Kau Tūpulaga: Koutou Fakafiafia Te Loto ʼo Sehova
1 Kapau ʼe fakaʼaogaʼi e he tahi tona mālohi ʼi tona temi tūpulaga ʼi te ala ʼo te faitotonu, ko tona maʼuli ʼe feala ia ke lelei ʼaupito. Ko te tagata poto, te hau ko Salomone neʼe ina tohi: “Ke ke fakafiafia, tama, ʼi tou temi tūpulaga, pea ke fai e tou loto he meʼa ʼe lelei kia te koe ʼi te ʼu ʼaho ʼo tou temi tūpulaga.” (Tnk. 11:9). Kau tūpulaga ʼe fakamaʼuaʼi koutou e te ʼAtua ʼo ʼuhiga mo ʼakotou ʼu aga.
2 Kae ko tokotou maʼuli ʼe maʼuhiga ʼo mole gata pe kia koutou kae feiā foki ki ʼakotou ʼu mātuʼa. ʼE ʼui mai e Tāʼaga Lea 10:1: “Ko te foha poto, ʼe ina fakafiafia te tāmai, pea ki he tama vale ʼe ko he fakaloto mamahi ia ʼo tana faʼe.” Kae ko te meʼa ʼaē ʼe maʼuhiga age, ko tokotou maʼuli ʼe ʼi ai tona ikuʼaga ki tokotou Tupuʼaga, ia Sehova ʼAtua. He koʼe ko te talanoa ia Tāʼaga Lea 27:11 ʼe fakaloto mālohi ki te kau tūpulaga: “Ke ke poto ia koe, ê hoku foha pea ke ke fakafiafia toku loto, koteʼuhi ke feala kau tali kia ia ʼaē ʼe manukinuki kia te ʼau.” E feafeaʼi takotou fakafiafia e koutou kau tūpulaga te loto ʼo Sehova ia ʼaho nei? ʼE feala takotou fakahoko te faʼahi ʼaia ʼaki hakotou fai he ʼu faʼahiga meʼa.
3 ʼAki takotou faʼifaʼitaki: Ia koutou kau tūpulaga ʼe koutou tau mo “te ʼu temi maʼuhiga ʼaupito mo faigataʼa” ʼaē neʼe fakakikite e te Folafola ʼa te ʼAtua (2 Tim. 3:1). E lagi ʼe koutou tau mo he ʼu faigataʼaʼia mai tokotou ʼu kaumeʼa ʼi te faleako ʼaē ʼe mole tui pea mo tokotou ʼu faiako ʼaē ʼe nātou kataʼi koutou ʼuhi heʼe fakatafito takotou tui ki te Tohi-Tapu. Ohage la, ko te tagata faiako neʼe talanoa ki te evolisio ohage he meʼa moʼoni pea mo ʼui maʼana ko te Tohi-Tapu ʼe ko he fagana. Kae, neʼe fakatonutonu fakalelei e te tūpulaga fai faka mafola ʼi tana kalasi ia te manatu ʼaia ʼaki te Tohi-Tapu. Ko te meʼa neʼe hoko, neʼe kamata ai te ʼu ako faka tohi-tapu. Ko ʼihi ia nātou ʼaē neʼe fia logo neʼe kamata ʼolo ki te ʼu fono. Ko takotou tui ʼu tēhina pea mo tuagaʼane kei tūpulaga ʼe ina tauteaʼi te mālama agakovi pea mo taki te hahaʼi agatonu ki te moʼoni. — Vakaʼi ia Hepeleo 11:7.
4 ʼE feala koa hakotou fakaloto mālohi te kau tūpulaga ʼi te kokelekasio, ke ʼaua naʼa nātou tō ki te tuʼutāmaki? ʼAki takotou foaki he faʼifaʼitaki lelei ʼi te faleako, ʼi te loto fale, pea ʼi te kokelekasio, ʼe feala ke koutou fakamālohiʼi te tui ʼa ʼihi kau faka mafola tūpulaga (Lom. 1:12). Koutou fakafiafia te loto ʼo Sehova ʼaki takotou tuku he faʼifaʼitaki ki niʼihi.
5 ʼAki tokotou teu pea mo tokotou faʼu: Ko te tuagaʼane neʼe kataʼi pea mo vaʼiganoaʼi ʼuhi ko te matatonu ʼo tona teu pea neʼe nātou fakahigoaʼi ia “ko he tahi ʼe mole feala ke fā ki ai”. Ko te faʼahi ʼaia neʼe mole lotolotolua ai ia ʼo mulimuli ki te ʼu fakatuʼutuʼu agakovi ʼo te mālama. Pea, neʼe ina fakamahino age ko ia ko te Fakamoʼoni ʼa Sehova pea ʼe ina maʼuliʼi ia te ʼu fakatuʼutuʼu māʼoluga ʼa te kau Fakamoʼoni. ʼE ia koutou koa te taʼi mālohi ʼaia? Peʼe koutou tuku koa koutou te mālama ʼa Satana ke ina taki takotou fakakaukau pea mo takotou aga? ʼI meʼa lelei leva tatatou sio ki te tokolahi ia koutou kau tūpulaga ʼe koutou tokaga ki te ʼu akonaki ʼa Sehova pea ʼe koutou fakafisi ki te ʼu teu ʼaē ʼe mole lelei, te ʼu lamote, te ʼu tamapua pea mo te ʼu akonaki ʼa te mālama. ʼE moʼoni, ohage ko tatatou ako ʼi tatatou fakatahi faka tisitilike, ʼe tonu ke tou ʼiloʼi, ko te ʼu meʼa ʼaia ʼe haʼu mai te mālama ʼaē ʼe puleʼi e te kau temonio! — 1 Tim. 4:1.
