“Ko Te Folafola ʼa Te ʼAtua ʼe . . . Malohi”

1. He koʼe ʼe ke tui papau ko te Folafola ʼa te ʼAtua ʼe malohi? (Vakaʼi te ʼuluaki pāki.)

ʼE TUI papau te kau Fakamoʼoni ʼa Sehova, ko te folafola ʼa te ʼAtua, ia tana logo ʼae maʼa te hahaʼi, “ ʼe maʼuli pea mo malohi.” (Hepeleo 4:12) Neʼe tou sisio ki te malohi ʼo te gaue ʼa te Tohi-Tapu ʼi ʼotatou maʼuli pea mo te maʼuli ʼo ʼihi. Ko ʼihi ʼi muʼa ʼo tanatou liliu ko he kau Fakamoʼoni, neʼe natou kaihaʼa, mo fakaʼaogaʼi te toloke pea mo fai he ʼu aga heʼe ʼaoga. Pea ko ʼihi, neʼe maʼu falā mo logologona, kaʼe neʼe mole natou maʼuli fiafia. (Ekelesiasi 2:3-11) Ko te tokolahi ia natou ʼaia neʼe mole hanatou ʼamanaki, kaʼe ʼi te temi nei kua ʼi ai te ʼuhiga moʼoni ʼo ʼonatou maʼuli pea mo hanatou ʼamanaki. Pea ʼe mahino ia, ʼe tou fia lau te ʼu alatike ʼi Te Tule Leʼo “ ʼE Fetogi Te ʼu Maʼuli ʼUhi Ko Te Tohi-Tapu,” ʼae ʼe fakamatala ai te maʼuli ʼo he ʼu tehina mo tuagaʼane. Neʼe tou fakatokagaʼi ai foki, maʼia pe la kua natou ʼosi papitema, kaʼe neʼe tonu pe ke hoko atu ia tanatou fakamalohiʼi ʼanatou felogoʼi mo Sehova ʼaki te tokoni ʼa te Tohi-Tapu.

2. Neʼe ha feafeaʼi te malohi ʼo te Folafola ʼa te ʼAtua ʼi te ʼuluaki sekulo?

² ʼE mole tou punamaʼuli ki te ʼu toe fetogi ʼae ʼe fai e te tokolahi ʼi ʼonatou maʼuli ʼuhi ko tanatou ako ia te moʼoni. ʼI te ʼuluaki sekulo, neʼe toe fai pe la e natou ʼae neʼe natou maʼu te ʼamanaki ki te maʼuli ʼi selo ia he ʼu fetogi ʼi ʼonatou maʼuli. (Lau ia 1 Kolonito 6:9-11.) ʼI te ʼosi fakamahino e Paulo pe ko te faʼahiga hahaʼi feafeaʼi ʼae ʼe mole natou maʼu anai ia te Puleʼaga, neʼe ina ui fenei: “Neʼe feia ʼihi ia koutou.” Kaʼe neʼe tokoni te Folafola ʼa te ʼAtua pea mo tona laumalie maʼoniʼoni kia natou ʼaia. Pea tatau aipe pe neʼe kua natou liliu ko he kau Kilisitiano, kaʼe neʼe natou toe fai pe he ʼu agahala mamafa, ʼo fua kovi ai ki ʼanatou felogoʼi mo Sehova. Ohage la, ʼe talanoa ʼi te Tohi-Tapu ki te tehina fakanofo neʼe tonu ke fakamavae ʼi te kokelekasio. Kaʼe ki muli age, neʼe ina fai he ʼu fetogi ʼi tona maʼuli pea neʼe feala ke toe kau ki te kokelekasio. (1 Kolonito 5:1-5; 2 Kolonito 2:5-8) ʼE ko he fakalotomalohi hatatou sisio ki te ʼu fetogi ʼae neʼe feala ke fai e ʼotatou tehina mo tuagaʼane ʼaki te malohi ʼo te Folafola ʼa te ʼAtua.

