Tou Talanoa Ki Te ʼu Meʼa ʼAē Neʼe Hoko Moʼo Uga Tanatou Fia Logo
1 ʼE koutou loto koa ke ʼi ai tuʼumaʼu hakotou ʼu manatu lelei ki takotou minisitelio, pea mo uga te hahaʼi ke nātou fia logo ki te Tohi-Tapu? Kapau koia, pea koutou fakaʼaogaʼi te ʼu meʼa ʼaē neʼe hoko ʼi te malamanei pea mo te ʼu meʼa ʼaē ʼe hoko ʼi tokotou telituale moʼo kamata ʼaki he ʼu fai palalau. ʼE feala ke koutou talanoa ki he ʼu meʼa neʼe hoko ʼi tokotou telituale peʼe ʼi te tahi ʼu fenua. ʼI te ʼaho fuli, ʼe fetogi te ʼu meʼa ʼaē ʼe hoko ki te hahaʼi. (1 Ko. 7:31) Koʼeni tona ʼu faʼifaʼitaki.
2 Ko te ʼu meʼa ʼaē ʼe tuʼania tāfito kiai te hahaʼi, ʼe ko te ʼu fihifihia faka ekonomika, pea mo te faigataʼa ʼo te maʼuli. Koia ʼe feala hakotou ʼui fēnei:
◼ “Neʼe ke fakalogo ki te tala logo, kua toe hiki te totogi [fakahā pe koteā]?” Peʼe feala hakotou talanoa ki te mole maʼu ʼo he gāue, mo kapau neʼe ʼi ai he ʼu hahaʼi neʼe fakamavae ʼi tanatou gāue. ʼE fakalogo kia koutou te fakahoko ʼo te fai palalau, ʼe feala hakotou hoko atu ʼaki te fehuʼi ʼaenī “Neʼe kua ke fakakaukauʼi koa la, pe koʼe ʼe faigataʼa te maʼuli?” peʼe “ ʼI tau manatu, ʼe faigataʼa tuʼumaʼu anai koa te maʼuli?”
3 Ko te ʼu logo ʼo ʼuhiga mo te agamālohi, ohage la ko te ʼu tuʼutāmaki ʼi te famili peʼe ʼi te tamaliki ako, ʼe ko he fakatafito ʼaia moʼo fai he fai palalau. ʼE feala hakotou fehuʼi fēnei:
◼ “Neʼe kua ke lau koa te sulunale [fakahā he meʼa neʼe hoko ʼi te fenua]?” Pea koutou fai te fehuʼi ʼaenī “ ʼI tau manatu, he koʼe ʼe fakaʼāsili te agamālohi ʼi te malamanei?” peʼe “ ʼI tau manatu ʼe ʼi ai anai koa he temi ʼe tou maʼuʼuli fīmālie ai?”
4 Moʼo uga te fia logo ʼa te hahaʼi, tou talanoa ki te ʼu lōmaki, te ʼu mafuike, peʼe ko te ʼu tau ʼaē ʼe hoko ʼi te ʼu potu kehekehe ʼo te malamanei. Ohage la, ʼe feala hakotou fehuʼi fēnei:
◼ “ ʼE tonu koa ke tukugakoviʼi te ʼAtua ʼo ʼuhiga [fakahā he tuʼutāmaki neʼe hoko]?” Peʼe feala hakotou fakahā age he tau neʼe hoki hoko, pea mo ʼui age: “ ʼE fia maʼuli tokalelei te hahaʼi, kae he koʼe koa ʼe faigataʼa te faʼahi ʼaia?”
5 Koutou sivisivi te ʼu meʼa ʼaē neʼe hoko, ke koutou fakaʼaogaʼi ʼi takotou ʼu ʼuluaki palalau. ʼE koutou maʼu te ʼu tokoni maʼuhiga ʼi te kiʼi tohi Te ʼu Tokoni Ki Te ʼu Fai Palalau Faka Tohi-Tapu ʼi te kupu ʼaenī “Te ʼu meʼa neʼe hoko” ʼi te ʼu pasina 9-10. Kae ʼaua naʼa koutou lagolago ki he ʼu alatike faka politike peʼe faka sosiale. Koutou faka maʼuhigaʼi te ʼu manatu ʼa te Tohi-Tapu pea mo te Puleʼaga ʼo te ʼAtua, ʼaē ʼe ko te puleʼaki pe ʼaia e tahi moʼo fakatokatoka te ʼu fihifihia ʼo te malamanei.