6 ʼAki te fili ʼo te fakafiafia pea mo te mālōlō: ʼE ʼaoga ke manatuʼi e te ʼu mātuʼa te maʼuhiga ʼo te tokoniʼi ʼo tanatou fānau ke nātou fili fakapotopoto te faʼahiga fakafiafia pea mo te mālōlō. Neʼe viki e he tēhina ia he famili neʼe lahi tona ʼofa ki ai. Neʼe nātou fakaʼaogaʼi te ʼu meʼa fakalaumālie, pea ko te ʼu mātuʼa neʼe nātou foaki he takitaki ʼo aʼu ki te faʼahi ʼaē ʼo te mālōlō faka famili. Neʼe tala fēnei e te tēhina: ‘ ʼE ʼau leleiʼia te ʼu meʼa ʼe nātou fai fakatahi. ʼE mole gata ʼaki pe te teuteuʼi e te ʼu mātuʼa tanatou ʼu fānau ki te gāue faka mafola, kae ka hoko tonatou temi mālōlō, ʼe nātou ʼolo ʼo ʼeva, ʼo mamata ʼi te ʼu musées, peʼe nātou nonofo ʼi tonatou ʼapi ʼo nātou gaoʼi peʼe nātou gāue fakatahi. Ko tanatou feʼofaʼaki pea mo te ʼofa ki te kāiga, ʼe feala ai hatatou falala ʼe nātou haʼele anai ʼi te moʼoni ʼi te temi ka haʼu, logope la he faʼahiga meʼa ʼe hoko.’
7 ʼIo, ʼe ʼi ai te ʼu temi ʼaē ʼe mole feala ke mālōlō pea mo fakafiafia fakatahi te famili. Kau tūpulaga ʼe ʼaoga ke mahino kia koutou ko te faʼahi ʼaia ʼe tonu ke koutou fili fakapotopoto ke koutou fakaʼaogaʼi tokotou temi ʼāteaina. ʼE faiga tāfito ia Satana ke ina fakahēhē te tokolahi. Ko te kau tūpulaga pea mo nātou ʼaē ʼe mole fakapotopoto ʼe nātou mulimuli gafua ki tana ʼu aga kākā pea mo loi (2 Ko. 11:3; Ef. 6:11). Koia ia ʼaho nei ʼe fakaʼaogaʼi e Satana te ʼu meʼa kehekehe moʼo uga ʼo koutou ke koutou hēhē pea ke koutou haga maʼuliʼi te manatu pe ʼaē kia kita ʼi te kumi ʼo te fakafiafia pea mo te aga heʼeʼaoga.
8 Ko te televisio ʼe ko he meʼa tāfito ʼaia ʼe uga ai te holi ki te paʼaga pea mo te maʼuli heʼeʼaoga. Ko te sinema pea mo te ʼu viteo ʼe tautau fakahā ai te ʼu faʼahi kehekehe ʼo te aga mālohi pea mo te koga tapu ʼo te sino. Ko te musika kua lahi ʼosi tona kovi pea mo fakalialia. Ko te ʼu faiga ʼa Satana ʼe hage ia ʼe mole faʼa kovi, kae neʼe kua higa ai te ʼu kilisitiano tūpulaga ʼe lauʼi afe ʼo nātou maʼu te ʼu manatu kovi peʼe mo te aga ʼe mole lelei. Moʼo tauʼi ʼo te ʼu taʼi fakataga ʼaia, ʼe tonu ke koutou mālohi ʼo muliʼi te faitotonu (2 Tim. 2:22). Kapau ʼe ʼaoga ke koutou fakatotonu ʼakotou manatu peʼe ko takotou aga ʼo ʼuhiga mo te ʼu fakafiafia pea mo te ʼu mālōlō, koteā anai te meʼa ka koutou fai? ʼE tali fēnei e te tagata fai pesalemo: “ ʼI toku loto katoa neʼe ʼau kumi ia koe. ʼAua naʼa ke fai he meʼa ke ʼau hēhē mamaʼo ʼi tau ʼu folafola.” — Pes. 119:10.
