Te Tali Ki ʼAkotou ʼu Fehuʼi

◼ Koteā te ʼu tuʼutāmaki ʼo te fakaʼaogaʼi ʼo te Itineti moʼo fai palalau mo he tahi ʼe mole tou ʼiloʼi?

ʼE lahi te ʼu faʼahi ʼi te Itineti neʼe fakatuʼutuʼu ke felāveʼi ai te hahaʼi pea mo natou fai palalau ai. ʼE toe feala foki ki te hahaʼi ke natou fakahā ai honatou ʼu pāki peʼe ko te tahi ʼu naunau ʼo ʼuhiga mo nātou. Ko te hahaʼi ʼaē ʼe natou sisio ki te ʼu pāki pea mo lau te ʼu naunau ʼaia, ʼe feala hanatou faka felōgoi mo ia. Ko te ʼu faʼahi ʼaia ʼi te Itineti ʼe leleiʼia ʼaupitō e te kau tūpulaga, pea ko ʼihi tūpulaga ʼo te kōkelekāsio neʼe natou fakaʼaogaʼi te ʼu faʼahi ʼaia moʼo felōgoi mo ʼihi ʼe natou ʼui ko he kau Fakamoʼoni ʼa Sehova.

ʼE faigafua ki he tahi neʼe tou feʼiloʼiʼaki mo ia ʼi te Itineti ke loi ʼo ʼuhiga mo ia, mo tona ʼaluʼaga fakalaumālie, peʼe ko te ʼu meʼa ʼaē ʼe fakatuʼutuʼu kiai. (Pes. 26:4) Ko he tahi ʼe ina ʼui ko he Fakamoʼoni ʼa Sehova, ʼi tona ʼuhiga moʼoni, ʼe lagi loi ia, peʼe lagi ko he tahi kua fakamavae, peʼe ko he ʼapositā. (Kal. 2:4) Neʼe tokagaʼi, tokolahi te hahaʼi ʼaē ʼe natou fia fai he ʼu felāveʼi fakasino mo te tamaliki liliki, ʼe natou fakaʼaogaʼi te ʼu faʼahi ʼaia ʼo te Itineti moʼo maʼu te tamaliki liliki.

Tatau aipē peʼe tou tui papau ko nātou ʼaē ʼe tou felōgoi mo nātou ʼe ko he ʼu hahaʼi lelei ʼi te kōkelekāsio, kae ʼe feala pē ki te ʼu taʼi fai palalau ʼaia ʼi te Itineti ke fua kovi. Koteʼuhi heʼe fakaʼaluʼalu, pea ʼe mole kei mātataku te hahaʼi ʼi te fai palalau mo he tahi ʼe mole natou feʼiloʼiʼaki. Pea maʼa natou ʼe ko te faʼahiga felōgoi ʼaia, ʼe ko nātou tokotahi pē mo ia pea mo natou manatu ko te ʼu meʼa ʼaē ʼe natou ʼui ʼe mole tonu ke ʼiloʼi e he tahi kehe, ohagē ko tanatou ʼu mātuʼa peʼe ko te ʼu tagata ʼāfea. Kae meʼa fakaʼofaʼofa, heʼe ko ʼihi tūpulaga ʼo te ʼu fāmili Kilisitiano, neʼe natou tō ki te ʼu hele ʼaia pea mo kau ki he ʼu fai palalau heʼeʼaoga. (Efe. 5:3, 4; Kol. 3:8) Ko ʼihi neʼe natou ʼai tonatou ʼu pāki heʼeʼaoga, peʼe ko he ʼu kiʼi higoa ʼe mole lelei, peʼe ko he ʼu kiʼi ʼata heʼeʼaoga ʼi tanatou olotinatea.

ʼAki te ʼu manatu ʼaē neʼe kua tou vakaʼi, ʼe tonu ki te ʼu mātuʼa ke natou leʼoleʼo lelei te ʼu meʼa ʼaē ʼe fai e tanatou fānau ʼi te olotinatea. (Taag. 29:15) ʼE fakatupu tuʼutāmaki mokā tou fakaafe ki totatou ʼapi he tahi ʼe mole tou ʼiloʼi peʼe tou fakagafua ki ai ke nofo tokotahi mo tatatou fānau. ʼO toe fēia, ʼe fakatupu tuʼutāmaki kiā tātou peʼe ki tatatou fānau mokā tou fakakaumeʼa mo ni ʼu hahaʼi ʼe mole tou ʼiloʼi ʼi te Itineti, tatau aipē peʼe natou ʼui atu ʼe ko he kau Fakamoʼoni ʼa Sehova.—Taag. 22:3.