3. Kotea ʼae ka tou vakaʼi anai ʼi te alatike ʼaeni?

³ Ko te Folafola ʼa te ʼAtua ʼe malohi ʼaupito pea neʼe foaki mai e Sehova maʼa tatou. Koia ʼe tou fia fakaʼaogaʼi lelei anai. (2 Timoteo 2:15) ʼI te alatike ʼaeni, ʼe tou vakaʼi anai pe ʼe feafeaʼi hatatou tuku te malohi ʼo te Tohi-Tapu ke gaue (1) ʼi ʼotatou maʼuli, (2) ʼi te faifakamafola, pea (3) moka tou fai he akonaki ʼi te kokelekasio. ʼE tokoni mai anai te ʼu faʼahi ʼaia ke tou fakaha totatou ʼofa mo totatou lotofakafetaʼi ki tatatou Tamai ʼi selo, ʼae ʼe ina akoʼi tatou ke fua lelei kia tatou.—Esaia 48:17

ʼI ʼOTATOU MAʼULI

4. (1) Kotea ʼae ʼe tonu ke tou fai ke malave ia te Folafola ʼa te ʼAtua kia tatou? (2) ʼE ke maʼu feafeaʼi te temi ʼae ke ke lau ai ia te Tohi-Tapu?

⁴ Ke malave ia te Folafola ʼa te ʼAtua kia tatou, ʼe tonu ke tou lau tuʼumaʼu. ʼE tonu ke tou faigaʼi ʼo lau ʼi te ʼaho fuli. (Sosue 1:8) ʼE moʼoni, tokolahi ia tatou ʼe tou maʼumaʼua. Kaʼe ʼe mole tonu ki ʼotatou maʼua peʼe ki he meʼa ke ina taʼofi tatatou lau ia te Tohi-Tapu. (Lau ia Efeso 5:15, 16.) ʼE lagi feala ke tou maʼu he temi ʼi te mafoata, peʼe ko te ʼaho, peʼe ko te poʼuli ke tou lau ai te Tohi-Tapu. Pea ʼe tou manatu tahi mo te tagata faipesalemo ʼae neʼe ina ui fenei: “E au ofa osi ki tau lao! E au metitasio ki ai i te aho katoa.”—Pesalemo 119:97.

5, 6. (1) He koʼe ʼe maʼuhiga ia te metitasio? (2) ʼE feafeaʼi hatatou metitasio ke fua lelei kia tatou? (3) Neʼe feafeaʼi te tokoni atu ʼa te Tohi-Tapu ʼi tau lau pea mo tau metitasio ki ai?

⁵ Kaʼe, ʼe mole feʼauga pe tatatou lau ia te Tohi-Tapu. ʼE toe ʼaoga foki ke tou metitasio ki ai, ʼo tou fakakaukauʼi te ʼu manatu ʼae ʼe tou lau. (Pesalemo 1:1-3) Kapau ʼe tou fai feia, ʼe hoki feala anai ke tou fakaʼaogaʼi ʼi ʼotatou maʼuli ia te poto ʼae ʼe tou maʼu ʼi te Tohi-Tapu. Tatau aipe pe ʼe tou lau te Folafola ʼa te ʼAtua ʼi te Tohi-Tapu peʼe ʼi he kiʼi masini, kaʼe tou tuku ke ina ʼekenaki tatou pea ke ina fetogi ʼotatou maʼuli.

⁶ ʼE feala ke fua lelei feafeaʼi ia tatatou metitasio? Ka tou lau ia te Tohi-Tapu, ʼe tonu muʼa ke tou ʼai he kiʼi tuʼu pea mo tou fai te ʼu fehuʼi ʼaeni: ‘Kotea ʼe au ako ʼo ʼuhiga mo Sehova ʼaki te manatu ʼaeni? ʼE au maʼuliʼi feafeaʼi te pelesepeto ʼaeni? Kotea te ʼu faʼahi ʼae ʼe kei tonu ke au fetogi ʼi toku maʼuli?’ Ka tou metitasio ki te Folafola ʼa te ʼAtua pea mo tou faikole ʼo ʼuhiga mo te ʼu manatu ʼae ʼe tou lau, ʼe tou fia maʼuliʼi anai te ʼu tokoni ʼaia. Pea ʼe feala ai anai ke tou logoʼi ia te malohi ʼo te Tohi-Tapu ʼi ʼotatou maʼuli.—2 Kolonito 10:4, 5.

