Naʼi Tehina Tupulaga, ʼe Kotou Fakaʼamu Koa Ki He ʼu Pilivilesio?
1. Ko te temi fea ʼae ʼe tonu ai ke kamata muliʼi e te kau tehina tupulaga te ʼu palalau ʼae ʼe tuʼu ia 1 Timoteo 3:1?
1 “Kapau ʼe fakaʼamu he tahi ki he gāue . . . , ʼe fakaʼamu ia ki he gāue matalelei.” (1 Tim. 3:1, MN) ʼE fakalotomalohi ia te ʼu palalau ʼaeni ki te ʼu tehina ke natou fakaʼamu ki he ʼu pilivilesio ʼi te kokelekasio. ʼE tonu koa ke kotou talitali ke hoki kotou lalahi? ʼE lelei age ke kotou kamata faiga nei ʼi takotou kei tupulaga heʼe feala ai ke akoʼi koutou. Pea ʼi takotou lahilahi ake, ʼe kotou fakaha ʼe feala ke kotou liliu ko he faifekau fakaminisitelio. (1 Tim. 3:10) ʼE kotou fakaha feafeaʼi ʼe kotou fakaʼamu ki he ʼu pilivilesio mo kapau kua kotou papitema?
2. ʼE kotou lava fakatuputupu pea mo fakaha feafeaʼi ia te fia tokoni?
2 Te Fia Tokoni: Kotou manatuʼi ʼe kotou fakaʼamu ki he gaue ʼe lelei kaʼe mole ki he tuʼulaga. Koia, kotou fakatuputupu ia kotou te fia tokoni ki ʼokotou tehina mo tuagaʼane. Ko he puleʼaki ki te faʼahi ʼaia, ʼe ko te metitasioʼi te faʼifaʼitaki ʼa Sesu. (Mat. 20:28; Soa. 4:6, 7; 13:4, 5) Kotou kole kia Sehova ke tokoni atu ke kotou tokaga lelei ki ʼihi. (1 Ko. 10:24) ʼE feala anai koa ke kotou tokoni kia natou ʼae kua matutuʼa peʼe mahamahaki ʼi te kokelekasio? Ohage la, ʼe feala koa ke kotou ʼave natou ki te ʼu fono pea mo te faifakamafola? ʼE kotou kau koa ki te fakamaʼa ʼo te ʼoloto pea mo te Fale Fono peʼe ko ʼihi atu gaue ki te taupau ʼo te Fale Fono? ʼE kotou fia fetogi anai koa he tehina ʼe mole ina lava fai tana akonaki ʼi te Ako Fakateokalatike? ʼE kotou logoʼi anai te fiafia ʼi takotou gaue moʼo tokoni ki te kokelekasio ʼaki he loto katoa.—Gaue 20:35.
3. ʼE maʼuhiga feafeaʼi te fia tokoni, pea ʼe kotou lava fakatuputupu feafeaʼi te koga ʼaia?
3 Te Malohi Fakalaumalie: ʼE maʼuhiga age ki he tahi ʼe gaue ʼi te kokelekasio ke malohi ʼi te faʼahi fakalaumalie ʼi hana maʼu he ʼu fealagia peʼe ko he poto makehe. ʼE maʼu e te tagata ʼae ʼe manatu fakalaumalie ia te faʼahiga manatu ʼa Sehova pea mo Sesu. (1 Ko. 2:15, 16) ʼE ina maʼuliʼi “te fua o te laumalie.” (Kal. 5:22, 23) ʼE faʼafai ʼi te gaue faifakamafola pea mo ina fakamuʼamuʼa te ʼu gaue ʼo te Puleʼaga. (Mat. 6:33) ʼE kotou lava fakatuputupu te ʼu kalitate fakalaumalie ʼaki takotou polokalama ako takitokotahi. ʼE kau ki te polokalama ʼaia ia te lau ʼo te Tohi-Tapu ʼi te ʼaho fuli, mo te lau ʼo Te Tule Leʼo pea mo te Réveillez-vous !, pea mo takotou teuteuʼi te ʼu fono ʼo te kokelekasio ke kotou kau ai. (Pes. 1:1, 2; Hep. 10:24, 25) ʼI te temi ʼae neʼe fakalotomalohiʼi ai e Paulo ia te tupulaga ko Timoteo ke tuputupu ʼi te faʼahi fakalaumalie, neʼe ina tohi fenei: “Ke ke tokaga . . . [ki] tau faiakonaki.” (1 Tim. 4:15, 16) Koia kotou teuteuʼi fakamalotoloto ʼakotou akonaki ʼi te Ako Fakateokalatike. Kotou teuteuʼi te gaue faifakamafola pea mo kotou kau tuʼumaʼu ki ai. Kotou fakaʼamu pea mo kotou gaue ki he ʼu fakatuʼutuʼu fakalaumalie ohage ko te selevisi pionie, peʼe ko te gaue ʼi te Petele, peʼe ko te Ako Tohi-Tapu ʼo Te ʼu Tehina Selipatea. ʼE tokoni atu anai tokotou maʼuli fakalaumalie ke kotou “hola mai te u holi fakavale o te temi tupulaga.”—2 Tim. 2:22.
