Te Fakaʼosi ʼo Te Malamanei—ʼE Fakamataku, Mo Fakatupu Fia ʼIloʼilo Pea Mo Fakatupu Fiu

Kotea takotou manatu ʼo ʼuhiga mo te ʼaho 21 ʼo Tesepeli 2012, ʼae ʼe tuʼu ʼi te kaletalio ʼo te kau Maya, ʼae ʼe lahi ai te ui ka hoko anai he ʼu fetogi ʼi te malamanei? ʼO mulimuli ki te faʼahi ʼae neʼe kotou tui kiai, ʼe lagi kotou fiafia, pe ko he faʼahi kua kotou fiu ai, pe kua kotou meʼa noaʼi. ʼE ko he tahi fakakikite pe koa ʼaia ʼo te fakaʼosi ʼo te malamanei ka mole hoko anai?

ʼE feafeaʼi ʼo ʼuhiga mo “te fakaosi o te malamanei” ʼae ʼe talanoa kiai te Tohi-Tapu? (Mateo 24:3) ʼE matataku ʼihi naʼa vela anai te kele. Ko ʼihi kua fakaʼamu natou ke natou sisio pe kotea ʼape ka hoko ʼi te fakaʼosi ʼo te malamanei. Pea ko te tokolahi kua natou fiu ʼi te logo talu mai fualoa kua ovi mai te fakaʼosi. Kaʼe ʼi ai koa he tupuʼaga moʼoni ʼo te feia ʼa te hahaʼi peʼe kailoa?

ʼE lagi kotou punamaʼuli anai moka kotou iloʼi pe kotea ʼae ʼe ui moʼoni ʼi te Tohi-Tapu ʼo ʼuhiga mo te fakaʼosi ʼo te malamanei. ʼE tuku mai ʼi te Tohi-Tapu he ʼu tupuʼaga ke tou fakaʼamu ai ke hoko mai te fakaʼosi pea ina toe fakamoʼoni mai ʼe fiu anai ʼihi ʼi te atalitali kiai. ʼE matou fakaafe atu koutou ke kotou vakaʼi te ʼu fehuʼi ʼe tau fai e ʼihi ʼo ʼuhiga mo te fakaʼosi ʼo te malamanei pea mo ʼona tali ʼi te Tohi-Tapu.

ʼE vela anai koa te kele?

TONA TALI ʼI TE TOHI-TAPU: “[Ko te ʼAtua] nee ina fakatuu te kele i ona fakatafito, e mole gaugaue anai ia ia i he aho.”—PESALEMO 104:5.

ʼE mole maumauʼi anai te kele e he afi pe ko he tahi age meʼa. Kaʼe akoʼi mai ʼi te Tohi-Tapu ko te kele ʼaeni ʼe ko te nofoʼaga heʼe gata ʼo te tagata. ʼE ui fenei ia Pesalemo 37:29: “E mau anai e te kau agatonu te fenua [pe ko te kele], pea e natou nonofo anai i ai o heegata.”—Pesalemo 115:16; Esaia 45:18.

ʼI te ʼosi fakatupu e te ʼAtua ia te kele, neʼe ina ui “nee lelei tukupau” pea ʼe mole heʼeki fetogi tana manatu. (Senesi 1:31) ʼE mole fakatuʼutuʼu e te ʼAtua ke ina maumauʼi te kele, kaʼe ina fakapapau ʼe ina “maumaui . . . natou ae nee natou maumaui te kele,” pea ʼe mole ina tuku ke hoholo atu tona maumauʼi.—Apokalipisi 11:18.

Kaʼe lagi kotou fia mahino ki te vaega ʼo 2 Petelo 3:7, Tauhi Foou. Heʼe ui fenei ai: “[Ko] te lagi mo te kelekele o te temi-nei, . . . e taupau ki te afi.” ʼE mole fakaha ai koa la ʼe vela anai te kele? ʼI ʼihi temi, ʼe fakaʼaoga ʼi te Tohi-Tapu te ʼu kupu “lagi,” “kele,” pea mo “afi” ʼi hona aluʼaga fakata. Ohage la, ʼe ui fenei ia Senesi 11:1: “Nee palalau tahi te kele katoa, ki he lea e tahi” pea ko te kupu “kele” ʼe fakaʼuhiga ki te hahaʼi.

