Te Tali Ki ʼAkotou ʼu Fehuʼi

◼ He koʼe koa ʼe tonu ke tou tokakaga fakalelei ki tatatou faʼahiga teu pea mo te faʼahiga gaohi ʼo totatou ʼulu, mokā tou ʼaʼahi te ʼu pilō ʼo te Sosiete ʼi Brooklyn, mo Patterson, pea mo Wallkill, ʼi New York, pea mo te ʼu filiale ʼo te malamanei?

ʼE fakamaʼua ki te kau Kilisitiano ke nātou taupau he aga fakaʼapaʼapa. ʼI te temi fuli pe, ʼe tonu ke hā ʼi tatatou faʼahiga teu pea mo te faʼahiga faʼu ʼo totatou lauʼulu te aga fakapoipoi pea mo te fakaʼapaʼapa ʼaē ʼe tāu mo te kau kaugana ʼa Sehova ʼAtua. ʼE moʼoni tāfito te faʼahi ʼaia ʼo ʼuhiga mo te ʼu ʼaʼahi ʼo te ʼu pilō ʼo te Sosiete ʼi New York pea mo te ʼu filiale ʼo te malamanei.

Lolotoga te taʼu 1998, ʼe fai anai te ʼu fakatahi faka tisitilike pea mo faka malamanei. Ko totatou ʼu tēhina ʼe lauʼi afe mai te ʼu fenua kehekehe, ʼe nātou ʼaʼahi anai te nofoʼaga tāfito ʼo te Sosiete ʼi New York pea mo te ʼu filiale ʼo te tahi ʼu fenua. ʼO mole gata pe ʼi te ʼu lakaga ʼaē ʼe tou ʼaʼahi ai te ʼu pilō ʼaia, kae ʼi te temi fuli pe, ʼe tonu ke tou ‘fakahā ai ko tatou ko te ʼu minisi ʼa te ʼAtua ia meʼa fuli,’ ʼo kau kiai mo tatatou teu pea mo te gaohi fakalelei ʼo totatou ʼulu.​—2 Ko. 6:​3, 4.

ʼI tana palalau ʼo ʼuhiga mo te maʼuhiga ʼaē ke tou teu pea mo gaohi fakalelei totatou ʼulu, ʼe talanoa te tohi Organisés pour bien remplir notre ministère ki te maʼua ʼaē ke tou maʼa, ke mole tokagaʼi tatatou faʼahiga teu, pea ke lelei tatatou gaohi ʼo totatou ʼulu, ʼi tatatou kau ki te fai faka mafola pea mo te ʼu fono faka Kilisitiano. Koia, ʼi te pasina 131, palakalafe 1, ʼe ʼui fēnei ai: “ ʼE toe feiā mokā tou ʼaʼahi te Petele, ʼi Brooklyn peʼe ko te tahi age fenua ʼe tuʼu ai he filiale ʼo te Sosiete. Koutou manatuʼi ko te faka ʼuhiga ʼo te kupu Petele ko te ‘ ʼApi ʼo te ʼAtua,’ koia ko totatou faʼahiga teu, mo te faʼahiga gaohi ʼo totatou ʼulu pea mo tatatou aga, ʼe tonu ke tatau mo te meʼa ʼaē ʼe fakamaʼua mai kia tatou mokā tou kau ki te ʼu fono ki te tauhi ʼaē ʼe fai ʼi te Fale ʼo te Puleʼaga.” ʼE tonu ke mulimuli ki te lekula māʼoluga ʼaia te ʼu kaugā fai faka mafola ʼo te fenua ʼaia pea mo nātou ʼaē ʼe ʼōmai mai mamaʼo moʼo fakasiosio pea mo fakatahi mo te famili ʼo te Petele pea mo ʼaʼahi te filiale.

ʼE tonu ke lave lelei tatatou faʼahiga teu ki te manatu ʼa te hahaʼi ʼo ʼuhiga mo te tauhi moʼoni ʼa Sehova. Kae neʼe fakatokagaʼi, ko ʼihi tēhina mo tuagaʼane ʼe mole nātou teu fakaʼapaʼapa mokā nātou ʼaʼahi te ʼu filiale ʼo te Sosiete. Ko te ʼu teu ʼaia ʼe mole faʼa lelei mokā tou ʼaʼahi he ʼu Petele. ʼI te faʼahi ʼaia, ʼo feiā mo te ʼu faʼahi fuli ʼo totatou maʼuli faka Kilisitiano, ʼe tou fia taupau te ʼu lekula ʼaē ʼe fakakeheʼi ai te hahaʼi ʼa te ʼAtua mai te mālama ʼi tatatou fai ia meʼa fuli ki te kolōlia ʼo te ʼAtua. (Loma 12:2; 1 Ko. 10:31) ʼE toe lelei foki ke tou palalau mo nātou ʼaē ʼe tou fai tanatou ako Tohi-Tapu pea mo ʼihi ʼaē ʼe lagi ko tanatou ʼuluaki ʼaʼahi ʼaia ʼo te Petele, pea mo fakamanatuʼi age kia nātou te maʼuhiga ʼaē ke nātou tokakaga ke lelei tanatou faʼahiga teu pea mo te gaohi ʼo tonatou ʼulu.

Koia, mokā koutou ʼaʼahi he ʼu filiale ʼo te Sosiete, koutou fai te ʼu fehuʼi ʼaenī: ‘ ʼE fakahā koa e taku faʼahiga teu pea mo te gaohi ʼo toku ʼulu te agavaivai?’ (Vakaʼi ia Mikea 6:8.) ‘ ʼE ina vikiʼi koa te ʼAtua ʼaē ʼe ʼau tauhi ki ai? ʼE tokagaʼi anai koa e ʼihi peʼe nātou faikeheʼia anai koa taku faʼahiga teu? ʼE ʼau tuku koa he faʼifaʼitaki lelei kia nātou ʼaē ko tanatou lagi ʼuluaki ʼaʼahi ʼaia?’ Tou fakaʼamu ke tou “fakamataleleiʼi [tuʼumaʼu] te akonaki ʼo tatatou Fakamaʼuli, te ʼAtua, ia meʼa fuli” ʼaki tatatou faʼahiga teu pea mo te gaohi ʼo totatou ʼulu.​—Tito 2:​10.