Tou Fakavikiviki Kia Sehova “ ʼi Te Lotolotoiga ʼo Te Kokelekasio”

KO TE ʼu fono faka Kilisitiano ʼe ko he fakatuʼutuʼu neʼe fai e Sehova ke mālohi tuʼumaʼu ai tana hahaʼi ʼi te faʼahi fakalaumālie. ʼAki tatatou kau tuʼumaʼu ki te ʼu fono, ʼe tou fakahā ai tatatou loto fakafetaʼi ki te ʼu fakatuʼutuʼu ʼa Sehova. Tahi ʼaē meʼa, ʼe feala ai ke tou “uga [totatou ʼu tēhina] ki te ʼofa pea mo te ʼu gāue matalelei,” pea ʼe ko he faʼahi maʼuhiga ʼaia moʼo fakahā tatatou feʼofaniʼaki. (Hepeleo 10:24, MN; Soane 13:35) ʼE tou lava uga feafeaʼi totatou ʼu tēhina ʼi te ʼu fono?

Tou Fai He ʼu Tali Ia Muʼa ʼo Te Hahaʼi

Neʼe faitohi fēnei ia te Hau ko Tavite ʼo ʼuhiga mo ia: “ ʼE ʼau tala anai tou huafa ki toku ʼu tēhina; ʼi te lotolotoiga ʼo te kokelekasio ʼe ʼau vikiviki anai kia te koe. ʼE tupu anai taku fakavikiviki ʼi te fakatahi lahi ʼuhi ko koe.” “ ʼE ʼau faka kolōlia anai kia te koe ʼi te kokelekasio lahi; ʼi te hahaʼi tokolahi ʼe ʼau fakavikiviki anai kia te koe.” “Neʼe ʼau tala te logo lelei ʼo te faitotonu ʼi te kokelekasio lahi. Koʼeni! ʼE mole ʼau tāʼofi toku ʼu laugutu.”​—Pesalemo 22:22, 25; 35:18; 40:9.

ʼI te temi ʼo te ʼapositolo ko Paulo, mokā fakatahitahi te kau Kilisitiano moʼo fai tanatou tauhi, neʼe toe feiā pe tanatou fakahā ʼo tanatou tui kia Sehova pea mo tanatou faka kolōlia kia te ia. ʼI te ʼaluʼaga ʼaia, neʼe nātou fefakaloto mālohiʼaki pea mo feʼugaʼaki ki te ʼofa pea mo te ʼu gāue lelei. ʼI totatou temi, ʼi te kua hili ʼo ni ʼu sēkulō talu mai te temi ʼo Tavite pea mo Paulo, ʼe tou “mamata [moʼoni] ki te fakaovi mai o te Aho [ʼo Sehova].” (Hepeleo 10:24, 25) ʼE iku māmālie te tuʼu ʼaenī ʼa Satana ki tona fakaʼauha, pea ʼe haga tuputupu pe anai te ʼu faigataʼaʼia. ʼE ‘tonu ke toe laka age tatatou faʼa kātaki’ ʼi te temi nei. (Hepeleo 10:36) Kanapaula neʼe mole ʼi ai hotatou ʼu tēhina, ko ai ʼaē ka ina fakaloto mālohiʼi anai tatou ke tou faʼa kātaki?

Ia ʼaho nei, ohage ko te ʼu temi muʼa, ʼe maʼu e te hahaʼi tui te ʼu faigamālie ke nātou fakahā tanatou tui “ ʼi te lotolotoiga ʼo te kokelekasio.” Ko te faigamālie ʼaē ʼe foaki ki te hahaʼi fuli ʼe ko te tali ki te ʼu fehuʼi ʼaē ʼe fai ʼi te ʼu fono ʼo te kokelekasio. ʼAua naʼa tou meʼa noaʼi te ʼu lelei ʼaē ʼe tou maʼu mai te faʼahi ʼaia. Ohage la ko te ʼu tali ʼaē ʼe tou fakahā ai peʼe feafeaʼi te tauʼi peʼe ko te tekeʼi ʼo te ʼu fihifihia, ʼe nātou fakaloto mālohiʼi totatou ʼu tēhina ke nātou mulimuli ki te ʼu pelesepeto ʼa te Tohi-Tapu. Ko te ʼu tali ʼaē ʼe nātou fakamahino te ʼu vaega faka Tohi-Tapu ʼaē ʼe mole tuʼu katoa, peʼe ko he ʼu manatu neʼe kita maʼu ʼi te ʼu kumi ʼaē neʼe tou fai, ʼe feala ke fakaloto mālohi ai ʼihi ke nātou hikihiki ke toe lelei age tanatou ʼu agamāhani ʼaē ki te ako.