9 Ko te atolasioʼi ʼonatou ʼaē ʼe fai gaoʼi pea mo te fakafiafia ʼe ko meʼa ia kua māhani. Ko te manavasiʼi kia Sehova ʼe ina tokoniʼi anai koutou ke ʼaua naʼa koutou tauhi ki te ʼu hahaʼi ʼe mole haohaoa. Tatau aipe mo te aga fakalialia ʼi te felāveʼi fakasino kua tauhi ki ai te tokolahi. ʼE feala hakotou hāofaki mai te faʼahi ʼaia ʼaki takotou fakamamaʼo mai te meʼa fakalialia heʼeʼaoga pea mo te musika heʼeʼaoga. ʼO ʼuhiga mo te musika, ko Te Tule Leʼo ʼo te ʼaho 15 ʼo ʼapelili 1993 neʼe ina fai te fakatokaga ʼaenī: “Ko te musika ʼe ko he meʼa ʼofa fakaʼatua. Kae, ki te tokolahi, ʼe liliu ko he mahaki ʼo nātou. Koutou fakatuʼutuʼu ke koutou tuku te musika ki tona tuʼulaga pea ke koutou tuku te ʼu gāue ʼa Sehova ke liliu ko te ʼu meʼa tāfito ʼe koutou tokaga ki ai. Koutou fakaʼaoga pe te musika ʼaē ʼe lelei pea mo koutou fakatokaga ʼo ʼuhiga mo te musika ʼaē ʼe koutou filifili. Koia, ʼe feala anai ke koutou fakaʼaoga, kae mole fakavale: te meʼa ʼofa fakaʼatua ʼaia.”
10 Ke ia koutou he fehiʼa katoa ki te meʼa ʼaē ʼe kovi (Pes. 97:10). Kapau ʼe koutou fia fai te meʼa ʼaē ʼe kovi, koutou manatuʼi pe koteā te manatu ʼa Sehova ʼo ʼuhiga mo te faʼahi ʼaia, pea ke koutou manatuʼi te ʼu ikuʼaga: ko he faitama kae mole koutou loto ki ai, ko ni mahaki fakalialia, ko te mamahi ʼo te loto, te puli ʼo takita fakaʼapaʼapa, te puli ʼo te ʼu pilivilesio ʼi te kokelekasio. Ke ʼaua naʼa koutou tuku ia koutou ke puleʼi e te ʼu ʼata fai gaoʼi, te ʼu sinema, te ʼu fime viteo, te ʼu hiva peʼe ko te ʼu fai palalau ʼaē ʼe fakaloto mālohiʼi ai te agakovi. Ke ʼaua naʼa koutou kaugā fakatahi mo nātou ʼaē ʼe higoaʼi e te Tohi-Tapu ko te kau “vavale”. (Taag. 13:19.) Ke koutou fili fakalelei; ke koutou kaugā fakatahi mo nātou ʼaē ʼi te kokelekasio ʼe ʼoʼofa kia Sehova pea mo tana ʼu pelesepeto faitotonu.
11 ʼIo, ko te kau tūpulaga ʼaē ʼe nātou fia fakafiafia moʼoni te loto ʼo Sehova ʼe nātou tokaga anai ki te tokoni lelei ʼaē ʼe tuʼu ia Efesi 5:15, 16: “Ke koutou tokaga fakalelei peʼe feafeaʼi takotou haʼele: ke ʼaua naʼa hage ko he kau vale, kae ke hage ni kau popoto, ʼo totogi maʼa koutou te temi faigamālie, koteʼuhi ko te ʼu ʼaho, ko te ʼu ʼaho ʼo te agakovi.” Koteā anai te meʼa ʼe tokoni kia koutou ke koutou “tokaga fakalelei” ki takotou tuputupu ʼi te ʼu ʼaho fakamuli ʼaenī?
12 Ke koutou tokaga ki tokotou faʼahi fakalaumālie: Ia Mateo 5:3, neʼe tala fēnei e Sesu: “Manuʼia ia nātou ʼaē ʼe nātou ʼiloʼi te maʼuhiga ʼo te ʼu meʼa fakalaumālie kia nātou.” ʼE feala foki takotou fiafia mokā ʼe koutou ʼiloʼi te maʼuhiga ʼo te meʼa fakalaumālie ʼe ʼaoga kia koutou. Moʼo fai ʼo te faʼahi ʼaia ʼe tonu ke koutou faiva ʼi te faka mafola ʼo te logo lelei, koteʼuhi ʼe fakamālohiʼi ai te tui ki te ʼu meʼa ʼaē ʼe tou akoʼi. — Lom. 10:17.
13 ʼAki takotou māhani, ʼe koutou ʼiloʼi pe ʼe mole faigafua te kau tuʼumaʼu ʼi te fai faka mafola. Lagi ʼuhi ko te mole lahi ia kita ʼo te falala. Koia ko takotou faiga mālohi ʼe ʼaoga. ʼAki takotou kau tuʼumaʼu ʼi te minisitelio, ʼe koutou faiva anai ʼi te fakahā ʼo te logo pea ʼe koutou falala anai ki takotou fealagia ʼaē ki te fai faka mafola.
