Te Tali Ki ʼAkotou ʼu Fehuʼi

◼ Ko te faʼahiga teu feafeaʼi ʼaē ʼe lelei mokā tou ʼolo ʼo mamata ki te ʼu fale ʼaē ʼe fakaʼaogaʼi ki te tauhi ʼaē kiā Sehova?

ʼI te mālamanei kātoa, ko te ʼu Fale ʼo Te Puleʼaga, te ʼu Fale Ki Te ʼu Fakatahi, te ʼu Petele, pea mo te ʼu filiale ʼe ko he ʼu koga meʼa maʼuhiga ʼe fakahoko ai te tauhi ʼaē kiā Sehova. ʼE ko he ʼu koga meʼa ʼe hā ai te agavaivai, te maʼa, pea mo teuteuʼi lelei, ʼo tou ʼiloʼi ai ia te maʼuhiga ʼo te fale. ʼE ʼasi lelei ai te kehekehe mo te meʼa ʼaē ʼe tou tau sio kiai ʼi te tuʼu ʼaenī ʼa Satana. Ko nātou ʼaē ʼe natou ʼaʼahi te ʼu fale ʼaē ʼe fakaʼaogaʼi ki te tauhi ʼaē kiā Sehova ʼe toe maʼua foki ke ʼiloga iā nātou ko he kau ʼatolasio ʼa Sehova, ʼe natou fakahoko tona finegalo.

ʼI totatou ʼuhiga Kilisitiano, “ ʼe [tou] fakahā ko [tātou] ko te ʼu minisi ʼo te ʼAtua” ʼi te ʼu faʼahi fuli pē, ʼo fēia ʼi tatatou faʼahiga teu pea mo te helu ʼo totatou lauʼulu. (2 Ko. 6:3, 4) ʼE toe maʼua foki ke lelei tatatou aga. ʼI te temi fuli pē ʼe tonu ke hā ʼi tatatou faʼahiga teu pea mo te helu ʼo totatou lauʼulu ia te aga fakapoipoi pea mo te aga fakaʼapaʼapa ʼaē ʼe tāu mo te ʼu kaugana ʼa Sehova ʼAtua. ʼE moʼoni te faʼahi ʼaia tāfito mokā tou ʼolo ʼo mamata te ʼu pilo lalahi fakamālamanei ʼaē ʼi New York pea mo te ʼu filiale ʼi te mālamanei.

ʼO ʼuhiga mo te maʼuhiga ʼaē ke fakaʼapaʼapa tatatou faʼahiga teu pea mo te helu ʼo totatou lauʼulu, ʼe talanoa ʼi te tohi Organisés pour faire la volonté de Jéhovah ʼo ʼuhiga mo te maʼuhiga ʼaē ke tou maʼa ʼi te faʼahi fakasino, ke hā te agavaivai ʼi tatatou faʼahiga teu, pea mo lelei te helu ʼo totatou lauʼulu mokā tou ʼolo ʼo fai fakamafola pea mo kau ki te ʼu fono. Pea ʼi te pāsina 138 palakalafe 13, ʼe ʼui fēnei ai: “Ke ʼaua naʼa galo kiā tātou ko te fakaʼuhiga ʼo te kupu Petele ʼe ko te ‘ ʼApi ʼo te ʼAtua.’ Koia ʼe tou fakaʼamu ai ʼo ʼuhiga mo te faʼahiga gaohi ʼo te ʼulu, te faʼahiga teu pea mo te faʼahiga aga ʼe tou muliʼi pē anai ia ki te ʼu lēkula ʼaē mokā tou kau ki te ʼu fono moʼo tauhi ʼi te Fale ʼo Te Puleʼaga.” Ko te lēkula maʼuhiga ʼaia ʼe tonu ke mulimuli kiai te kau fai fakamafola ʼo te Puleʼaga ʼi tanatou ʼolo ʼo mamata ia te Petele ʼo tonatou fenua ʼo fēia mo te ʼu Petele ʼi te tahi ʼu fenua atu. ʼI tana fai fēia, ʼe fakahā e ia ʼaē ʼe ʼalu ʼo mamata tona loto fakafetaʼi pea mo tana aga fakaʼapaʼapa.—Pes. 29:2.

ʼE tonu ke hā ʼi totatou ʼu teu tatatou “lau ʼe [tou] fakaʼapaʼapa ki te ʼAtua.” (1 Tim. 2:10) Kapau ko totatou teu pea mo te helu ʼo totatou lauʼulu ʼe lelei, pea ʼe toe malave lelei ki ʼihi atu ʼo ʼuhiga mo te tauhi moʼoni ʼaē kiā Sehova. Kae neʼe fakatokagaʼi kā ʼolo ʼihi tehina mo tuagaʼane ʼo mamata ki te ʼu fale ʼaē ʼe fakaʼaogaʼi ki te tauhi ʼaē kiā Sehova, pea ʼe mole natou teu fakaʼapaʼapa peʼe hā he ʼu koga ʼo tonatou sino. Ko te faʼahiga teu ʼaia ʼe mole tāu mo te kau Kilisitiano ʼi he ʼaluʼaga pē ia. ʼO ʼuhiga mo te faʼahi ʼaia, pea mo te ʼu faʼahi fuli pē ʼo totatou maʼuli Fakakilisitiano, ʼe tou fia taupau te lēkula maʼuhiga ʼaē ʼe fakakehekeheʼi ai te hahaʼi ʼa te ʼAtua pea mo te mālama, ʼo tou fai ia meʼa fuli pē ke fakakolōliaʼi ia te ʼAtua.—Loma 12:2; 1 Ko. 10:31.

Koia kā kotou ʼolo ʼo mamata ia te ʼu pilo lalahi pea mo te filiale ʼi New York peʼe ko te tahi age ʼu filiale, tatau aipē pē neʼe kotou fakatuʼutuʼu kiai peʼe ʼi takotou ʼolo ʼo haʼele ʼi he tahi age fenua, kotou fai kiā koutou ia te ʼu fehuʼi ʼaenī: ‘ ʼE hā koa ʼi taku faʼahiga teu pea mo te helu ʼo toku lauʼulu ia te agavaivai, te maʼa pea mo te aga fakaʼapaʼapa ʼaē ʼe tāu mo te fale ʼaē ʼe au ʼalu ʼo mamata? ʼE ʼiloga lelei ai koa ia te ʼAtua ʼaē ʼe au tauhi ki ai? ʼE sioʼi anai koa au peʼe ōfo anai koa ʼihi ʼi taku faʼahiga teu mo te helu ʼo toku lauʼulu?’ ʼAki tatatou faʼahiga teu pea mo te helu ʼo totatou lauʼulu, ʼofa pē ke tou “fakakolōliaʼi [tuʼumaʼu pē] ia te faiakonaki ʼo totatou Haofakiʼaga, te ʼAtua ia meʼa fuli pē”!—Tito 2:10.