ʼE Pulihi Anai Koa Te Malama ʼAeni?

ʼE Mole Pulihi Anai:

TE TAGATA

ʼE ui ʼi te Tohi-Tapu: Neʼe fakatupu te ʼAtua ia te kele “ke aua naa lavaki, ae nee ina fakatupu ia ia ke nofoi.”—ESAIA 45:18.

TE KELE

ʼE ui ʼi te Tohi-Tapu: “E puli atu he taitupu, kae hau he tahi taitupu kehe: kae e tuumau aipe te kele.”—EKELESIASI 1:4.

KOTEA TONA FAKAʼUHIGA: ʼE ui ʼi te Tohi-Tapu ʼe mole pulihi anai ia te kele, pea ʼe nofoʼi tuʼumaʼu pe anai. Kae kotea te fakaʼuhiga ʼo te fakaʼosi ʼo te malama?

KO HE FAʼIFAʼITAKI: ʼE fakatatau e te Tohi-Tapu ia te fakaʼosi ʼo te malama ʼaeni ki te aluʼaga ʼae neʼe hoko ʼi te temi ʼo Noe. ʼI te temi ʼaia, neʼe fonu te kele ko “te agamalohi.” (Senesi 6:13) Kae ko Noe neʼe ko te tagata faitotonu. Koia neʼe haofaki ai e te ʼAtua ia Noe mo tona kiʼi famili, kae ina pulihi ia te hahaʼi agakovi ʼi te tulivio. ʼE ui fenei ʼi te Tohi-Tapu: “Neʼe fakaʼauha te malama ʼo te temi ʼaia ʼi te lomaki.” (2 Petelo 3:6) Neʼe ʼosi ai te malama ʼo te temi ʼaia. Kae kotea ʼae neʼe pulihi? Neʼe mole ko te kele ʼae neʼe pulihi, kae ko te hahaʼi agakovi ʼae neʼe maʼuʼuli ai. Koia ka talanoa ʼi te Tohi-Tapu ki te fakaʼosi ʼo te malama ʼe mole fakaʼuhiga ki te pulihi ʼo te kele. ʼE fakaʼuhiga ia ki te fakaʼosi ʼo te hahaʼi agakovi ʼi te kele pea mo ʼanatou fakatuʼutuʼu.

ʼE Pulihi Anai?

TE ʼU FAIGATAʼAʼIA MO TE AGAKOVI

ʼE ui ʼi te Tohi-Tapu: “Kei toe pe he kii temi siisii pea e puli anai te tagata agakovi; e ke sio ki te kogamea ae nee nofo ai, pea kua puli ia. E mau e te kau masiva te fenua, pea e natou fiafia lahi i te tokalelei.”—PESALEMO 37:10, 11.

KOTEA TONA FAKAʼUHIGA: ʼI te hili ʼo te to ʼo te Tulivio, neʼe mole pulihi ai te agakovi ʼo talu ai. Neʼe kei hoko atu te agakovi ʼa ʼihi hahaʼi. Kae kua vave fakagata e te ʼAtua ia te agakovi. Ohage pe ko tona ui e te tagata faipesalemo: “E puli anai te tagata agakovi.” ʼE pulihi anai e te ʼAtua ia te agakovi ʼaki tona Puleʼaga. ʼE ko tona Puleʼaga ʼae ʼi selo, ʼae ka ina takitaki anai ia te hahaʼi faitotonu ʼi te kele.

KO HE FAʼIFAʼITAKI: ʼE ui ʼi te Tohi-Tapu ʼe mole tali leleiʼi anai e te kau taki ʼo te kele ia te Puleʼaga ʼo te ʼAtua. ʼE natou fakafeagai anai ki ai. (Pesalemo 2:2) Kotea leva tona ikuʼaga? ʼE fetogi anai e te Puleʼaga ʼo te ʼAtua ia te ʼu puleʼaga fakatagata fuli pea “e tuu anai ia ia totonu, o heegata.” (Taniela 2:44) Kae he koʼe ʼe tonu ke fakagata ia te takitaki ʼa te tagata?

ʼE TONU: Ke Fakagata Ia Te Takitaki ʼa Te Tagata

ʼE ui ʼi te Tohi-Tapu: “E mole ko te tagata ae e ina taki ona lakaaga moka haele.”—SELEMIA 10:23.

KOTEA TONA FAKAʼUHIGA: Neʼe mole fakatupu e te ʼAtua ia te tagata ʼaki ia te fealagia ʼae ke ina takitaki ia ia totonu. ʼE mole feala ki te tagata ke ina takitaki he tahi age ʼu hahaʼi pea mo puleʼakiʼi ʼonatou fihifihia.

KO HE FAʼIFAʼITAKI: ʼE tohi ʼi te pasina ʼi te Neti (Britannica Academic) ʼe mole feala ki he puleʼaga ke ina “pulihi ia te masiva, mo te pakupaku, te ʼu mahaki, te ʼu tuʼutamaki fakanatula, te ʼu tau pea mo te agamalohi.” Ki te manatu ʼa ʼihi, “ ʼe gata pe ki he puleʼaga fakamalamanei ʼe feala ke ina tauʼi te ʼu fihifihia ʼaia.” Kae tatau aipe pe ʼe fakatahitahi te ʼu puleʼaga fakatagata fuli, ʼe kei takitaki pe anai e te malama ʼaeni e ni tagata heʼe haohaoa. Koia, ʼe mole feala anai ke natou tauʼi te ʼu fihifihia ʼae neʼe kua tou palalau ki ai. ʼE gata pe ki te Puleʼaga ʼo te ʼAtua ʼe feala ke ina puleʼakiʼi te ʼu fihifihia ʼo te malama ʼaeni ʼo talu ai.

Koia, ohage pe ko tona ui ʼi te Tohi-Tapu, ʼe pulihi anai e te ʼAtua ia te malama ʼaeni, ko tona fakaʼuhiga ʼe ina pulihi anai ia te hahaʼi agakovi. Koia, ʼe mole tonu ke tuʼania te hahaʼi agalelei mo agatonu. Kailoa, kae ʼe tonu ke natou fiafia, he ʼe kua vave fetogi e te ʼAtua ia te malama ʼaeni ʼaki he malama foʼou mo taulekaleka.

Ko ʼafea ʼae ka hoko ai anai te aluʼaga ʼaia? Tou lau ia te alatike ʼae ka hoa mai.