Te Fakatahi Faka Tisitilike 2005 ʼa Te Kau Fakamoʼoni ʼa Sehova “Te Fakalogo Ki Te ʼAtua”
1 ʼI tona ʼuhiga Tagata Faiako Lahi, ʼe fakatuʼutuʼu e Sehova ʼAtua maʼa tatou ke tou fakatahitahi ke akoʼi tatou ʼi tona ʼu ala. (Isa. 30:20, 21; 54:13) ʼE ina fai te faʼahi ʼaia ʼaki te kalasi ʼo te tagata kaugana agatonu pea mo poto, ʼaē ʼe ina fakatuʼutuʼu te ʼu fakatahi ʼaia ohage ko tatatou ʼu fakatahi faka tisitilike ʼaē ʼe fai ʼi te taʼu fuli. (Mat. 24:45-47) ʼE tou hage ko te tagata fai pesalemo ko Tavite ʼaē neʼe hiva fēnei: “ ʼI te lotolotoiga ʼo te hahaʼi ʼaē ʼe fakatahitahi ʼe au tapuakina te ʼAtua.” (Pes. 26:12) Neʼe mahino lelei kia Tavite te maʼuhiga ʼo tona akoʼi e Sehova pea neʼe loto papau ke nofo ʼi te lotolotoiga ʼo Tana hahaʼi ʼi te temi fuli pe ʼaē ʼe nātou fakatahitahi ai.
2 ʼE koutou nonofo anai koa ʼi te lotolotoiga ʼo ‘te hahaʼi ʼaē ka fakatahitahi’ ʼi te Fakatahi Faka Tisitilike ʼo te taʼu ʼaenī, ʼaē ko tona kupu tāfito “Te Fakalogo Ki Te ʼAtua”? Kapau ʼe koutou kau ai, pea ʼe lava tokoni atu anai te ʼu manatu ʼaenī ki takotou teuteu ʼaē ke koutou kau kiai.
3 Koutou Fakatuʼutuʼu ʼi Te Temi Nei Ke Koutou Kau ʼi Te ʼu ʼAho Fuli: ʼI tatatou filiale, ko te ʼuluaki fakatahi faka tisitilike ʼe fai anai ʼi Vanuatu ʼi te ʼaho 26 ki te 28 ʼo ʼAukusito, pea ʼi Niu-Kaletonia ʼe fai anai ʼi Sepetepeli ʼi te ʼaho 16 ki te 18 pea mo te ʼaho 23 ki te 25, pea ki muli age ʼi Uvea ʼi te ʼaho 1 mo te 2 ʼo ʼOketopeli. “Ko te ʼu fakatuʼutuʼu ʼa te tagata poto ʼe fua manuʼia moʼoni.” (Taag. 21:5) ʼE mole fakahā lelei koa e te vaega ʼaia te maʼuhiga ʼaē ke koutou foimo fai he ʼu fakatuʼutuʼu ke koutou kau ki te fakatahi ʼaia? Ke feala hakotou kau ʼi te ʼu ʼaho e tolu ʼo te polokalama fakafiafia ʼaia ʼi te faʼahi fakalaumālie, koutou agapoto ʼo koutou kamata fai ʼi te temi nei te ʼu fakatuʼutuʼu fuli ʼaē ʼe tonu ke koutou fai ke feala hakotou kau ki te ʼu ʼaho ʼaia e tolu. Kapau ʼe tonu ke koutou kole he ʼaho mālōlō ki takotou patolo, koutou kole neinei. Kapau ʼe tonu ke koutou palalau mo tokotou ʼohoana ʼaē ʼe mole ko he Fakamoʼoni ʼa Sehova ʼo ʼuhiga mo takotou ʼu fakatuʼutuʼu, ʼaua naʼa koutou fakatuatuai. Ko te ʼu faigataʼaʼia fuli ʼaē ʼe feala ke hoko kiā koutou, koutou palalau kiai ʼi takotou ʼu faikole kiā Sehova, ʼo koutou falala ʼaki tana tokoni, “ko [takotou] ʼu fakatuʼutuʼu ʼe tuʼu mālohi anai.” (Taag. 16:3) Tahi ʼaē meʼa, ʼe lelei anai mo kapau ʼe koutou tokoni ʼo teuteuʼi takotou kau ako Tohi-Tapu ke nātou kau ki te polokalama kātoa.
