Tou Manatuʼi Te Hahaʼi Matutuʼa ʼAē ʼe Agatonu
1 Logola neʼe kua vitua pea mo finematuʼa, kae ko Ana ʼi tona taʼu 84 “neʼe mole puli ia ʼi he ʼaho ʼi te fale lotu.” ʼUhi ko tana agatonu ʼaia, neʼe foaki age e Sehova kia ia he tapuakina makehe. (Luka 2:36-38, MN ) Ia ʼaho nei, ʼe tokolahi te ʼu tēhina mo tuagaʼane ʼe nātou hage ko Ana logola te ʼu ʼaluʼaga faigataʼa ʼe hoko kia nātou. Ka tau te hahaʼi agatonu ʼaia mo he ʼu mahaki pe nātou gaʼegaʼe ʼuhi ko tanatou kua matutuʼa, pea ʼe feala ke nātou lotovaivai ʼi ʼihi temi. Tou vakaʼi he ʼu faʼahi ʼe feala ke tou fai moʼo fakaloto mālohiʼi nātou pea mo tokoni kia nātou ke nātou taupau he ʼu agamāhani fakalaumālie ʼe lelei.
2 Te ʼu Fono Pea Mo Te Minisitelio: Ko ʼihi, ʼaki he agaʼofa, ʼe nātou fakatuʼutuʼu ke nātou feʼāveʼaki te hahaʼi matutuʼa agatonu, pea ʼe faigafua ai kia nātou matutuʼa ʼaia ke nātou kau tuʼumaʼu ki te ʼu fono. Ko te faʼahi ʼaia, ʼe ina fakaloto mālohiʼi ʼi te faʼahi fakalaumālie te ʼu kaugana matutuʼa ʼaia kua fualoa tanatou nonofo agatonu, pea ʼe toe fua lelei ki te kokelekasio. ʼE koutou kau koa ia nātou ʼaē ʼe nātou fai te gāue lelei ʼaia?—Hep. 13:16.
3 Ko tatatou kau tuʼumaʼu ki te fai faka mafola, ʼe tou maʼu ai he fiafia pea mo he fīmālie moʼoni. Kae ʼe feala ke faigataʼa te faʼahi ʼaia maʼa he tahi kua matuʼa pea mo he tahi ʼe mahaki. ʼE feala koa ke koutou fai he fakatuʼutuʼu ke feala ki he tahi ia nātou ʼofaina ʼaia, ke “hoa gaue” mo koutou ʼi he faʼahi pe ʼo te gāue fai faka mafola? (Loma 16:3, 9, 21) ʼE lagi feala ke koutou fakaafe ia ia ke fai faka mafola mo koutou ʼaki te telefoni, peʼe ke koutou kaugā ʼolo ʼo fai he ʼaʼahi peʼe ko he ako Tohi-Tapu. Kapau ʼe tonu kia ia ʼaē kua matuʼa ke nofo maʼu ʼi tona ʼapi, pea ʼe feala koa ke ʼalu age ia ia ʼe ako ke fai tana ako ʼi tona loto fale?
4 Te Ako Pea Mo Te Fakatahitahi: ʼI ʼihi temi, ko ʼihi ʼe nātou fakaafe he tahi kua matuʼa peʼe mahaki ke kau ki tanatou ako faka famili, peʼe nātou fai te ako ʼi te loto fale ʼo ia ʼaia. Ko te faʼe neʼe ina ʼave tana ʼu toe e toko lua ki te ʼapi ʼo te tuagaʼane kua finematuʼa, ke nātou lau ai Te Tohi ʼo Te ʼu Hisitolia Faka Tohi-Tapu, pea neʼe nātou felotomālohiʼaki ʼi tanatou fakatahitahi ʼaia. ʼE toe leleiʼia e te hahaʼi ʼaia mokā fakaafe nātou ki he kai peʼe ke nātou fakatahitahi mo ʼihi atu. Kapau ʼe gaʼegaʼe fau nātou ʼaē ʼe mahaki ʼo mole feala ke koutou nonofo fualoa, pea ʼe lagi feala ke koutou telefoni age peʼe koutou ʼolo ʼo fai he ʼaʼahi nounou kia nātou, ke koutou lautohi maʼa nātou, faikole mo nātou, peʼe vaevae mo nātou he ʼu manatu fakaloto mālohi.—Loma 1:11, 12.
5 ʼE maʼuhiga ʼaupito kia Sehova te hahaʼi matutuʼa agatonu. (Hep. 6:10, 11) ʼE feala ke tou mulimuli ki tana faʼifaʼitaki ʼo tou fakahā kia nātou ʼe nātou maʼuhiga, pea mo tokoni kia nātou ke nātou taupau he ʼu agamāhani fakalaumālie lelei.