Te Tali Ki ʼAkotou ʼu Fehuʼi
◼ Koteā te meʼa ʼaē ʼe tonu ke tou manatuʼi mokā tou faitohi ki te hahaʼi ʼaē ʼe mole feala tatatou maʼu atu ki tonatou ʼapi?
ʼE lahi te ʼu tupuʼaga, ʼe tou fakatokagaʼi ai kua ʼāsili faigataʼa te fai palalau mo te hahaʼi mokā tou ʼaʼahi ia nātou ki tonatou ʼu ʼapi. Ko ʼihi ʼu kaugā fai faka mafola neʼe nātou fakatokagaʼi te faitohi ʼe ko he faʼahi ʼe lelei moʼo faka mafola kia nātou ʼaia. Logope la ko te faʼahiga fai ʼaia ʼe feala ke maʼu ai he ʼu fua lelei, ʼe tonu ke tou vakaʼi te ʼu fakamanatu ʼe feala ke tokoni kia tatou ke tou tekeʼi te ʼu faigataʼaʼia:
Ke ʼaua naʼa tou fakaʼaogaʼi te tuʼasila ʼo te Sosiete. ʼE mole lelei anai te fai ʼo te faʼahi ʼaia, heʼe manatu anai ia ia ʼaē ʼe ina maʼu te tohi ʼe haʼu mai te Sosiete, ʼo tupu ai he ʼu fihifihia, pea ʼi ʼihi temi ʼe feala ke fua kovi te fai ʼo te faʼahi ʼaia.
Ke koutou vakaʼi fakalelei peʼe tonu te tohi ʼo te tuʼasila pea mo feʼauga te sitapa ki te potu ʼaē ka fakamomoli kiai te tohi.
Ke ʼaua naʼa koutou fai he ʼu tohi ʼo tohi fēnei “Kia ia ʼaē ʼo te loto fale”; ʼo koutou tohi ai tona higoa.
Ke ʼaua naʼa koutou tuku te ʼu tohi ʼi te matapā mokā ʼe mole ʼi ai he tahi ʼi te ʼapi.
ʼE lelei age ke fai he ʼu tohi nounou. ʼE feala ke ai ʼi loto he kiʼi pepa lotu peʼe ko he nusipepa kae mole fai he tohi loaloaga.
Ko te ʼu tohi ʼaē ʼe tā masini ʼe faigafua age tona lau pea ʼe tupu ai he fia lau e ia ʼaē ʼe fai kiai te tohi ʼaia.
ʼE mole feala ke koutou ʼui ko te ʼu tohi ʼaia ʼe ko he ʼu ʼaʼahi, gata pe mo kapau neʼe kua koutou palalau totonu mo ia ʼaē ʼo te ʼapi ʼi muʼa atu.
Kapau ʼe koutou faitohi ki he tahi neʼe fia logo ki te moʼoni ki muʼa atu, pea ʼe tonu anai ke koutou tohi tokotou tuʼasila peʼe ko tokotou numelo telefoni ke feala ai hana felogoi mo koutou. Koutou fakamahino age ki ai tatatou polokalama ako Tohi-Tapu.
ʼE feala ke koutou fakaafe ia ia ki te ʼu fono ʼo te kokelekasio. Fakahā ki ai te tuʼasila ʼo te fale fono pea mo te ʼu hola ʼaē ʼe fai ai te fono.
Ke ʼaua naʼa koutou toe faitohi kia nātou ʼaē neʼe mole koutou maʼu atu ʼi tonatou ʼapi, mokā koutou toe fakaliliu te telituale; ko te kaugā fai faka mafola ʼaē ʼe ina fai te telituale ʼe tonu ke ina gāueʼi te ʼu hahaʼi ʼaia.