Te Fakatahi Faka Tisitilike ʼa Te Kau Fakamoʼoni ʼa Sehova 2003 “Koutou Faka Kolōlia Ki Te ʼAtua”
1 ʼAki tana polofeta agatonu ko Isaia, neʼe fakatotonu fēnei e Sehova: “Tokaga mai kia te ʼau, Ê toku hahaʼi, pea mo koe ʼaē ko toku puleʼaga, fakalogo mai.” (Isa. 51:4) ʼI te ʼu temi fakaʼosi ʼaenī ʼaē ʼe lahi ai te ʼu faigataʼaʼia, ʼe maʼuhiga ʼaupito koa ke tou fakalogo ki te ʼu fakatotonu ʼa Sehova? ʼI te ʼu faʼahi ʼaē ʼe tonu ai ke tou “fakalogo” kia Sehova, ʼe kau ai tatatou mulimuli ki tana fakatotonu ʼaē ke tou fakatahitahi moʼo tauhi. ʼE mahino ia ʼe tou fakaʼamu ki te lakaga makehe ʼaē ʼe fai ai tatatou ʼu fakatahi faka tisitilike ʼi te taʼu fuli! ʼI tatatou filiale ʼe fai anai te ʼuluaki fakatahi ʼi Vanuatu ʼi te ʼaho 22 ki te ʼaho 24 ʼo ʼAukusito, pea ʼi Niu Kaletonia ʼi te ʼaho 12 ki te ʼaho 14 ʼo Sepetepeli pea mo te ʼaho 19 ki te ʼaho 21, pea ʼi Uvea mo Futuna, ʼi te ʼaho 4 ki te ʼaho 5 ʼo ʼOketopeli.
2 Ohage ko tona fakahā ʼi Te Tule Leʼo ʼo te ʼaho 1 ʼo Sūlio 2002, ʼe fai anai mo te ʼu fakatahi faka malamanei ʼi te ʼu fenua neʼe filifili, ʼaki he ʼu telekē mai te ʼu potu kehekehe. ʼE mole lagi feala anai ke tou kau ki te ʼu fakatahi faka malamanei ʼaia. Kae ʼe tou logoʼi anai te ʼaluʼaga faka malamanei ʼo te ʼu fakatahi faka tisitilike fuli. Koteā ʼaē ʼe feala ke tou fai ke fua lelei katoa kia tatou te ʼu fakatuʼutuʼu ʼaē ʼe lolotoga fai nei ki tatatou ʼu fakatahi ka hoko mai?
3 Tou Kau ʼi Te ʼu ʼAho Fuli: Ke tou maʼu katoa te ʼu fua lelei ʼo te ako ʼaē ka foaki mai ʼaki te kalasi ʼo te tagata kaugana agatonu mo poto, ʼe tonu ke tou ʼiloʼi papau peʼe tou kau anai ki te polokalama katoa. (Mat. 24:45) ʼE tonu koa ke koutou kole ki takotou patolo hakotou ʼu ʼaho mālōlō ke koutou kau ʼi te ʼu ʼaho fuli ʼo te fakatahi? ʼI muʼa ʼo te kole ʼa Nehemia ki te Hau ko Artaxerxès te fakagafua ʼaē ke ʼalu ki Selusalemi ʼo toe laga te ʼu kaupā, neʼe “faikole ai ki te ʼAtua ʼo selo.” (Neh. 2:4) ʼO toe feiā mo koutou, ʼe tonu ke koutou faikole kia Sehova ke ina foaki atu te lototoʼa ke koutou kole ki takotou patolo hakotou ʼu ʼaho mālōlō ke koutou kau ki te ʼu ʼaho fuli e tolu ʼo te fakatahi. E feafeaʼi mo kapau ʼe mole faʼa loto e takotou patolo ke ina tuku atu hakotou ʼu ʼaho mālōlō? Lagi feala ke koutou fakamahino age ko te ako ʼaē ka koutou maʼu anai ʼi takotou fakatahi ʼe tokoni anai kia koutou ke koutou liliu ko he tagata gāue agatonu, mo faʼa gāue, pea mo tāu mo te falala, ʼo feala ai ke ina tali lelei. Tahi ʼaē meʼa, kapau ʼe mole kau ʼihi ʼo totatou famili ki te moʼoni, pea ʼe ko he agaʼofa anai mo kapau ʼe tou foimo fakahā fakatomuʼa kia nātou tatatou ʼu fakatuʼutuʼu ki te ʼu fakatahi.
