Ke “Ahiahiʼi Natou”—ʼO Feafeaʼi?
1 ʼE tuputupu tuʼumaʼu te kautahi ʼa Sehova, koia ʼe ʼaoga tuʼumaʼu ai he ʼu tēhina ʼe tau mo feʼauga ke nātou tagata faifekau faka minisitelio. Ko te tokolahi ʼo te ʼu tēhina ʼaē ʼe mole heʼeki nātou maʼu te pilivilesio ʼaia, ʼo feiā mo te kau tūpulaga, ʼe nātou fia gāue ʼi te kokelekasio. Ka foaki age kia nātou he tahi ʼu gāue, pea ʼe nātou logoʼi tonatou ʼaoga pea ʼe nātou fiafia he neʼe nātou fakahoko he gāue. Ko tanatou haʼele ki muʼa ʼe fakalogo ki tonatou ‘ ʼahiʼahi.’ (1 Tim. 3:10) ʼE hoko feafeaʼi te faʼahi ʼaia?
2 Te Gāue ʼo Te Kau Tagata ʼĀfea: Moʼo sivi he tēhina ʼo mulimuli ki te ʼu tokoni faka Tohi-Tapu maʼa te kau tagata faifekau faka minisitelio, ʼaē ʼe tuʼu ia 1 Timoteo 3:8-13, ʼe ʼahiʼahiʼi anai e te kau tagata ʼāfea peʼe feala ki te tēhina ʼaia ke ina fakahoko te ʼu maʼua ʼaē ʼe tuku age ki ai. ʼE nātou lava tuku age te ʼu gāue ohage ko te gāue ʼi te ʼu nusipepa pea mo te ʼu tohi, te fai mikolo, te fakamaʼa ʼo te Fale ʼo te Puleʼaga, pea mo te tahi ʼu gāue. ʼE vakaʼi anai e te kau tagata ʼāfea peʼe feafeaʼi tana fai te ʼu gāue ʼaia. ʼE nātou tokagaʼi anai te ʼu kalitate ohage ko te falala, te mole tauhala, te gāue vave, te fia mālalo, te fia gāue, pea mo te felogoi lelei mo te kokelekasio. (Filp. 2:20) ʼE ina tuku koa he faʼifaʼitaki lelei ʼi tana ʼu teu pea mo te kosi ʼo tona ʼulu? ʼE ina fakahoko fakalelei koa tana ʼu maʼua? ʼE nātou fia sio “aki te taulekaleka o tona mauli ana u gaue i te agamalu o te poto.” (Skp. 3:13) ʼE faiga moʼoni koa ke tokoni ki te kokelekasio? ʼE mulimuli koa ki te fakatotonu ʼa Sesu ke kau mālohi ki te minisitelio moʼo “fai ni ʼu tisipulo?”—Mat. 28:19, MN; vakaʼi Te Tule Leʼo Fakafalani ʼo te ʼaho 1 ʼo Sepetepeli 1990, ʼi te pasina 18 ki te pasina 28.
3 ʼE mole ʼui mai e te Tohi-Tapu pe ko te taʼu fia ʼaē ʼe lava hinoʼi ai he tahi ke tagata faifekau faka minisitelio, kae ʼe ina ʼui ko te ʼu tēhina ʼaia ʼe ko he ʼu “tagata ʼe tauhi.” ʼE mole feala anai ke foaki te pilivilesio ʼaia ki he tēhina ʼe kei tamasiʼi, tāfito la heʼe ʼui e te Tohi-Tapu ʼe feala ki te tēhina ʼaia ke ʼi ai hona ʼohoana, pea mo hana fānau. (1 Tim. 3:12, 13, MN) Ko te ʼu tagata ʼaia ʼe mole tonu ke nātou manako ki “te u fiafiaʼaga fakatupulaga,” kae ʼe tonu ke nātou aga fakapotopoto, ke lelei tonatou matagafua, pea ke maʼa tonatou leʼo ʼo loto ia muʼa ʼo te ʼAtua pea mo te tagata.—2 Tim. 2:22.
4 Logola ʼe ʼaoga te ʼu fealagia ʼaē neʼe kita tupu mo ia, kae ko te meʼa ʼaē ʼe maʼuhiga moʼoni ʼe ko tokita aga pea mo tokita faʼifaʼitaki. Ko te tēhina ʼaia ʼe agavaivai koa, ʼo fia vikiviki ki te ʼAtua pea mo gāue maʼa tana ʼu tēhina? Kapau koia ʼaia, pea ʼe tapuakina anai tana ʼu faiga e Sehova ke haga tuputupu ʼi te kokelekasio.