14 Koutou fai he ʼu fakatuʼutuʼu ke koutou fai faka mafola mo nātou ʼaē kua lahi tonatou faiva ʼi te kokelekasio, ohage ko te kau pionie katoa pea mo te ʼu tagata ʼāfea. Koutou fakalogo fakalelei ki tanatou ʼu palalau, pea mo tanatou faʼahiga tali ki te ʼu fehuʼi ʼe lagaʼi ʼi te fai faka mafola. Koutou fakaʼaogaʼi fakalelei te tohi Comment raisonner pea mo te ʼu tokoni ʼe tuʼu ʼi te Minisitelio ʼo te Puleʼaga. ʼE mole fualoa pea koutou maʼu anai he fiafia lahi ʼi te minisitelio koteʼuhi ʼe koutou foaki ia meʼa fuli ʼe koutou fealagia maʼa Sehova. — Gāue 20:35.
15 Ko ʼihi neʼe feala ke nātou fakaʼaogaʼi te ʼu faigamālie lahi ʼi te faleako pea neʼe nātou maʼu he fua lelei ʼi te fai ʼo he ʼu tisipulo (Mat. 28:19, 20). ʼE tala fēnei e te kilisitiano tūpulaga: “Lolotoga te ʼu hola ʼaē ʼe ʼau ʼāteaina ai, neʼe lahi te ʼu fealagia ke ʼau faka mafola ai, tāfito ʼi te ʼu ʼaho lafeti. ʼI taku tuku te ʼu tohi faka tohi-tapu ʼi toku pilō, ʼo feala ai te sio ʼa te tokolahi ki ai, neʼe tokolahi ai nātou ʼaē neʼe nātou ʼōmai ʼo fakafehuʼi ʼau.” Pea, tokolahi ʼi te kau ako pea mo te fafine faiako neʼe nātou kamata ʼolo ki te ʼu fono faka kilisitiano. Pea, neʼe tuputupu ai te fafine faiako ʼo aʼu ki tona papitema. ʼE lahi te fiafia ʼo Sehova mokā ʼe fakavikiviki tona huafa e he ʼu tūpulaga ohage ko koutou.
16 Ko te tahi faʼahi moʼo fafaga ʼo tokotou faʼahi fakalaumālie ʼe ko te ako takitokotahi. Moʼo fakafiafia te loto ʼo Sehova, ʼe tonu ke tou maʼu he ʼatamai mālama ʼo ʼuhiga mo ia, tana ʼu fakatuʼutuʼu pea mo tana ʼu fakamaʼua. ʼE koutou fakaʼaogaʼi koa he temi ʼo ʼuhiga mo te ako takitokotahi? ʼE koutou ako tuʼumaʼu koa, ohage ko takotou kai tuʼumaʼu? (Soane 17:3.) ʼE ʼi ai koa hakotou polokalama lau Tohi-Tapu ʼo mole gata ʼaki pe te polokalama ʼo te Ako ʼo te minisitelio faka teokalatike? ʼE koutou teuteu lelei koa ki te ʼu fono fuli? ʼE koutou lau tuʼumaʼu koa Te Tule Leʼo pea mo te nusipepa Koutou ʼaʼala! Tāfito la te ʼu alatike kehekehe “Les jeunes sʼinterrogent...” neʼe koutou toʼo koa he temi moʼona lau, ʼo vakaʼi te ʼu vaega faka tohi-tapu fuli? Pea ke ʼaua naʼa galo te tohi neʼe tā tāfito e te Sosiete ʼo ʼuhiga mo tokotou ʼu meʼa fakalaumālie, Les jeunes sʼinterrogent — Réponses pratiques. Ko te ʼu kilisitiano tūpulaga pea mo ʼanatou ʼu mātuʼa ʼi te malamanei, neʼe nātou faitohi mai moʼo fakahā ʼo te tokoni ʼa te tohi ʼaia kia nātou ke nātou fakaōvi kia Sehova.
17 ʼI takotou lau te Tohi-Tapu pea mo te ʼu tohi faka tohi-tapu, ʼe talanoa atu kia Sehova, ki tana ʼu manatu pea mo tana ʼu fakatuʼutuʼu. Koutou tokagaʼi peʼe feafeaʼi te ʼaoga ʼo te manatu ʼaia kia koutou. Koutou faka ʼalutahi te meʼa ʼaē ʼe koutou lau pea mo te meʼa neʼe kua ʼosi ʼi takotou lau. ʼE ʼaoga ke koutou metitasioʼi te faʼahi ʼaia. Ko te metitasio ʼe ina faka fealagia ki te manatu ke hū ki te loto pea ke ina uga ke gāue. — Pes. 77:12.