ʼI tatatou ʼiloʼi ʼaē ʼe fua lelei anai kia tatou pea mo ʼihi tatatou fai he ʼu tali ʼi te ʼu fono, ʼe ina uga ai ia tatou kau Fakamoʼoni ʼa Sehova fuli, ke tou tauʼi tatatou umiuminoa pea mo tatatou mataku. ʼE maʼuhiga tāfito ke fai he ʼu tali ʼa te ʼu tagata ʼāfea pea mo te ʼu tagata faifekau faka minisitelio ʼi te ʼu fono, heʼe ko nātou ʼaē ʼe tonu ke nātou tuku te faʼifaʼitaki ʼi te fai ʼo he ʼu tali pea mo te kau ki te ʼu fono. Kae ʼe lava feafeaʼi ki he Kilisitiano hana tuputupu, mo kapau ʼe faigataʼa te faʼahi ʼaia kia ia?

Ko He ʼu Tokoni Ke Tou Tuputupu

Tou manatuʼi ʼe kau te faʼahi ʼaia ki te tauhi kia Sehova. Ko te tuagaʼane ʼe maʼuli ʼi Siamani ʼe ina fakamatala tana manatu ʼo ʼuhiga mo te ʼu tali ʼaē ʼe ina fai. “Ko taku ʼu tali, ʼe ko taku tali totonu ʼaia ki te ʼu faiga ʼa Satana moʼo tāʼofi te hahaʼi ʼa te ʼAtua ke mole nātou fakahā tanatou tui.” Ko te tēhina neʼe hoki papitema ʼe toe kau mo ia ki te kokelekasio ʼa te tuagaʼane ʼaia, ʼe ina ʼui fēnei: “ ʼE lahi ʼaupito taku faikole ʼo ʼuhiga mo taku ʼu tali.”

Tou teuteu lelei. Kapau ʼe mole koutou vakaʼi fakatomuʼa te alatike ʼaē ka tou ako, pea ʼe faigataʼa anai kia koutou te fai ʼo he ʼu tali, pea ʼe mole faʼa lelei anai takotou ʼu tali. ʼE koutou maʼu anai he ʼu tokoni moʼo fai he ʼu tali ʼi te ʼu fono, ʼi te tohi Tirez profit de l’École du ministère théocratique, ʼi te pasina 70.a

Tou fakatuʼutuʼu ke tou tali ʼi te ʼu fono fuli. Ko tona faka ʼuhiga ke koutou teuteuʼi he ʼu tali e lahi, heʼe kapau ʼe tuʼa lahi te hiki ʼo tokotou nima pea ʼe feala anai ke hinoʼi koutou e te tēhina ʼaē ʼe ina takitaki te fai palalau. ʼE feala ke koutou fakahā fakatomuʼa age kia ia te ʼu fehuʼi ʼaē neʼe koutou teuteuʼi ke koutou tali kiai. ʼE tokoni lahi te faʼahiga fai ʼaia tāfito la mo kapau ko takotou kamata tali ʼaia ʼi te ʼu fono. Mai tona ʼaluʼaga ʼaē ʼe feala ke faigataʼa te hiki ʼo tokita nima “ ʼi te kokelekasio lahi,” koia ʼe koutou lotomālohi anai ʼo tali mo kapau ʼe koutou ʼiloʼi kua hoko mai takotou palakalafe pea ko te tēhina ʼaē ʼe ina fai te fono ʼe ina kumi anai tokotou nima.

