Moka Tono Tou ʼOhoana

“Neʼe alu toku ʼohoana mo te tahi fafine ʼe kei finemui. Neʼe kua au loto ʼosi ke au mate. Neʼe toe ʼasili toku mamahi ʼi taku manatuʼi te ʼu toe sakilifisio neʼe au fai maʼa ia.”—Ko Maria, ʼi Sepania.

“Neʼe au lotomamahi ʼaupito ʼi te mavae fakapunamaʼuli ʼo toku ʼohoana. Neʼe ʼi ai ʼamā fakatuʼutuʼu mo ʼamā fakaʼamu ki te ka haʼu kae neʼe mole kei feala ia ke hoko. Neʼe ʼi ai pe ʼihi ʼaho neʼe au lelei ai kae neʼe faifai pe pea neʼe au toe lotomamahi.”—Ko Bill, ʼi Sepania.

ʼE FAIGATAʼA ʼaupito moka hala ki tuʼa he tahi ʼi te taumatuʼa. Kapau ʼe fakahemala pea ʼe feala pe ke fakamolemole age tona hoa ki ai, pea ʼe nā toe faigaʼi anai ke lelei tonā maʼuli fakataumatuʼa.a Kae tatau aipe pe ʼe nā mavete peʼe kailoa kae ʼe mamahi pe ia ia ʼae neʼe nofo agatonu. Kae ʼe feafeaʼi koa te ʼutakiʼi ʼo te lotomamahi ʼaia?

HE ʼU VAEGA FAKATOHI-TAPU ʼE ʼAOGA

Neʼe maʼu e ʼihi ʼohoana he fakafimalie ʼi tanatou lau ia te Tohi-Tapu. Kua natou iloʼi ʼe tokagaʼi e te ʼAtua ʼonatou loʼimata pea ʼe fakaʼofaʼofa kia natou.—Malakia 2:13-16.

“ ’I te kua lahi fau ’o taku tuʼania, neʼe ke fakapelepele’i mo fakafimalieʼi au.”—Pesalemo 94:19, MN.

ʼE ui e Bill: “Ka au lau ia te vaega ʼaeni, ʼe hage pe ia Sehova ko he tamai ʼofa ʼe ina fakanaʼanaʼa toku loto.”

“Ki ʼae ʼe agatonu ʼe ke agatonu anai.”—Pesalemo 18:25, MN.

Neʼe faifeʼauʼaki te ʼohoana ʼo Carmen lolotoga ni mahina. Pea ʼe ui fenei e Carmen: “Neʼe mole nofo agatonu toku ʼohoana kia au, kae ʼe au falala ʼe agatonu pe ia Sehova kia au. ʼE mole feala ia ʼi he ʼaho ke situʼa mai.”

“ ʼAua naʼa kotou tuʼania ki he meʼa, kaʼe ʼi te temi fuli ʼaki te faikole mo te kole mamahi . . . kotou fakaha ki te ʼAtua ʼakotou kole, pea ko te tokalelei ʼo te ʼAtua ʼae ʼe maʼoluga age ʼi te ʼu ʼatamai fuli, ʼe ina taupau anai ʼokotou loto.”—Filipe 4:6, 7.

ʼE ui e Sasha: “ ʼE au tau lau te ʼu vaega ʼaeni pea mo faikole tuʼumaʼu ki te ʼAtua. ʼE au tokagaʼi ai ʼe tokalelei toku ʼatamai.”

ʼE tatau te ʼu tala manatu fuli ʼaeni. ʼI ʼihi temi neʼe lotovaivai te ʼu hahaʼi ʼaia. Kae neʼe natou lau mo ako leva ia te Tohi-Tapu pea neʼe hoki natou maʼu ai honatou tapikiʼaga, ia Sehova ʼAtua. Koia ʼae ʼe ui ai e Bill: “Neʼe mole kei ʼi ai he ʼuhiga ʼo toku maʼuli kae neʼe haofaki au e taku tui. Neʼe hage ʼe au haʼele ʼi he koga meʼa ʼe fakapoʼuli gaogao kae neʼe nofo pe te ʼAtua mo au.”—Pesalemo 23:4.

a Kapau ʼe ke fia maʼu he tahi age ʼu fakamahino ʼo ʼuhiga mo te fakamolemole moka hala ki tuʼa he ʼohoana, vakaʼi te Réveillez-vous! ʼo te ʼaho 22 ʼo Apelili 1999 ʼi te Fakafalani, “L’infidélité : des conséquences tragiques” “La réconciliation est-elle possible ?” pea mo “Quand on opte pour le divorce”

Ni Puleʼaki Neʼe ʼAoga Ki ʼIhi

Lau mo metitasio ki te ʼu vaega Fakatohi-tapu.

ʼE fakamatala fenei e Bill: “Moka ʼe au lau ʼi te Tohi-Tapu te tohi ʼo Sopo pea mo te ʼu Pesalemo, ʼe au fakailoga te ʼu vaega ʼae ʼe to tonu mo toku maʼuli. Neʼe hage pe te ʼu tagata ʼaia ʼo te Tohi-Tapu ko au. Neʼe ʼi ai pe ʼihi temi neʼe natou lotomamahi mo lototuʼania.”

Fakalogo he ʼu musika.

Neʼe tau fakalogo musika ia Carmen moka neʼe mole lava mamoe ʼi te poʼuli. Pea neʼe logo fimalie atu aipe. ʼE ui fenei e Daniel: “Neʼe au faiga ke au poto ʼi te ta ʼukalele pea neʼe kamata puli ai toku lotohoha ʼuhi ko te musika.”

Palalau faʼifaʼitaliha ki ʼau manatu.

Neʼe mole loko palalau ia Daniel ki te ʼu meʼa ʼae ʼe ina logoʼi ʼi tona loto. Kae neʼe faipalalau mo ʼona kaumeʼa lelei ʼi te ʼaho fuli mo tau faitohi age kia natou. Pea neʼe tokoni te faʼahi ʼaia kia ia. ʼE ui e Sasha: “Neʼe ʼaoga ʼaupito ia te tokoni ʼo toku famili. Moka neʼe au fia palalau neʼe mole pe la fiu taku faʼe ʼi te fakalogo mai. Pea neʼe au logoʼi mo taku tamai toku ʼofainaʼi, neʼe tokoni mai ke toe liliu toku maʼuli ohage ko te mahani.”

Faikole tuʼumaʼu.

Neʼe ko te agamahani ʼa Carmen ia te faikole. ʼE ina ui fenei: “Neʼe au iloʼi neʼe mole liʼakina au e te ʼAtua kae ʼe fakalogo mo tokoni kia au. ʼI te temi faigataʼa ʼae neʼe au fakalaka ai neʼe au fakaoviovi ai ki te ʼAtua.”