18 ʼE tou fakafiafia ʼi tatatou sio ki te kau tūpulaga ʼe nātou ʼiloʼi te meʼa fakalaumālie ʼi te ʼolo ki te ʼu fono ʼo te kokelekasio. Kau tūpulaga kilisitiano, ʼe feala ke koutou fakaloto mālohiʼi niʼihi ʼaki takotou fai tuʼumaʼu he ʼu tali ʼaoga ʼi te ʼu fono. Ke koutou fakatuʼutuʼu ke koutou fai hakotou tali e tahi ʼi te ʼu fono. Koutou taupau he ʼu felogoi fakafiafia mo ni ʼu kilisitiano ʼe taʼu kehekehe ʼo koutou palalau fakafiafia mo nātou ʼi muʼa pea mo te hili ʼo te ʼu fono (Hep. 10:24, 25). Ko he tēhina tūpulaga neʼe ina fakahā neʼe fakaloto mālohiʼi ia e tana ʼu mātuʼa ke ʼalu ʼo fai palalau mo he tēhina peʼe ko he tuagaʼane kua matuʼa age ia te ia ʼi te ʼu fono fuli. Kua fiafia ia ia ʼaho nei ʼi tana maʼu te fakapotopoto koteʼuhi neʼe mole ina faka tuʼakoi pe tana felogoi mo te kau tūpulaga ʼaē ʼo te kokelekasio.
19 Ke koutou fai he ʼu fakatuʼutuʼu fakalaumālie: ʼI meʼa fakaʼofaʼofa leva ki te kau tūpulaga tokolahi ʼe mole hanatou ʼu fakatuʼutuʼu pea mo he ʼu takitaki fakalaumālie. Kae, ʼe mole ko he meʼa lelei koa mokā ʼe tou maʼu te ʼu fakatuʼutuʼu faka teokalatike pea mo fakahoko lelei? Ko te ʼu fakatuʼutuʼu ʼaia, neʼe hoko ʼaki te mālama ʼo te ako fakaʼatua, ʼe ina foaki atu anai te fiafia ʼi te temi nei pea ʼe ina taki anai koutou ki te maʼuli heʼegata. — Tnk. 12:1, 13.
20 Mokā ʼe koutou fai he ʼu fakatuʼutuʼu, ke koutou palalau ki ai ʼi te faikole. Ke koutou palalau mo ʼakotou ʼu mātuʼa pea mo te ʼu tagata ʼāfea. Ke koutou fakasiosio kia koutou pea mo takotou ʼu fealagia, pea ke koutou fai he ʼu fakatuʼutuʼu ʼe feala hakotou fakahoko, pea ke ʼaua naʼa koutou fakatatau mo he tahi. ʼE tou kehekehe fuli, tatau aipe ʼi te sino, te fakakaukau, te manatu pea mo te faʼahi fakalaumālie. Koia, ʼaua naʼa koutou ʼamanaki ʼe koutou fai fuli te ʼu meʼa ʼaē ʼe feala ke fai e he tahi.
21 Koteā te ʼu faʼahiga fakatuʼutuʼu ʼe feala ke koutou faiga ke koutou maʼu? Kapau mole heʼeki koutou fai faka mafola peʼe mole heʼeki koutou papitema, he koʼe ʼe mole koutou fakatuʼutuʼu ke koutou fai te faʼahi ʼaia? Kapau kua koutou fai faka mafola, ʼe feala ke koutou fakatuʼutuʼu he ʼu hola ke koutou fai ʼi te vāhaʼa fuli. Koutou faiga ke koutou liliu ko he kau faiako faiva ʼi te ʼu ʼaʼahi, pea ke koutou fakatuʼutuʼu ai ke fai he ako faka tohi-tapu. Kapau kua koutou papitema pea ʼe kei koutou ʼolo pe ʼo ako, he koʼe ʼe mole koutou fakatuʼutuʼu ke koutou pionie vaeluaʼi temi ʼi te temi māfana? ʼE “lahi te meʼa ke koutou fai ʼi te gāue ʼa te ʼAliki”. — 1 Ko. 15:58.
