ʼE Fagono Mai Koa He Tahi Ki ʼAtatou Faikole?

Ko ʼihi hahaʼi ʼi tanatou manatu ko te faikole ʼe ko he puli temi pea ʼe mole fagono mai he tahi. Ko ʼihi ʼe natou faiga ke natou faikole kaʼe ʼe natou manatu ʼe mole tali anai he tahi ki ʼanatou faikole. Ko he tahi ʼe mole tui ki te ʼAtua neʼe ina ʼahiʼahi fakakaukauʼi ko te ʼAtua ʼe maʼuli moʼoni pea neʼe faikole fenei: “Ke ke palalau mai ke au iloʼi ʼe ke maʼuli moʼoni.” Ki muli age, neʼe ina ui neʼe “nofo fakalogologo” te ʼAtua.

Kaʼe ʼe ui mai ʼi te Tohi-Tapu ʼe maʼuli moʼoni te ʼAtua pea ʼe fagono ki te ʼu faikole. ʼE ui fenei ʼi te Tohi-Tapu: “ ʼE . . . foaki atu anai [e te ʼAtua] kia koe tona kalasia, moka ke kalaga anai; i te temi pe ae e logo ai anai ia ia ki tau kalaga e ina tali atu anai kia koe.” (Esaia 30:19) ʼE toe ui fenei ʼi te tahi vaega Tohi-Tapu: “E fiafia ia ia ki te kole a te kau agatonu.”—Taaga Lea 15:8.

ʼE toe talanoa ʼi te Tohi-Tapu ki he ʼu faʼifaʼitaki ʼo he ʼu hahaʼi neʼe tali ʼanatou faikole. ʼE ui ʼi te Tohi-Tapu ko Sesu neʼe ina fai “ni kole . . . kia ia ae nee feala ke ina fakamauli ia . . . pea nee ina tali ia.” (Hepeleo 5:7) ʼE feala ke tou maʼu he tahi ʼu faʼifaʼitaki ia Taniela 9:21 pea mo 2 Koloniko 7:1.

He koʼe ʼe manatu ʼihi neʼe mole tali ʼanatou faikole? He ʼe tonu pe ke tou faikole ki te ʼAtua, ia Sehova,a kaʼe mole ki he tahi age ʼu ʼatua peʼe ko te ʼu kui. ʼI tatatou fai te faʼahi ʼaia, ʼe tali anai ʼatatou faikole. ʼE toe kole mai e te ʼAtua ke tou “kole he mea o mulimuli ki tona finegalo,” ko tona fakaʼuhiga ia te ʼu meʼa ʼae ʼe ina leleiʼia. ʼE fakaha mai e te ʼAtua kapau ʼe tou faikole feia, “e fakalogo mai ia kia tatou.” (1 Soane 5:14) Koia, kapau ʼe tou loto ke tali ʼatatou faikole, ʼe tonu ke tou iloʼi te ʼAtua pea mo mahino ki tona finegalo.

Tokolahi ʼe natou tui ko te faikole ʼe mole ko he aga fakalotu feia pe kaʼe ʼe fagono pea mo tali e te ʼAtua te ʼu faikole. ʼE ui fenei e Isaac mai Kenya: “Neʼe au faikole ke tokoni mai he tahi ke au mahino ki te Tohi-Tapu. Mole faʼa fualoa ki ai, neʼe haʼu he tahi kia au pea neʼe lotolelei ke tokoni mai.” ʼI Philippines, neʼe fia taʼofi e Hilda tana suluka. ʼI tana mole lava taʼofi te faʼahi ʼaia, neʼe ui fenei age e tona ʼohoana: “He koʼe ʼe mole ke kole tokoni ki te ʼAtua?” Neʼe mulimuli ki te tokoni ʼaia pea ʼe ina ui fenei: “Neʼe au punamaʼuli ʼosi ki Tana tokoni mai kia au. ʼE hage ʼosi mole kei au fia suluka. Neʼe au lava tuku taku suluka.”

ʼE feala koa ke tokagaʼi e te ʼAtua ʼokotou fihifihia takitokotahi?