ʼI TE FAIFAKAMAFOLA

7. ʼE feafeaʼi hatatou fakaʼaogaʼi lelei ia te Tohi-Tapu ʼi te faifakamafola?

⁷ Ka tou faifakamafola mo faiako, ʼe maʼuhiga ke tou fakaʼaogaʼi tuʼumaʼu ia te Folafola ʼa te ʼAtua. Neʼe ui fenei e te tehina: “Mo ka na pau la neʼe ke lolotoga faifakamafola ʼi te ʼu ʼapi mo Sehova, ʼe ke faipalalau tokotahi pe anai mo te hahaʼi peʼe ke tuku anai ke kau mo ia ki te faipalalau?” Ka tou lau te Tohi-Tapu ki he tahi, ʼe tou tuku ke palalau ia Sehova kia ia. Pea ko te vaega ʼae neʼe filifili lelei, ʼe malohi age ia ʼi te ʼu palalau fuli ʼae ʼe feala ke tou fai. (1 Tesalonika 2:13) Koia, ʼe lelei ke ke fai te fehuʼi ʼaeni: ‘Ka au faifakamafola, ʼe au kumi koa te ʼu faigamalie fuli ke au lau he vaega ki he tahi?’

8. He koʼe ʼe mole feʼauga pe tatatou lau ia te ʼu vaega moka tou faifakamafola?

⁸ Kaʼe ka tou felaveʼi mo te hahaʼi ʼi te faifakamafola, ʼe mole feʼauga pe tatatou lau age ia he vaega Tohi-Tapu. Koteʼuhi, tokolahi ʼe mole natou mahino ki te Tohi-Tapu. Neʼe feia pe la mo te hahaʼi ʼi te ʼuluaki sekulo. (Loma 10:2) Koia ka tou lau he vaega ki he tahi, ʼe mole tonu ke tou ui ʼe mahino ki te vaega. Kaʼe ʼe feala ke tou tokoni ki ai, ʼaki tatatou lau liuliuga te ʼu kupu tafito peʼe ko te ʼu manatu tafito ʼo te vaega. Pea tou fakamahino age leva tonatou fakaʼuhiga. ʼAki tatatou fai feia, ʼe feala ai ke malave te Folafola ʼa te ʼAtua ki te ʼu ʼatamai mo te ʼu loto ʼo te hahaʼi.—Lau ia Luka 24:32.

9. ʼE feafeaʼi hatatou tokoni ki he tahi ke fakaʼapaʼapa ki te Tohi-Tapu? Tuku mai he faʼifaʼitaki.

⁹ ʼE toe feala foki ke tou tokoni ki he tahi ke fakaʼapaʼapa ki te Tohi-Tapu, ʼaki ʼatatou ʼuluaki palalau. Ohage la, ʼe feala ke tou ui fenei age: “Tou vakaʼi muʼa pe kotea te manatu ʼa te Tupuʼaga ʼo ʼuhiga mo te faʼahi ʼaia.” Peʼe kapau ʼe tou faipalalau mo he tahi ʼe mole ko he Kilisitiano, ʼe feala ke tou ui fenei age: “Tou vakaʼi muʼa pe kotea ʼe ui mai ʼi te ʼu Tohi Taputapu.” Pea ki he tahi ʼe mole fia palalau ki te lotu, ʼe feala ke tou ui fenei age: “Neʼe kua ke logo la ki te ʼu palalau ʼafeā ʼaeni?” Kapau ʼe tou manatuʼi, ʼe kehekehe te agaaga ʼo te tagata takitokotahi, ʼe tou faiga anai ke tou fai he ʼu ʼuluaki palalau ʼe alu tahi mo te faʼahi ʼaia.—1 Kolonito 9:22, 23.