Tou tali ʼi te kamata. ʼE liliu anai ʼo faigataʼa mo kapau ʼe tou fakaholomuli tatatou fai he tali. Ka fai he fono, ʼe ko he puleʼaki lelei hatatou fai he ʼu tali ʼi te kamata. ʼE koutou punamaʼuli anai ki te faifai ʼo faigafua takotou tali tuʼa lua peʼe tuʼa tolu, heʼe kua koutou lavaʼi te faigataʼaʼia moʼo fai te ʼuluaki tali.

Tou vakaʼi te faʼahi ʼaē ʼe lelei ke tou heheka ai. ʼE manatu e ʼihi ʼe faigafua hanatou fai he ʼu tali mokā nātou heheka ʼi muʼa. ʼE mole fakaleluʼi ai nātou, pea ʼe sio lelei ai te tēhina takitaki ki tonatou nima. Kapau ʼe koutou ʼahiʼahi te faʼahi ʼaia, koutou manatuʼi ʼo palalau leʼo lahi ke logoʼi koutou e te hahaʼi fuli, tāfito la mokā ʼe mole fakaʼaogaʼi e te kokelekasio he ʼu mikolo.

Tou fakalogo lelei. ʼE tokoni atu te faʼahi ʼaia ke mole koutou toe tali ki te ʼu meʼa ʼaē kua ʼosi tali kiai he tahi kehe. Pea ʼi takotou fakalogo ki te ʼu tali ʼa ʼihi, ʼe lagi koutou manatuʼi ai anai he vaega peʼe ko he manatu ʼe feala ke koutou hilifaki ki te tali ʼaē kua ʼosi fai. ʼI ʼihi temi, ʼe feala hakotou fakamatala he meʼa neʼe hoko kia koutou, ʼe ʼi ai tona pikipikiga mo te meʼa ʼaē ʼe tou palalau kiai. ʼE ʼaoga moʼoni te ʼu tali ʼaia.

Koutou faiga ke koutou tali ʼaki takotou ʼu palalau. Ko takotou lau te tali ʼi te alatike ʼaē ʼe ako ʼe hā ai kua koutou maʼu te tali totonu, pea ʼe lagi ko he kamata lelei ʼaia moʼo fai he ʼu tali. Kae ko takotou tuputupu moʼo fai ʼo he ʼu tali ʼaki takotou ʼu palalau ʼa koutou totonu, ʼe ina fakahā ai kua koutou mahino ki te puani. ʼE mole tonu leva ke tou lau fuli te ʼu kupu ʼaē ʼe tohi, heʼe mole tou toe fia lau pe te ʼu meʼa ʼaē ʼe tohi ʼi tatatou ʼu tohi.

Tou tali ʼo mulimuli ki te ʼu meʼa ʼaē ʼe tou ako. ʼE mole lelei te fai ʼo he ʼu tali ʼe mole ʼalutahi mo te meʼa ʼaē ʼe tou vakaʼi, peʼe ina fakamamaʼo tatou mai te ʼu manatu tāfito. Ko tona faka ʼuhiga ʼe tonu ke pipiki takotou ʼu tali ki te manatu ʼaē ʼe tou vakaʼi. Kapau ʼe tou fai feiā, ʼe tou lagolago anai ki he fai palalau fakaloto mālohi ʼi te faʼahi fakalaumālie ʼo ʼuhiga mo te kupu tāfito ʼaē ʼe lolotoga vakaʼi.

Tou fakatuʼutuʼu ke tou fakaloto mālohi. Mai tona ʼaluʼaga ʼaē ʼe fai tāfito te ʼu tali moʼo fakaloto mālohiʼi te hahaʼi, ʼe tonu ai ke tou faiga ke ʼaua naʼa tou fai he ʼu palalau ʼe feala ke fakaloto vaivai ai ia nātou. Tahi ʼaē meʼa, ʼaua naʼa koutou palalau ki te ʼu manatu fuli ʼaē ʼe tuʼu ʼi te palakalafe, heʼe mole koutou faka fealagia anai ki ʼihi ke nātou talanoa ki he tahi ʼu manatu. Ko te ʼu tali ʼaē ʼe loaloaga peʼe faigataʼa fau, ʼe mole tokoni mai anai ke tou mahino lelei ki tona faka ʼuhiga. Ko te ʼu tali nounou, ʼe feala ke malave moʼoni, pea ʼe fakaloto mālohiʼi ai te hahaʼi foʼou ke nātou fai he ʼu tali nounou.