ʼI te ʼu vaega ki muʼa atu ʼo 2 Petelo 3:7, ʼe toe talanoa ai ki te lagi, mo te kele, pea mo te afi fakata. ʼI te vaega 5 mo te 6 ʼe talanoa ʼo ʼuhiga mo te Tulivio ʼi te temi ʼo Noe. ʼI te temi ʼaia, neʼe ko te malama ʼafeā ʼae neʼe fakaʼauha, ka neʼe tuʼu pe totatou kele. Koia, neʼe ko te hahaʼi agamalohi pe ko te “kelekele,” ʼae neʼe fakaʼauha. Neʼe toe fakaʼauha ai mo te “lagi,” ia te kau pule ʼo te hahaʼi ʼo te temi ʼaia. (Senesi 6:11) ʼO toe feia aipe, ʼe fakakikite ia 2 Petelo 3:7 te fakaʼauha ʼo talu ai ʼo te hahaʼi agakovi pea mo te kau takitaki aga kakā, ohage ʼi he afi.

Kotea ʼae ka hoko anai ʼi te fakaʼosi ʼo te malamanei?

TONA TALI ʼI TE TOHI-TAPU: “E puli te malamanei, mo ona holi foki; kae e nofo o heegata ae e ina fai te finegalo o te Atua.”—1 SOANE 2:17.

Ko “te malamanei” ʼae ka pulihi ʼe mole ko te kele, kaʼe ko te hahaʼi ʼae ʼe mole mulimuli tonatou maʼuli ki te finegalo ʼo te ʼAtua. Ohage pe ko he toketa fai tafa ʼe ina fia haofaki he tahi ʼe kōsea ʼe tonu anai ke ina toʼo te faʼahi ʼae kua kovi, ʼo toe feia pe ko te ʼAtua ʼe ina “molehi” anai te kau agakovi ke feala ke fiafia moʼoni te hahaʼi agalelei ʼi te kele. (Pesalemo 37:9, MN) Koia la ʼae ʼe ko he meʼa lelei moka hoko mai “te fakaosi o te malamanei.”

Ko te manatu fakafiafia ʼaia ʼo ʼuhiga mo “te fakaosi o te malamanei” ʼe tou toe maʼu ʼi ʼihi Tohi-Tapu, ʼae ʼe fakaliliu ai ko “te fakaʼosi ʼo te tuʼu ʼo te ʼu faʼahiga meʼa ʼaeni.” (Mateo 24:3, MN) Mai tona aluʼaga ʼae ʼi te fakaʼosi, ʼe hao anai te hahaʼi mo te kele, pea ʼe mahino ia ʼe hoa anai kiai he temi foʼou, pe ko he tuʼu foʼou. Koia ʼe talanoa ai te Tohi-Tapu ki “te malama kahau.”—Luka 18:30, Tauhi Foou.

Neʼe fakahigoa e Sesu te temi ʼaia ka haʼu ko “te fakafoou o te u mea fuli.” ʼI te temi ʼaia, ʼe ina toe fakatuʼu anai te ʼu aluʼaga ʼae neʼe loto kiai e te ʼAtua ʼi te kamataʼaga maʼa te malamanei. (Mateo 19:28) ʼE tou maʼu anai

Kapau ʼe tou “fai te finegalo o te Atua,” te ʼu meʼa ʼae ʼe ina kole mai ke tou fai, pea ʼe mole ʼaoga ke tou matataku ki te fakaʼosi ʼo te malamanei, kaʼe ke tou fakaʼamu kiai.

Kua ovi moʼoni mai koa te fakaʼosi ʼo te malamanei?

TONA TALI ʼI TE TOHI-TAPU: “Moka kotou sisio anai ki te u mea aena kua hoko mai, ke kotou iloi kua ovi mai te puleaga o te Atua.”—LUKA 21:31.

ʼI te tohi (The Last Days Are Here Again) ʼa te Polofesea ko Richard Kyle, ʼe ina ui “ ʼuhi ko te ʼu fetogi fakafokifa pea mo te ʼu maveuveu ʼae ʼe hoko, ʼe tupu ai te fai ʼo he ʼu fakamatala ʼo ʼuhiga mo te fakaʼosi ʼo te malamanei.” Pea ʼe hoko tafitō te faʼahi ʼaia moka faigataʼa te fakamahino ʼo te ʼu fetogi mo te ʼu maveuveu ʼaia.