10. (1) Kotea te aluʼaga neʼe hoko ki te tehina? (2) Neʼe kua ke sio koa ki te malohi ʼo te Folafola ʼa te ʼAtua ʼi tau faifakamafola?

¹⁰ ʼE fakatokagaʼi e te tokolahi, ko te fakaʼaogaʼi ʼo te Tohi-Tapu ʼe feala ke malave ki te hahaʼi ʼi te faifakamafola. Ohage la, ko te tehina ʼe ina ʼaʼahi tuʼumaʼu ia te tagata kua matuʼa, ʼe ina lau ʼatatou nusipepa talu mai fualoa. ʼI te tahi ʼaho, neʼe mole ina foaki age pe ia Te Tule Leʼo foʼou, kaʼe neʼe ina fakatotonu ke ina lau age he vaega Tohi-Tapu. Neʼe ina lau ia 2 Kolonito 1:3, 4 ʼae ʼe ui fenei ai: “Te Tamai ʼo te ʼu manavaʼofa pea mo te ʼAtua ʼae ʼe ina fakafimalieʼi te hahaʼi ʼi te ʼu faʼahiga aluʼaga kehekehe, mo ina fakafimalieʼi tatou ʼi ʼotatou ʼahiʼahi.” Neʼe malave ʼaupito te ʼu palalau ʼaia ki te matuʼa, pea neʼe ina kole ki te tehina ke ina toe lau age te ʼu vaega ʼaia. Koia, neʼe ui age leva e te matuʼa ki te tehina, ʼe ʼaoga moʼoni ia he fakalotofimalie kia naua taumatuʼa. Pea neʼe ina fia iloʼi he tahi age ʼu manatu ʼo ʼuhiga mo te Tohi-Tapu. ʼO ha mai ai, ʼe malohi ia te Folafola ʼa te ʼAtua ʼi te faifakamafola.—Gaue 19:20.

MOKA ʼE TOU FAI HE AKONAKI ʼI TE KOKELEKASIO

11. Kotea ia te maʼua ʼe maʼu e te ʼu tehina ʼae ʼe faiakonaki?

¹¹ ʼE tou fiafia fuli moka ʼe tou kau ki te ʼu fono mo te ʼu fakatahi lalahi. Ko te tupuʼaga tafito ʼo tatatou kau ki ai, ke tou atolasio ai kia Sehova. Pea ko te ʼu ako ʼae tou maʼu ai ʼe fua lelei anai kia tatou. Koia la ʼae, ʼe maʼu e te ʼu tehina faiakonaki he pilivilesio lahi pea ko he maʼua ʼe tonu ke natou fakahoko lelei. (Sakopo 3:1) Pea ʼe tonu ke natou tokakaga ʼo fakatafito ʼanatou akonaki ki te Folafola ʼa te ʼAtua. Kapau ʼe ke maʼu ia te pilivilesio ʼaia, ʼe feafeaʼi anai hau fakaʼaogaʼi ia te malohi ʼo te Tohi-Tapu ke malave tau faiakonaki ki te nofoʼaki?

12. ʼE tokaga feafeaʼi anai he tehina ke fakatafito ia tana akonaki ki te Tohi-Tapu?

