Te Tali Ki ʼAkotou ʼu Fehuʼi
◼ ʼE tonu ke tohi feafeaʼi te tuʼasila ʼa te kau Fakamoʼoni ʼa Sehova ʼi te tohi ʼo te ʼu numelo telefoni?
Neʼe fakatokagaʼi ʼe lahi te ʼu faʼahiga tohi ʼo te ʼu tuʼasila ʼa te kau Fakamoʼoni ʼa Sehova ʼi te tohi ʼo te ʼu numelo telefoni. Ko ʼihi ʼe mole kei nātou ʼiloʼi lelei peʼe feafeaʼi te fakaʼaluʼalu ʼo te ʼu tuʼasila ʼa te kau Fakamoʼoni ʼa Sehova, pea ko ʼihi ʼe mole feʼauga te ʼu meʼa ʼaē neʼe nātou ʼai ʼi te tohi ʼo te ʼu numelo telefoni. Kapau ʼe ʼi ai he telefoni ʼo te kokelekasio ʼi te Fale ʼo te Puleʼaga, ʼe maʼuhiga ke tohi lelei te tuʼasila ʼo te Fale ʼo te Puleʼaga ʼi te tohi ʼo te ʼu numelo telefoni, ke faigafua ai te faka felogoi ʼa te hahaʼi ʼaē ʼe fia logo ki te moʼoni pea mo ʼotatou ʼu tēhina mo te kokelekasio ʼo te fenua.
Koʼeni te meʼa ʼaē ʼe tonu ke koutou tohi ʼi te tohi ʼo te ʼu numelo telefoni: ko te kau Fakamoʼoni ʼa Sehova, (te kolo), (te fenua), ʼo hoa atu kiai te tuʼasila pea mo te numelo telefoni ʼo te Fale ʼo te Puleʼaga.
ʼI te ʼu kolo ʼaē ʼe lahi ai te ʼu kokelekasio, ʼe tokoniʼi mai ke tou tohi fēnei: ko te kau Fakamoʼoni ʼa Sehova, (te kolo), (te fenua), ʼo tohi he lisi ʼaki te higoa ʼo te ʼu kokelekasio, ʼe fefakahoahoaʼaki ʼo mulimuli ki te ʼu ʼuluaki mataʼi tohi ʼo te ʼu higoa ʼaia, mo tohi te tuʼasila ʼo te Fale ʼo te Puleʼaga, pea mo te ʼu numelo telefoni ʼo te ʼu kokelekasio.
ʼE feala ke fai he fakatuʼutuʼu ʼi te kokelekasio peʼe fai he tahi numelo telefoni. Kapau ʼe koutou fakaʼaogaʼi he Fale ʼo te Puleʼaga mo he tahi kokelekasio ʼe tuʼu ʼi he tahi kolo, ka mole tuʼu ʼi te tohi ʼaē ʼe tuʼu ai te ʼu numelo telefoni, ko te higoa ʼo te kolo ʼaia ʼe tonu foki ke tohi fakatahi mo te tuʼasila pea mo te numelo telefoni ʼo te Fale ʼo te Puleʼaga.