22 ʼE maʼuhiga te tokoni ʼa te ʼu mātuʼa: Ko te kau tūpulaga ʼi te kokelekasio ʼe mole tonu ke nātou ʼui ko nātou pe ʼaē ʼe faiga ʼo ʼuhiga mo tonatou maʼuli. Kae ʼaki te kautahi ʼo Sehova, ʼe ina foaki mai te ʼu tokoni ke feala ai te popoto ʼo te kau tūpulaga ʼi te fai ʼo he ʼu tonu ʼi te ʼaho fuli pea mo tauʼi te ʼu faigataʼaʼia ʼo te maʼuli. ʼIo, ko te ʼu mātuʼa ʼaē kua papitema, ko tonatou ʼuluaki maʼua ko te tokoniʼi ʼo tanatou fānau ke nātou fai he tonu ʼe lelei. Ia 1 Kolonito 11:3, ʼe hinoʼi e te Tohi-Tapu ia te tagata ʼohoana ko te pule ʼo te famili. Koia, ʼi he loto fale faka kilisitiano, ʼe kaugā gāue te fafine mo tona ʼohoana, ko te tāmai ʼaē ʼe ina akoʼi tana ʼu fānau ki te ʼu folafola ʼa te ʼAtua (Ef. 6:4). Ko te faʼahi ʼaia ʼe fai fakalelei talu tona tupu. ʼUhi ko te tuputupu fakavilivili ʼo te ʼuto ʼo te tamasiʼi ʼi te ʼuluaki taʼu, ko te ʼu mātuʼa ʼe mole tonu anai ke nā meʼa noaʼi ʼo ʼui maʼa nāua ʼe mole feala te ako ʼo te ʼu kiʼi tamaliki (2 Tim. 3:15). ʼI te lahilahi age ʼo te ʼu fānau, ʼe tonu ke akoʼi age e te ʼu mātuʼa ke nātou ʼoʼofa kia Sehova pea ke nātou taupau he ʼu felogoi lelei mo ia.
23 ʼI te fakatahi faka tisitilike “Akonaki fakaʼatua”, neʼe fai ai te akonaki ko tona kupu tāfito “Ke koutou gāue mālohi ki te hāofaki ʼo tokotou loto fale”. ʼO fakahā ai ki te ʼu mātuʼa te ʼu manatu kehekehe ke feala ai hanatou tokoni ki tanatou ʼu fānau. Ko te faʼahi ʼe ʼuluaki fakahā e te ʼu mātuʼa ko te foaki ʼo he faʼifaʼitaki lelei. ʼE koutou foaki anai ki takotou fānau he tokoni fakalaumālie ʼo lelei age ʼi te foaki ʼaē ʼo he akonaki loaloaga ʼo ʼuhiga mo te meʼa ʼaē ʼe tonu ke fai pea mo te meʼa ʼe mole tonu ke fai. Koutou tuku he faʼifaʼitaki, ʼaki takotou maʼuliʼi te ʼu fua ʼo te laumālie ʼi te loto fale, ki tokotou ʼohoana pea ki takotou ʼu fānau (Kal. 5:22, 23). Tokolahi ʼe nātou tokagaʼi takitokotahi ko te laumālie ʼo te ʼAtua ko te mālohi ʼe ina uga ki te meʼa ʼaē ʼe lelei. ʼE feala ke tokoni kia koutou ke koutou fakatonutonu ia te fakakaukau pea mo te loto ʼo ʼakotou fānau.
24 Neʼe toe fakahā foki ʼi te fakatahi ko te ʼu mātuʼa ʼe tonu ke nātou foaki he faʼifaʼitaki ʼi te ako takitokotahi, ʼi te ʼolo ʼaē ki te ʼu fono pea mo te kau ki te fai faka mafola. Kapau ʼe koutou palalau fakafiafia ki te moʼoni ʼi tokotou ʼapi, kapau ʼe koutou faiva ʼi te fai faka mafola, pea ʼe koutou tokaga ki takotou ako takitokotahi, ʼe koutou fakaloto mālohi ai anai takotou fānau ke nātou tokakaga fakamalotoloto ki te ʼu meʼa fakalaumālie.
25 Kapau neʼe teuteu fakalelei te ako faka tohi-tapu faka famili, ʼo fai tuʼumaʼu pea mo ʼaoga ʼe feala ia ke lelei pea mo fakafiafia; ʼo feala ai ke ina fakapipiki te ʼu noʼo ʼo te famili. Koutou toʼo he temi moʼo fakahū ʼo te moʼoni ki te loto ʼo takotou fānau (Taag. 23:15). Logope e tokolahi te ʼu famili ʼe nātou fakaʼaogaʼi te temi ʼaia moʼo teuteuʼi ai Te Tule Leʼo, ʼe ko he meʼa fakaloto mālohi anai he tokaga ki he faʼahi tāfito ʼe ʼaoga ki te famili. Fai he ʼu fehuʼi ke tou mahino ai ki tana manatu pea mo fakalogo ki te ʼu manatu ʼa nātou takitokotahi ʼe ko he meʼa lelei mo fakatupu fiafia. Ko te fai ʼo he ako ʼe fua lelei ki te famili katoa ʼe mole ko he meʼa faigafua ki te pule faka famili. Kae ʼe ko he fakapale ia mokā ʼe nātou tuputupu fuli ʼi te faʼahi fakalaumālie! ʼAki te tokaga ʼaē ke ʼaoga kia nātou takitokotahi, ʼe koutou fakatuʼu anai he maʼuli fakafiafia ʼi tokotou loto fale.
