Te ’u Fehu’i ’a Te Kau Lautohi
Kotea ʼae neʼe fia ui e Sesu ʼi tana fai te ʼu palalau ʼaeni: “ ʼAua naʼa kotou manatu neʼe au haʼu ʼo ʼaumai te tokalelei”?
Neʼe tala e Sesu he logo ʼo te tokalelei. Kae neʼe ina ui fenei ki ʼana apositolo: “ ʼAua naʼa kotou manatu neʼe au haʼu ʼo ʼaumai te tokalelei ki te kele, neʼe mole au haʼu ʼo ʼaumai te tokalelei kaʼe ko te heleta. Koteʼuhi neʼe au haʼu ʼo fakamavetevete te ʼu loto fale: ʼE fakafeagai anai te foha ki tana tamai, mo te taʼahine ki tana faʼe pea mo te fafine ʼohoana ki te faʼe ʼo tona ʼohoana.” (Mat. 10:34, 35) Kotea ʼae neʼe fia ui e Sesu?
Neʼe mole loto e Sesu ke mavetevete he famili kae neʼe ina iloʼi e fakatupu ai anai he mavetevete ʼi ʼihi famili ʼuhi ko ʼana akonaki. ʼE tonu ke mahino ia natou ʼae ʼe fia liliu ko he ʼu tisipulo pea mo papitema, ʼi ʼihi temi ʼe mole fiafia anai tonatou famili ʼi te tonu ʼae ʼe natou fai. ʼI ʼihi temi, ʼe fakafeagai anai ʼonatou hoa peʼe ko ʼihi ʼo ʼonatou famili kia natou ʼo faigataʼa ai tanatou fakalogo ki te ʼu akonaki ʼa Kilisito.
ʼE fakalotomalohiʼi ʼi te Tohi-Tapu ia te kau Kilisitiano ke natou “maʼuʼuli ʼi te tokalelei mo te hahaʼi fuli pe.” (Loma 12:18) Kae ʼe feala ke liliu te ʼu akonaki ʼa Sesu ko he “heleta” ʼi ʼihi famili. ʼE hoko te faʼahi ʼaia moka tali e he tahi ʼo te famili ia te ʼu akonaki ʼa Sesu kae ʼe liʼaki peʼe fakafeagai ki ai ʼihi ʼo natou. Kapau ʼe hoko te aluʼaga ʼaia, pea ʼe liliu ia natou ʼaia ʼo te famili ko he ʼu “fili” ʼo ia ʼae ʼe ina ako te moʼoni.—Mat. 10:36.
ʼE ʼi ai te ʼu tisipulo ʼa Kilisito ʼe maʼuʼuli fakatahi mo honatou ʼu famili ʼe kau ʼi he tahi age lotu. Pea ʼi ʼihi temi, ʼe tonu ke natou filifili pe ʼe natou fakafiafiaʼi ia Sehova mo Sesu peʼe ko ʼonatou famili. Ohage la, ʼe feala ke uga natou e ʼonatou famili ʼae ʼe mole tauhi kia Sehova ke natou fai he fakafiafia fakalotu. Ka ʼahiʼahiʼi natou, ko ai ʼae ka natou fakafiafiaʼi? Neʼe ui fenei e Sesu: “Ko ʼae ʼe lahi age tona ʼofa ki tana tamai peʼe ko tana faʼe ia te au, ʼe mole tuha ia mo au.” (Mat. 10:37) ʼE mahino ia, neʼe mole fia ui e Sesu kapau ʼe tou fia liliu ko hana ʼu tisipulo pea ʼe tonu ke mole tou toe ʼoʼofa ki ʼatatou matuʼā. Kae neʼe ina akoʼi age kia natou ke natou vakavakaʼi pe kotea te ʼu aluʼaga ʼae ʼe maʼuhiga age ʼi tonatou maʼuli. Kapau ʼe fakafeagai ia natou ʼo totatou famili ʼae ʼe mole tauhi kia Sehova ki ʼatatou faiga ʼae ke tou tauhi kia Sehova, ʼe hoko atu pe anai tatatou ʼoʼofa ia natou. Kae ʼe tonu ke tou mahino ʼe maʼuhiga age totatou ʼofa ʼae ki te ʼAtua.
ʼE mahino ia, ʼe ko he aluʼaga fakalotomamahi moka fakafeagai mai totatou famili. Kae ʼe manatuʼi tuʼumaʼu pe e te ʼu tisipulo ʼa Sesu ia te ʼu palalau ʼaeni: “Ko ʼae ʼe mole ina tali tona pou fakamamahi pea mo mulimuli ia te au, ʼe mole tuha ia mo au.” (Mat. 10:38) ʼE natou fakaʼamu ʼe fetogi anai te manatu ʼo ʼonatou famili pea mo natou fia ako anai te Tohi-Tapu ʼuhi he ʼe natou tuku he faʼifaʼitaki lelei.—1 Pet. 3:1, 2.