4 He ʼu Hahaʼi ʼe ʼAoga Ki Ai He Tokoni: Neʼe ʼui e te ʼapositolo ko Paulo ʼo ʼuhiga mo ʼihi tēhina neʼe ko “he tokoni ʼe fakaloto mālohi” kiā ia. (Kol. 4:7-11, MN ) Neʼe nātou tokoni kiā Paulo ʼo ʼuhiga mo te ʼu meʼa ʼaē neʼe ʼaoga kiā ia. Koteā ʼaē ʼe feala ke koutou fai ʼo ʼuhiga mo te fakatahi, ke feala hakotou liliu ko “he tokoni ʼe fakaloto mālohi” ki ʼihi hahaʼi? Ko te kau mātutuʼa, mo nātou ʼe māʼimoa, mo nātou ʼe gāue ʼi te minisitelio ʼi te temi fuli pe, pea mo ʼihi atu, ʼe lagi tonu ke feʼaveʼaki nātou pea mo kumi he ʼapi ke nātou ʼolo ʼo nonofo ai. Ko te maʼua tāfito ʼaia ʼa te famili. (1 Tim. 5:4) Kae kapau ʼe mole nātou lavaʼi ia te faʼahi ʼaia, pea ʼe feala ke tokoni ki ai te ʼu tēhina mo tuagaʼane. (Skp. 1:27) Ko te ʼu tēhina taupau ki te ʼu Ako Tohi ʼe tonu ke nātou vakaʼi ʼi tanatou Ako Tohi peʼe ko ai ʼaē ʼe tonu ke fai ki ai te tokoni ʼaia, ke fai fakatomuʼa he ʼu fakatuʼutuʼu ʼi muʼa ʼo te fakatahi.
5 ʼE ʼAoga He Kau Gāue: Neʼe tuku mai e Sesu te faʼifaʼitaki lelei ʼi tana tokaga ʼaki he agavaivai ki te ʼu meʼa ʼaē neʼe ʼaoga ki ʼihi. (Luka 9:12-17; Soa. 13:5, 14-16) Ko nātou ʼaē ʼe gāue ʼi te ʼu fakatahi ʼe nātou maʼu te manatu ʼa Sesu. Moʼo fakahoko te ʼu gāue ʼi te ʼu fakatahi, ʼe kole fakatomuʼa anai e te Komite ʼo Te Fakatahi he ʼu hahaʼi ke nātou kaugā gāue mo nātou. ʼE ʼaoga tāfito he ʼu tagata ʼāfea ki te ʼu gāue pea mo nātou tali ke nātou takitaki he ʼu gāue. Ko tanatou lotolelei ʼaia ʼe ko he faʼifaʼitaki lelei ki te kokelekasio kātoa.—1 Pet. 5:2, 3.
6 ʼAki te “tagata tauhi ʼapi agatonu,” neʼe fakatuʼutuʼu e Sehova ʼAtua ke fakatahitahi tana hahaʼi ke akoʼi nātou ʼi te faʼahi fakalaumālie ʼi te temi ʼaenī. (Luka 12:42, MN ) ʼE tonu anai ke tou faiga mālohi ʼo teuteuʼi ke tou kau ki te ʼu ʼaho ʼaia e tolu, pea ʼe fakapale anai tatatou ʼu faiga ʼaia. Ko te Fakatahi Faka Tisitilike ʼo te taʼu ʼaenī “Te Fakalogo Ki Te ʼAtua,” ʼe ina fakaloto mālohiʼi moʼoni anai tatatou fakatotonu ʼaē ke tou tauhi kiā Sehova ʼi te temi nei ʼo talu ai. ʼOfa pe ke tou lotomālohi ke tou mulimuli ki te fakatotonu ʼa te tagata fai pesalemo: “ ʼI te hahaʼi ʼaē ʼe fakatahitahi koutou tapuakina te ʼAtua.”—Pes. 68:26.
[Talanoa ʼo te pasina 4]
Te ʼu Hola ʼo Te Polokalama
Te Feliaono Pea Mo Te Moeaki
ʼi te hola hiva vaelua ʼuhu ki te hola nima ʼosi nima afiafi
Te ʼAhotapu
ʼi te hola hiva vaelua ʼuhu ki te hola fā ʼosi hogofulu hoʼatā