Ke Tou Tali Pea Mo Maʼuliʼi Te Folafola ʼa Te ʼAtua ʼe ʼAoga Kia Tatou
1 Logope ko te ʼu lauʼi miliona hahaʼi ʼe ʼi ai tanatou Tohi-Tapu, tokolahi ia nātou ʼe mole nātou tali ohage ko te Folafola ʼa te ʼAtua, pea ʼe lahi nātou ʼaē ʼe mole nātou maʼuliʼi tana ʼu tokoni fakapotopoto. Koia ʼaē, ʼe tokosiʼi nātou ʼaē ʼe nātou fakaʼaoga. Kae, ko te kau Fakamoʼoni ʼa Sehova ʼe nātou tui moʼoni ko te Tohi-Tapu e ko te Folafola ʼa te ʼAtua pea ʼe ʼaoga ia kia meʼa fuli (2 Tim. 3:16, 17). Koia ʼaē ko te ʼu fakatahi faka silikosikilipisio ʼe hoko anai ʼi te taʼu gāue 1993 ko tona kupu “Ke tou tali pea mo maʼuliʼi te Folafola ʼa te ʼAtua ʼe ʼaoga kia tatou”.
2 ʼI te polokalama ʼe fai ai te ʼu akonaki, te ʼu faʼifaʼitakiʼaga, te ʼu gaoʼi, te ʼu hisitolia neʼe hoko pea mo te ʼu fehuʼi ʼe fakaloto mālohiʼi ai tatou, ʼe toe loloto ai tatatou fakafetaʼi ki te Folafola ʼa te ʼAtua pea ʼe fakahā mai kia tatou pe ʼe feafeaʼi te maʼuliʼi ʼo lahi age te ʼu tokoni ʼaia ʼi te ʼu fahaʼi kehekehe ʼo totatou maʼuli. Ko te moeaki hoʼatā, ʼe palalau anai ki te akonaki pea mo te ʼu tokoni ʼe ʼaoga ki te famili ʼo ʼuhiga mo te ʼu fakafiafia, te ʼu hahaʼi ʼe fakatahi mo tatou pea mo te fia fai paʼaga. ʼE tou vakaʼi anai pe ʼe feafeaʼi tatatou kehekehe mo te mālama pea ʼe feafeaʼi te mole maʼuliʼi ʼo tana ʼu aga kovi, te gutu tauvele pea mo te heʼe fakaʼapaʼapa. Tahi ʼaē meʼa, ko nātou ʼaē ʼe nātou akoʼi tokotahi tanatou fānau pea mo nātou ʼaē mole hanatou tāmai ʼe foaki age he ʼu fakaloto mālohi ʼe ʼaoga kia nātou.
3 Ko te moeaki, ʼi te ʼosi fakalogo ki he akonaki faka tohi-tapu ʼe palalau ai ki te papitema, ko te ʼu hahaʼi ʼaē neʼe kua foaki tonatou maʼuli kia Sehova ʼe nātou ʼolo anai ʼo papitema. Ko nātou ʼaē ʼe loto ke hoko te fahaʼi ʼaia ʼi te fakatahi faka silikosikilipisio ʼe tonu ke nātou ʼolo fakavilivili ki te tagata taupau pelesita ʼo tonatou kokelekasio. Ke maʼu ai hona temi moʼo fakahā ki te ʼu tagata ʼāfea ke nātou fakasiosio te ʼu fehuʼi mo nātou ʼaē ʼe fia papitema.
4 Ko te ʼahotapu uhu, ʼe tou vakaʼi anai te ʼu faʼahi ʼe tou kehekehe ai mo te mālama ʼuhi heʼe tou maʼuliʼi te Folafola ʼa te ʼAtua. ʼE tou palalau anai, ki te maʼuhiga ʼo tatatou aga pea mo te ʼu faʼahiga meʼa ke ʼaua naʼa ʼuli ai totatou laumālie. ʼI te hoʼatā, ko te tagata taupau faka tisitilike ʼe ina fai anai te akonaki ki te hahaʼi ko tona kupu tāfito “Te Tohi-Tapu: ko he tohi moʼoni?” ʼE tou fia fakaafe te ʼu hahaʼi fuli ke nātou ʼomai ʼo logo ki te ʼu akonaki lelei ʼaia.
5 Ko te taupau ʼo tokotou silikosikilipisio ʼe ina fakahā atu anai te ʼaho pea mo te fahaʼi ʼe fai ai takotou fakatahi faka silikosikilipisio. ʼE fakaloto mālohiʼi tatou ke tou ʼolo ki te fakatahi ʼaia ke feala ai hatatou tali pea mo maʼuliʼi te Folafola ʼa te ʼAtua ʼe ʼaoga kia tatou. — Sake 1:22-25.