Te Gāue ʼa Nātou ʼAē ʼe Nātou Takitaki Te ʼu Fono

Ko ia ʼaē ʼe ina takitaki te fono ʼe tonu ke ina fakaloto mālohiʼi pea ʼe ina maʼu mo te tahi maʼua maʼuhiga. ʼE ina fakahā tana tokaga moʼoni ki te ʼu tali fuli ʼaē ʼe fai, ʼo fakalogo lelei pea mo ina sioʼi ia ia ʼaē ʼe tali, kae ke mole ina sioʼi he tahi meʼa. ʼE mole lelei anai mo kapau neʼe mole ina fakalogo lelei, heʼe ina toe fai liuliuga anai te tali, peʼe ina fai anai he fehuʼi kae neʼe hoki ʼosi atu pe tona tali kiai.

ʼE toe fakaloto vaivai foki mo kapau ko te tēhina ʼaē ʼe ina takitaki te fono ʼe ina toe fai tuʼumaʼu te tali ʼaki tana ʼu palalau ʼaʼana, ohage ʼe ina fakahā ai neʼe mole faʼa lelei te tali ʼaē neʼe fai. Kae ʼe ko he meʼa fakaloto mālohi mo kapau ʼe fai he tahi ʼu tali moʼo lagolago ki he manatu maʼuhiga. Ko te ʼu faʼahiga fehuʼi ʼaenī ʼaē ʼe nātou uga ke tou fai he ʼu tali ʼe lelei, pea mo ʼaoga moʼoni: ‘ ʼE tou lava maʼuliʼi feafeaʼi te faʼahi ʼaia ʼi totatou kokelekasio?’ peʼe ‘Koteā te ʼu vaega ʼi te palakalafe ʼe lagolago ki te tali?’

ʼE mahino ia, ʼe tonu ke tou fakamālo lahi ki te hahaʼi ʼaē ʼe foʼofoʼou peʼe umiuminoa mokā nātou fai hanatou tali. ʼE feala ke fai te faʼahi ʼaia ʼi te ʼosi ʼo te ako ke mole ufiufi ai, pea ʼe feala ai kia ia ʼaē ʼe ina takitaki te ako ke ina foaki he tahi ʼu tokoni kia nātou mokā ʼe ʼaoga.

ʼI te agamāhani, kapau ʼe ko he tokotahi pe ʼaē ʼe palalau, pea ʼe mole tou fia hoko atu ia te fai palalau mo ia. Ko nātou ʼaē ʼe nātou fakalogo ʼe feala ke nātou manatu ʼe mole he ʼaoga ke nātou palalau. Ko te meʼa pe ʼaē ka nātou fai, ʼe ko te fakalogo peʼe mole fakalogo. ʼE feala ke hoko te meʼa ʼaia mo kapau ʼe lahi fau te palalau ʼa te tēhina ʼaē ʼe ina takitaki te ako. ʼI ʼihi temi, ko te meʼa ʼaē ʼe lelei ke ina fai, ʼe ko te faka palalauʼi ia te kokelekasio pea mo ina fai he tahi ʼu fehuʼi moʼo uga ke nātou fakakaukauʼi te alatike ʼaē ʼe ako. ʼE mole tonu ke lahi fau tana fai te faʼahi ʼaia.

Ko ia ʼaē ʼe ina takitaki te fono ʼe mole maʼua ke ina hinoʼi atu aipe ia ia ʼaē neʼe ina ʼuluaki hiki tona nima. Heʼe feala ke lotovaivai ai nātou ʼaē ʼe nātou loto ki he kiʼi temi ke nātou fakamanatu tanatou ʼu tali. Kapau ʼe ʼai muʼa hana kiʼi talitali, pea ʼe ina foaki anai te faigamālie ʼaia ki he tahi neʼe mole heʼeki fai hana tali. ʼE ina toe fakahā anai he fakasiosio poto, ʼo mole ina hinoʼi he ʼu kiʼi tamaliki ke nātou tali ki he ʼu fehuʼi ʼe mole nātou mahino kiai.

