Te Ako Pea Mo Takotou ʼu Fakatuʼutuʼu Fakalaumālie
1 Kapau ʼe lelei takotou ako te ʼu meʼa tāfito ʼi takotou kei tūpulaga, pea ʼe feala ke koutou maʼu ai te ʼu fealagia ʼaoga ke koutou poto ʼi te lautohi pea mo te faitohi, pea ke koutou mahino lelei ki te seokalafia, mo te hisitolia, mo te ʼu matematike, pea mo te ʼu meʼa fakapoto lalahi. ʼI takotou fai te faʼahi ʼaia, ʼe koutou ako ai anai peʼe feafeaʼi hakita fakakaukau fakalelei, mo sivi he ʼu faʼahiga ʼaluʼaga, pea mo fakatokatoka he ʼu fihifihia, pea mo maʼu he ʼu puleʼaki. Ko te taʼi ako ʼaia ʼe ʼaoga anai kia koutou ʼi takotou maʼuli katoa. Koteā te pikipikiga ʼo takotou ako pea mo takotou ʼu fakatuʼutuʼu fakalaumālie, pea ʼe lava tokoni feafeaʼi kia koutou ke koutou maʼu “te poto ʼaoga pea mo te fealagia ki te fakakaukau”?—Taag. 3:21, 22.
2 Koutou Kau ʼi Te Selevisi Ki Te ʼAtua: ʼI takotou nofo ʼi te faleako, koutou fakalogo fakalelei ʼi te kalasi pea koutou fai fakalelei te ʼu gāue ʼaē ʼe hinoʼi atu ke koutou fai ʼi fale. Kapau ʼe koutou māhani lelei ʼi te lautohi pea mo te ako ʼo te ʼu tohi, pea ʼe faigafua anai hakotou ako te Folafola ʼa te ʼAtua pea ʼe koutou mālohi anai ʼi te faʼahi fakalaumālie. (Gaue 17:11) Ko takotou mālama ki he ʼu faʼahi kehekehe ʼe tokoni anai kia koutou ʼi takotou fai faka mafola, ke koutou felogoi mo he ʼu hahaʼi ʼe kehekehe tonatou ʼaluʼaga, mo te ʼu meʼa ʼaē ʼe nātou fia palalau kiai, pea mo te ʼu meʼa ʼaē ʼe nātou tui kiai. Ko te ako ʼaē ʼe fai atu kia koutou ʼi te faleako ʼe ʼaoga anai kia koutou moʼo fakahoko takotou ʼu maʼua faka Kilisitiano ʼi te kautahi ʼa te ʼAtua.—Vakaʼi ia 2 Timoteo 2:21; 4:11.
3 Koutou Ako Ke Koutou Totogi Te ʼu Meʼa ʼAē ʼe ʼAoga Ki Tokotou Maʼuli: Kapau ʼe koutou ako fakalelei, pea ʼe feala anai ke koutou maʼu te poto ʼaē ʼe ʼaoga ke koutou maʼu he gāue ʼi takotou ʼosi maʼu pepa. (Vakaʼi ia 1 Timoteo 5:8.) Koutou filifili fakalelei te ʼu meʼa ʼaē ʼe koutou fia ako. ʼAua naʼa koutou fia fai ki he faʼahiga ako ʼe faka tuʼakoi te gāue ʼaē ʼe kita fai ʼaki, kae koutou fai he ako ʼe feala ai anai ke koutou maʼu ʼaki hakotou gāue lelei ʼi he faʼahi pe ʼe koutou nonofo ai. (Taag. 22:29) Ko te ʼu ako ʼaia ʼe ina faka fealagia anai kia koutou ke koutou totogi te ʼu meʼa ʼaē ʼe ʼaoga kia koutou, mo kapau ʼe koutou fakatuʼutuʼu ke koutou ʼolo ʼo gāue ʼi he telituale ʼe ʼaoga ai he kau fai faka mafola.—Vakaʼi ia Gaue 18:1-4.
4 Kapau ʼe lelei takotou ako, pea ʼe feala anai ke koutou fakalahi takotou minisitelio. Koutou gāue kinakina ke koutou maʼu te fealagia ʼaē ke koutou maʼu te ʼu meʼa ʼaē ʼe ʼaoga ki tokotou maʼuli, ʼo koutou haʼele ki muʼa ʼi te tauhi ʼaē kia Sehova. Kapau ʼe koutou fai te faʼahi ʼaia, pea ʼe tokoni atu anai takotou ako ke koutou fakahoko takotou ʼu fakatuʼutuʼu ʼi te faʼahi fakalaumālie.