4 Tou Tokoni Kia Nātou ʼe ʼAoga Tāfito Kia Nātou: ʼE ʼi ai koa ʼihi ʼi takotou kokelekasio ʼe lagi ʼaoga ke tou tokoni kia nātou ke nātou kau ki te fakatahi? Ko te ʼu meʼa ʼaē ʼe ʼaoga tāfito ki te hahaʼi matutuʼa, mo mahahaki, peʼe ko nātou ʼaē ʼe pionie katoa ʼe tonu ke tokaga tāfito kiai tanatou famili, kae ko te ʼu tagata ʼāfea pea mo ʼihi atu ʼaē ʼe nātou ʼiloʼi te ʼaluʼaga ʼo nātou ʼaia ʼe toe feala pe foki ke nātou tokoni kia nātou ʼaki te ʼofa.
5 Ko te Sikalaipe ʼo Te Kokelekasio ʼe ina vakaʼi anai te ʼu Kole Nofoʼaga fuli ʼaē neʼe ʼavage e te kau fai faka mafola. Kapau kua ʼosi tohi katoa te ʼu pepa ʼaia, pea ʼe sinie anai e te sikalaipe, pea mo ina momoli ki te komite ʼaē ʼe tokaga ki te nofoʼaga. Ko te ʼu fakatuʼutuʼu ʼaia neʼe fai pe maʼa te ʼu kaugā fai faka mafola ʼaē ʼe nātou tuku he faʼifaʼitaki lelei, pea mo tanatou ʼu fānau ʼaē ʼe lelei tanatou aga. Kapau ʼi te lisi ʼo te hahaʼi ʼaē ʼe tonu ke maʼu honatou nofoʼaga, ʼe ʼi ai he kaugā fai faka mafola, peʼe ko he tahi ʼi te famili ʼe mole lelei tana aga, pea ʼe tonu anai ke fai he ʼu tokoni ki ai, e he toko lua ʼo te komite ki te gāue, moʼo fakatonutonuʼi te fihifihia.
6 ʼE Sioʼi Tatou e Te Hahaʼi: ʼE sio koa te hahaʼi ki te kehekehe ʼa te kau Fakamoʼoni ʼa Sehova pea mo te hahaʼi ʼo te mālama ʼaenī? Ei! ʼE tau fai te ʼu fakavikiviki ʼo ʼuhiga mo te felagolagoʼaki pea mo te agalelei ʼa te kau fakamoʼoni ʼi te ʼu fakatahi faka tisitilike. Ko te ʼu fakavikiviki ʼaia ʼe tokoni mai kia tatou ke tou mahino ko te “poto mai oluga” ʼe ʼi ai tona fua lelei kia tatou takitokotahi. (Skp. 3:17) Mai tona ʼaluʼaga ʼaē ko tatou “ko he mataga ki . . . te malama-nei,” ʼofa pe ke hā ʼi tatatou aga ʼi te temi fuli te fakaʼapaʼapaʼia pea mo te kolōlia ʼo totatou ʼAtua, ko Sehova.—1 Ko. 4:9.
7 Mai tona ʼaluʼaga ʼaē “ko te ʼaluʼaga ʼo te mālama ʼaenī ʼe fetogi,” koia ʼe ʼaoga ai kia tatou te ʼu fakatahi faka tisitilike heʼe nātou tokoni mai ke tou tokaga ki te ʼu meʼa fakalaumālie. (1 Ko. 7:31) ʼE mahino ia ʼe tonu anai ke tou faiga lahi moʼo fai he ʼu fakatuʼutuʼu ke tou kau kiai ʼi te ʼaho fuli, kae ʼe tau mo feʼauga ke tou fai te faʼahi ʼaia. Ko te Fakatahi Faka Tisitilike ʼo te taʼu ʼaenī “Koutou Faka Kolōlia Ki Te ʼAtua” neʼe teuteuʼi moʼo tokoni kia tatou ke tou nonofo mālohi ʼi tatatou atalitali ki te ʼaho ʼaē ka hoko ai te fakamāu ʼa Sehova ki te mālama ʼa Satana. ʼOfa pe ke mole he meʼa ʼe ina tāʼofi tatou ke tou kau ki te ako ʼaē neʼe teuteuʼi e Sehova maʼa tatou.—Isa. 51:4, 5.
[Talanoa ʼo te pasina 3]
Te ʼu Hola ʼo Te Polokalama
Te Feliaono Pea Mo Te Moeaki ʼi te hola hiva vaelua uhu ki te hola nima afiafi
Te ʼAhotapu ʼi te hola hiva vaelua uhu ki te hola fā ʼosi nima hoʼatā