26 Ko te akonaki ʼaē ʼe koutou fai ʼaki te ʼofa ʼi te temi nei ʼe maʼuhiga moʼo hāofaki ʼo te maʼuli ʼo ʼakotou fānau (Taag. 22:6). ʼAki takotou manatuʼi te faʼahi ʼaia, ʼe faigafua ia te mahino e lagi ko te akonaki maʼuhiga ʼaia ʼe tonu ke koutou fai. ʼAua naʼa koutou manatu e koutou tokotahi pe ʼi te fai ʼo te gāue maʼuhiga pea mo makehe ʼaia. Koutou ako ʼo koutou tuku takotou falala katoa kia Sehova ke feala tana fakahā atu peʼe feafeaʼi te fakahoko ʼo tokotou ʼu maʼua faka famili. Kae mole gata aipe. ʼE ʼi ai ʼihi ʼe feala ke nātou foaki atu te taʼi tokoni lelei ʼaia.
27 Te tokoni ʼe feala ke fai e ʼihi: Ko te ʼu tagata ʼāfea ʼe feala ke nātou fakakau he ʼu tūpulaga, ʼo feiā foki mo tanatou ʼu mātuʼa, moʼo fakamaʼa ʼo te Fale ʼo te Puleʼaga. Fakaloto mālohiʼi te ʼu fānau ʼi te ʼu fono ʼo te kokelekasio. Ko te ʼu tagata ʼāfea pea mo te ʼu tagata faifekau faka minisitelio ʼaē neʼe hinoʼi ke nātou talanoa ki he alatike ʼi te fono gāue ʼe tonu anai ke nātou tokagaʼi te ʼu nima ʼo te ʼu tamaliki ʼaē ʼe hiki ʼi te ʼu fono. Kumi te ʼu faigamālie moʼo fakaʼaogaʼi ʼo te ʼu tūpulaga ʼaē ʼe nātou tuku he faʼifaʼitaki lelei ʼi te ʼu faʼifaʼitaki mo ʼanatou ʼu mātuʼa. ʼE feala te fakafehuʼi ʼo ʼihi pea ke nātou fai he ʼu fakamatala fakanounou.
28 Ke ʼaua naʼa koutou meʼa noaʼi te ʼu faiga ʼa te kau tūpulaga. Ko nātou ko he meʼa ʼaoga ʼi te kokelekasio. ʼAki tanatou aga lelei, tokolahi ʼe nātou ‘maʼuliʼi te akonaki ʼo totatou Hāofakiʼaga, te ʼAtua’. (Tito 2:6-10.) Ke koutou mahino lelei ʼe ʼaoga ke fakamālo ki te kau tūpulaga ʼaē ʼe kau ki te fono, tatau aipe peʼe siʼisiʼi. Ko te faʼahi ʼaia ʼe fakaloto mālohiʼi ai nātou ke nātou teuteu pea ke hoko atu tanatou faiga ʼi te temi ka haʼu. Ko takotou tokaga kia nātou ʼe maʼuhiga ia. ʼU tagata ʼāfea, ʼu tagata faifekau faka minisitelio, neʼe tuʼa fia takotou tokagaʼi te kau tūpulaga ʼo te kokelekasio ʼo koutou fakamālo age kia nātou ʼo ʼuhiga mo tanatou akonaki peʼe ko hanatou faʼifaʼitaki neʼe fai ʼi te fono?
29 Kau pionie, ʼe feafeaʼi takotou foaki takotou tokoni? He koʼe ʼe mole koutou toe vakaʼi takotou polokalama ke koutou tohi ai te ʼu tamaliki ʼaē ʼe kei ako ke kaugā gāue mo koutou ʼi he ʼu hoʼatā peʼe ko te ʼu fakaʼosi vāhaʼa? ʼE koutou palalau fakafiafia koa ki takotou gāue pionie katoa? ʼE koutou fakahā koa ʼi takotou aga ko te fai faka mafola ʼe fakatupu fiafia? ʼE koutou holi fakavilivili koa ʼo fakaloto mālohiʼi niʼihi ke nātou hū ki te gāue, tāfito te kau tūpulaga? Mokā koutou fai faka mafola ʼi te ʼu ʼapi, ko ʼakotou palalau ʼe lelei koa pea mo ʼaoga? Kapau koia ʼaia, mo koutou foki kau pionie ʼe koutou kau ki te ako ʼaia ʼe maʼuhiga age ʼi te ʼu gāue fuli.
30 Ko te kokelekasio katoa ʼe tonu anai ke nātou tuʼania fakalelei te ako maʼuhiga ʼa te kau tūpulaga. ʼE feala koa hakotou fai he ʼu fakatuʼutuʼu makehe ke koutou fai faka mafola mo nātou. ʼE feala koa hakotou fakataufai mo nātou he faʼifaʼitaki ki te fai faka mafola ʼi te ʼu ʼapi? ʼE koutou tokaga koa ki te ʼu fealagia moʼo fakaloto mālohiʼi ʼo he ʼu fakatuʼutuʼu fakalaumālie mokā koutou fai faka mafola fakatahi ʼi te minisitelio? ʼE tonu ke mahino ki te kau fai faka mafola fuli ko he fakatokaga veliveli ʼe feala ai ke uga te loto ʼo he tūpulaga ke ia ia he lotolelei ʼo ʼuhiga mo he ʼu fakatuʼutuʼu fakalaumālie, pea ʼe ʼaoga ki te temi ka haʼu.
