Ko Te Folafola ʼa Te ʼAtua ʼe Moʼoni
1. Koteā te ʼu faʼahi maʼuhiga ʼaē ʼe tuʼu ʼi te Tohi-Tapu?
1 Neʼe tohi fēnei e te tagata fai pesalemo: “Ko te fakatafito ʼo tau folafola, ʼe ko te moʼoni.” (Pes. 119:160) ʼAki tana Folafola ʼaē neʼe tohi ʼaki te laumālie maʼoniʼoni, ʼe tuku mai e Sehova te ʼu tali lelei ʼo ʼuhiga mo te ʼu fehuʼi maʼuhiga ʼaupito ʼo te maʼuli. ʼE ina foaki te fakaloto fīmālie pea mo te ʼamanaki ki te hahaʼi ʼaē ʼe tau mo he ʼu faigataʼaʼia. Pea ʼe ina fakahā mai kia tatou peʼe tou lava fakaōvi feafeaʼi kia te ia. ʼAki he loto fakafetaʼi, neʼe ʼui fēnei e te fafine: “Ko te ako ʼo te moʼoni ʼo te Tohi-Tapu, ʼe hage ko takita mavae mai he potu fakapōʼuli pea mo fakamataku, pea kita hū ki he kogafale ʼe mālama lelei pea mo kita logo lelei ai.” ʼE koutou fia vaevae koa ʼi te ʼu lakaga fuli, te moʼoni ʼaē ʼe haʼu mai te Folafola ʼa te ʼAtua?
2. ʼE fetogi feafeaʼi e te Tohi-Tapu ia te maʼuli ʼa te hahaʼi?
2 ʼE Ko He Mālohi Moʼo Fetogi, Pea ʼe Ina Taki Mai Te Hahaʼi Kehekehe: Ko te moʼoni ʼa te Tohi-Tapu, ʼe ina maʼu te mālohi moʼo malave ki te ʼu loto pea mo fetogi te ʼu maʼuli. (Hep. 4:12) Ko te fafine kei finemui, ʼe higoa ko Rosa, neʼe ko he fafine paomutu, pea neʼe ʼinu kava pea mo toloke. ʼE ina ʼui fēnei: “ ʼI te tahi ʼaho, neʼe kua ʼau fihifihia ʼaupito, pea neʼe ʼōmai te taumatuʼa Fakamoʼoni, ʼo fakahā mai ko te Tohi-Tapu ʼe ina lava fakatokatoka totatou ʼu fihifihia. Neʼe ʼau kamata ako ai te Folafola ʼa te ʼAtua, pea neʼe ʼau leleiʼia. ʼI te lolotoga ʼo te māhina ʼaia, neʼe ʼau maʼu ai te mālohi ke ʼau fakamaʼa pea mo fetogi toku maʼuli. ʼI te temi nei, ʼe ʼi ai taku fakatuʼutuʼu ʼi toku maʼuli, ʼe mole kei ʼaoga mai te lagolago ʼa te kava pea mo te toloke. Pea mai tona ʼuhiga ʼaē neʼe ʼau loto moʼoni ke ʼau kaumeʼa mo Sehova, neʼe ʼau faiga mālohi ai ke ʼau mulimuli ki tana ʼu lekula. Kanaʼauala te poto ʼaoga ʼaē ʼe maʼu ʼi te Folafola ʼa te ʼAtua, ʼe mahino ia kua lagi fualoa haku fakamate.”—Pes. 119:92.
3. He koʼe ʼe mole tonu ke tou faka tātāʼofi tatatou faka mafola te logo ʼa te Tohi-Tapu ki te hahaʼi?
3 Ko te Tohi-Tapu ʼe mole hage ko te ʼu tohi fuli ʼo te temi nei, koteʼuhi ʼe ina taki mai te hahaʼi ʼo ‘te ʼu fenua fuape, mo te ʼu telepi, mo te ʼu hahaʼi, pea mo te ʼu lea.’ (Apk. 7:9) Ko te finegalo ʼo te ʼAtua, “ke hāofaki te faʼahiga tagata fuli pe, pea ke nātou aʼu ki te ʼatamai mālama totonu ʼo te moʼoni.” (1 Tim. 2:4, MN ) Koia ʼe mole tonu ai ke tou manatu, ʼe mole tali anai e he tahi te logo lelei, ʼuhi ko tona faʼahiga maʼuli. Kailoa, kae ʼe tonu ke tou faka mafola te logo ʼo te Puleʼaga ki te hahaʼi fuli, ʼo tou fakaʼaogaʼi te ʼu fakamahino ʼaē ʼe haʼu tonu mai te Tohi-Tapu, mo kapau ʼe feala.
4. ʼE tou lava fakaʼaogaʼi feafeaʼi te Tohi-Tapu mokā tou fai fagonogono?
4 Koutou Fakaʼaogaʼi Tāfito Te Tohi-Tapu: ʼE lahi te ʼu faigamālie ke tou fakaʼaogaʼi ai te Tohi-Tapu ʼi te minisitelio. Ka koutou fakahā te ʼu nusipepa, koutou faigaʼi ke koutou lau age te vaega ʼaē ʼe tuʼu ʼi te faʼifaʼitaki moʼo tufa te ʼu nusipepa. Ka nātou tufa te tohi ʼo te māhina, ko ʼihi ʼe nātou sio ʼe lelei ke nātou kamata tanatou ʼu palalau, ʼo nātou lau age ki te hahaʼi he vaega neʼe nātou filifili lelei. Ka koutou fai he ʼu ʼaʼahi, koutou lau tuʼumaʼu age kia nātou he vaega e tahi peʼe ko he ʼu vaega Tohi-Tapu, moʼo tokoni ki te hahaʼi ʼaia ke nātou maʼu māmālie te ʼatamai mālama totonu. Ka koutou fai he ako Tohi-Tapu, koutou faka maʼuhigaʼi te ʼu vaega tāfito. ʼI te ʼu temi ʼaē ʼe mole koutou faka mafola ai ʼi te ʼu ʼapi, koutou ʼave mo koutou he Tohi-Tapu ke koutou fakaʼaogaʼi ʼi te ʼu lakaga ʼaē ʼe lelei ai moʼo fai te fagonogono faigamālie.—2 Tim. 2:15.
5. He koʼe ʼe tonu ke tou faiga mālohi ʼo fakaʼaogaʼi te Tohi-Tapu ʼi totatou minisitelio?
5 ʼOfa pe ke tou tokoni ki te hahaʼi, ke nātou ʼiloʼi te mālohi ʼo te moʼoni ʼa te Folafola ʼa te ʼAtua, ʼo tou fakaʼaogaʼi te Tohi-Tapu ʼi te ʼu lakaga fuli pe ʼi totatou minisitelio.—1 Tes. 2:13.