki atu tona laumālie māʼoniʼoni moʼo tokoni atu ke kotou fakatuputupu te tokalelei ʼi tokotou loto fale. (Hep. 12:14) ʼIo, ʼe feala pē hakita fakatuputupu he ʼu ʼaluʼaga tokalelei ʼe feala anai ke malave ki te loto ʼo nātou ʼo te fāmili ʼaē ʼe mole heʼeki tui. ʼE kotou maʼu anai te fiafia mo he loto pea mo he ʼatamai tokalelei ʼaki takotou “fai te mea fuli ki te kololia o te Atua.” (1 Ko. 10:31) ʼI takotou ʼu faiga ʼaia, ʼe ko he meʼa fakalotofīmālie te ʼiloʼi ʼaē ʼe lagolago atu tokotou ʼu tehina mo tuagaʼane ʼi te kōkelekāsio Fakakilisitiano!

[ʼU nota]

[Paki ʼo te pāsina 30]

Kotou filifili te temi totonu ʼaē ke kotou fakamahino ai te ʼu akonaki ʼaē kua kotou tui kiai

[Paki ʼo te pāsina 31]

Kotou fakahā takotou loto tokaga ki te hahaʼi ʼohoana ʼaē ʼe mole heʼeki tui