Ko Te ʼu Fai Palalau Fakakaumeʼa ʼe Feala Ke Lave Ki Te Loto
1 ʼE feala ke tou ʼui fēnei, ko he fai palalau ʼe ko he “fefoakiʼaki ʼo he ʼu manatu.” Ko te kamata ʼo he ʼu fai palalau fakakaumeʼa ki he puani ʼe ʼaoga ki niʼihi, ʼe feala ke uga ai tanatou fia logo pea ʼe feala ke tokoni kia tatou ke tou fakaaʼu te logo ʼo te Puleʼaga ki tonatou loto. Kua ʼiloʼi papau ʼe lelei age tatatou fai palalau fakakaumeʼa mo te hahaʼi pea ke tou fai palalau ʼi te tokalelei ka mole tou fai he ʼu palalau ohage ko hatatou fai akonaki.
2 E Feafeaʼi He Kamata ʼo He Fai Palalau Fakakaumeʼa: Ka tou fai palalau mo te hahaʼi, ʼe mole tonu ke tou fakahā kia nātou he ʼu tuʼuga manatu pea mo he ʼu tuʼuga vaega faka Tohi-Tapu. Ko tona faka ʼuhiga fakanounou, ʼe tou faka fealagia ki he tahi ke palalau mo tatou. Ohage la, mokā tou palalau fakakaumeʼa mo totatou vāhaʼa fale, ʼe mole tou fai fakamālohi kae ʼe tou fai ʼi te tokalelei. ʼE mole tou fakakaukauʼi anai pe koteā te ʼu palalau ʼaē ka tou fai, kae ʼe tou tali fakalelei ki te ʼu manatu ʼaē ʼe ina fakahā mai. Ko hatatou fakalogo fakamalotoloto ki te meʼa ʼaē ʼe ina fakamatala mai, ʼe feala ke ina fakaloto mālohiʼi ia ia ke hoko atu tana fai palalau mo tatou. ʼE tonu ke tou fai feiā mokā tou fai faka mafola ki te hahaʼi.
3 Ko te ʼu alatike ʼaē ʼe talanoa ki te fai fakapō, te ʼu fihifihia ʼo ʼuhiga mo te kau tūpulaga, te ʼu alatike ʼo ʼuhiga mo te ʼu meʼa ʼaē neʼe hoko ʼi te fenua, te ʼu tokakovi ʼaē ʼe hoko ʼi te malamanei, ʼo feiā aipe mo te ʼu fai palalau ʼo ʼuhiga mo te agaaga ʼo te temi, ʼe feala ke fakaʼaogaʼi moʼo kamata he ʼu palalau fakakaumeʼa. Ko te ʼu alatike ʼaē ʼe lave fakahagatonu ki te maʼuli ʼo te hahaʼi, ʼe lelei ʼaupito moʼo fakatupu ai hanatou fia logo. ʼI te kua kamata ʼo te fai palalau, ʼe feala ke tou fakahā kiai te logo ʼo te Puleʼaga.
4 Ko te fai ʼo he fai palalau ʼi te tokalelei ʼe mole faka ʼuhiga leva ʼe mole ʼaoga ke teuteuʼi fakatomuʼa te fai palalau. Kae, ʼe mole tonu ke tou fakatuʼutuʼu fakatomuʼa te ʼu palalau fuli ʼaē ka tou fai peʼe tou ako ke tou fakamaʼumaʼu loto he akonaki, heʼe mole faigafua anai te fai palalau pea mo tona fakapipiki ki te ʼu meʼa ʼaē ʼe ina fia ʼiloʼi. (Vakaʼi ia 1 Kolonito 9:20-23.) Ko te faʼahiga teuteu ʼaē ʼe lelei, ko tatatou fili he kupu tāfito e tahi peʼe lua ʼi te Tohi-Tapu, ʼo tou fakatuʼutuʼu ke tou fakatafito kiai te ʼu fai palalau ʼaia. ʼO ʼuhiga mo te faʼahi ʼaia, ʼe tokoni lelei anai kia tatou te ʼu kupu tāfito ʼo te tohi Comment raisonner.
5 Te ʼu Kalitate ʼAē ʼe ʼAoga Moʼo Fai ʼo He Fai Palalau Fakakaumeʼa: Ka tou palalau mo te hahaʼi, ʼe tonu ke tou fakafiafia pea mo tou fai fakamalotoloto. ʼE hā te ʼu kalitate ʼaia mokā tou malimali pea mo fiafia. ʼE tou maʼu te logo ʼaē ʼe lelei age ʼi te ʼu logo ʼo te mālama; pea ʼe leleiʼia tāfito e te hahaʼi ʼaē ʼe lotolelei. Kapau ʼe nātou logoʼi ʼi tonatou loto ko tatatou tokaga kia nātou ʼe fai ʼaki he fakamalotoloto ke feala ai hanatou ʼiloʼi te logo lelei, ʼe mahino ia ʼe nātou fia fakalogo anai.—2 Ko. 2:17.
6 ʼE tonu ke tou fiafia mokā tou fakatupu he fai palalau. Koia, ʼe tonu ke tou agalelei mo tou palalau fakapotopoto mokā tou fakahā te logo ʼo te Puleʼaga. (Kal. 5:22; Kol. 4:6) Tou faiga ke tou mavete lelei mo ia ʼaē neʼe palalau mo tatou, ke ʼaua naʼa laukoviʼi tatou. ʼI te faʼahi ʼaia, tatau aipe peʼe mole lave ki tona loto tatatou ʼuluaki fai palalau, kae ʼe lagi feala anai ke lahi age hana fia logo ki he ʼaʼahi ʼa he tahi Fakamoʼoni.
7 Ko te kamata ʼo he fai palalau fakakaumeʼa ʼe mole ko te ikuʼaga ʼaia ʼo he akonaki faigataʼa. ʼE tou fakatupu he fai palalau ʼaki te meʼa ʼaē ʼe fia ʼiloʼi ʼe ia ʼaē ʼe tou fai faka mafola ki ai. ʼI te hili ʼo tatatou teuteuʼi fakatomuʼa te faʼahi ʼaia, kua tou tokalelei leva ke tou fai he ʼu palalau fakakaumeʼa mo te hahaʼi. Tou faiga ke lave ki te loto ʼo te hahaʼi ʼaē ʼe tou fai faka mafola ki ai, te logo lelei ʼaē ʼe tou maʼu, mo te ʼu tapuakina heʼegata ʼaē ka foaki mai anai e te Puleʼaga.—2 Pe. 3:13.