4. He ko ʼe ʼe maʼuhiga te falala pea mo te agatonu?
4 ʼE Tuha Mo Te Falala Pea ʼe Agatonu: ʼI te temi ʼo Sesu, neʼe hinoʼi te ʼu tehina fakapotopoto, neʼe tuha mo te falala pea mo agatonu, ke natou tufa te meʼa kai ki te kau Kilisitiano ʼae ʼe masisiva. Koia neʼe mole hoha te kau apositolo pe ʼe fakahoko lelei anai ia te gaue ʼaia. Pea neʼe feala ke tokaga lelei ia te kau apositolo ki ʼihi ʼu gaue maʼuhiga. (Gaue 6:1-4) Koia, ka foaki atu he gaue ʼi te kokelekasio, kotou fakahoko ʼaki tokotou loto katoa. Kotou faʼifaʼitakiʼi ia Noe, ʼae neʼe mulimuli fakalelei ki te ʼu fakatotonu neʼe foaki age moʼo faʼu ia te aleka. (Sen. 6:22) ʼE maʼuhiga te agatonu kia mata ʼo Sehova pea ʼe ha ai takotou fakapotopoto ʼi te faʼahi fakalaumalie.—1 Ko. 4:2; vakaʼi te fakamatala ʼae ʼe ʼatakai “Te ʼu Fua Lelei ʼo Te Ako.”
5. He ko ʼe ʼe ʼaoga ke fakaʼamu te ʼu tehina tupulaga ki he ʼu pilivilesio?
5 Ohage ko tona fakakikite, ʼe vave te tanaki e Sehova ia te hahaʼi. (Esa. 60:22) ʼE fakafuafua atu ko te toko 250 000 hahaʼi ʼe papitema ʼi te taʼu fuli. ʼI te kua hahaʼi ʼo natou ʼae ʼe ʼomai ki te moʼoni, ʼe ʼaoga ke ʼi ai he ʼu tehina fotufotuʼa ʼi te faʼahi fakalaumalie moʼo fakahoko te ʼu maʼua ʼo te kokelekasio. Kua lahi nei te ʼu gaue ʼi te kautahi ʼa Sehova. (1 Ko. 15:58) ʼU tehina tupulaga, ʼe kotou fakaʼamu koa ki he ʼu pilivilesio? Kapau koia, ʼe mahino papau ʼe kotou fakaʼamu ki he gaue ʼe lelei tukupau.
[Fakamatala ʼo te pasina 2]
ʼI te kua hahaʼi ʼo natou ʼae ʼe ʼomai ki te moʼoni, ʼe ʼaoga ke ʼi ai he ʼu tehina fotufotuʼa ʼi te faʼahi fakalaumalie moʼo fakahoko te ʼu maʼua ʼo te kokelekasio
[Talanoa ʼo te pasina 3]
Te ʼu Fua Lelei ʼo Te Ako
ʼE fua lelei ki te ʼu tehina tupulaga te ʼu gaue ʼae ʼe foaki age pea mo te ako ʼae ʼe fai age e te kau tagata ʼafeā. ʼI te hili ʼo te fono, neʼe heka te taupau ʼo te siliko ʼi te faiakonakiʼaga ʼo foaki tokoni ki he kauga fagona. Neʼe ina fakatokagaʼi te tuʼu ovi age ʼa te kiʼi tupulaga, pea neʼe ina fehuʼi age pe ʼe talitali kia ia ke nā faipalalau. Neʼe tali age e te tehina tupulaga ʼe tonu ke ina fakamaʼa te faiakonakiʼaga ʼi te ʼu hili fono. Neʼe kua teuteu mavae ʼi te fale fono ʼana matuʼā, kaʼe mole fia mavae ʼi muʼa ʼo te fakahoko tana gaue. Neʼe malave ki te tehina taupau te aluʼaga ʼaia. Neʼe ina ui fenei: “ ʼE lelei ke akoʼi tuʼumaʼu e te kau tagata ʼafeā ia te kau tehina tupulaga ʼo foaki age ni gaue ʼi te kokelekasio. Ko te tupuʼaga la ʼaia, moka ʼe au ʼaʼahi te kokelekasio, ʼe tautau fakaui e te kau tagata ʼafeā ke fakanofo he tehina tupulaga ko he faifekau fakaminisitelio.”