Te ʼu Fakapapau ʼAe Ka Hoko Moʼoni Anai
Ohage pe ko tona fakakikite e Sesu, ʼe fakamafola te logo lelei ʼo te Puleʼaga ʼo te ʼAtua ʼi te kele katoa. (Mateo 24:14) ʼE ui ʼi te tohi Fakatohi-tapu ʼo Taniela, ʼe ko te ʼAtua ʼae ʼe pule ʼi te Puleʼaga ʼaia. ʼE maʼu ʼi te kapite 2 te lea fakapolofeta ʼe talanoa ai ki te fakaalualu ʼo te ʼu puleʼaga fakatagata talu mai Papiloni ʼafeā ki totatou temi. ʼE ui fenei ʼi te vaega 44 ʼo ʼuhiga mo te ka haʼu:
“E fakatupu anai e te Atua o te atu lagi he puleaga ae e mole toe maumaui anai i he aho, pea e mole toe tuku anai ki te pule a he tahi age puleaga; e ina fasifasii anai, pea e ina maumaui anai te u puleaga fuli ake ae, kae e tuu anai ia ia totonu, o heegata.”
ʼE tala fakatomuʼa ʼi te lea fakapolofeta Fakatohi-tapu ʼaeni pea mo ʼihi atu, ʼe fetogi anai e te Puleʼaga ʼo te ʼAtua te ʼu puleʼaga fakatagata fuli. Pea ʼe ina ʼaumai anai te tokalelei mo te maʼuli fakatokatoka ki te kele. ʼE feafeaʼi anai te maʼuli moka kua pule te Puleʼaga ʼo te ʼAtua? Tou vakaʼi te ʼu fakapapau taulekaleka ʼae ka hoko moʼoni anai.
Ko tona fakaʼuhiga ʼe mole ʼi ai anai he tuʼakoi ʼo totatou maʼuli haohaoa ʼi te palatiso fakakelekele. Ko te fakapapau ʼaia neʼe fai mai e totatou Tupuʼaga ʼofa, ia Sehova ʼAtua.
ʼE MOLE TOE ʼI AI ANAI HE TAU
Pesalemo 46:10: “Koia ae nee ina fakagata [ia te ʼAtua] te u tau o kaku ki te u taupotu o te kele; nee ina fasii te nahau pea nee ina motuhi te tao, nee ina tutu aki te afi te u saliote tau.”
Fakakaukauʼi age muʼa pe ʼe feafeaʼi anai te malamanei mo kapau la, ʼe fakaʼaogaʼi te foʼi falā ʼae ʼe fakaʼaogaʼi ʼi te temi nei ki te faʼu ʼo ni mahafu, ke tokoni ki te maʼuli ʼo te hahaʼi kae mole ke matematehi ʼaki natou. ʼE hoko moʼoni anai te fakapapau ʼaia moka hoko mai te pule ʼo te Puleʼaga ʼo te ʼAtua.
ʼE MOLE TOE ʼI AI ANAI HE MAHAKI
Esaia 33:24: “E mole ui e he tahi: E au mahaki!”
Fakakaukauʼi age muʼa he malamanei ʼe mole kei maʼu ai anai te mahaki mafu, te kosea, te suka pea mo ʼihi atu mahaki. ʼE mole toe ʼaoga anai he ʼu lopitali mo he ʼu faitoʼo. ʼE maʼu anai e te hahaʼi ʼi te kele he maʼuli malolo haohaoa.
ʼE MOLE TOE ʼI AI ANAI HE HOGE MEʼA KAI
Pesalemo 72:16: “E lahi anai te fulumeto i te fenua, i te tumutumu o te u mouga.”
ʼE mahu anai te meʼa kai ʼi te kele maʼa te hahaʼi fuli pea ʼe maʼu gafua anai. ʼE mole toe ʼi ai anai he tahi ʼe pakupaku.
ʼE MOLE TOE ʼI AI ANAI HE MAMAHI MO HE MATE
Fakaha 21:4: “Pea ʼe ina [te ʼAtua] holoholoʼi anai te ʼu loʼimata fuli mai ʼonatou mata, ʼe mole toe ʼi ai anai te mate, mo te putu, mo te lauga pea mo te mamahi. Ko te ʼu meʼa ʼafeā kua puli ia.”
ʼE AU “FAKAHOKO AKU FAKATUUTUU”
ʼE ko he moemisi koa? Tokolahi ʼe natou fakaʼamu ki te maʼuli taulekaleka ʼae ʼe fakapapauʼi mai ʼi te Tohi-Tapu kae ʼe natou manatu ʼe faigataʼa hanatou tui ki he maʼuli heʼe gata. Pea ʼe mole tou punamaʼuli ki ai he neʼe mole heʼeki ʼi ai he tahi neʼe kua maʼuli ʼo heʼe gata.
ʼE popula te tagata ki te agahala mo te mate. Pea ʼe maʼuli ʼi te mamahi mo te ʼu faigataʼaʼia talu mai fualoa. ʼE ui e te hahaʼi ʼe ko te aluʼaga pe ia ʼo te maʼuli. Kae, ʼe kehe ia mo te fakatuʼutuʼu ʼo totatou Tupuʼaga, ia Sehova ʼAtua, ki te tagata.
Ke tou tui pau ʼe hoko moʼoni anai ʼana fakapapau fuli, neʼe ui fenei e te ʼAtua: “E mole toe liliu mai ia ia kia au hala fua, kae e heeki fai e ia toku finegalo pea mo fakahoko aku fakatuutuu.”—Esaia 55:11.
ʼE ui ʼi te Tohi-Tapu ko Sehova ʼe ko te ʼAtua “ ʼe mole feala ke loi.” (Tito 1:2) ʼUhi ʼae ko ia ʼae neʼe ina fakapapauʼi mai te ʼu meʼa taulekaleka fuli ʼaia ki te ka haʼu, ʼe tonu ke tou metitasio ki te ʼu fehuʼi ʼaeni: ʼE moʼoni koa ʼe maʼuli anai te tagata ʼi te Palatiso fakakelekele ʼo heʼe gata? Kotea ʼae ʼe tonu ke tou fai ke tou maʼu ai te ʼu tapuakina ʼaia mai te ʼAtua? ʼI te ʼu pasina ʼae ka hoa mai, ʼe ke maʼu ai anai te ʼu tali ki te ʼu fehuʼi ʼaia.