¹² ʼE tonu ke fakamaʼuhigaʼi ia te Tohi-Tapu ʼi te ʼu akonaki fuli. (Soane 7:16) Ka ke fai he akonaki, tokaga naʼa fia logo pe te nofoʼaki ki te ʼu faʼifaʼitaki pea mo te ʼu fakamatala ʼae ʼe ke fakaʼaogaʼi, kaʼe mole ko te Tohi-Tapu. Manatuʼi, ko tau lau pea mo tau akoʼi ia te Tohi-Tapu ʼe mole tatau. Kaʼe ka lahi fau te ʼu vaega ʼae ʼe ke lau, ʼe mole manatuʼi anai e te nofoʼaki ia te ʼu vaega fuli. Koia, filifili lelei te ʼu vaega ʼae ka ke fakaʼaogaʼi anai. Pea lolotoga tau akonaki, toʼo he temi ke ke lau ia te ʼu vaega, mo fakamahino, mo fakaʼaogaʼi he ʼu faʼifaʼitaki pea ke toʼo mai ai he ʼu ako. (Neemia 8:8) Kapau ʼe foaki atu hau pepa akonaki ʼe tuʼu ai te ʼu manatu tafito, ako fakalelei te akonaki ʼaia pea mo te ʼu vaega ʼae ʼe tuʼu ai. Faigaʼi ke ke mahino pe kotea te pikipikiga ʼo te ʼu manatu ʼi te akonaki pea mo te ʼu vaega. ʼOsi ʼaia, pea ʼe ke fakaʼaogaʼi anai he ʼu kiʼi vaega pe moʼo fakamahino ia te ʼu manatu ʼo tau akonaki. (ʼE ke maʼu anai he ʼu tokoni ʼaoga ʼi te ako 21 ki te ako 23 ʼo te tohi Tirez profit de l’École du ministère théocratique.) Kaʼe ko te faʼahi ʼae ʼe maʼuhiga, ke ke kole kia Sehova ke tokoni atu ke ke fakaha ia te ʼu manatu maʼuhiga ʼo tana Folafola.—Lau ia Esetalasi 7:10; Taaga Lea 3:13, 14.

13. (1) Neʼe malave feafeaʼi ki te tuagaʼane ia te vaega ʼae neʼe logo ki ai ʼi te fono? (2) Kotea te ʼu fua lelei ʼe ke maʼu mai te ʼu akonaki Fakatohi-tapu ʼi ʼatatou fono?

¹³ Tou vakaʼi te faʼifaʼitaki ʼo te tuagaʼane mai ʼOsitalalia. Neʼe maʼuli fakaʼofaʼofa ʼi tana kei veliveli. Ki muli age, neʼe ina iloʼi ia Sehova pea mo papitema, kaʼe ʼi tana manatu ʼe mole ʼofa Sehova ia ia. Pea neʼe ʼi ai leva te vaega neʼe malave ʼaupito kia ia ʼi he fono. Neʼe metitasio ki ai pea mo ina fai he ʼu fekumi. ʼI tana fai te ʼu fekumi, neʼe ina maʼu ʼihi atu vaega ʼi te Tohi-Tapu. Neʼe mahino ai leva ia te tuagaʼane, ʼe ʼofa Sehova ia ia.a (Vakaʼi te kiʼi nota.) Neʼe kua malave koa kia koe ia he vaega Tohi-Tapu neʼe fakaʼaogaʼi ʼi he fono peʼe ko he fakatahi lahi?—Neemia 8:12.

14. ʼE feafeaʼi hatatou fakaha ʼe tou ʼoʼofa ki te Folafola ʼa te ʼAtua?

¹⁴ ʼE mole koa la tou lotofakafetaʼi kia Sehova ʼuhi ko tana Folafola, ia te Tohi-Tapu? Neʼe ina fakapapauʼi mai ʼe tuʼu anai ia tana Folafola ʼo talu ai, pea neʼe ina fakahoko ia tana fakapapau ʼaia. (1 Petelo 1:24, 25) Koia ʼae ʼe tou fia lau tuʼumaʼu ai ia te Tohi-Tapu, mo tou mulimuli ki ai ʼi totatou maʼuli pea mo tou fakaʼaogaʼi moʼo tokoni ki ʼotatou tatau. Ka tou fai feia, ʼe tou fakaha ai ʼe tou ʼoʼofa mo leleiʼia moʼoni te koloa ʼaia. Pea ʼe tou fakaha tafito ʼe tou ʼoʼofa kia Sehova ʼAtua, ia te Haʼuʼaga ʼo te Tohi-Tapu.