Kua Fetogi Te Temi
1 ʼE ʼui fēnei mai e te Tohi-Tapu kia tatou “ko te ʼaluʼaga ʼo te malamanei ʼe lolotoga fetogi nei.” (1 Ko. 7:31) ʼI moʼoni leva ʼo te ʼu palalau ʼaia ia ʼaho nei! ʼO feiā aipe mo totatou maʼuli, neʼe tou mamata ki te ʼu fetogi mālohi ʼi te fakakaukau, pea mo te aga ʼa te hahaʼi ʼi te ʼu sosiete fakatagata fuli. Kapau ʼe tou loto ke aʼu te logo ʼo te Puleʼaga ki te hahaʼi, pea ʼe tonu ke faka ʼalutahi te fakahā ʼo te logo ʼaia mo te ʼu fetogi ʼaē ʼe hoko ʼi totatou temi. ʼE tou fia fakahā te logo lelei ke feala he fia logo kiai ʼa te hahaʼi pea ke lave ki tonatou ʼu loto.
2 ʼI te ʼu taʼu kua hili, neʼe mole tatau te fai fagonogono ʼi te ʼatu ʼu fenua kehekehe, koteʼuhi ko te tokolahi ʼo te hahaʼi neʼe maʼuʼuli ʼi te tokalelei, pea neʼe nātou nofo ʼi te fīmālie. Ko te lotu neʼe ko he faʼahi maʼuhiga ʼi tonatou maʼuli. Neʼe lahi ʼaupito te tokagaʼi ʼo te Tohi-Tapu. ʼI te ʼu temi ʼaia neʼe tautau fai ki te kau Fakamoʼoni te ʼu fehuʼi ʼo ʼuhiga mo te lotu. Ia ʼaho nei, kua nonofo te hahaʼi ʼi te tuʼania. Kua meʼa noaʼi te lotu. Ko te tokosiʼi ʼe tui ki te Tohi-Tapu. Pea ki te tokolahi, ko te akonaki ʼo te evolisio kua ina maumauʼi te tui ki te ʼAtua.
3 Neʼe fakatokagaʼi fēnei e te tagata taupau feʼaluʼaki: “ ʼI te temi nei, ʼe hage ʼe lahi ʼaupito te ʼu faigataʼaʼia pea mo te ʼu fihifihia ʼi te maʼuli ʼo te hahaʼi, koia ʼe ʼaoga ai ke tou akoʼi ia nātou ʼo ʼuhiga mo te maʼuli.” ʼI te agamāhani, ko te ʼu meʼa ʼaē ʼe fia logo kiai te hahaʼi, ko te ʼu meʼa ʼe ʼaoga kia nātou totonu, ki tonatou ʼu famili, pea mo te ʼu meʼa ʼaē ʼe nātou tuʼania kiai. Ko te ʼu meʼa ʼaia ʼe nātou talanoa kiai mokā nātou fefakatahiʼaki mo niʼihi. ʼE ʼaoga ke tou manatuʼi te faʼahi ʼaia ʼi tatatou gāue fai faka mafola.
4 Ko Te Puleʼaga ʼo Te ʼAtua ʼe Ko Te ʼAmanaki Pe ʼAia e Tahi Ki Te Temi Ka Haʼu: ʼE lahi te hahaʼi ʼe siʼisiʼi tanatou falala ki te ʼu puleʼaga fakatagata. ʼI tanatou manatu ʼe mole feala ʼi he ʼaho ʼo tonatou maʼuli, ke nātou sisio ki he mālama ʼe lelei age. Ko te lotu hala neʼe mole ina foaki age kia nātou he ʼamanaki. Ko te tupuʼaga la ʼaia, ʼaē ʼe ʼaoga ai ke logo te hahaʼi ki te logo lelei ʼo te Puleʼaga ʼo te ʼAtua. Tou fakahā age peʼe feafeaʼi anai te foaki e te Puleʼaga ʼaia te ʼu puleʼaki ki te ʼu fihifihia fuli ʼaē ʼe tau mo te hahaʼi.
5 Ko Te Tohi-Tapu ʼe Ko Te Matapuna Pe ʼAia e Tahi ʼe Lelei Moʼo Takitaki ʼo Tatou: Ko te kaugamālie ia ʼaho nei neʼe kākāʼi e te kau takitaki lotu ʼaē ʼe falala ki te poto fakatagata pea mo te ʼu filosofia fakamālama. Kae ʼe tonu ke mahino ki te hahaʼi “ ʼe mole ʼa te tagata ʼaē ʼe haʼele te takitaki ʼo tana haʼele.” (Sel. 10:23) Ko te ako lahi age ʼaē ʼe feala ke nātou ako ʼe ko ia ʼaenī, ʼe tonu ke ‘tuku tanatou falala kia Sehova ʼaki tonatou loto katoa pea ʼaua naʼa nātou falala ki tonatou ʼatamai totonu.’ (Taag. 3:5) Tatau aipe peʼe kua fetogi te temi, ka ko te Tohi-Tapu ʼe mole heʼeki fetogi ia. Koia, ʼi totatou minisitelio ʼe tonu ke tou fakahā tuʼumaʼu te maʼuhiga ʼo te Folafola ʼa te ʼAtua, ʼo akoʼi te hahaʼi ke nātou mahino ʼe ko he tohi ia ʼe haʼu mai te ʼAtua, pea ʼe ʼaoga moʼo takitaki ʼo tatou. (2 Tim. 3:16, 17) Moʼo fakahoko te fakatuʼutuʼu ʼaia, ʼe tonu ke tou fakahā te maʼuhiga ʼo te Tohi-Tapu ʼi muʼa ʼo te hahaʼi, ʼaki tatatou fakaʼaogaʼi ʼi tatatou ʼu palalau, ʼo tou fakaʼaogaʼi moʼo tali ki tanatou ʼu fehuʼi, pea mo tou fakahā ʼe ʼaoga ke tou akoʼi pea mo tou maʼuliʼi tana ʼu tokoni fakapotopoto.
6 Logope la kua lolotoga fetogi nei te temi, kae ʼe mole fetogi tatatou ʼu fakatuʼutuʼu ʼi te minisitelio. ʼE tonu ke tou faka mafola te logo lelei ʼo te Puleʼaga, ke tou fakamālohi tatatou falala ki te Folafola ʼa te ʼAtua, pea ke tou tokoni ki te hahaʼi ke nātou mahino ki te ʼaoga ʼo te ako ʼo te Tohi-Tapu ʼaē mo tatou. Ko te meʼa ʼaē ʼe tou talanoa kiai ʼe tonu ke ʼalutahi mo te ʼu meʼa ʼaē ʼe ʼaoga ki te hahaʼi ʼaē ʼe tou fai faka mafola kiai. Kapau ʼe tou fai te faʼahi ʼaia, ʼe feala ke tou vaevae ai te logo lelei mo te hahaʼi pea ke tou maʼu ai te hahaʼi tokolahi.—1 Ko. 9:19, 23.