Te ʼu Tali Ki Te ʼu Fehuʼi Fakatohi-tapu

ʼE feafeaʼi ia te ʼAtua?

Ko te ʼAtua ʼe fakapulipuli. Neʼe ina fakatupu te lagi, mo te kele pea mo te ʼu meʼa maʼuli fuli. Neʼe mole fakatupu te ʼAtua, koia ʼe mole hona kamataʼaga. (Pesalemo 90:2) ʼE loto e te ʼAtua ke kumi e te hahaʼi ia ia pea mo natou iloʼi ia te moʼoni ʼo ʼuhiga mo ia.—Lau ia Gaue 17:24-27.

ʼE feala ke tou iloʼi ia te huafa ʼo te ʼAtua. ʼE feala ke tou tokagaʼi ʼona kalitate ʼi te ʼu meʼa ʼae neʼe ina fakatupu. (Loma 1:20) Kaʼe kapau ʼe tou fia iloʼi lelei te ʼAtua, ʼe maʼua ke tou ako tana Folafola, te Tohi-Tapu. ʼE tou iloʼi ai ia te ʼulugaaga ʼo te ʼAtua.—Lau ia Pesalemo 103:7-10.

Kotea te manatu ʼa te ʼAtua ʼo ʼuhiga mo te heʼe faitotonu?

ʼE fehiʼa ia Sehova ki te heʼe faitotonu. Pea neʼe ina fakatupu te tagata ki tona pakī. (Tetelonome 25:16) Koia la ʼae, tokolahi ia tatou ʼe tou fehihiʼa ki te heʼe faitotonu. ʼE mole ko te ʼAtua ʼae ʼe ina fakahoko ia te ʼu aga heʼe faitotonu. Neʼe ina foaki ki te tagata ia te loto faʼitaliha. Kaʼe tokolahi ʼe mole natou fakaʼaogaʼi lelei ia te fealagia ʼaia, ʼo natou fai ai ia te ʼu aga heʼe faitotonu. Pea ʼe lotomamahi ia te ʼAtua ʼuhi ko te ʼu faʼahi ʼaia.—Lau ia Senesi 6:5, 6; Tetelonome 32:4, 5.

ʼE leleiʼia e Sehova ia te faitotonu, koia ʼe mole feala ke ina tuku ke hoko atu ia te heʼe faitotonu ʼo talu ai. (Pesalemo 37:28, 29) ʼE fakapapauʼi ʼi te Tohi-Tapu ʼe vave fakagata anai e te ʼAtua ia te ʼu aga heʼe faitotonu fuli.—Lau ia 2 Petelo 3:7-9, 13.