E Feafeaʼi Hakotou Tali Ki Te Masini Tali Telefoni?

Ko te telefoni ʼe ko he meʼa gāue lelei moʼo faka mafola ki te hahaʼi ʼaē ʼe mole feala ke maʼu atu ʼi tonatou ʼapi, peʼe kia nātou ʼaē ʼe maʼuʼuli ʼi he ʼu telituale ʼe mole tou lava aʼu kiai. Kae kua tokolahi te hahaʼi ʼaē ʼe mole kei nātou tali ʼi te telefoni​—kae ʼe tali ia e te masini. Kapau ʼe feiā, pea koteā ʼaē ʼe koutou lava fai? Koutou teuteuʼi lelei he tali neʼe koutou tohi ki he moʼi pepa, ke feala hakotou lau ʼi te telefoni. Koutou faiga liuliuga ke koutou lau ʼaki he leʼo fiafia, pea mo fakaʼaogaʼi he ʼu kupu ʼe mahino gafua. Koteā te ʼu palalau ʼaē ʼe koutou lava fai?

ʼE feala hakotou fakaafe ki he fono ʼi te Fale ʼo te Puleʼaga. ʼE feala ke koutou ʼui fēnei: “Fakalelei age he neʼe mole ʼau maʼu atu koe. Kapau ʼe ke fia logo ki he akonaki faka Tohi-Tapu [fakahā te kupu tāfito ʼo te akonaki], pea ke haʼu ki te Fale ʼo te Puleʼaga ʼa te kau Fakamoʼoni ʼa Sehova. ʼE fakaafe kiai te hahaʼi pea ʼe mole fai he tae falā.” Koutou fakahā lelei age te ʼaho pea mo te hola ʼo te fono, pea mo koutou fakamahino age peʼe tuʼu ʼifea te Fale ʼo te Puleʼaga.

Koutou vakavakaʼi ia nātou ʼaē ʼe foʼofoʼou mai ki te ʼu fono, ʼo koutou palalau mo nātou, pea mo fakatalitali lelei nātou. Koutou manatuʼi ʼo fakaafe ke fai hanatou ako Tohi-Tapu!