‘Tou Laga Totatou Famili’
1 ʼE mahino ia, ʼi te malamanei katoa, kua tahi ʼalu te famili. Ko te mālama ʼaē ʼe puleʼi e Satana, ʼe ina leleiʼia te aga fakakākā pea mo te ʼu aga heʼeʼaoga. (1 Soa. 5:19) Koia, ʼe maʼuhiga ai kia tatou ke ‘tou laga totatou famili’ pea mo tou akoʼi te hahaʼi peʼe nātou lava laga feafeaʼi tonatou famili.—Taag. 24:3, 27.
2 Ko Te ʼu Pelesepeto Faka Tohi-Tapu ʼe Ko He Puipuiʼaga: Ko te maʼuliʼi ʼo te ʼu pelesepeto ʼo te Tohi-Tapu, ʼe ko te kalavi ʼaia ke fiafia moʼoni ai te maʼuli faka famili. ʼI te ʼu ʼaluʼaga fuli ʼo totatou maʼuli, ko te ʼu moʼoni ʼo te Tohi-Tapu ʼe mālohi pea ʼe ʼaoga ki te ʼu famili fuli. ʼE maʼuli fiafia he famili pea mo ina maʼu te tokalelei fakaʼatua mokā ina maʼuliʼi te ʼu moʼoni ʼaia.—Vakaʼi ia Isaia 32:17, 18.
3 Ko te ʼu pelesepeto ʼaē ʼe nātou faka fealagia ke tou laga totatou famili, ʼe fakamatalatala lelei ʼi te tohi foʼou Te Kalavi ʼo Te Manuʼia Faka Famili, ʼaē ka tou kamata akoʼi anai ʼi totatou ʼu ako tohi ʼi te māhina ʼo ʼApelili. ʼI te fakaʼosi ʼo te ʼu kapite fuli, ʼe ʼi ai te talanoa ʼe fakahā lelei ai te ʼu pelesepeto ʼaē ʼe tonu ke manatuʼi e te famili. ʼE ʼi ai ʼihi talanoa ʼe kamata ʼaki te fehuʼi: “ ʼE lava tokoni feafeaʼi te ʼu pelesepeto faka Tohi-Tapu ʼaenī . . . ?” ʼE nātou fakatokagaʼi mai te manatu ʼa te ʼAtua, ʼo nātou fakapipiki maʼu ki totatou loto tana manatu ʼo ʼuhiga mo te faʼahi ʼaia.—Isa. 48:17.
4 ʼE tonu ke tou ʼiloʼi lelei te tohi ʼaia. Tou ako ke tou maʼu te ʼu pelesepeto ʼaē ka ʼaoga anai kia tatou mokā hoko mai he ʼu faigataʼaʼia. ʼE talanoa te tohi ʼaia ki te ʼu faʼahi ohage la: ko te meʼa ʼaē ʼe tonu ke kita kumi ʼi he tahi ʼe tou fia ʼohoanaʼi (kapite 2), te tafitoʼaga ke tologa ai pea mo fiafia ai te nofo ʼohoana (kapite 3), te ʼu meʼa ʼaē ʼe lava fai e te ʼu mātuʼa ke liliu ai tanatou fānau ko he hahaʼi ʼe nātou fakahoko tonatou maʼua pea mo nātou manavasiʼi ki te ʼAtua (kapite 6), ʼe lava puipui feafeaʼi te famili mai te ʼu meʼa ʼaē ʼe kovi (kapite 8), te ʼu pelesepeto ʼaē ʼe feala ai ke maui mālie te ʼu loto fale ʼaē ʼe taupau tokotahi e te tāmai peʼe ko te faʼe (kapite 9), te tokoni fakalaumālie ki te ʼu famili ʼaē ʼe felāveʼi mo te fihifihia ʼaē ko te ʼinu kava pea mo te agamālohi (kapite 12), te meʼa ʼaē ʼe tonu ke kita fai mokā kita ʼamanaki mavete (kapite 13), te meʼa ʼaē ʼe feala ke tou fai moʼo fakaʼapaʼapa ki te ʼu mātuʼa ʼaē kua matutuʼa (kapite 15), pea ʼe lava maʼu feafeaʼi e totatou famili he ka haʼu heʼegata (kapite 16).
5 Tou Fakaʼaogaʼi Lahi Te Tohi Foʼou ʼAia: Kapau mole heʼeki koutou fai, pea he koʼe koa ʼe mole koutou teuteuʼi faka famili te tohi Te Manuʼia Faka Famili? Kapau ʼe felāveʼi totatou famili mo he tahi ʼu fihifihia peʼe hoko he ʼaluʼaga faigataʼa, pea tou toe vakaʼi te ʼu kapite ʼo te tohi ʼaē ʼe talanoa kiai, pea mo tou fakakaukauʼi ʼi te faikole tatatou faʼahiga maʼuliʼi te ʼu tokoni.
6 Ko te ʼu famili ʼaē ʼe nātou pipiki ki te ʼAtua, ʼe nātou mālolohi anai ʼi te faʼahi fakalaumālie pea mo logo tahi, pea ʼe nātou lava tauʼi anai te ʼu ʼohofi ʼa Satana. (1 Tim. 4:7, 8; 1 Pet. 5:8, 9) ʼE tou loto fakafetaʼi lahi ki te Tupuʼaga ʼo te famili ʼaē ʼe ina akoʼi tatou.