Tou Fai Faka Mafola ʼi He Mālama ʼe Fetogi Tuʼumaʼu
1 ʼE feala ke fetogi vave te ʼu meʼa. ʼE feala ke hoko fakapunamaʼuli mai he tuʼutāmaki faka natula, peʼe ko he tuʼutāmaki ʼi te faʼahi ʼo te paʼaga, peʼe ko he fetogi ʼi te faʼahi faka politike, peʼe ko he fai fakapō ʼo liliu ai ko te meʼa tāfito ʼaē ʼe palalau kiai e te hahaʼi. Kae ohage pe ko te fetogi vave ʼaia, ʼe feala ke tokaga leva te hahaʼi ki he tahi meʼa. (Gaue 17:21; 1 Ko. 7:31) ʼI te mālama ʼaenī ʼaē ʼe fetogi tuʼumaʼu, koteā ʼaē ʼe feala ke tou fai ke tokaga mai te hahaʼi mokā tou fakahā age kia nātou te logo ʼo te Puleʼaga?
2 Tou ʼIloʼi Te ʼu Faʼahi ʼAē ʼe Tuʼania Kiai Te Hahaʼi: ʼE feala ke tokaga mai te hahaʼi mokā tou palalau age kia nātou ʼo ʼuhiga mo he ʼu meʼa neʼe hoko. ʼI tana fakaloto mālohi te hahaʼi ʼaē neʼe fakalogo ke nātou fakakaukauʼi lelei tonatou ʼaluʼaga ia muʼa ʼo te ʼAtua, neʼe talanoa Sesu ki te tuʼutāmaki neʼe hoko neʼe mole heʼeki faʼa fualoa pea neʼe nātou ʼiloʼi lelei. (Luka 13:1-5) ʼO toe feiā pe, mokā tou fakahā te logo lelei, ʼe lelei mo kapau ʼe tou talanoa ki he ʼu faʼahi neʼe hā ʼi te tala logo, pe neʼe hoko ʼi totatou fenua, pea ʼe malave ki te maʼuli ʼo te hahaʼi ʼo totatou telituale. Kae ka tou palalau ki te ʼu faʼahi ʼaia, ʼe tonu ke tou tokakaga ke ʼaua naʼa tou lagolago ki he faʼahi faka politike peʼe ko he ʼu ʼaluʼaga faka sosiale.—Soane 17:16.
3 ʼE tou lava ʼiloʼi feafeaʼi te meʼa ʼaē ʼe tuʼania moʼoni kiai te hahaʼi? Lagi feala pe ke tou fai he fehuʼi pea mo tou fakalogo lelei. (Mat. 12:34) Ko tatatou tokagaʼi te hahaʼi ʼe ina uga anai tatou ke tou tāʼofi tanatou manatu, pea ʼaki he fakaʼapaʼapa ke tou fai he tahi ʼu fehuʼi. Ko he palalau ʼe fai mai e he tahi ʼe lagi fakahā ai te faʼahi ʼaē ʼe tuʼania kiai te tokolahi ʼo te koga meʼa ʼaia, pea ʼe feala ke tou maʼu ai he faigamālie ke tou fai faka mafola.
4 Tou Teuteuʼi Tatatou ʼu Palalau: ʼI tatatou teuteuʼi tatatou fai faka mafola ʼi he mālama ʼe fetogi tuʼumaʼu, ʼe feala ke tou fakaʼaogaʼi te kaupepa Te ʼu Tokoni Ki Te ʼu Fai Palalau. Ko he ʼu tokoni peʼe feafeaʼi hatatou talanoa ki he ʼu meʼa neʼe hoko ʼi tatatou fai palalau mo te hahaʼi ʼe tuʼu ʼi te pasina 5, ʼi te kupu tāfito “Te Fakapō/Te Fīmālie,” pea mo te pasina 9 “Te ʼu Meʼa Neʼe Hoko.” ʼE feala ke tou toe maʼu he ʼu manatu feiā ʼi Te Minisitelio ʼo Te Puleʼaga ʼo Sepetepeli 2000, ʼi te pasina 4. Ka koutou teuteuʼi takotou ʼu palalau, koutou vakaʼi ke koutou fakahā mo he vaega ʼe ʼalutahi mo te faʼahi ʼaē ʼe koutou palalau kiai.
5 Ka tou tokagaʼi te ʼu tuʼania ʼa te hahaʼi ʼo totatou telituale, ʼaē ʼe fetogi tuʼumaʼu, ʼe tonu ke tou faka ʼalutahi tatatou fakahā te logo lelei mo te faʼahi ʼaia. ʼE tou palalau ai mo te hahaʼi ʼo ʼuhiga mo te ʼu faʼahi ʼaē ʼe malave moʼoni ki tonatou loto. ʼAki te fai ʼaia, ʼe tou tokoni anai ki te tokolahi ke nātou ʼiloʼi Ia ia ʼaē ʼe mole fetogi tona ʼu kalitate pea mo tona ʼu lekula.—Skp. 1:17.