Ka ʼi te Tohi-Tapu ko te kau polofeta ʼae neʼe palalau ki te fakaʼosi, neʼe mole faiga ke natou fakamahino ni aluʼaga kovi neʼe hoko ʼi tonatou temi. Neʼe takitaki natou e te ʼAtua ke natou fakakikite te ʼu aluʼaga ʼae ka ha ai ia te kua ovi mai ʼo te fakaʼosi ʼo te malamanei. Kotou vakaʼi ʼihi ʼi te ʼu fakakikite ʼaia mo kotou sisio pe lolotoga hoko nei te ʼu faʼahi ʼaia.

Ohage ko tona ui e Sesu, ʼi tatatou sio “ki te u mea fuli aia,” ʼe tou iloʼi ai kua ovi mai te fakaʼosi ʼo te malamanei. (Mateo 24:33) ʼE tui te kau Fakamoʼoni ʼa Sehova ʼe hoko moʼoni te ʼu aluʼaga ʼaia, pea ʼe natou fakaha ki te hahaʼi tanatou tui ʼi tanatou fai fakamafola ia fenua ʼe 236.

Ko he ʼu fakaatalitali neʼe to noa ʼe fakaʼuhiga koa ʼe mole hoko mai anai te fakaʼosi?

TONA TALI ʼI TE TOHI-TAPU: “I te temi ae e ui ai anai e te u tagata: Tokalelei mo fimalie! I te temi pe aia e fakamautoka anai natou e he tuutamaki fakapunamauli, o hage ko te u mamahi fanau ae e natou fakamautoka te fafine faitama; pea e mole feala anai hanatou hao i ai.”—1 TESALONIKA 5:3.

ʼI te Tohi-Tapu ʼe fakatatau te fakaʼauha ʼo te malamanei ki te mamahi ʼe tonu ke hoko ki he fafine faitama, ʼi hona aluʼaga fakafokifa. Ko te temi ʼae ka iku ki te fakaʼosi ʼe toe hage pe ko he fafine faitama, heʼe ina iloʼi te ʼu fakaʼiloga ʼae ʼe lesili malohi ka iku ki tana fanau. ʼE lagi feala ke iloʼi e te toketa te ʼaho ʼae ka fanau ai; tatau aipe pe tuai, kaʼe tui papau pe ia ʼe tupu anai tana tamasiʼi. ʼO toe feia pe, logope neʼe to noa he ʼu fakaatalitali ʼo ʼuhiga mo te fakaʼosi, ka ko te ʼu aluʼaga ʼae ʼe hoko ʼi “te u aho fakamuli” ʼe mole puli ia.—2 Timoteo 3:1.

ʼE lagi kotou feʼekeʼaki fenei: “Kapau ʼe kua ha lelei te fakaʼiloga ʼo tatatou kua ovi ki te fakaʼosi, he ko ʼe koa ʼe mole tokagaʼi e te hahaʼi tokolahi?” ʼE ui ʼi te Tohi-Tapu ʼi te ovi mai ʼo te fakaʼosi, tokolahi ʼe natou meʼa noaʼi anai te ʼu aluʼaga ʼaia. ʼE mole natou fakamoʼoni anai ki te ʼu fetogi lahi ʼe hoko lolotoga te ʼu ʼaho fakamuli, kaʼe natou manukinuki anai, ʼo ui fenei: “Koeni kua mamate foki atatou tamai, kae e tuu aipe te u mea fuli o hage i te kamataaga o te fakatupu o te malamanei.” (2 Petelo 3:3, 4) Koia, ʼe ha lelei te fakaʼiloga ʼo te ʼu ʼaho fakamuli, kaʼe mole tokagaʼi anai e te tokolahi.—Mateo 24:38, 39.

Neʼe tou vakaʼi ʼi te alatike ʼaeni ʼihi fakamoʼoni Fakatohi-tapu ʼo te kua ovi mai ʼo te fakaʼosi.a ʼE kotou fia iloʼi koa he tahi age ʼu faʼahi? Kapau koia, kotou fakaha ki te kau Fakamoʼoni ʼa Sehova ʼe kotou fia ako te Tohi-Tapu. ʼE feala ke fai te ako ʼi tokotou ʼapi, pe ʼi he tahi age koga meʼa, pe ʼi te telefoni. ʼE maʼua anai ke maʼu hokotou temi moʼo fai takotou ako pea ʼe fua lelei anai kia koutou.