Ko Te ʼu Tali Ki ʼAkotou ʼu Fehuʼi
◼ E feafeaʼi hatatou fai he ʼu tali ʼe lelei ʼi te ʼu fono?
ʼE tou nonofo ʼo ʼamanaki ki te ʼu fono ʼo te kokelekasio ʼaē ʼe fai ʼi te vāhaʼa fuli. ʼE tou maʼu ai he faigamālie ke tou fakahā ai tatatou tui pea mo tou fakaloto mālohiʼi ai niʼihi ʼaki ʼatatou ʼu tali. (Taag. 20:15; Hep. 10:23, 24) ʼE tonu ke tou faka ʼuhigaʼi tatatou ʼu tali ohage ko he pilivilesio pea ke tou faiga ke tou tali tuʼumaʼu. E feafeaʼi koa hatatou fai fakalelei te faʼahi ʼaia?
Ko te ʼuluaki faʼahi ʼe tonu ke tou fai ke tou teuteu. ʼE maʼuhiga ke tou lau pea mo tou fakakaukauʼi fakatomuʼa te alatike. Tou faiga ke tou mahino ki te ʼuhiga moʼoni ʼo te meʼa ʼaē ʼe talanoa kiai te alatike. Logope la ko he alatike neʼe kua ʼosi talanoa kiai, tou faiga ke tou mahino ki te ʼu puani foʼou ʼaē ʼe fakahā ʼi te alatike. Tou taupau maʼu te kupu tāfito ʼo te alatike. ʼI te temi ʼaē ʼe tou teuteuʼi ai he ʼu tali ʼi he tohi faka Tohi-Tapu ʼaē ʼe talanoa ki he ako loloto ʼo he tohi ʼo te Tohi-Tapu, ohage la ko te tohi Fakahā, tou faigaʼi ke tou ʼiloʼi te pikipikiga ʼo te vaega tāfito ʼo te alatike mo te ʼu vaega ʼaē ʼe tuʼu ʼi ai. Ko takotou mulimuli ki te ʼu tokoni ʼaia ʼe nātou uga anai te fealagia ʼo takotou fakakaukau. Ko te faʼahi ʼaia ʼe tokoni anai kia koutou ke koutou teuteuʼi he ʼu tali ʼe lelei pea ke koutou fiafia ʼi takotou kau ʼaē ki te ʼu fono.
Ko te ʼu tali ʼaē ʼe lelei ʼe totonu, ʼe nounou, pea ʼe fakatafito ki te nusipepa ʼaē ʼe tou lolotoga ako. Ko te ʼuluaki tali ʼe tonu ke tali fakahagatonu ki te fehuʼi, pea hilifaki atu leva kiai he tahi age ʼu puani. ʼE ʼaoga ke tou tekeʼi te ʼu tali loaloaga, te ʼu tali ʼe mole hona ʼuhiga heʼe pulinoa ai te temi pea ʼe mole feala ai te tali ʼa ʼihi. Koutou tali ʼaki takotou ʼu palalau māhani, kae ʼaua naʼa koutou lau te ʼu kupu ʼaē ʼe tuʼu ʼi te tohi. Ko te ʼu tali ʼaē ʼe hoa atu ki ai ʼe feala ko ni ʼu puani ʼo ʼuhiga mo te ʼu vaega faka Tohi-Tapu ʼaē ʼe tuʼu ʼi ai. Koutou fakalogo lelei ki te ʼu tali ʼaē ʼe fai e ʼihi naʼa koutou toe talanoa pe ki te ʼu manatu ʼaia.
ʼE lelei hakotou hiki tuʼa lahi tokotou nima kae ʼaua leva naʼa koutou hiki pe ʼi te ʼu palakalafe fuli. ʼE mātou fakaafe atu te kau tūpulaga ke fai hanatou tali. Kapau ʼe koutou lotolotolua ʼi te fai ʼo hakotou tali, ʼe feala ke koutou ʼolo ki te tēhina ʼaē ʼe ina takitaki te fono ʼo fakahā fakatomuʼa ki ai te palakalafe ʼaē ʼe koutou fia fai ai hakotou tali, pea ʼe feala anai ke ina faka fealagia atu ke fai hakotou tali.
Ko tatou fuli, ʼe tonu anai ke tou faiga fakamalotoloto ke tou talanoa ki he meʼa ʼi te ʼu fono ʼo te kokelekasio ʼaē ʼe fakamaʼua ki te hahaʼi ʼaē ʼe kau ki ai ke fai hanatou ʼu tali. Tou manatuʼi, ko te fua lelei ʼo te ʼu taʼi faʼahiga fono ʼaia ʼe fakalogo ki te lahi ʼo totatou lotolelei pea mo te maʼuhiga ʼaupito ʼo tatatou ʼu tali.—Pes. 26:12.