E feafeaʼi mo kapau ʼe hala te tali? Ko ia ʼaē ʼe ina takitaki te fono ʼe mole tonu ke ina fai he meʼa ke ufiufi ai ia ia ʼaē neʼe tali. Ko te ʼu tali, tatau aipe peʼe mole totonu, kae ʼe ʼi ai pe te ʼu manatu ʼe moʼoni. Kapau ʼaki he aga fakaʼeteʼete, ʼe ina filifili he manatu neʼe totonu, ʼo ina toe fai te fehuʼi peʼe ina toe fai he tahi age fehuʼi, pea ʼe feala anai ke ina fakatonutonuʼi te tali kae mole ina fai he meʼa ke lainoa ai he tahi.

Moʼo fakaloto mālohiʼi te kokelekasio ke nātou fai he ʼu tali, ʼe lelei mo kapau ʼe mole fai e ia ʼaē ʼe ina takitaki te ako te ʼu fehuʼi ohage la, ‘ ʼE ʼi ai koa he tahi manatu?’ ʼI te vave ʼosi ʼo te alatike, ʼe lagi tou māhani ʼi te ʼui fēnei ‘Kapau neʼe mole heʼeki koutou fai hakotou tali, ko tona temi faigamālie ʼaenī.’ ʼE mole lagi ko he valoki ʼaē ʼe tou fai, kae ko te taʼi palalau ʼaia ʼe mole ina fakaloto mālohiʼi he tahi ke ina tali faʼifaʼitaliha. ʼAki tanatou ʼu palalau, ʼe mole tonu ke hage maʼa te ʼu tēhina ʼe tukugakoviʼi nātou he neʼe mole nātou tali ʼi te kamata ʼo te ako. Kae ʼe tonu ke fakaloto mālohiʼi nātou ke nātou vaevae te ʼu meʼa ʼaē ʼe nātou ʼiloʼi, heʼe ko te fakahā ʼaia ʼo tonatou ʼofa. Tahi ʼaē meʼa, kapau ko ia ʼaē ʼe ina takitaki te ako, kua ina ʼosi hinoʼi he tahi ke fai hana tali, ʼe lagi lelei anai ke mole ina ʼui fēnei: “ ʼOsi ʼaia, pea tou fakalogo anai ki te tali ʼa te Tēhina ʼaē pea mo te Tuagaʼane ʼaē.” Ko ia ʼaē ʼe ina takitaki te ako ʼe tonu ke fakalogo muʼa ki te tali, pea ina vakaʼi leva peʼe ʼaoga ke fai he tahi ʼu tali.

ʼE Ko He Pilivilesio Te Fai ʼo He ʼu Tali

Ko te kau ki te ʼu fono ʼe ko he maʼua ʼi te faʼahi fakalaumālie; ko te fai ʼo he ʼu tali ʼe ko he pilivilesio. Kapau ʼe lahi tatatou kau ki te ʼaluʼaga makehe ʼaia moʼo fakavikiviki kia Sehova “ ʼi te lotolotoiga ʼo te kokelekasio,” pea ʼe lahi anai tatatou mulimuli ki te faʼifaʼitaki ʼo Tavite, pea mo tatatou faka maʼuhigaʼi ia te tokoni ʼa Paulo. Ko tatatou tali ʼi te ʼu fono ʼe ina fakamoʼoni ai ʼe tou ʼofa ki totatou ʼu tēhina pea ʼe tou kau ki te kokelekasio lahi ʼaia ʼa Sehova. ʼE mole he tahi age koga meʼa ʼe tou fia nonofo ai ʼi tatatou “sio ki te fakaōvi mai ʼo te ʼaho.”​—Hepeleo 10:25, MN.

[Kiʼi nota]

[Paki ʼo te pasina 20]

ʼE maʼuhiga ke kita fakalogo pea mo fai he ʼu tali ʼi te ʼu fono faka Kilisitiano

[Paki ʼo te pasina 21]

Ko te tēhina ʼaē ʼe ina takitaki te ako ʼe tokaga moʼoni ki te ʼu tali fuli ʼaē ʼe fai