ʼE Feʼauga Koa Takotou ʼu Nusipepa?
1 Neʼe mole heʼeki koutou ʼolo koa la ki te fono fai faka mafola pea mo koutou fakatokagaʼi ai neʼe mole hakotou ʼu nusipepa ʼi takotou kato? Koutou manatuʼi te pepa ʼaē neʼe ʼalutahi mo Te Minisitelio ʼo Te Puleʼaga ʼo Sepetepeli 1995 ʼaē neʼe ko tona kupu tāfito ʼaenī, “Tou Fakaʼaogaʼi Fakalelei Tatatou ʼu Nusipepa.” Neʼe ʼui fēnei ai kia tatou ke tou ‘fakatuʼutuʼu pe ko nusipepa ʼe fia ka tou fakaʼui,’ pea ina toe ʼui fēnei: “Koutou fakaʼui hakotou ʼu nusipepa ʼi te tēhina ʼaē ʼe gāue ʼi te ʼu nusipepa, ʼo fakatuʼutuʼu te lahi ʼo te ʼu nusipepa. ʼI te faʼahi ʼaia, ʼe koutou maʼu anai mo tokotou famili he ʼu nusipepa ʼe feʼauga.” Neʼe koutou fai koa te faʼahi ʼaia?
2 He koʼe koa ʼe mole koutou fakaʼui hakotou ʼu nusipepa? ʼE tuputupu anai takotou fia tufa te ʼu nusipepa ʼaia ʼi te vāhaʼa fuli, pea ʼe koutou ʼāsili fiafia anai ʼi takotou fai te faʼahi ʼaia. Kapau kua koutou ʼosi fakatuʼutuʼu pe ko nusipepa ʼe fia ʼaē ʼe koutou fakaʼui, pea koutou toe vakaʼi peʼe kei feʼauga takotou ʼu nusipepa ki te fai faka mafola ʼi te māhina katoa. ʼE mahino ia ʼe tou fia agatonu anai, ʼo tou toʼo ʼi te vāhaʼa fuli tatatou ʼu nusipepa heʼe ko hatatou maʼua ke tou fai te faʼahi ʼaia. Kapau ʼe tou mavae ʼi te kokelekasio ʼi he temi loaloaga, pea tou fakahā ki te tēhina ʼo te ʼu nusipepa ke ina foaki tatatou ʼu nusipepa ki he tahi ʼo aʼu ki tatatou toe liliu mai.
3 ʼI te alatike ʼaē neʼe tou talanoa kiai ʼi te kamata, neʼe toe ʼui ai ʼe tonu ke tou “fakatuʼutuʼu ʼo ʼuhiga mo te ʼaho ʼe tufa tuʼumaʼu ai te nusipepa.” ʼE feala koa ke koutou lagolago ki te ʼaho ʼaē neʼe fakatuʼutuʼu ʼi te vāhaʼa fuli ke tufa ai te ʼu nusipepa? Ohage ko tana fakahā ʼi te Kaletalio ʼo te kau Fakamoʼoni ʼa Sehova ʼo te taʼu 1999, ʼe fai ʼi te Moeaki fuli ʼo te taʼu! ʼAua naʼa koutou meʼa noaʼi te maʼuhiga ʼo te tufa ʼo Te Tule Leʼo pea mo te Réveillez-vous! Kapau ʼe tou faiga ke tou kau katoa ki te tufa ʼo te ʼu nusipepa, pea ʼe tou “ ʼave [anai ki te hahaʼi] te ʼu logo lelei ʼo he meʼa ʼe lelei age.”—Isa. 52:7.