31 ʼU tūpulaga koutou fakatokaga kia koutou: Kau tūpulaga, ʼe mātou fakaloto mālohiʼi koutou ke koutou nonofo ʼo fakalogo ki te ʼu akonaki ʼa Sehova pea ke koutou līaki te meʼa ʼe foaki atu e te mālama. Ke koutou ʼahiʼahiʼi tuʼumaʼu ia koutou ʼo koutou fakasiosio takotou aga pea mo ʼakotou manatu. Koteā takotou manatu ʼo ʼuhiga mo Sehova pea mo te meʼa ʼe loto ia ia ke koutou fai ʼi te ʼaho fuli? Koutou tauʼi mo tokotou mālohi katoa te ʼu manatu mālohi ʼa Satana (1 Tim. 6:12)? ʼUhi ko te hahaʼi, kae tāfito te kau tūpulaga, ʼe nātou loto ke leleiʼia nātou e te hahaʼi ʼaē ʼe taʼu tahi mo nātou, ʼe koutou fia fai koa te meʼa ʼaē ʼe kovi ohage ko te tokolahi (Ek. 23:2). Neʼe ʼiloʼi e te ʼapositolo ko Paulo ko te mālama ʼe ina uga mālohi te kau kilisitiano ke nātou muliʼi tona ʼu ala. — Lom. 7:21-23.
32 ʼE tonu ke maʼu he lototoʼa moʼo tauʼi ʼo te mālohi ʼo te mālama, ke kehekehe mo tona ʼu kaumeʼa ʼo te mālama, pea mo taupau te akonaki ʼa te ʼAtua. Ko te ʼu tagata ʼo te temi muʼa neʼe nātou aʼu ki te faʼahi ʼaia. Koutou manatuʼi te tagata lototoʼa ko Noe. Neʼe ina tauteaʼi te mālama katoa ʼaki tana tui ʼo nofo makehe ʼi te ʼu hahaʼi kaihaʼa ʼo tona temi (Hep. 11:7). Koutou tauʼi fakamālohi heʼe ʼaoga ia te faʼahi ʼaia. ʼAua naʼa koutou mulimuli ki te kau vaivai, te hahaʼi ʼaē ʼe manavasiʼi ki te tagata ʼaē ʼe mulimuli ʼi te tokolahi ʼe taki e Satana. Kae, ke koutou kumi te kaugā fagona ʼo nātou ʼaē ʼe ʼoʼofa kiai Sehova (Filp. 3:17). Ke koutou fakatahi mo he ʼu kaumeʼa ʼe hū anai mo koutou ki te mālama foʼou ʼaē ʼe fakapapau mai e te ʼAtua (Filp. 1:27). Ke koutou manatuʼi ko te ala pe e tahi ʼe ʼalu ki te maʼuli heʼegata. — Mat. 7:13, 14.
33 Kapau ʼe tou fiafia ʼi tatatou sisio ki te kau tūpulaga ʼe nātou vikiviki pea mo fakaʼapaʼapa ki totatou ʼAtua, ʼe lahi age anai foki tona fiafia! ʼE mole fai he mahalohalo ko Sehova ʼe ina leleiʼia mokā lahi te kau ʼa te kau tūpulaga ki te fakahā ʼo tana ʼu fakatuʼutuʼu fakaofoofo. Ko nātou “ko he tofiʼa” ʼe haʼu mai ia te ia, pea ko tona loto ke nātou maʼu te meʼa ʼaē ʼe lelei (Pes. 127:3-5; 128:3-6). ʼAki tana loto tokaga ohage ko tana Tāmai, neʼe fiafia Sesu Kilisito ʼi tana palalau mo te ʼu tamaliki, pea neʼe ina toʼo te temi moʼo fakaloto mālohiʼi ʼo nātou ke nātou tauhi kia Sehova. Neʼe ina fakahā kia nātou tona ʼofa (Maleko 9:36, 37; 10:13-16). ʼE tou tokaga koa ki te kau tūpulaga ohage ko te aga ʼa Sehova pea mo Sesu Kilisito? Ko te ʼu tūpulaga ʼo totatou kokelekasio ʼe mahino koa kia nātou ʼe sio ifo ia Sehova pea mo te kau ʼaselo ki tonatou agatonu pea mo tanatou faʼifaʼitaki lelei? ʼE tonu ke fakamālo pea mo fakaloto mālohiʼi nātou ke nātou fakafiafia ia Sehova ʼaki tanatou fai he ʼu fakatuʼutuʼu fakalaumālie. Kau tūpulaga, koutou haga fai he ʼu fakatuʼutuʼu ʼe koutou maʼu ai anai he ʼu tapuakina ʼi te temi nei pea mo te temi ka haʼu.